ယောဟန် 14
14
ဗွေႏယေသျုထွာတဖူꩻလွေꩻဖါတောႏထျꩻ
1ဗွေႏယေသျု ဒေါ့ꩻဖေႏဝွေꩻသီး၊ “တွမ်ႏနန်းခီမွိုန်းတဲင် သꩻတွမ်ႏ ကုဲင်မွိုန်း၊ ယွုမ်းသွော့ ဗွေႏဘုရာꩻတွော့ꩻ ယွုမ်းပါသွော့ခွေ။ 2ခွေဖါတောႏ လမ်းကိုနဝ်ꩻ အခန်ꩻဖုံႏ အဝ်ႏအာငါႏတဲင် ခွေအီႏလွေꩻ ဖျင်ရဲဉ်ꩻဖေႏ သီတာႏ ခင်ႏလမ်းနဝ်ꩻသွူ။ မဉ်ႏတမွေးတဝ်းနဝ်ꩻ ခွေအီႏတဒေါ့ꩻနယ်တဝ်း သီနုဲင်းယိုသွူ။ 3ခွေလွေꩻတွော့ꩻ ဖျင်ရဲဉ်ꩻဖေႏ သီတာႏခင်ႏလမ်း တထွောင်းထွူ ခွေအီႏသဲင်ꩻလွဉ်ချာတဲင် ဖေႏနေး သီကအဝ်ႏငီꩻ ခွေကအဝ်ႏဒါႏ အရပ်ခင်ႏလမ်းနဝ်ꩻ ခွေနမ်း အီႏလွဉ်ဟဲ့ꩻယင်းသီသွူ။ 4ခွေကအီႏလွေꩻဒါႏ ခင်ႏလမ်းတဖူꩻနဝ်ꩻ သီအဝ်ႏသေ” နုဲင်းနဝ်ꩻသွူ။
5တောမ ဒေါ့ꩻဖေႏဝွေꩻဗွေႏ၊ “ဗွေႏ၊ နီဗွေႏ ကအဝ်ႏလွေꩻဒါႏ ခင်ႏလမ်းနဝ်ꩻ နီတသေတဝ်း၊ နဝ်ꩻမꩻ တဖူꩻကအီႏတွိုႏလွေꩻ နဝ်ꩻကိုနဝ်ꩻ နီအီႏသေနွောင်ꩻ နုဲင်းမုဲင်ꩻဟောင်း” နုဲင်းနဝ်ꩻသွူ။
6ဗွေႏယေသျု လဝ်းချာဝွေꩻ၊ “ခွေနဝ်ꩻထွာ တဖူꩻ၊ ထွာသမ္မာႏတရာꩻစွဉ်ႏ အသက်သွူ။ ပေါႏလွိုသွူ စွဉ်ႏခွေနဝ်ꩻ ပါꩻမုဲင်ꩻတဖြာꩻတဲ့ တလွေꩻနွောင်ꩻတဝ်း ဖါတောႏထျꩻသွူ။ 7ဝွေꩻဗွေႏ ဒေါ့ꩻဖေႏဝွေꩻသီး၊ “ယိုခါ သီအဝ်ႏသေလဲဉ်း ခွေနဝ်ꩻမꩻ သီအီႏသေပါက ခွေဖါတောႏတဲင် တယ်ႏယိုခါ သီအီႏသေ ဝွေꩻဗွေႏ၊ သီအီႏထီႏဗာႏ ဝွေꩻဗွေႏ” နုဲင်းနဝ်ꩻသွူ။
8ဖိလိပ္ပုဒေါ့ꩻဖေႏ ဝွေꩻဗွေႏ၊ “ဗွေႏ၊ ဖါတောႏနဝ်ꩻ အွဉ်ႏနယ်ဖေႏနီမွိုင်။ နုဲင်းနဝ်ꩻမꩻ နီကားကအဝ်ႏ အလိုႏဆန္ဒအီႏဗွေ” နုဲင်းနဝ်ꩻသွူ။
9ဗွေႏယေသျု လဝ်းချာ၊ “ခွေအဝ်ႏငီꩻစွဉ်ႏသီ ကားကအဝ်ႏနဝ်ꩻ ညငါႏလဲဉ်း၊ ကွဲႏတွော့ꩻ နာꩻလꩻ သေတဝ်းဒွိုန်း ခွေဟောင်း၊ ဖိလိပ္ပု။ ပါꩻမုဲင်ꩻထီႏခွေနဝ်ꩻ ထီႏဗာႏလဲဉ်း ဖါတောႏသွူ။ တွိုႏနဝ်ꩻ၊ ပွိုးတမုဲင်ꩻ နာꩻရိုꩻဗာႏတွိုႏ၊ ‘အွဉ်ႏနယ်နီ ဖါတောႏ နုဲင်းမုဲင်ꩻဟောင်း’ နုဲင်းနဝ်ꩻသွူ။ 10ဗွေႏယေသျုဒေါ့ꩻဖေႏ ဝွေꩻဗွေႏ တပဲ့တောႏဖုံႏ၊ “ဖိလိပ္ပု၊ ခွေနဝ်ꩻ အဝ်ႏသော့ꩻဒျာႏ ဖါတောႏကိုတဲင် ဖါတောႏနဝ်ꩻတဲ့ အဝ်ႏသော့ꩻဒျာႏ ခွေကိုနဝ်ꩻ ပွိုးတမုဲင်ꩻ နာꩻတယွုမ်း တဝ်းဒွိုန်းဟောင်း။ ငဝ်းဖုံႏ ခွေကဒေါ့ꩻဖေႏဒါႏသီနဝ်ꩻ အဝ်ႏခွေထျꩻလွဉ် တမွေးတဝ်း၊ အဝ်ႏဖါတောႏ ကအဝ်ႏသော့ꩻငီꩻ သေႏသေႏဒါႏ ခွေအကိုနဝ်ꩻ ဝွေꩻဗွေႏနမ်း မာꩻဒျာႏထာꩻမာꩻ။ 11ခွေနဝ်ꩻ အဝ်ႏသော့ꩻ ဖါတောႏကိုတဲင် ဖါတောႏနဝ်ꩻ အဝ်ႏသော့ꩻ ခွေအကို ခွေကရိုꩻဒါႏနဝ်ꩻ ယွုမ်းသွော့ခွေ။ မဉ်ႏတယွုမ်းတဝ်းနဝ်ꩻ ခွေကမာꩻဒါႏဖုံႏနဝ်ꩻ ယွုမ်းသွော့။ 12ခွေဒေါ့ꩻဖေႏသီ အမွေးအမဲဉ်ႏ၊ ပါꩻမုဲင်ꩻယွုမ်းခွေတဲ့ နုဲင်းခွေကမာꩻနဝ်ꩻ အီႏမာꩻနွောင်ꩻ လွုမ်ꩻတကာႏတဝ်း ဝွေꩻသီး အီႏမာꩻတန်လွို ကယ်ꩻထဲင်းကနဝ်ꩻ ပွိုးတွော့ꩻ ခွေနဝ်ꩻ အဝ်ႏလွေꩻထေ့ ဖါတောႏထျꩻ အတွက်သွူ။ 13တွမ်ႏခွေအမဉ်ꩻ နာႏမတွော့ꩻ သီကကွီဒါႏ ဆုအမျိုꩻမုဲင်ꩻ တရိုꩻတဝ်း ခွေအီႏမာꩻဖေႏ၊ ပွိုးဖါတောႏ ဘွုန်ꩻတောႏနဝ်ꩻ အီႏအွဉ်ႏနယ်အီတွမ်ႏ ပိုခိုတောႏသွူ။ 14ပွိုးတွော့ꩻ ထာꩻကားကအဝ်ႏ အတာႏ တွမ်ႏခွေအမဉ်ꩻတောႏ နာႏမတွော့ꩻ သီမဉ်ႏကွီခွေနဝ်ꩻ ခွေအီႏဖေႏသွူ။
ကြောင်းစင်ဝိညာဉ်ႏတောႏဂတိတောႏ
15“သီမဉ်ႏရက်ခွေနဝ်ꩻ သီအီႏလွောက်ꩻနာႏ မာꩻလွဉ်ꩻဒျာႏ ခွေပညတ်ဖုံႏသွူ။ 16ခွေအီႏကွီ ဖါတောႏတဲင် ဝွေꩻဗွေႏ အီႏဖေႏသီ ကောစွဲကိုသား အလင်တပါꩻတွော့ꩻ အီႏအုံငီꩻ သေႏသေႏ သီနဝ်ꩻသွူ။ 17ဝွေꩻဗွေႏနဝ်ꩻထွာ ဝိညာဥ်ႏတောႏ ကဖေါႏနယ်ဖေႏဒါႏ ပွိုင်းဝွို့တွမ်ႏ သမ္မာႏတရာꩻ ဗွေႏဘုရာꩻ ခရာႏသွူ။ ပွိုးတွော့ꩻ တထီႏနွောင်ꩻတဝ်း ဝွေꩻဗွေႏတဲင် တသေငါတဝ်း ဝွေꩻဗွေႏအတွက် ကမ္ဘာႏလောကသားနဝ်ꩻ တလက္ခံႏနွောင်ꩻတဝ်း ဝွေꩻဗွေႏသွူ။ ကွဲႏတွော့ꩻ ကွပ်ပွိုး ဝွေꩻဗွေႏနဝ်ꩻ အဝ်ႏငီꩻစွူစွူ တွမ်ႏသီတဲင် အဝ်ႏသော့ꩻဒျာႏ သီအကို နဝ်ꩻမꩻ သီနဝ်ꩻ သေငါꩻ ဝွေꩻဗွေႏသွူ။
18“ခွေထွိုင်ႏကျွꩻလွေꩻ ထိုꩻချိန်ႏနဝ်ꩻ သီအီႏတအဝ်ႏကုဲင် တဆွူႏဗာႏတဝ်း၊ ခွေအီႏသဲင်ꩻထေ့ချာယင်းဒျာႏ သီသွူ။ 19တညတဝ်း ကမ္ဘာႏလောကသားဖုံႏနဝ်ꩻ အီႏတထီႏထဲင်း ဗာႏတဝ်းဒွုမ်ခွေ။ ကွဲႏတွော့ꩻ သီနဝ်ꩻ အီႏထီႏဗာႏ ခွေသွူ။ ပွိုးတွော့ꩻ ခွေနဝ်ꩻ အသက်အဝ်ႏမွန်အတွက် သီနဝ်ꩻတဲ့ သက်အီႏအဝ်ႏမွန်ပါကသွူ။ 20ခွေနဝ်ꩻ အဝ်ႏတီႏသော့ꩻဒျာႏ ဖါတောႏကိုတဲင် သီနဝ်ꩻ အဝ်ႏတီႏသော့ꩻ ခွေအကို ဗွိုန်နုဲင်း ခွေကအဝ်ႏတီႏသော့ꩻ သီအကိုနဝ်ꩻ အနီꩻနဝ်ꩻ အီႏဖျော်လွဉ်ချိန်ႏ သီ အီႏသေဗာႏသွူ။
21“လိုꩻကလက္ခံႏ ခွေပညတ်ကျမ်ꩻဖုံႏတွော့ꩻ ကလွောက်ꩻနာႏ မာꩻလွဉ်ꩻ ပညတ်ကျမ်ꩻသားဖုံႏနဝ်ꩻ ထွာပါꩻအဖြာꩻ ရက်ခွေသွူ။ လိုꩻကရက်ဒါႏ ခွေနဝ်ꩻ ခွေဖါတောႏ အီႏရက်သွူ။ ခွေနဝ်ꩻတဲ့ အီႏရက် ဝွေꩻသီးတဲင် ခွေနမ်း အီႏပေါႏနယ်ဖေႏ ဝွေꩻသီး” နုဲင်းနဝ်ꩻသွူ။
22ယုဒ (ယုဒသျာကရုတ် တမွေးတဝ်း)ဒေါ့ꩻ၊ “ဗွေႏ၊ နီဗွေႏနမ်းနဝ်ꩻ အီႏပေါႏနယ်ဖေႏ နီတွော့ꩻ အီႏတပေါႏနယ်ဖေႏတဝ်း ကမ္ဘာႏလောကသားဖုံႏနဝ်ꩻ ထွာနွောင်ꩻနုဲင်းမုဲင်ꩻဟောင်း” နုဲင်းနဝ်ꩻသွူ။
23ဗွေႏယေသျု လဝ်းချာဝွေꩻ၊ “လိုꩻကရက်ခွေသားဖုံႏနဝ်ꩻ အီႏလွောက်ꩻနာႏ ခွေထာꩻသွဉ်သင်ဖုံႏနဝ်ꩻသွူ။ ခွေဖါတောႏနဝ်ꩻ အီႏရက်ဝွေꩻသီးတဲင် ခွေဖါတောႏ တွမ်ႏခွေနဝ်ꩻ အီႏကျွꩻလွဉ်ထေ့ ဝွေꩻသီးထျꩻတွော့ꩻ အုံငီꩻစွဉ်ႏ ဝွေꩻသီးသွူ၊၊ 24လိုꩻတရက်တဝ်း ခွေနဝ်ꩻ တလွောက်ꩻနာႏတဝ်း ခွေထာꩻသွဉ်သင်နဝ်ꩻသွူ။ သီကအဝ်ႏ ဟွိုန်ဗာႏလဲဉ်းဒါႏ ထာꩻသွဉ်သင်ဖုံႏနဝ်ꩻ ခွေထာꩻသွဉ်သင်ဒျာႏ တမွေးတဝ်း၊ ကွဲႏတွော့ꩻ အဝ်ႏဖါတောႏ ကအွဉ်ႏစွꩻလွဉ်ခွေ အထာꩻသွဉ်သင်ဖုံႏဒျာႏသွူ။
25ခွေအဝ်ႏငီꩻနေဒွိုန်းက သီကျာꩻနဝ်ꩻ ခွေဒေါ့ꩻဖေႏသီ နုဲင်းယိုသွူ။ 26စွဉ်ႏခွေအမဉ်ꩻတောႏ နာႏမနဝ်ꩻ ဖါတောႏ ကအွဉ်ႏစွꩻလွဉ် ကြောင်းစင်ဝိညာဉ်ႏတောႏ ကောစွဲကိုသားနဝ်ꩻ အီႏသွဉ်သင်ဖေႏသီ ထာꩻစွုမ်ႏစွိုးတဲင် နုဲင်းခွေကအဝ်ႏဒေါ့ꩻနယ် ဖေႏလဲဉ်းဒါႏဖုံႏ ကားကအဝ်ႏနဝ်ꩻ သီအီႏယူႏလꩻချာလို့နဝ်ꩻသွူ။
27“ထာꩻငိမ်ꩻချမ်ꩻနဝ်ꩻ ခွေအွဉ်ႏကုဲင်ငီꩻဖေႏလဲဉ်းသီ၊ ခွေနမ်း ထာꩻငိမ်ꩻချမ်ꩻနဝ်ꩻ ခွေဖေႏသီနဝ်ꩻသွူ။ ခွေတဖေႏတဝ်း နုဲင်းကမ္ဘာႏလောကသား ကဖေႏနဝ်ꩻသွူ။ တွမ်ႏနန်းခီမွိုန်းတဲင် သꩻတွမ်ႏကုဲင်မွိုန်း။ တွမ်ႏငမ်းသꩻမွိုန်းဟုဲင်း။ 28ခွေကဒေါ့ꩻဖေႏဒါႏသီနဝ်ꩻ သီအဝ်ႏဟွိုန်ဗာႏလဲဉ်း၊ ‘ခွေနဝ်ꩻ အဝ်ႏထန်ႏလွေꩻ၊ ကွဲႏတွော့ꩻ ခွေအီႏသဲင်ꩻလွဉ် ချာယင်းဒျာႏ သီထျꩻ၊’ သီမဉ်ႏရက်ခွေနဝ်ꩻ နုဲင်းခွေကအဝ်ႏလွေꩻထေ့ဒါႏ ဖါတောထျꩻနဝ်ꩻ သီသꩻအီႏဟဝ်ရေꩻဗာႏ နဝ်ꩻသွူ။ ပွိုးတွော့ꩻ ဝွေꩻဗွေႏနဝ်ꩻ တန်မျတ်ကယ်ꩻက ခွေနဝ်ꩻသွူ။ 29ခလား ထာꩻနဝ်ꩻဖုံႏ မဉ်ႏထွာလွဉ်ချိန်ႏ ဖေႏနေး သီကယွုမ်းခွေနဝ်ꩻ ခလားထာꩻနဝ်ꩻဖုံႏ ကထွာလွဉ်ခါကာႏ ယိုခါ ခွေဒေါ့ꩻဖေႏသီသွူ။ 30ပွိုးတွော့ꩻ ကအုပ်စိုꩻဒါႏ ကမ္ဘာႏလောကယို သားဖုံႏနဝ်ꩻ အဝ်ႏလွဉ်လဲဉ်းအတွက် ခွေအီႏတဒေါ့ꩻရီည နွောင်ꩻထဲင်းတဝ်းဒွုမ် သီသွူ။ ဝွေꩻတန်ꩻခိုꩻနဝ်ꩻ တနွောင်ꩻတဝ်းခွေ။ 31ကွဲႏတွော့ꩻ ခွေရက်ဖါတောႏ ကျောင်ꩻနဝ်ꩻ ကမ္ဘာႏလောကသား အီႏသေဗာႏသွူ။ နဝ်ꩻမꩻ နုဲင်းဝွေꩻဗွေႏ ကမိန်းဖေႏဒါႏ ခွေအတွိုင်ꩻနဝ်ꩻ ခွေမာꩻလွဉ်ꩻလို့နဝ်ꩻသွူ။
“လွဉ်ဟုဲင်း၊ အဝ်ႏခင်ႏလမ်းယို နီအွဉ်ဝင်ꩻ လွေꩻထိုꩻတွမ်” နုဲင်းနဝ်ꩻသွူ။
ទើបបានជ្រើសរើសហើយ៖
ယောဟန် 14: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
