ယောဟန် 21

ဗွေႏယေသျုပေါႏနယ်တပဲ့တောႏဖုံႏဝင်ꩻနွတ်ꩻ

1ယိုထွိုင်ႏထွူ ဗွေႏယေသျု ပေါႏနယ်ဖေႏဖျင်ယင်း ဝွေꩻဗွေႏ တပဲ့တောႏဖုံႏ တိဗေရိ ထီနောင်ထျꩻ တလဲင်ႏနဝ်ꩻသွူ။ ကထွာဒါႏနဝ်ꩻ နုဲင်းယိုသွူ။ 2သိမုန်ပေတရု၊ တောမ(ကဟဲ့ꩻဒါႏမဲရွာ)၊ နာတနေလ(ပါꩻအဖြာꩻ ကအဝ်ႏ ကာလိလဲခမ်း၊ ဝေင်ꩻကန္နကို)၊ ဇေဗေဒဲပိုခိုဖုံႏတွမ်ႏ တပဲ့တောႏ အလင်နီဖြာꩻ ကအဝ်ႏငီꩻ သေႏသေႏဒါႏ ဗွေႏယေသျုနဝ်ꩻသွူ။ 3#လု ၅:၅။ သိမုန်ပေတရုဒေါ့ꩻဖေႏ လိုꩻလင်ဖုံႏ၊ “ခွေအီႏလွေꩻဆွမ်ꩻ ထပေႏ” နုဲင်းနဝ်ꩻသွူ။

ဝွေꩻသီး ဒေါ့ꩻဖေႏဝွေꩻ၊ နီအီႏလွေꩻလွဉ်ꩻနာꩻ” နုဲင်းနဝ်ꩻသွူ။ နဝ်ꩻမꩻ ဝွေꩻသီး ထန်ႏလွေꩻနွို့သော့ꩻ ဖြီတဆွိုင်ꩻကို၊ ကွဲႏတွော့ꩻ တနာꩻသူႏသူႏနဝ်ꩻ ဝွေꩻသီး ဆွမ်ꩻထပေႏ တဗာႏငါတဲ့ တလꩻတဝ်းဖုံႏသွူ။ 4နုဲင်းမွူး ထွိုင်ႏထန်ႏလွဉ်ချိန်ႏ ဗွေႏယေသျု အဝ်ႏအုံထွိုင်ႏထာꩻ ထီဖင်ႏမော့သွူ။ ကွဲႏတွော့ꩻ နဝ်ꩻနဝ်ꩻထွာဒျာႏ ဗွေႏယေသျုကျောင်ꩻ တပဲ့တောႏဖုံႏ တသေတဝ်းသွူ။ 5နဝ်ꩻထွူ ဝွေꩻဗွေႏရီဝွေꩻသီး၊ “လိုꩻခိုယွဲဖုံႏ၊ သီဆွမ်ꩻထပေႏ တဗာႏဗာႏ လꩻတဝ်းနဲ့ဟောင်း” နုဲင်းနဝ်ꩻသွူ။

ဝွေꩻသီးလဝ်းချာ၊ “တဗာႏငါတဲ့ လꩻတဝ်း” နုဲင်းနဝ်ꩻသွူ။

6 # လု ၅:၆။ ဝွေꩻဗွေႏ ဒေါ့ꩻဖေႏဝွေꩻသီး၊ “ဝန်ႏလင်ꩻသီခြယ် ဖြီအထွေဖဲ့ꩻနဝ်ꩻတဲင် သီအီႏဆွမ်ꩻလꩻ ထပေႏယင်ဟန်ႏ” နုဲင်းနဝ်ꩻသွူ။ နဝ်ꩻမꩻ ဝွေꩻသီ ဝန်ႏလင်ꩻအခြယ်တဲင် ပွိုးဝွေꩻသီး ကဆွမ်ꩻလꩻ ထပေႏနဝ်ꩻ အာငါႏနဝ်ꩻမꩻ ထွို့ꩻထန်ႏချာခြယ် တနွောင်ꩻနေးဒွုမ်သွူ။

7ဗွေႏယေသျု ကရက်ငါႏ တပဲ့တောႏနဝ်ꩻ ဒေါ့ꩻဖေႏပေတရု၊ “နဝ်ꩻနဝ်ꩻထွာဒျာႏ ဗွေႏဘုရာꩻတန်” နုဲင်းနဝ်ꩻသွူ။ နဝ်ꩻနဝ်ꩻထွာဒျာႏ ဗွေႏဘုရာꩻကျောင်ꩻ ပေတရု ထွိုင်ႏဟွိုန် ဝွေꩻဆဲင်ꩻယွုံးတန်နဝ်ꩻ ဝွေꩻဗုဲင်ခူဝွေꩻနမ်း (ပွိုးဝွေꩻဗွောင်ခါꩻနေး ဝွေꩻခွမ်ꩻလာꩻဖုံႏ)တဲင် ပကျောက်ꩻလင်ꩻသော့ꩻစွဉ်ႏ ထီကိုနဝ်ꩻသွူ။ 8တပဲ့တောႏ အလင်ဖုံႏနဝ်ꩻ ဝွေꩻသီး တပေါႏအဝ်ႏညာꩻတဝ်း တွမ်ႏထီဖင်ႏ အဝ်ႏညာꩻ ကဲက်တရျာꩻ ရပ်လွုမ်ꩻနဝ်ꩻမꩻ ထပေႏဖုံႏ ကအဝ်ႏဗွေသော့ꩻဒါႏ ခြယ်နဝ်ꩻ ဝွေꩻသီး ထွို့ꩻလွဉ်ဗော့ꩻ ဖင်ႏထျꩻသွူ။ 9ဝွေꩻသီး ထွိုင်ႏကာထင်ႏ ဖင်ႏလောင်းချိန်ႏနဝ်ꩻ ဝွေꩻသီးထီႏ မေႏတပြုန်ႏ အဝ်ႏဖို့ꩻခါ ထပေႏ မေႏအွူလောင်းတွမ်ႏ တခိုးပေါင်မုတ် ယင်ဟန်ႏနဝ်ꩻသွူ။ 10နဝ်ꩻထွူ ဗွေႏယေသျု ဒေါ့ꩻဖေႏဝွေꩻသီး၊ “အီလွဉ်သီ ကဆွမ်ꩻလꩻ ထပေႏနဝ်ꩻ ယင်ဟန်ႏဟုဲင်း” နုဲင်းနဝ်ꩻသွူ။

11သိမုန်ပေတရုနဝ်ꩻ ထင်ႏဖြီလောင်းတဲင် ခြယ်ကအဝ်ႏဗွေသော့ꩻဒါႏ စွဉ်ႏထတန်ဖုံႏနဝ်ꩻ တရွစ်ꩻတွာႏထင်ႏလွဉ် ဖင်ႏလောင်းတွော့ꩻ ထပေႏ ကားကအဝ်ႏနဝ်ꩻ အဝ်ႏ၁၅၃ဗာႏသွူ။ ထပေႏလဲင်ꩻအာငါႏ နုဲင်းနဝ်ꩻစွဉ်ႏတဲ့ ခြယ်တသဲ့ထိုꩻတဝ်းသွူ။ 12ဗွေႏယေသျု ဒေါ့ꩻဖေႏဝွေꩻသီး၊ “လွဉ်တွော့ꩻ အံႏဟုဲင်း” နုဲင်းနဝ်ꩻသွူ။ ဝွေꩻနဝ်ꩻထွာ ဗွေႏဘုရာꩻကျောင်ꩻ ကွပ်ပွိုး ဝွေꩻသီး အဝ်ႏသေ ထွူလဲဉ်းနဝ်ꩻမꩻ၊ “နာꩻနဝ်ꩻ ပါꩻမုဲင်ꩻဟောင်း” နုဲင်းနဝ်ꩻနဝ်ꩻ တပဲ့တောႏဖုံႏ တဖြာꩻငါတဲ့ တရီဗွိုန်ႏတဝ်း ဝွေꩻဗွေႏသွူ။ 13နဝ်ꩻမꩻ ဗွေႏယေသျု လွေꩻထူႏတခိုးတဲင် ဖေႏစွဉ်ႏ ဝွေꩻသီးနဝ်ꩻသွူ။ ထပေႏနဝ်ꩻတဲ့ ဝွေꩻဗွေႏမာꩻဗွိုန် နုဲင်းနဝ်ꩻနေနေသွူ။။

14ယိုနဝ်ꩻ ဗွေႏယေသျု အဝ်ႏထာꩻသီ ထွိုင်ႏမွန်လွဉ်ထွူ ပေါႏနယ်ဖေႏ တပဲ့တောႏဖုံႏ ထွာတတိယလဲင်ႏသွူ။

ဗွေႏယေသျုတွမ်ႏပေတရု

15ဝွေꩻသီး ထွိုင်ႏအံႏထွူ ဗွေႏယေသျု ဒေါ့ꩻဖေႏ သိမုန်ပေတရု၊ “ယောဟန်ပိုခို သိမုန်၊ နာꩻရက်ခွေနဝ်ꩻ လွိုကယ်ꩻနေ လိုꩻလင်ဖုံႏ စားယိုဟောင်း” နုဲင်းနဝ်ꩻသွူ။

ဝွေꩻလဝ်းချာ၊ “မွေးဗွေႏ၊ ခွေရက်နီဗွေႏနဝ်ꩻ နီဗွေႏအဝ်ႏသေဒျာႏ” နုဲင်းနဝ်ꩻသွူ။

ဗွေႏယေသျု ဒေါ့ꩻဖေႏဝွေꩻ၊ “ထိန်ꩻထွားဟဝ်ဟဝ် ခွေသွိုꩻပေႏဖုံႏဟုဲင်း” နုဲင်းနဝ်ꩻသွူ။ 16ဗွေႏယေသျု ဒေါ့ꩻဖေႏဝွေꩻ ဒုတိယလဲင်ႏ၊ “ယောဟန်ပိုခိုသိမုန်၊ နာꩻရက်နေ ခွေဟောင်း” နုဲင်းနဝ်ꩻသွူ။

ဗွေႏယေသျုဒေါ့ꩻဖေႏဝွေꩻ၊ “ထိန်ꩻထွားဟဝ်ဟဝ် ခွေသွိုꩻဟုဲင်း” နုဲင်းနဝ်ꩻသွူ။ 17ဗွေႏယေသျု ဒေါ့ꩻဖေႏဝွေꩻ တတိယလဲင်ႏ၊ “ယောဟန်ပိုခိုသိမုန်၊ နာꩻရက်နေ ခွေဟောင်း” နုဲင်းနဝ်ꩻသွူ။

ပွိုးဗွေႏယေသျုရီဝွေꩻ၊ “နာꩻရက်နေခွေဟောင်း” နုဲင်းနဝ်ꩻနဝ်ꩻ ဗွေသွံလဲင်ႏနဝ်ꩻမꩻ ပေတရုနဝ်ꩻ အသꩻပေႏလွဉ်တဲင် ဝွေꩻဒေါ့ꩻဖေႏ ဝွေꩻဗွေႏ၊ “ဗွေႏ၊ နီဗွေႏနဝ်ꩻ အဝ်ႏသေလို့ထာꩻ ကားကအဝ်ႏသွူ။ ခွေရက်နီဗွေႏနဝ်ꩻ နီဗွေႏအဝ်ႏသေဒျာႏ” နုဲင်းနဝ်ꩻသွူ။

ဗွေႏယေသျုဒေါ့ꩻဖေႏဝွေꩻ၊ ထိန်ꩻထွားဟဝ်ဟဝ် ခွေသွိုꩻနဝ်ꩻဟုဲင်း။ 18ခွေဒေါ့ꩻဖေႏနာꩻ အမွေးအမဲဉ်ႏ၊ နာꩻအဝ်ႏပေႏဆားက တွင်ꩻနဝ်ꩻ နာꩻအဝ်ႏဖျင်ရဲဉ်ꩻဒျာႏ နာꩻမဉ်လွေꩻ မုဲင်ꩻကိုတဲ့ နာꩻလွေꩻ၊ ကွဲႏတွော့ꩻ နာꩻထွိုင်ႏဖြားလွဉ်ချိန်ႏနဝ်ꩻ နာꩻအီႏယောင်းစွဉ်ႏဗာႏ နာꩻစူဖုံႏတဲင် လိုꩻလင်တဖြာꩻဖြာꩻ အီႏစွိုင်နာꩻတွော့ꩻ ထူႏလွေꩻထိုꩻနာꩻ နာꩻတမဉ်လွေꩻတဝ်း ခင်ႏလမ်း” နုဲင်းနဝ်ꩻသွူ။ (19ကဒေါ့ꩻဗာႏ နုဲင်းယိုနဝ်ꩻ ဗွေႏယေသျု ဖေါႏနယ်ဒျာႏ ပေတရု အီႏသီဗာႏ အနယ်ꩻမုဲင်ꩻတဲင် အီႏတောင်ႏလေဖေႏ ဗွေႏဘုရာꩻ ဘွုန်ꩻသရေႏတောႏ နုဲင်းမုဲင်ꩻနဝ်ꩻသွူ။) နဝ်ꩻထွူ ဗွေႏယေသျု ဒေါ့ꩻဖေႏဝွေꩻ၊ “လွေꩻလွဉ်ꩻသွော့ခွေ” နုဲင်းနဝ်ꩻသွူ။

ဗွေႏယေသျုတွမ်ႏတပဲ့တောႏအလင်ဖုံႏ

20 # ယော ၁၃:၂၅။ ပေတရု ခွယ်ႏထွားချာတွော့ꩻ ဝွေꩻဗွေႏဆꩻချာနဝ်ꩻ ထီႏစွဉ်ႏ တပဲ့အလင်တဖြာꩻ ဝွေꩻဗွေႏ ကရက်ဒါႏ ပါꩻအဖြာꩻ ကအဝ်ႏအုံဒေါင်ဗော့ꩻဒါႏ ဗွေႏယေသျု ကအံႏထာꩻအံႏနဝ်ꩻတဲင် ကအဝ်ႏရီလဲဉ်းဒါႏ၊ “ဗွေႏ၊ ပါꩻအဖြာꩻ သစ္စာႏကဖေါက်ဒါႏ နီဗွေႏနဝ်ꩻ အီႏထွာနုဲင်းမုဲင်ꩻဟောင်း” နုဲင်းနဝ်ꩻသွူ။ 21ပေတရု ထွိုင်ႏထီႏ ဝွေꩻနဝ်ꩻ ဝွေꩻရီ ဗွေႏယေသျု၊ ဗွေႏ၊ တွိုႏပါꩻခိုယိုနဝ်ꩻ အီႏထွာ နုဲင်းမုဲင်ꩻဟောင်း” နုဲင်းနဝ်ꩻသွူ။

22ဗွေႏယေသျု လဝ်းချာဝွေꩻ၊ “ခွေမဉ်ႏမဉ်အွဉ်ႏ သက်မွန်ဝွေꩻ ဗꩻတွိုႏစွဉ်ႏ ခွေကကျွꩻလွဉ်နဝ်ꩻ ဆဲင်ႏနာꩻ တမုဲင်ꩻဟောင်း။ လွေꩻလွဉ်ꩻသွော့ခွေ” နုဲင်းနဝ်ꩻသွူ။

23နဝ်ꩻမꩻ တပဲ့တောႏယိုနဝ်ꩻ အီႏတသီတဝ်း သတင်ꩻနဝ်ꩻ ကျော်ႏစွစ်ꩻစဲစ်ꩻစွဉ်ႏ ဗွေႏယေသျု တပဲ့တောႏဖုံႏကိုနဝ်ꩻသွူ။ ကွဲႏတွော့ꩻ ဝွေꩻအီႏတသီဗာႏတဝ်း ဗွေႏယေသျုရိုꩻ နုဲင်းနဝ်ꩻ တမွေးတဝ်းနဝ်ꩻသွူ။ ဝွေꩻဗွေႏဒေါ့ꩻ၊ “ခွေမဉ်ႏမဉ်အွဉ်ႏ သက်မွန်ဝွေꩻ ဗꩻတွိုႏစွဉ်ႏ ခွေကကျွꩻလွဉ်နဝ်ꩻ ဆဲင်ႏနာꩻတမုဲင်ꩻဟောင်း” နုဲင်းနဝ်ꩻသွူ။

24ဝွေꩻနဝ်ꩻထွာဒျာႏ တပဲ့တောႏအဖြာꩻ ကဒေါ့ꩻဒါႏ ထာꩻယိုဖုံႏတဲင် ထွာပါꩻအဖြာꩻ ကတဲမ်းမတ်ခါꩻဒါႏ ထာꩻကထွာလွဉ် နဝ်ꩻဖုံႏခရာႏတဲင် နုဲင်းဝွေꩻဗွေႏ ကဒေါ့ꩻနဝ်ꩻ မဲဉ်ႏကျောင်ꩻ နီအဝ်ႏသေသွူ။

အွဉ်ႏသွတ်ꩻ

25ယိုခါ ဗွေႏယေသျု ကမာꩻလဲဉ်းဒါႏ ထာꩻအလင်ဖုံႏနဝ်ꩻ အဝ်ႏအာငါႏကသွူ။ မဉ်ႏတဲမ်းမတ်လင်ꩻ နဝ်ꩻခရာႏဖုံႏ ကားကအဝ်ႏ တစွိုးထွူ တစွိုးနဝ်ꩻ ခွေသွဉ်းထင်း ကျမ်ꩻအုပ်နဝ်ꩻ ကမ္ဘာႏလောက လောင်းယို အွဉ်ႏခင်ႏလမ်း အီႏတအဲဉ်ထဝ်းသွူ။

ទើបបានជ្រើសរើសហើយ៖

ယောဟန် 21: PBCL

គំនូសចំណាំ

ចែករំលែក

ចម្លង