မာကု 4
4
ထာꩻခြွီရုဲင်သားဥပမာႏ
(မတဲ ၁၃:၁–၉။ လုကာ ၈:၄–၈)
1 # လု ၅း၁–၃။ ဗွေႏယေသျုနဝ်ꩻ စတဲင် သွဉ်သင်ဖေႏဖျင်ယင်း ကာလိလဲ ထီနောင်ထျꩻနဝ်ꩻသွူ။ လိုꩻစွိုꩻဖုံႏ စုဗူႏခူ ဝွေꩻဗွေႏနဝ်ꩻ အာငါႏနဝ်ꩻမꩻ၊ ဝွေꩻဗွေႏနွို့သော့ꩻ ဖြီတဆွိုင်ꩻကိုတဲင် အုံလင်ꩻသော့ꩻ ဖြီကိုနဝ်ꩻသွူ။ ဖြီနဝ်ꩻထန်ႏငါသော့ꩻ ထီကိုတဲင် လိုꩻစွိုꩻဖုံႏ အဝ်ႏအုံထွိုင်ႏ ထီ ဖင်ႏလောင်းဖုံႏနဝ်ꩻသွူ။ 2ဝွေꩻဗွေႏ ကသွဉ်သင် ဝွေꩻသီးနဝ်ꩻ၊ သွုံꩻနေး ငဝ်းဥပမာႏတွော့ꩻ သွဉ်ဖေႏဝွေꩻသီး အာငါႏနဝ်ꩻသွူ၊၊
3“နာႏသွော့။ တလဲင်ႏသား နဝ်ꩻကို လိုꩻတဖြာꩻ ထန်ႏလွေꩻတွော့ꩻ အီႏဝန်ႏရုဲင်ထာꩻခြွီနဝ်ꩻသွူ။ 4နုဲင်းဝွေꩻ ကဖြေ့ꩻ ထာꩻခြွီ ခြံကိုနဝ်ꩻ ထာꩻခြွီဖုံႏ ယင်ဟန်ႏနဝ်ꩻ ထဲ့လောင်းတဖူꩻတဲင် ဝါးဖုံႏ လွဉ်တွမ်အံႏထိုꩻဒျာႏသွူ။ 5ထာꩻခြွီယင်ဟန်ႏနဝ်ꩻ ထဲ့လူးဟံႏ ကအဝ်ႏလုံးလောင်း နဝ်ꩻတွော့ꩻ ဟံႏယာႏ တပေါႏအဝ်ႏအာတဝ်းသွူ။ အခြွီဖုံႏနဝ်ꩻ တဆင်ႏပေႏ အဒေါ့ꩻဖြော့ ထန်ႏလွဉ်၊ ကွပ်ပွိုး ဟံႏယာႏ တယော့တဝ်း အတွက်သွူ။ 6နဝ်ꩻထွူ မွူးထွိုင်ႏထန်ႏလွဉ်ချိန်ႏ၊ ယာခိုးလျဲမ်ႏထိုꩻ အမွူးပေႏဖုံႏတဲင် ကွပ်ပွိုး အရွီးဖုံႏ လင်ꩻယော့ တလꩻတဝ်းနဝ်ꩻမꩻ၊ အမွူးဖုံႏနဝ်ꩻ တညတဝ်း သဲင်ထိုꩻဒျာႏသွူ။ 7အခြွီယင်ဟန်ႏဖုံႏနဝ်ꩻ ထဲ့သော့ꩻဒျာႏ ထာꩻဆူႏပုန်ခါႏ ဒေါ့ꩻတန်လွဉ်တဲင် ထာꩻဆူႏမွူးဖုံႏ ယိပ်ꩻထိုꩻဒျာႏနဝ်ꩻမꩻ အမွူးဖုံႏနဝ်ꩻ အရာႏ တရာႏနွောင်ꩻတဝ်းဖုံႏသွူ။ 8ကွဲႏတွော့ꩻ အခြွီဖုံႏ ယင်ဟန်ႏနဝ်ꩻ ထဲ့သော့ꩻဒျာႏ ဟံႏဟဝ်ကိုနဝ်ꩻမꩻ အမွူးဖုံႏ ဒေါ့ꩻဖြော့လွဉ်၊ တန်လွဉ်တဲင် အရာႏဖုံႏ ရာႏစွဉ်ႏနဝ်ꩻသွူ။ ယင်ဟန်ႏနဝ်ꩻ ပွါꩻအာလွဉ် အပွန်းသွံဆီ၊ အလင်နဝ်ꩻ သူဆီတဲင် အလင်နဝ်ꩻတရျာꩻ” နုဲင်းနဝ်ꩻသွူ။
9နဝ်ꩻထွူ ဗွေႏယေသျု အွဉ်ႏသွတ်ꩻငဝ်း၊ “နဝ်ꩻမꩻ သီနားဖုံႏ မဉ်ႏအဝ်ႏနဝ်ꩻ နာႏလွဒျာႏ သွော့” နုဲင်းနဝ်ꩻသွူ။
ငဝ်းဥပမာႏဖုံႏအင်းရွယ်ႏချက်
(မတဲ ၁၃:၁၀–၁၇။ လုကာ ၈:၉–၁၀)
10ဗွေႏယေသျု ထွိုင်ႏအဝ်ႏ တဖြာꩻလွုမ်ꩻချိန်ႏ၊ လိုꩻကဟွိုန်ဗာႏဒါႏ ဝွေꩻဗွေႏငဝ်း သားယင်ဟန်ႏနဝ်ꩻ စွဉ်ႏတပဲ့တောႏ တဆီနီဖြာꩻနဝ်ꩻ လွဉ်ထေ့ ဝွေꩻဗွေႏထျꩻတဲင် ရီဝွေꩻဗွေႏဖေႏ ကသျင်ꩻနယ် ငဝ်းဥပမာႏ အဓိပ္ပါယ်ႏဖုံႏသွူ။ 11ဗွေႏယေသျုလဝ်းချာ၊ “ဗွေႏဘုရာꩻခမ်းထီ အယော့အဆုံးနဝ်ꩻ အဝ်ႏဖေႏလဲဉ်းသွူသီ။ ကွဲႏတွော့ꩻ လိုꩻလင်ဖုံႏ ကအဝ်ႏဒါႏ ကောင်းထန်ႏဖဲ့ꩻ သားဖုံႏသူꩻနဝ်ꩻ ဥပမာႏ နဝ်ꩻခရာႏဖုံႏ ကားကအဝ်ႏနဝ်ꩻ အဝ်ႏဟွိုန်ဗာႏဒျာႏ နဝ်ꩻသွူ။ 12#ဟေသျာ ၆:၉၊ ၁၀ (LXX)။ ကွပ်ပွိုး၊
‘ဝွေꩻသီးနဝ်ꩻ ထွားနဝ်ꩻ အဝ်ႏထွားဒျာႏ၊ ကွဲႏတွော့ꩻ၊
အတထီႏတဝ်း။
ဝွေꩻသီးနဝ်ꩻ ဟွိုန်နဝ်ꩻ အဝ်ႏဟွိုန်ဒျာႏ၊ ကွဲႏတွော့ꩻ
အတသေနာႏတဝ်းသွူ။
ဝွေꩻသီးမဉ်ႏထီႏ မဉ်ႏသေနာႏနဝ်ꩻ ဝွေꩻသီး အီႏခွယ်သဲင်ꩻထေ့ချာဒျာႏ ဗွေႏဘုရာꩻထျꩻတဲင်၊
ဝွေꩻဗွေႏ အီႏအွဉ်ႏစွꩻလွစ်ဖေႏဒျာႏ ဝွေꩻသီးအပဲစ်’” နုဲင်းနဝ်ꩻသွူ။
ဗွေႏယေသျုသျင်ꩻနယ်ဖေႏထာꩻခြွီရုဲင်သားဥပမာႏ
(မတဲ ၁၃:၁၈–၂၃။ လုကာ ၈:၁၁–၁၅)
13နဝ်ꩻထွူ ဗွေႏယေသျုရီ ဝွေꩻသီး၊ “သီလꩻသေနာႏတဝ်းဒွိုန်းက ငဝ်းဥပမာႏယို အဓိပ္ပါယ်ႏဟောင်း။ ပေါ့ꩻနုဲင်းနဝ်ꩻနဝ်ꩻ သီအီႏမာꩻနုဲင်းမုဲင်ꩻ သေနာႏနွောင်ꩻ ငဝ်းဥပမာႏ တစွိုးစွိုး နုဲင်းမုဲင်ꩻဟောင်း။ 14ထာꩻခြွီရုဲင်သားနဝ်ꩻ အဝ်ႏရုဲင် ဗွေႏဘုရာꩻအငဝ်း သတင်ꩻနဝ်ꩻသွူ။ 15လိုꩻယင်ဟန်ႏနဝ်ꩻ ဗွိုန်နုဲင်း ထာꩻခြွီဖုံႏ ကထဲ့လောင်းဒါႏ တဖူꩻနဝ်ꩻသွူ။ ဝွေꩻသီးဟွိုန် တရာꩻငဝ်းတဲင် တလဲင်ႏချင်ꩻ စာႏတန်ႏလွဉ်တွော့ꩻ တွမ်ထူႏညာꩻထိုꩻဒျာႏ တရာꩻငဝ်းသွူ။ 16လိုꩻအလင်ဖုံႏနဝ်ꩻ ဗွိုန်နုဲင်းဒျာႏ ထာꩻခြွီဖုံႏ ကထဲ့လူးဒါႏ ဟံႏလုံးတူႏလောင်းသွူ။ နုဲင်းဝွေꩻသီး ကဟွိုန်ဒါႏ တရာꩻငဝ်းနဝ်ꩻ ဝွေꩻသီးအဝ်ႏစွဉ်ႏ ထာꩻသꩻဟဝ်သꩻရေꩻ လက်ခံႏဆွုမ်ႏစွဉ်ႏ တရာꩻငဝ်းနဝ်ꩻသွူ။ 17ကွဲႏတွော့ꩻ တရာꩻနဝ်ꩻ နွို့ယော့သော့ꩻတဝ်း ဝွေꩻသီး အကိုတဲင် ဝွေꩻသီးနဝ်ꩻ တခံႏညတဝ်းနဝ်ꩻသွူ။ နဝ်ꩻမꩻ ကွပ်ပွိုး ထာꩻဒုက္ခစွဉ်ႏ ထာꩻနစ်စက် ထွိုင်ႏဖျော်လွဉ်ချိန်ႏ၊ တလဲင်ႏချင်ꩻ ဝွေꩻသီး စွဉ်ꩻကုဲင်ထိုꩻစွဉ်ႏ တရာꩻနဝ်ꩻသွူ။ 18လိုꩻလင်ဖုံႏနဝ်ꩻ ဗွိုန်နုဲင်းဒျာႏ ထာꩻခြွီဖုံႏ ကထဲ့သော့ꩻဒါႏ ထာꩻဆူႏပုန်ဖုံႏကိုနဝ်ꩻသွူ။ ပါꩻအဖြာꩻ စားယိုဖုံႏနဝ်ꩻ ဟွိုန်တရာꩻငဝ်း စွဉ်ႏတဲ့၊ 19အဝ်ႏနန်းခီဒျာႏ ဘဝယိုခရာႏ၊ မဉ်ခြွေချမ်ꩻသာႏ ငါႏထာꩻတွော့ꩻ ထာꩻနန်းခီအလင်ဖုံႏ အဝ်ႏအာငါႏတဲင် ယိပ်ꩻကုဲင်ထိုꩻဒျာႏ တရာꩻနဝ်ꩻမꩻ သီအရာႏ တရာႏနွောင်ꩻတဝ်းသွူ။ 20ကွဲႏတွော့ꩻ လိုꩻလင်ဖုံႏနဝ်ꩻ ဗွိုန်နုဲင်း အခြွီဖုံႏ ကထဲ့သော့ꩻဒါႏ ဟံႏဟဝ်ကိုနဝ်ꩻသွူ။ ဝွေꩻသီးဟွိုန် တရာꩻငဝ်းနဝ်ꩻ လက်ခံႏစွဉ်ႏ တရာꩻငဝ်းတဲင် အရာႏရာႏလွဉ်နဝ်ꩻသွူ။ ယင်ဟန်ႏနဝ်ꩻ အပွန်းသွံဆီ၊ ယင်ဟန်ႏနဝ်ꩻ သူဆီတဲင် ယင်ဟန်ႏနဝ်ꩻတရျာꩻ” နုဲင်းနဝ်ꩻသွူ။
မေႏတေန်ꩻတဖြုံႏကအွဉ်ႏတခြို့ꩻသေꩻခါဒါႏခြောင်းတဖြုံႏဆလ
(လုကာ ၈:၁၆–၁၈)
21 #
မ ၅:၁၅၊ လု ၁၁:၃၃။ ဗွေႏယေသျု ဒေါ့ꩻသွုပ်၊ “ပါꩻမုဲင်ꩻတဖြာꩻတဲ့ ထူႏမေႏတေန်ꩻ တဖြုံႏတွော့ꩻ မေႏတေန်ꩻနဝ်ꩻ အွဉ်ႏနေ ခြောင်းတဖြုံႏဆꩻလ မဉ်ႏတမွေးတဝ်း ခင်ႏလမ်းဗေင်ႏ ကူႏဆꩻလဟောင်း။ မေႏတေန်ꩻနဝ်ꩻ အွဉ်ႏဒျာႏ မေႏတေန်ꩻထွန်ႏလောင်း တမွေးတဝ်းဟောင်း။ 22#မ ၁၀:၂၆၊ လု ၁၂:၂။ ထာꩻဗဉ်ႏဗꩻ ခင်ႏလမ်းကို ဖေႏနေး ကပေါႏထင်ႏသျာꩻတွော့ꩻ ထာꩻကအဝ်ႏတခြို့ သေꩻခါꩻဒါႏနဝ်ꩻ အီႏဗွောင်လွဉ်နဝ်ꩻသွူ။ 23နဝ်ꩻထွူ သီနားဖုံႏ မဉ်ႏအဝ်ႏနဝ်ꩻ နာႏလွသွော့” နုဲင်းနဝ်ꩻသွူ။
24 #
မ ၇:၂၊ လု ၆:၃၈။ ဝွေꩻဗွေႏ ဒေါ့ꩻဖေႏပါက ဝွေꩻသီး၊ “နုဲင်းသီကဟွိုန်ဗာႏနဝ်ꩻ အွဉ်ႏသတိသွော့။ ဗွိုန်နုဲင်းနာꩻ ကသွုံꩻစွဲꩻတရာꩻ ကစီႏရင်ႏ လိုꩻလင်အတွိုင်ꩻ ဗွေႏဘုရာꩻ အီႏသွုံꩻအီစွဉ်ႏ တရာꩻနဝ်ꩻတဲင် အီႏစီႏရင်ႏနာꩻနဝ်ꩻသွူ။ ကွဲႏတွော့ꩻ လဲင်ꩻအီႏလွိုအာ ကယ်ꩻကနဝ်ꩻသွူ။ 25#မ ၁၃:၁၂၊ ၂၅:၂၉၊ လု ၁၉:၂၆။ လိုꩻကအဝ်ႏလဲဉ်း တစွိုးတမျိုꩻသားနဝ်ꩻ အီႏဖေႏအာထဲင်းတဲင် လိုꩻတမုဲင်ꩻမုဲင်ꩻ အဲဉ်ထဝ်းသားထျꩻနဝ်ꩻ ဝွေꩻသီးအဝ်ႏလဲဉ်း တစိꩻအကိုငါတဲ့ အီႏထူႏညာꩻ ထိုꩻထဲင်းဒွိုန်းက” နုဲင်းနဝ်ꩻသွူ။
ထာꩻခြွီကအဝ်ႏဒေါ့ꩻတန်လွဉ်ဒါႏဥပမာႏ
26ဗွေႏယေသျု သွုပ်ဒေါ့ꩻဖေႏထဲင်းယင်း၊ “ဗွေႏဘုရာꩻ ခမ်းထီနဝ်ꩻ ဗွိုန်နုဲင်းယိုသွူ။ ပါꩻခိုတဖြာꩻနဝ်ꩻ ဖြေ့ꩻထာꩻခြွီ ဝွေꩻအခြံကိုသွူ။ 27ဝွေꩻနဝ်ꩻ ထာꩻခေ့ꩻခိုႏ အဝ်ႏဗေင်ႏဒျာႏထာꩻတဲင် မွူးယာခိုႏနဝ်ꩻ အဝ်ႏထွိုင်ႏဒျာႏ၊ ထာꩻခြွီဖုံႏ ကားကအဝ်ႏနဝ်ꩻ အဝ်ႏဖြော့ထန်ႏ အဝ်ႏဒေါ့ꩻထန်ႏ တန်လွဉ်ဒျာႏနဝ်ꩻသွူ။ ကွဲႏတွော့ꩻ ဝွေꩻထာꩻခြွီနဝ်ꩻ အထွာလွဉ်ထာꩻ နုဲင်းမုဲင်ꩻနဝ်ꩻ ဝွေꩻတသေတဝ်းသွူ။ 28ဟံႏနဝ်ꩻ မာꩻဒေါ့ꩻတန်လွဉ် အမွူးဖုံႏတဲင် အွဉ်ႏရာႏအရာႏဖုံႏသွူ။ အရီးသွတ်ꩻနဝ်ꩻ အဗုတ်ꩻ ပေါႏထန်ႏလွဉ်ထွူ၊ အခြီႏဖုံႏ ထန်ႏလွဉ်တဲင် အဆုဲင်ꩻသွတ်ꩻ အခြီႏဖုံႏကိုနဝ်ꩻ အဝ်ႏဗွေစွဉ်ႏ ဗွူခူꩻဖုံႏနဝ်ꩻသွူ။ 29#ယောလ ၃:၁၃။ ဗွူဖုံႏ ထွိုင်ႏမဉ်လွဉ်ချိန်ႏနဝ်ꩻ ပွိုးတွော့ꩻ ရဲ့သိမ်ꩻချိန်ႏ တွိုႏလွဉ်လဲဉ်းအတွက် တွမ်ႏဝွေꩻစန် ရဲ့သိမ်ꩻစစွဉ်ႏသွူ။
ဟန်ႏလွူးခူꩻဥပမာႏ
(မတဲ ၁၃:၃၁–၃၂၊ ၃၄။ လုကာ ၁၃:၁၈–၁၉)
30ဗွေႏယေသျုရီ၊ “ဗွေႏဘုရာꩻ ခမ်းထီနဝ်ꩻ ဗွိုန်တမုဲင်ꩻနဝ်ꩻ နီအီႏရိုꩻဖေႏဗာႏ နုဲင်းမုဲင်ꩻဟောင်း။ ကအီႏသျင်ꩻနယ်ဖေႏနဝ်ꩻ နီအီႏသွုံꩻအီဗာႏ ငဝ်းဥပမာႏ နုဲင်းမုဲင်ꩻဟောင်း။ 31နဝ်ꩻနဝ်ꩻ ဗွိုန်နုဲင်းယိုသွူ။ ပါꩻတဖြာꩻနဝ်ꩻ ထူႏဟန်ႏလွူးခူꩻ ဟံႏတန်လောင်း ဟန်ႏလွူးခူꩻနဝ်ꩻ ထွာအပေႏလဲဥ်းဝင်ꩻတဲင် ဟန်ႏလွူးခူꩻနဝ်ꩻ ဆို့ꩻသော့ꩻဟံႏကိုသွူ။ 32ဆုဲင်ꩻတညတဝ်း ဟန်ႏလွူး တန်လွဉ်တဲင် အမွူးဖုံႏ ကားကအဝ်ႏနဝ်ꩻ ထွာလွဉ်စွဉ်ႏ အတန်သွတ်ꩻသွူ။ ဟန်ႏလွူးပင်ဖုံႏ ထွိုင်ႏထန်ႏလွဉ်နဝ်ꩻ ဝါးဖုံႏလွဉ်တဲင် မာꩻလꩻစွဉ်ႏအပွီ အပင်ဖုံႏလောင်း” နုဲင်းနဝ်ꩻသွူ။
33ဗွေႏယေသျု ကဟော်ꩻဖေႏဒါႏ လိုꩻဖုံႏ ဝွေꩻဗွေႏတရာꩻနဝ်ꩻ သွုံꩻနေး ငဝ်းဥပမာႏ ဗွိုန်နုဲင်းယိုနဝ်ꩻ အာငါႏသွူ။ ခွိုင်းကား ဝွေꩻသီး ကသေနာႏနွောင်ꩻ ဝွေꩻဗွေႏဒေါ့ꩻနယ်ဖေႏ ဝွေꩻသီးနဝ်ꩻသွူ။ 34တသွုံꩻနေးတဝ်း ငဝ်းဥပမာႏနဝ်ꩻ ဝွေꩻဗွေႏ တဒေါ့ꩻနယ်တဝ်း ဝွေꩻသီးနဝ်ꩻသွူ။ ကွဲႏတွော့ꩻ ဝွေꩻဗွေႏ အဝ်ႏတပါꩻလွုမ်ꩻ စွဉ်ႏဝွေꩻဗွေႏ အတပဲ့တောႏဖုံႏ ချိန်ႏမꩻ ဝွေꩻဗွေႏ သျင်ꩻနယ်ဖေႏလို့ ဝွေꩻသီး အဓိပ္ပါယ်ႏ ကားကအဝ်ႏနဝ်ꩻသွူ။
ဗွေႏယေသျုမာꩻယဉ်ဖေႏတလီꩻဝစ်ꩻသန်
(မတဲ ၈:၂၃–၂၇။ လုကာ ၈:၂၂–၂၅)
35အနီꩻနဝ်ꩻနေနေ မွူးထွိုင်ႏဟာလွဉ် ဗွေႏယေသျုဒေါ့ꩻဖေႏ ဝွေꩻဗွေႏ တပဲ့တောႏဖုံႏ၊ “နီအွဉ်ဝင်ꩻ ဖျတ်ကာႏလွေꩻတွမ် ထီနောင်ဖင်ႏ ခတဖဲ့ꩻသူꩻ” နုဲင်းနဝ်ꩻသွူ။ 36နဝ်ꩻမꩻ ဝွေꩻသီး အဝ်ႏလိုꩻစွိုꩻဖုံႏခြာနဝ်ꩻ ထန်ႏထိုꩻစွဉ်ႏသွူ။ ဝွေꩻဗွေႏ တပဲ့တောႏဖုံႏ နွို့သော့ꩻစွဉ်ႏ ဗွေႏယေသျု ကအဝ်ႏအုံလင်ꩻ သော့ꩻမꩻဒါႏ ဖြီကိုနဝ်ꩻတဲင် ဝွေꩻဗွေႏနဝ်ꩻ ဝွေꩻသီး ဟဲ့ꩻလွေꩻငီꩻစွဉ်ႏ ဝွေꩻသီးနဝ်ꩻသွူ။ ဖြီအလင်ဖုံႏတဲ့ အဝ်ႏနဝ်ꩻကို နေနေသွူ။ 37တလီꩻဝစ်ꩻ မာꩻသန်လွဉ်စွော့ꩻ ထာꩻတဲင် ထီလဲင်ꩻ ထွိုင်ႏလွဉ်စထာꩻနဝ်ꩻ ထီအီႏလုမ်ႏသော့ꩻထိုꩻစွဉ်ႏ ဖြီကို၊ နဝ်ꩻမꩻ ထီအီႏဗွေသော့ꩻ ထိုꩻစွဉ်ႏ ဖြီနဝ်ꩻသွူ။ 38ဗွေႏယေသျုနဝ်ꩻ အဝ်ႏသော့ꩻ ဖြီမော့ချာဖဲ့ꩻတဲင် ဝွေꩻဗွေႏကတူႏနဝ်ꩻ အွဉ်ႏခွုမ်းစွဉ်ႏ မွဉ်တဖြုံႏလောင်းတွော့ꩻ အဝ်ႏဗေင်ႏထာꩻနဝ်ꩻသွူ။ တပဲ့တောႏဖုံႏနဝ်ꩻ တမာထွိုင်ႏ ဝွေꩻဗွေႏတဲင်ဒေါ့ꩻ၊ “ဆရာႏ နီအီႏဗော့ꩻသီထိုꩻသွူ၊ နီဗွေႏ တထွားတဝ်းနီနဲ့ဟောင်း” နုဲင်းနဝ်ꩻသွူ။
39ဗွေႏယေသျု အုံထွိုင်ႏတဲင် မိန်းတလီꩻ၊ “ယဉ်ဟုဲင်း။ ဝွေꩻဗွေႏမိန်းဖေႏ ထီလဲင်ꩻ၊ “အုံထွိုင်ႏဟုဲင်း” နုဲင်းနဝ်ꩻတဲင် တလီꩻယဉ်ထိုꩻတွော့ꩻ နဝ်ꩻကိုနဝ်ꩻ ငိမ်ꩻချမ်ꩻသာႏယာႏ မွေးနေးစွဉ်ႏနဝ်ꩻသွူ။ 40နဝ်ꩻထွူ ဗွေႏယေသျု ဒေါ့ꩻဖေႏ ဝွေꩻဗွေႏ တပဲ့တောႏဖုံႏ၊ “ပွိုးတမုဲင်ꩻ သီငမ်းသꩻဗာႏတွိုႏ ထာꩻဟောင်း။ သီထာꩻယွုမ်း တလꩻအဝ်ႏတဝ်းဒွိုန်းကနဲ့ဟောင်း” နုဲင်းနဝ်ꩻသွူ။
41ကွဲႏတွော့ꩻ ဝွေꩻသီး အဝ်ႏငမ်းသꩻ တနွော့ꩻနေးတဲင် တဖြာꩻစွဉ်ႏတဖြာꩻ ဒေါ့ꩻစဖေႏလို့ဝင်ꩻ၊ ‘ပါꩻယိုနဝ်ꩻထွာ ပါꩻမုဲင်ꩻဟောင်း။ တလီꩻတွမ်ႏ ထီလဲင်ꩻဖုံႏနဝ်ꩻ လဲင်ꩻနာႏစွဉ်ႏဝွေꩻငဝ်း နုဲင်းမုဲင်ꩻ” နုဲင်းနဝ်ꩻသွူ။
ទើបបានជ្រើសរើសហើយ៖
မာကု 4: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.