လုကာ 13
13
အဝ်ႏသီအပဲစ်ဖုံႏနဝ်ꩻလꩻသွော့ထာꩻကော့ꩻမာႏမဉ်ႏမွေးတဝ်းမဲ့သီထိုꩻ
1အချိန်ႏနဝ်ꩻ လိုꩻဖုံႏအဝ်ႏနဝ်ꩻကို ယင်ဟန်ႏ ပွိုင်းဝွို့တွမ်ႏ ကာလိလဲလိုꩻဖုံႏ ဝွေꩻသီး ကအဝ်ႏပူႏဇောႏ ထင်ႏဖေႏဒါႏ ဗွေႏဘုရာꩻ ယဇ်ထာꩻလူႏကျာꩻ ခွန်ပိလတ် ကအဝ်ႏမာꩻသီ ထိုꩻလဲဉ်းဒါႏ ခရာႏနဝ်ꩻ ဒေါ့ꩻနယ်ဖေႏ ဗွေႏယေသျု၊။ 2ဗွေႏယေသျု လဝ်းချာ ဝွေꩻသီး၊ “ကာလိလဲလိုꩻဖုံႏ ကခံႏဗာႏ မာꩻသီထိုꩻအနယ်ꩻနဝ်ꩻ သီထင်းဒျာႏ ကွပ်ပွိုးဝွေꩻသီး အပဲစ်အာကယ်ꩻလဲဉ်းက ကာလိလဲလိုꩻ အလင်ဖုံႏနဲ့ဟောင်း။ 3မွေးတဝ်း၊ ခွေဒေါ့ꩻဖေႏသီအမွေး သီကအဝ်ႏမာꩻဒါႏအပဲစ် မဉ်ႏတလꩻတဝ်း ထာꩻကော့ꩻမာႏနဝ်ꩻ သီအီႏသီကုဲင်ဗာႏ နုဲင်းဝွေꩻသီး ကသီလဲဉ်းနဝ်ꩻသွူ။ 4လိုꩻတဆီသွစ်ꩻဖြာꩻ အဝ်ႏသော့ꩻသျိလောင် ရန်းခြေင်ႏတွိုက်ထို ကပြင်ꩻလင်ꩻလူး ဝွေꩻသီးချိန်ႏ က သီထိုꩻဒါႏနဝ်ꩻ ထွာတမုဲင်ꩻဟောင်း။ သီထင်းဒျာႏ ဝွေꩻသီးနဝ်ꩻ အပဲစ်တန်ကယ်ꩻက လိုꩻအလင် ကအဝ်ႏအုံသော့ꩻဒါႏ ဝေင်ꩻယေရုသလမ်ႏကိုဖုံႏ နဝ်ꩻနဲ့ဟောင်း။ 5တမွေးတဝ်း၊ ခွေဒေါ့ꩻဖေႏသီအမွေး၊ သီကအဝ်ႏမာꩻဒါႏ အပဲစ် မဉ်ႏတလꩻချာတဝ်း ထာꩻကော့ꩻမာႏနဝ်ꩻ သီအီႏသီဗာႏ နုဲင်းဝွေꩻသီးကသီ” နုဲင်းနဝ်ꩻသွူ။
အရာႏတရာႏတဝ်းဖက်ꩻဒွိုႏဆꩻမွူးဥပမာႏ
6နဝ်ꩻထွူ ဗွေႏယေသျု ဒေါ့ꩻဖေႏဝွေꩻသီး ငဝ်းဥပမာႏနုဲင်းယို၊ “တလဲင်ႏသား ပါꩻတဖြာꩻနဝ်ꩻ ဆို့ꩻဖက်ꩻဒွိုႏဆꩻမွူး ဝွေꩻတဗဲစ်ဥယျာဉ်ႏ ခြံကိုသွူ။ ဝွေꩻလွေꩻထုမ်ႏထွား ဖက်ꩻဒွိုႏဆꩻရာႏ အမွူးလောင်းစွဉ်ႏတဲ့ တထီႏတဝ်း အရာႏနဝ်ꩻသွူ။ 7နဝ်ꩻမꩻ ဝွေꩻဒေါ့ꩻဖေႏ ဝွေꩻဥယျာဉ်ႏခြံပွေါးသား၊ ‘ထွားမွိုင်၊ ခွေလွဉ်ယိုကို လꩻလဲဉ်းသွံနေင်ႏ ထုမ်ႏထွား ဖက်ꩻဒွိုႏဆꩻရာႏဖုံႏ ဖက်ꩻဒွိုႏမွူးလောင်းနဝ်ꩻ ခွေတထီႏတဝ်း အရာႏတဖြုံႏဖြုံႏသွူ။ ခွဉ်းဝꩻလင်ꩻထိုꩻခန်းနဝ်ꩻ။ ပွိုးတမုဲင်ꩻ အမွူးနဝ်ꩻ အဝ်ႏသွုံꩻခြေင် ထိုꩻဗာႏတွိုႏ ဟံႏဟောင်း’ နုဲင်းနဝ်ꩻသွူ။ 8ကွဲႏတွော့ꩻ ဥယျာဉ်ႏခြံပွေါးသား လဝ်းချာ၊ ‘ အမွူးနဝ်ꩻ အွဉ်ႏဗော့ꩻက နုဲင်းနဝ်ꩻဗွေႏ၊ အုံပွေါးထွားစမ်ꩻက တနေင်ႏငါႏ ခွေအီႏခူႏခူဖေႏကအမွူး၊ သော့ꩻဖေႏထဲင်းက ဟံႏဩႏဇာႏဖုံႏ။ 9တွိုႏနဝ်ꩻ ဆုဲင်ꩻတနေင်ႏ အမွူးမဉ်ႏရာႏဒျာႏနဝ်ꩻ ကယိန်းဟဝ်။ နဝ်ꩻထွူ မဉ်ႏတရာႏတဝ်းခါမꩻ နီဗွေႏခွဉ်းဝꩻနွောင်ꩻဒျာႏ’” နုဲင်းနဝ်ꩻသွူ။
ဗွေႏယေသျုလုမ်ꩻလာꩻဟဝ်ဖေႏပါꩻမူႏမာႏရေႏဥပုသ်မွူးနီꩻကို
10ဥပုသ်မွူးနီꩻ တနီꩻကိုနဝ်ꩻ ဗွေႏယေသျု အဝ်ႏသွဉ်သင်ဖေႏ တရာꩻစရွပ်တဖြုံႏ အကိုနဝ်ꩻသွူ။ 11နဝ်ꩻကိုနဝ်ꩻ ပါꩻမူႏတဖြာꩻ လူꩻကုဲင်တဗာႏ အဝ်ႏစောင်ꩻဝွေꩻတွော့ꩻ မာꩻဆာမာႏရေႏဝွေꩻနဝ်ꩻ လꩻလဲဉ်း တဆီသွစ်ꩻနေင်ႏသွူ။ ပါꩻမူႏနဝ်ꩻ ငင်းတကောင်ႏတွော့ꩻ အုံထွိုင်ႏစွဉ်ႏထာꩻ တလꩻတဝ်းသွူ။ 12ဗွေႏယေသျု ထွိုင်ႏထီႏ ပါꩻမူႏနဝ်ꩻချိန်ႏ ဝွေꩻဟဲ့ꩻပါꩻမူႏ၊ “မူႏ၊ နာꩻကအဝ်ႏခံႏဗာႏ ထာꩻဆာနဝ်ꩻ လွစ်ကင်ꩻထိုꩻလဲဉ်း” နုဲင်းနဝ်ꩻသွူ။ 13ဝွေꩻဗွေႏ စူဖုံႏနဝ်ꩻ ဝွေꩻဗွေႏ အွဉ်ႏဒင်ႏဖေႏ ပါꩻမူႏလောင်းတွော့ꩻ တလဲင်ႏချင်ꩻ ဝွေꩻမူႏ အွဉ်ႏစွဉ်ႏလꩻစွဉ်ႏ အနမ်းတဲင် အုပ်ꩻထင်ႏစွဉ်ႏ ဗွေႏဘုရာꩻနဝ်ꩻသွူ။
14 # ထလ ၂၀:၉၊၁၀၊ ဟော်ꩻ ၅:၁၃၊ ၁၄။ နုဲင်းဗွေႏယေသျု ကအဝ်ႏလုမ်ꩻလာꩻ မာꩻဟဝ်ဖေႏဒါႏ ဥပုသ်မွူးနီꩻကိုနဝ်ꩻ တရာꩻစရွပ်လိုꩻတန်နဝ်ꩻ အဝ်ႏသꩻလျားထာ နဝ်ꩻမꩻ ဝွေꩻဒေါ့ꩻထန်ႏဖေႏ လိုꩻဖုံႏ၊ “နီကထွိုက်မာꩻဒါႏ ထာꩻမာꩻနဝ်ꩻ အဝ်ႏသူနီꩻလွုမ်းသွူ။ နဝ်ꩻမꩻ လွဉ်အနီꩻနဝ်ꩻဖုံႏ ယံꩻတွင်ꩻတွော့ꩻ လုမ်ꩻလာꩻဖေႏမွိုင်၊ ကွဲႏတွော့ꩻ ဥပုသ်မွူးနီꩻကိုနဝ်ꩻ တအဝ်ႏလိုႏမာꩻတဝ်း” နုဲင်းနဝ်ꩻသွူ။
15ဗွေႏဘုရာꩻ လဝ်းချာဝွေꩻ၊ “သီသူႏတောႏလဲဉ်၊ သီကိုတဖြာꩻဖြာꩻ ဥပုသ်မွူးနီꩻနဝ်ꩻ သီဖိုး မဉ်ႏမွေးတဝ်း သီသေလာꩻ အဝ်ႏအဖေါင်ꩻကိုတွော့ꩻ စေအဖြွီꩻ တလွေꩻဖေႏအွꩻတဝ်းထီနဝ်ꩻ အဝ်ႏနေတဖြာꩻဖြာꩻဟောင်း။ 16ယိုခါ ယိုကို ကထွာ အဗြာဟံပိုလီꩻယို အဝ်ႏခံႏဗာႏ စာႏတန်ႏစွိုင်သေꩻခါꩻနဝ်ꩻ လꩻလဲဉ်း တဆီသွစ်ꩻနေင်ႏသွူ။ ဝွေꩻမူႏနဝ်ꩻ တဟဝ်လွစ်ထွိုက်တဝ်း ဥပုသ်မွူးနီꩻကိုဟောင်း” နုဲင်းနဝ်ꩻသွူ။ 17ဝွေꩻဗွေႏ ကလဝ်းချာဒါႏ ငဝ်းနဝ်ꩻ မာꩻဝင်ꩻသꩻမွေးစွဉ်ႏ ဝွေꩻဗွေႏရန်ႏသူႏဖုံႏ၊ အကျာꩻနဝ်ꩻ ဝွေꩻဗွေႏ ကမာꩻလဲဉ်းဒါႏ ထာꩻအံႏဖြာႏခရာႏဖုံႏ ကားကအဝ်ႏနဝ်ꩻ လိုꩻဖုံႏ သꩻဟဝ်သꩻရေꩻငါႏသွူ။
ဟန်ႏလွူးခူꩻဥပမာႏ
(မတဲ ၁၃:၃၁–၃၂။ မာကု ၄:၃၀–၃၂)
18ဗွေႏယေသျုရီ၊ “ဗွေႏဘုရာꩻ ခမ်းထီနဝ်ꩻ ဗွိုန်တမုဲင်ꩻဟောင်း။ ခမ်းထီနဝ်ꩻ ခွေအီႏတဲက်တွိုင်ꩻ နယ်အီဗာႏ တမုဲင်ꩻဟောင်း။ 19ခမ်းထီနဝ်ꩻ ဗွိုန်နုဲင်းယိုသွူ။ လိုꩻခိုတဖြာꩻ ထူႏဟန်ႏလွူးခူꩻတဲင် ဆို့ꩻသော့ꩻ ဝွေꩻခြံကိုသွူ။ အမွူးနဝ်ꩻ တန်လွဉ်တဲင် ထွာလွဉ် သေင်ႏတမွူးတွော့ꩻ ဝါးဖုံႏမာꩻ ဝွေꩻသီးအပွီဖုံႏ အပင်ဖုံႏလောင်း” နုဲင်းနဝ်ꩻသွူ။
တမီႏဥပမာႏ
(မတဲ ၁၃:၃၃)
20ဗွေႏယေသျု ရီဖျင်တလဲင်ႏ၊ “ဗွေႏဘုရာꩻ ခမ်းထီနဝ်ꩻ ခွေအီႏတဲက်တွိုင်ꩻအီဗာႏ တမုဲင်ꩻဟောင်း။ 21ခမ်းထီနဝ်ꩻ ဗွိုန်နုဲင်းယိုသွူ။ ပါꩻမူႏတဖြာꩻနဝ်ꩻ ထူႏတမီႏ ယင်ဟန်ႏတွော့ꩻ ရော်ꩻစွဉ်ႏတခိုးဖွန်ႏ တဖျတဲင် တခိုးနုတ်ꩻ တဖြုံႏလွုမ်း ပွစ်ꩻတန်လွဉ်စွဉ်ႏ” နုဲင်းနဝ်ꩻသွူ။
တခါꩻငွါအဲဉ်ႏ
(မတဲ ၇:၁၃–၁၄၊၂၁-၂၃)
22ဗွေႏယေသျု ကအဝ်ႏလွေꩻ ဝေင်ꩻယေရုသလမ်ႏ တဖူꩻလောင်းနဝ်ꩻ ဝွေꩻဗွေႏဖျတ်လွေꩻ ဝေင်ꩻဖုံႏတွမ်ႏ ဒုံဖုံႏတဲင် သွဉ်သင်ဖေႏ လိုꩻဖုံႏသွူ။၊ 23ပါꩻတဖြာꩻ ရီဝွေꩻဗွေႏ၊ “ဗွေႏ၊ လိုꩻကအီႏလꩻဒါႏ ထာꩻကယ်ႏတင်ႏနဝ်ꩻ အဖြာꩻဆေ့ꩻလွုမ်ꩻဟောင်း” နုဲင်းနဝ်ꩻသွူ။
ဗွေႏယေသျု လဝ်းချာဝွေꩻသီး၊ 24“သီကျိုꩻစာꩻတဲင် နွို့သော့ꩻသွော့ တခါꩻငွါအဲဉ်ႏဖဲ့ꩻဟုဲင်း။ ကွပ်ပွိုး လိုꩻအာဖုံႏနဝ်ꩻ အီႏကျိုꩻစာꩻ နွို့လွေꩻသော့ꩻစွဉ်ႏတဲ့ ဝွေꩻသီး အီႏတနွို့သော့ꩻ နွောင်ꩻတဝ်း အတွက်သွူ။ 25လမ်းဗွေႏနဝ်ꩻ ထွိုင်ႏတဲင် အွဉ်ႏဒို့ꩻထိုꩻ တခါꩻသွူ။ နဝ်ꩻထွူ သီကအဝ်ႏအုံထွိုင်ႏ ကောင်းထန်ႏဖဲ့ꩻ တဒေါက်ꩻစ တခါꩻချိန်ႏတဲင်ရိုꩻ၊ ‘ဗွေႏ၊ ဗွောင်ဖေႏနီတခါꩻဟုဲင်း’ နုဲင်းနဝ်ꩻတဲင်၊ ဝွေꩻဗွေႏ အီႏလဝ်းချာသီ၊ ‘သီအဝ်ႏမုဲင်ꩻလွဉ်နဝ်ꩻ ခွေတသေတဝ်း၊’ နုဲင်းနဝ်ꩻသွူ။ 26တွိုႏနဝ်ꩻ သီအီႏလဝ်းချာ၊ ‘နီအဝ်ႏအံႏအွꩻငီꩻလဲဉ်း တွမ်ႏနီဗွေႏသွူ။ နီဗွေႏ အဝ်ႏသွဉ်သင် သော့ꩻဒျာႏ နီဝေင်ꩻကို’နုဲင်းနဝ်ꩻသွူ။ 27#သာ ၆:၈။ ကွဲႏတွော့ꩻ ဝွေꩻအီႏရိုꩻဖေႏဖျင်သီ၊ ‘သီအဝ်ႏမုဲင်ꩻကို လွဉ်နဝ်ꩻ ခွေတသေတဝ်း။ သီလိုꩻမွိုက်ကုဲင်ဖုံႏ ကားကအဝ်ႏ လွေꩻညာꩻထိုꩻခန်းခွေဟုဲင်း’ နုဲင်းနဝ်ꩻသွူ။ 28#မ ၂၂:၁၃၊ ၂၅:၃၀။ #မ ၈:၁၁၊ ၁၂။ သီထွိုင်ႏထီႏအဗြာဟံ၊ ဣသဲစ်၊ ယာကုပ်တွမ်ႏ ပရောဖဲစ်ဖုံႏ ကားကအဝ်ႏ အဝ်ႏသော့ꩻ ဗွေႏဘုရာꩻ ခမ်းထီကိုကျာꩻ သီ အဝ်ႏကောင်းထန်ႏဖဲ့ꩻ သီအီႏငွိုးအွီႏတဲင် စုဲင်ချာဗာႏသီတငါ ခွိုင်းကားမုဲင်ꩻ။ 29တဲင်လိုꩻဖုံႏ အဝ်ႏဆꩻကွဉ်ႏဖဲ့ꩻ ဆꩻတွို့ꩻဖဲ့ꩻတွမ်ႏ ဆꩻနဝ်ဖဲ့ꩻ ဆꩻထင်ꩻဖဲ့ꩻနဝ်ꩻ လွဉ်တဲင် အုံလင်ꩻသော့ꩻ ဗွေႏဘုရာꩻခမ်းထီ ပွယ်ꩻကိုသွူ။ 30#မ ၁၉:၃၀၊ ၂၀:၁၆၊ မာ ၁၀:၃၁။ နဝ်ꩻထွူ ယိုခါ လိုꩻကထဲ့ဆုဲင်ꩻသားဖုံႏနဝ်ꩻ အီႏထဲ့ရီးတဲင် ယိုခါ လိုꩻကထဲ့ရီးသားဖုံႏနဝ်ꩻ အီႏထဲ့ဆုဲင်ꩻ” နုဲင်းနဝ်ꩻသွူ။
ဗွေႏယေသျုရက်ဝေင်ꩻယေရုသလမ်ႏ
(မတဲ ၂၃:၃၇–၃၉)
31အချိန်ႏနဝ်ꩻ ဖါရိသဲဖုံႏယင်ဟန်ႏ လွဉ်ဗွေႏယေသျုထျꩻတဲင် ဒေါ့ꩻဖေႏဝွေꩻဗွေႏ၊ “နာꩻအဝ်ႏယိုကိုနဝ်ꩻ ထန်ႏလွေꩻထိုꩻခန်း ခင်ႏလမ်း အလင်တထွောင်း၊ ပွိုးတွော့ꩻ ခွန်တန်ဟေရုဒ် အဝ်ႏမဉ်မာꩻသီနာꩻ” နုဲင်းနဝ်ꩻသွူ။
32ဗွေႏယေသျု လဝ်းချာ ဝွေꩻသီး၊ “လွေꩻတဲင် ဒေါ့ꩻနယ်ဖေႏသွော့ ထွီႏဟံႏနဝ်ꩻဟုဲင်း။ ‘ခွေနဝ်ꩻ အဝ်ႏဝါးထန်ႏဖေႏ လူꩻကုဲင်ဖုံႏတဲင် လုမ်ꩻလာꩻမာꩻဟဝ်နယ်ဖေႏ ထာꩻဆာ ရောႏဂါႏဖုံႏ၊ ဟန်ႏနီꩻ၊ မွူးရဝ်ꩻနီꩻတဲင် သွံနီꩻနဝ်ꩻ ခွေအီႏအွဉ်ႏထွူ ခွေထာꩻမာꩻ။’ 33ကွဲႏတွော့ꩻ ဟန်ႏနီꩻ၊ မွူးရဝ်ꩻနီꩻစွဉ်ႏ တရူꩻနီꩻနဝ်ꩻ ခွေအီႏလွေꩻဗာႏတဖူꩻ၊ ပရောဖဲစ်တဖြာꩻနဝ်ꩻ ပေါႏလွို ဝေင်ꩻယေရုသလမ်ႏနဝ်ꩻ ခင်ႏလမ်းမုဲင်ꩻကိုတဲ့ အီႏမာꩻသီတဝ်းနဝ်ꩻသွူ။
34“အွိုးဝေင်ꩻယေရုသလမ်ႏ၊ ဝေင်ꩻယေရုသလမ်ႏ၊ နာꩻမာꩻသီပရောဖဲစ်ဖုံႏ၊ ဗွေႏဘုရာꩻ ကအွဉ်ႏစွꩻလွဉ် တရာꩻဟော်ꩻသားဖုံႏနဝ်ꩻ နာꩻနုဲင်ႏသီတွမ်ႏ လုံးတူႏဖုံႏ၊ ဗွိုန်နုဲင်းဆျာမွူးဖုံႏ ကစုဗူႏအပေႏဖုံႏ အဒေ့ꩻဆꩻလအတွိုင်ꩻ စွဉ်ႏခွေစူဗောင်နဝ်ꩻ ခွေမဉ်တဖေါ့ခူ ခွေလိုꩻဖုံႏ ခွိုင်းမုဲင်ꩻလဲင်ႏလဲင်ႏလဲဉ်း၊ ကွဲႏတွော့ꩻ သီတဖေႏတဝ်း ခွေအခွင်ꩻ။ 35#သာ ၁၁၈:၂၆။ နဝ်ꩻမꩻ ဗိမာန်ႏတောႏကျောင်ꩻနဝ်ꩻ အီႏစွဉ်ꩻကုဲင်ထိုꩻဗာႏသွူ။ ခွေဒေါ့ꩻဖေႏသီ အမွေးအမဲဉ်ႏ၊ သီအီႏတထီႏဗာႏတဝ်းဒွုမ်ခွေ ဗꩻတွိုႏစွဉ်ႏ သီကရိုꩻဒါႏအချိန်ႏ၊ ‘ဗွေႏကကျွꩻလွဉ်ဒါႏတွမ်ႏ ဗွေႏထာဝရဘုရာꩻ အမဉ်ꩻတောႏ နာႏမနဝ်ꩻ ဗွေႏဘုရာꩻ ယံကဖေႏသွော့ ဝွေꩻဗွေႏမင်္ဂလာႏ’” နုဲင်းနဝ်ꩻသွူ။
ទើបបានជ្រើសរើសហើយ៖
လုကာ 13: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
