လုကာ နိဒါန်း
နိဒါန်း
လုကာ ကတဲမ်းမတ်ခါꩻဒါႏ သတင်ꩻဟဝ်ကျမ်ꩻနဝ်ꩻ ဒင်ႏနယ်ဖေႏဒျာႏ ဗွေႏယေသျုနဝ်ꩻ အွဉ်ႏဂတိခါꩻ ထွာနုဲင်း ဣသရေး လိုꩻမျိုꩻတာႏ ထာꩻကယ်ႏတင်ႏ အဗွေႏစွဉ်ႏ ထွာနုဲင်း လိုꩻမျိုꩻဖုံႏ ကားကအဝ်ႏတာႏ ထာꩻကယ်ႏတင်ႏဗွေႏ နုဲင်းနဝ်ꩻသွူ။ လုကာ ကတဲမ်းမတ်ခါꩻနဝ်ꩻ “ဖေႏကဟော်ꩻဖေႏ လိုꩻကေန်ꩻခြောဖုံႏ သတင်ꩻဟဝ်” ထာဝရဘုရာꩻ အဝိညာဉ်ႏတောႏ ဟဲ့ꩻခန်ꩻခါꩻ ဗွေႏယေသျု နုဲင်းနဝ်ꩻစွဉ်ႏတဲ့ သတင်ꩻဟဝ်ယိုနဝ်ꩻ သော့ꩻဖေႏပါစွဉ်ႏ ပွိုင်းဝွို့တွမ်ႏ လိုꩻဖုံႏကအဝ်ႏလိုꩻဒါႏ ထာꩻအမျိုꩻမျိုꩻဖုံႏ ကားကအဝ်ႏ ခရာႏနဝ်ꩻသွူ။ လုကာကျမ်ꩻကိုနဝ်ꩻ တဲမ်းမတ် ထင်ႏသျာꩻဖေႏပါက ထာꩻပျောႏသွင်ႏတဲင်၊ အဗွောင်ခန်ꩻကိုနဝ်ꩻ ကေႏညာႏဖေႏ ဗွေႏယေသျု အဝ်ႏကျွꩻလွဉ်တဲင် အွဉ်ႏသွတ်ꩻခန်ꩻနဝ်ꩻ တဲမ်းဖျင် ဗွေႏယေသျု ထွိုင်ႏမွန် ကျွꩻသဲင်ꩻ ခမ်းထီမို့ꩻလောင်းခရာႏ နဝ်ꩻသွူ။ ကဒေါ့ꩻနယ်ဒါႏ ဗွေႏယေသျု ထွိုင်ႏမွန်လွဉ် ခရာႏထွူ ခရစ်ယာန်ႏဖုံႏ ထာꩻယွုမ်း တိုꩻတက်ထင်ႏထိုလွဉ်တဲင် ကစွစ်ꩻလီဒါႏ ရာႏဇဝင်ႏနဝ်ꩻ တဲမ်းဗွိုန်သော့ꩻ တမန်ႏတောႏဝတ္ထု ကျမ်ꩻအုပ်ကိုနဝ်ꩻသွူ။
အကွို့ꩻ၂ တွမ်ႏ၆နဝ်ꩻ (ထီႏဗာႏ အကျောင်ꩻခရာႏ အအဲဉ်ႏကို နုဲင်းဆꩻလ) ကပါသော့ꩻဒါႏ ရာႏဇဝင်ႏအစား နုဲင်းမို့ꩻလောင်းတမန်ႏဖုံႏ ကရွစ်ဒါႏ ငဝ်းသချင်ꩻ၊ တွမ်ႏသွိုꩻတီသားဖုံႏက လွဉ်လယ်ႏဒါႏ ဗွေႏယေသျု လွူးဖွာꩻခရာႏ၊ ဗွေႏယေသျုထွာ နုဲင်းလိုꩻပေႏတဖြာꩻ ကအဝ်ႏသော့ꩻ ဗိမာန်ႏတောႏ ကျောင်ꩻကို ခရာႏတွမ်ႏ ကတဲက်တွိုင်ꩻအီဒါႏ ကဟဝ်မျတ်ငါႏ သျာမရိစွဉ်ႏ ပိုခိုထိုꩻမားခရာႏနဝ်ꩻ ထီႏဗာႏ သတင်ꩻဟဝ်ကျမ်ꩻယို တစောင်ႏလွုမ်ꩻနဝ်ꩻသွူ။ သတင်ꩻဟဝ် တကျမ်ꩻလွုမ်းနဝ်ꩻ အွဉ်ႏရေꩻသန်ဒျာႏ ထာꩻဆုတောင်ꩻ၊ ကြောင်းစင်ဝိညာဉ်ႏတောႏ၊ ဗွေႏယေသျု အမုတောႏထာꩻမာꩻကို လိုꩻမူႏဖုံႏ အခန်ꩻကဏ္ဍတွမ်ႏ ဗွေႏဘုရာꩻ ကအွဉ်ႏစွꩻလွစ်ဖေႏ အပဲစ်ဖုံႏခရာႏနဝ်ꩻသွူ။
အကျောင်ꩻခရာႏအအဲဉ်ႏ
နိဒါန်း (၁:၁–၄)
ဗတ္တိဇံႏဆရာႏယောဟန်တွမ်ႏဗွေႏယေသျုလွူးဖွာꩻလွဉ်လိုꩻပေႏဘဝခရာႏ (၁:၅—၂:၅၂)
ဗတ္တိဇံႏဆရာႏယောဟန်အမုတောႏထာꩻမာꩻ (၃:၁–၂၀)
ဗွေႏယေသျုခံႏဗတ္တိဇံႏထီမင်္ဂလာႏတွမ်ႏခံႏဗာႏထာꩻသွေꩻကုဲင် (၃:၂၁—၄:၁၃)
ဗွေႏယေသျုမာꩻအမုတောႏထာꩻမာꩻလိုꩻအမျာꩻခြာကာလိလဲခမ်းကို (၄:၁၄—၉:၅၀)
အဝ်ႏကာလိလဲခမ်းကျွꩻလွေꩻဝေင်ꩻယေရုသလမ်ႏ (၉:၅၁—၁၉:၂၇)
အဆုဲင်ꩻသွတ်ꩻပတ်ကိုတွမ်ႏဝေင်ꩻယေရုသလမ်ႏအသောင်အထျꩻ (၁၉:၂၈—၂၃:၅၆)
အဝ်ႏထာꩻသီထွိုင်ႏမွန်လွဉ်၊ပေါႏနယ်ဖေႏစွဉ်ႏထာဝရဘုရာꩻကျွꩻထင်ႏခမ်းထီမို့ꩻလောင်း (၂၄:၁–၅၃)
ទើបបានជ្រើសរើសហើយ៖
လုကာ နိဒါန်း: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.