ယောဟန် 12
12
ဆျာꩻလူးနမ်းမန်ꩻဟွမ်ဗွေႏယေသျုခင်ႏလောင်းဒုံဗေတနိကို
(မတဲ ၂၆:၆–၁၃။ မာကု ၁၄:၃–၉)
1ပွယ်ꩻပတ္တခါ ခလားကတွိုႏ သူနီꩻနဝ်ꩻ ဗွေႏယေသျု လွေꩻဒုံဗေတနိ၊ ပါꩻခိုအဝ်ႏထာꩻသီကို ဝွေꩻဗွေႏ ကမာꩻထွိုင်ႏမွန် လွဉ်ချာဖေႏဒါႏ လာဇရုအလမ်းသွူ။ 2ဝွေꩻဗွေႏတာႏ ဝွေꩻသီးဖျင်ရဲဉ်ꩻဖေႏ ထာꩻအံႏ မွူးဟာခိုႏနဝ်ꩻကို၊ မာတ အဝ်ႏတဲင် တမ်ꩻလွူး ဖေႏနဝ်ꩻသွူ။ လိုꩻကအုံလင်ꩻအံႏငီꩻ ထာꩻအံႏခွုံႏလောင်း စွဉ်ႏဗွေႏယေသျုနဝ်ꩻ လာဇရုအဝ်ႏပါသွူ။ 3#လု ၇:၃၇၊ ၃၈။ နဝ်ꩻထွူ မာရိထူႏလွဉ် နမ်းမန်ꩻဟွမ် အငိုꩻတန်စား ကမာꩻဒါႏတွမ်ႏ နာဒုနမ်းမန်ꩻဟွမ်စဲစ် ပလဲင်ꩻ အကျပ်သွံဆီ တဖြုံႏလွုမ်းနဝ်ꩻတွော့ꩻ ဆျာꩻလူးစွဉ်ႏ ဗွေႏယေသျု ခင်ႏလောင်းတဲင် စွဉ်ႏဝွေꩻမူႏကလူꩻ ဒွိုတ်ꩻဖေႏစွဉ်ႏသွူ။ နမ်းမန်ꩻလွီးနဝ်ꩻ နွမ်ꩻဟွမ်ထံစွဉ်ႏ တလမ်းလွုမ်းသွူ။ 4ဗွေႏယေသျု တပဲ့တောႏတဖြာꩻ အဖြာꩻ သစ္စာႏကအီႏဖေါက်ဒါႏ ဝွေꩻဗွေႏ ကထွာ ယုဒသျာကရုတ်နဝ်ꩻဒေါ့ꩻ၊ 5“နမ်းမန်ꩻဟွမ်ယိုနဝ်ꩻ စာလꩻနွောင်ꩻ ရွဉ်ဒင်္ဂါꩻ အဗီႏသွံရျာꩻတဲင် ရွဉ်နဝ်ꩻနဝ်ꩻ ပွိုးတမုဲင်ꩻ တဖေႏထိုꩻတဝ်း လိုꩻကေန်ꩻခြောဖုံႏ နုဲင်းမုဲင်ꩻဟောင်း” နုဲင်းနဝ်ꩻသွူ။ 6ဝွေꩻကဒေါ့ꩻနုဲင်းယိုနဝ်ꩻ ကွပ်ပွိုးဝွေꩻနဝ်ꩻ သꩻညင်ꩻငါႏ လိုꩻကေန်ꩻခြောဖုံႏ တမွေးတဝ်း၊ ကွပ်ပွိုး ဝွေꩻနဝ်ꩻထွာဒျာႏ တခွန်ꩻတဖြာꩻသွူ။ ဝွေꩻနဝ်ꩻ အဝ်ႏဆဲင်ဗာႏရွဉ် တောင်းပွိုတဲင် ဝွေꩻအဝ်ႏဗို့ꩻတခွန်ꩻ သွုံꩻချာဒျာႏ အနမ်းတာႏသွူ။
7ကွဲႏတွော့ꩻ ဗွေႏယေသျုဒေါ့ꩻ၊ “အွဉ်ႏဗော့ꩻဝွေꩻမူႏ နုဲင်းနဝ်ꩻဟုဲင်း။ အွဉ်ႏဝွေꩻမူႏနဝ်ꩻ ဖျင်ရဲဉ်ꩻ ဖေႏကသင်္ဂြိုဟ်ႏခွေ အနီꩻနဝ်ꩻတာႏဟုဲင်း။ 8#ဟော်ꩻ ၁၅:၁၁။ သီနဝ်ꩻ အီႏအဝ်ႏငီꩻ သေႏသေႏဒျာႏ စွဉ်ႏလိုꩻကေန်ꩻခြောဖုံႏ။ ကွဲႏတွော့ꩻ သီအီႏတအဝ်ႏငီꩻ သေႏသေႏတဝ်းခွေ” နုဲင်းနဝ်ꩻသွူ။
ကျံႏမာꩻသီတေ့ꩻလာဇရု
9ဗွေႏယေသျု အဝ်ႏသော့ꩻ ဒုံဗေတနိကို လိုꩻအာငါႏဖုံႏ ထွိုင်ႏဟွိုန် ဝွေꩻသီးလွေꩻ နဝ်ꩻကိုတဲင် ကွပ်ပွိုး ဖေႏကထီႏ ဗွေႏယေသျုလွုမ်ꩻ တမွေးတဝ်း ဖေႏကထီႏပါ လာဇရု အဝ်ႏထာꩻသီကို ဗွေႏယေသျု ကမာꩻထွိုင်ႏမွန် လွဉ်ချာနဝ်ꩻသွူ။ 10နဝ်ꩻမꩻ ဖေႏကမာꩻသီပါ လာဇရုနဝ်ꩻ ယဇ်ပရောဟိတ်တန်ဖုံႏ မာꩻစွဉ်ႏ အစီꩻစဲဉ်ႏသွူ။ 11ကွပ်ပွိုး လာဇရုတွော့ꩻ ဂျူးလိုꩻအာဖုံႏနဝ်ꩻ ပယ်ႏထိုꩻဝွေꩻသီးတဲင် ယွုမ်းထိုꩻတောစွဉ်ႏ ဗွေႏယေသျုနဝ်ꩻသွူ။
တွမ်ႏအောင်ႏပွယ်ꩻနွို့သော့ꩻဝေင်ꩻယေရုသလမ်ႏကို
(မတဲ ၂၁:၁–၁၁။ မာကု ၁၁:၁–၁၁။ လုကာ ၁၉:၂၈–၄၀)
12ဆုဲင်ꩻတနီꩻ လိုꩻစွိုꩻအာဖုံႏ ကအဝ်ႏလွဉ်ဒါႏ ပွယ်ꩻပတ္တခါသားနဝ်ꩻ ဟွိုန်ဗွေႏယေသျု အဝ်ႏကျွꩻလွဉ် ဝေင်ꩻယေရုသလမ်ႏသွူ။ 13#သာ ၁၁၈:၂၅၊ ၂၆။ နဝ်ꩻမꩻ ဝွေꩻသီးထူႏလွဉ် စွန်ပလွန်ပင်ဖုံႏတဲင် ခြောဝ်သန်အငဝ်းရိုꩻ ၊ “အုပ်ꩻထင်ႏသွော့ ဗွေႏဘုရာꩻဟုဲင်း။ ပါꩻကကျွꩻလွဉ်ဒါႏစွဉ်ႏ ဗွေႏအမဉ်ꩻနာႏမနဝ်ꩻ ဗွေႏဘုရာꩻ ယံကဖေႏသွော့ မင်္ဂလာႏ။ ဗွေႏဘုရာꩻ ယံကဖေႏသွော့ ဣသရေးခွန်တန် မင်္ဂလာႏ၊” နုဲင်းနဝ်ꩻတဲင် ထန်ႏလွေꩻမော့ꩻခွဲ ဝွေꩻဗွေႏသွူ။
14ဗွေႏယေသျုထီႏ သေလာꩻတဗာႏတဲင် ထင်ႏထုမ်း သေလာꩻနဝ်ꩻလောင်း၊ ဗွိုန်နုဲင်း လိတ်ကျမ်ꩻကရိုꩻ၊
15 #
ဇာ ၉:၉။ “ဝေင်ꩻသိအုံ၊ တွမ်ႏငမ်းသꩻမွိုန်း။
ယိုသီခွန်တန် အဝ်ႏထုမ်းသေလာꩻ ပေႏတဗာႏလောင်း ၊
အဝ်ႏကျွꩻလွဉ်” နုဲင်းနဝ်ꩻသွူ။
16အချိန်ႏနဝ်ꩻနဝ်ꩻ ဝွေꩻဗွေႏ တပဲ့တောႏဖုံႏ တသေနာႏတဝ်းဒွိုန်း ကျမ်ꩻအချက်ယိုသွူ။ ကွဲႏတွော့ꩻ ဗွေႏယေသျု ဘွုန်ꩻသရေႏတောႏ ထွိုင်ႏပွင်ꩻလွဉ်ချိန်ႏမꩻ နုဲင်းကျမ်ꩻချက် ကဒေါ့ꩻဒါႏ ပွိုင်းဝွို့တွမ်ႏ ဝွေꩻဗွေႏခရာႏ ယိုဖုံႏစွဉ်ႏ ဝွေꩻသီး ကမာꩻလဲဉ်းဒါႏ ယိုဖုံႏနဝ်ꩻတဲ့ ထွာဝွေꩻဗွေႏတာႏ ဒျာႏကျောင်ꩻ ဝွေꩻသီး ယူႏလꩻချာယင်းနဝ်ꩻသွူ။
17ဝွေꩻဗွေႏ ကဟဲ့ꩻထန်ႏလွဉ် လာဇရု သဲင်ႏခဲင်ꩻထမ်းအို အဝ်ႏထာꩻသီကို ကမာꩻထွိုင်ႏမွန်လွဉ်ချိန်ႏ လိုꩻဖုံႏ ကအဝ်ႏငီꩻဒါႏ တွမ်ႏဗွေႏယေသျုနဝ်ꩻ နုဲင်းထာꩻကထွာလွဉ် အခရာႏနဝ်ꩻ ဒေါ့ꩻဟွိုန်ဖေႏ တောစွဉ်ႏ ဝင်ꩻနဝ်ꩻသွူ။ 18နုဲင်းဝွေꩻဗွေႏ ကမာꩻနယ် အံႏဖြာႏခရာႏ နိမိတ်လက္ခဏာႏယိုနဝ်ꩻ ဝွေꩻသီး အဝ်ႏဟွိုန်နဝ်ꩻမꩻ လိုꩻစွိုꩻဖုံႏ မော့ꩻခွဲစွဉ်ႏ ဝွေꩻဗွေႏနဝ်ꩻသွူ။ 19နဝ်ꩻထွူ ဖါရိသဲဖုံႏ တဖြာꩻတွမ်ႏတဖြာꩻ ဒေါ့ꩻဖေႏလို့ဝင်ꩻ ထာꩻကားကအဝ်ႏနဝ်ꩻ နီတအောင်ႏနွောင်ꩻ တဝ်းဒွုမ်နဝ်ꩻ သီအဝ်ႏထီႏဒျာႏ၊ ထွားဟုဲင်း တဟံႏတန်လွုမ်းနဝ်ꩻ အဝ်ႏပါလွဉ်ꩻထိုꩻလဲဉ်းဝွေꩻ” နုဲင်းနဝ်ꩻသွူ။
ဂရိလိုꩻမျိုꩻဖုံႏယင်ဟန်ႏအဝ်ႏထုမ်ႏဗွေႏယေသျု
20ကအီႏဝုဲင်ႏ ကိုꩻကွယ်ႏဒါႏ ပွယ်ꩻယံꩻတွင်ꩻ လိုꩻကအဝ်ႏလွဉ်ဒါႏ ဝေင်ꩻယေရုသလမ်ႏနဝ်ꩻ ဂရိလိုꩻမျိုꩻဖုံႏ ယင်ဟန်ႏအဝ်ႏပါငီꩻသွူ။ 21ဝွေꩻသီးလွေꩻထေ့ ဖိလိပ္ပုထျꩻ (ဝွေꩻနဝ်ꩻထွာ လိုꩻဝေင်ꩻဗဲက်သဲဒ၊ ကာလိလဲခမ်းသား)တဲင်ဒေါ့ꩻ၊ “ဗွေႏ၊ နီမဉ်ထီႏငါႏ ဗွေႏယေသျု” နုဲင်းနဝ်ꩻသွူ။
22ဖိလိပ္ပု လွေꩻတဲင် အွဉ်ႏဒေါ့ꩻနယ် အန္ဒြေတွော့ꩻ ဝွေꩻသီးဝင်ꩻနီနဝ်ꩻ လွေꩻဒေါ့ꩻနယ် ဗွေႏယေသျုနဝ်ꩻသွူ။ 23ဗွေႏယေသျု လဝ်းချာဝွေꩻသီး၊ “လိုꩻပိုခို အီႏလက္ခံႏဗာႏ ဘွုန်ꩻသရေႏတန်နဝ်ꩻ ယိုခါ အချိန်ႏနားရီႏ တွိုႏဖျော်လွဉ်လဲဉ်းသွူ။ 24ခွေဒေါ့ꩻဖေႏသီ အမွေးအမဲဉ်ႏ။ ဗွူကလာꩻခူꩻ တခူꩻနဝ်ꩻ ပေါႏအွဉ်ႏထဲ့လင်ꩻသော့ꩻတဝ်း ဟံႏကိုတွော့ꩻ အဝ်ႏစွူစွူဒျာႏ တသေင်ထိုꩻတဝ်းနဝ်ꩻ တခူꩻငါတဲ့ တလွိုလွဉ် အာထဲင်းတဝ်းသွူ။ မဉ်ႏသီထိုꩻမꩻ အရာႏဖုံႏ အီႏတိုꩻပွါꩻ ထန်ႏလွဉ်အာနဝ်ꩻသွူ။ 25#မ ၁၀:၃၉၊ ၁၆:၂၅၊ မာ ၈:၃၅၊ လု ၉:၂၄၊ ၁၇:၃၃။ လိုꩻကရက်ဒါႏ ဝွေꩻသီးနမ်း အသက်နဝ်ꩻ အသက်အီႏသွုမ်ꩻထိုꩻသွူ။ လိုꩻကလွꩻထီႏချာ ဝွေꩻသီး နမ်းအသက်နဝ်ꩻ ကမ္ဘာႏလောကကိုယို အီႏထိန်ꩻဟဝ် ထာဝရအသက်သွူ။ 26ပါꩻမုဲင်ꩻ မဉ်မာꩻခွေထာꩻမာꩻနဝ်ꩻ လွေꩻလွဉ်ꩻဗာႏ ခွေဆꩻချာ၊ ဖေႏနေး ခွေအသွဉ်းဖုံႏနဝ်ꩻ အီႏအဝ်ႏငီꩻဗာႏ ခွေကအဝ်ႏဒါႏ အခင်ႏလမ်းနဝ်ꩻသွူ။ ပါꩻကမာꩻဒါႏ ခွေထာꩻမာꩻနဝ်ꩻ ခွေဖါတောႏ အီႏထူႏဂွုဏ်ႏသွူ။
ဗွေႏယေသျုဒေါ့ꩻထန်ႏပွိုင်းဝွို့တွမ်ႏဝွေꩻဗွေႏအီႏသီခရာႏ
27“ယိုခါ ခွေသꩻနဝ်ꩻ ဒုက္ခငါႏတဲင် ခွေအီႏရိုꩻဗာႏ နုဲင်းမုဲင်ꩻဟောင်း။ ခွေအီႏရိုꩻ၊ ‘ဖါတောႏ၊ အချိန်ႏနားရီႏယိုနဝ်ꩻ တွမ်ႏအွဉ်ႏထဲ့လူးမွိုန်း ခွေလောင်း အီႏရိုꩻဗာႏ နုဲင်းနဝ်ꩻဟောင်း။’ ကွဲႏတွော့ꩻ ဖေႏနေး ခွေကကာႏလွေꩻဗာႏ ထာꩻဒုက္ခ အချိန်ႏနားရီႏယိုအတွက် ခွေကျွꩻလွဉ်ဗာႏနဝ်ꩻသွူ။ 28ဖါတောႏ၊ နီဗွေႏ အမဉ်ꩻနာႏမꩻ ဘွုန်ꩻသရေႏတောႏ ယံကတောင်ႏလေသွော့” နုဲင်းနဝ်ꩻသွူ။
နဝ်ꩻထွူ အဝ်ႏခမ်းထီမို့ꩻလောင်း ငဝ်းဒေါ့ꩻလင်ꩻတစွိုး၊ “ခွေအီလွဉ်ဖေႏ ဘွုန်ꩻသရေႏတောႏတဲင် ခွေအီႏမာꩻဖေႏဖျင်ယင်း တလဲင်ႏ” နုဲင်းနဝ်ꩻသွူ။
29လိုꩻစွိုꩻဖုံႏ ကအဝ်ႏအုံထွိုင်ႏ နဝ်ꩻကိုနဝ်ꩻ ဟွိုန်ဗာႏငဝ်းနဝ်ꩻတဲင် ဝွေꩻသီးကို ယင်ဟန်ႏသားဒေါ့ꩻ နဝ်ꩻနဝ်ꩻခမ်းခြွိုင်ꩻဒျာႏ၊ အလင်ဖုံႏနဝ်ꩻဒေါ့ꩻ၊ “မို့ꩻလောင်းတမန်ႏတပါꩻ ဒေါ့ꩻဒျာႏဖေႏဝွေꩻ” နုဲင်းနဝ်ꩻသွူ။
30ကွဲႏတွော့ꩻ ဗွေႏယေသျု ဒေါ့ꩻဖေႏဝွေꩻသီး၊ “ငဝ်းကဒေါ့ꩻဒါႏယိုနဝ်ꩻ ထွာခွေတာႏ တမွေးတဝ်း၊ ထွာသီတာႏဒျာႏသွူ။ 31ယိုခါ ကမ္ဘာႏလောကယိုနဝ်ꩻ အီႏထွာ ထာꩻစီႏရင်ႏချိန်ႏသွူ။ ယိုခါ ကအဝ်ႏအုပ်စိုꩻဒါႏ ကမ္ဘာႏလောကနဝ်ꩻ အီႏခံႏဗာႏသွူ နုဲင်ႏထိုꩻနဝ်ꩻသွူ။ 32အဝ်ႏကမ္ဘာႏလောက ကမျောက်ပင်ႏ ထင်ႏကီခွေချိန်ႏ လိုꩻစွုမ်ႏဖြာꩻနဝ်ꩻ ခွေအီႏထွို့ꩻဗော့ꩻလွဉ် ခွေထျꩻ” နုဲင်းနဝ်ꩻသွူ။ 33(ဝွေꩻဗွေႏ ကဒေါ့ꩻဗာႏ နုဲင်ႏယိုနဝ်ꩻ ဝွေꩻဗွေႏဖေါႏနယ်ဒျာႏ အီႏခံႏသီဗာႏနုဲင်းမုဲင်ꩻ ဝွေꩻဗွေႏ အီႏခံႏစာꩻဗာႏ ထာꩻဒုက္ခ အစားမုဲင်ꩻနဝ်ꩻသွူ။)
34 #
သာ ၁၁၀:၄၊ ဟေသျာ ၉:၇၊ ဧသ ၃၇:၂၅၊ ဒံ ၇:၁၄။ လိုꩻစွိုꩻဖုံႏ လဝ်းချာ၊ “မေသျိယနဝ်ꩻ သက်အီႏအဝ်ႏမွန် သေႏသေႏဒျာႏ နီပညတ်ကျမ်ꩻကို ရိုꩻနုဲင်းနဝ်ꩻသွူ။ တွိုႏနဝ်ꩻ နာꩻရိုꩻနွောင်ꩻ လိုꩻပိုခိုနဝ်ꩻ အီႏခံႏဗာႏ အမျောက်ပင်ႏ ထင်ႏကီ နုဲင်းမုဲင်ꩻဟောင်း။ လိုꩻပိုခိုယိုနဝ်ꩻ ထွာပါꩻမုဲင်ꩻဟောင်း” နုဲင်းနဝ်ꩻသွူ။
35ဗွေႏယေသျု လဝ်းချာ၊ “ထာꩻလေနဝ်ꩻ အဝ်ႏငီꩻဒျာႏသီ တဆင်ႏလွုမ်ꩻ၊ ဖေႏနေးထာꩻခေ့ꩻ ကအဝ်ႏဒို့ꩻဗဉ်ႏလꩻမွိုန်း သီလောင်းနဝ်ꩻ ထာꩻလေ ကအဝ်ႏငီꩻနေကသီ တဆင်ႏပေႏယံꩻတွင်ꩻ လွေꩻသွုပ်သွော့ သီတဖူꩻဟုဲင်း။ ပွိုးပါꩻအဖြာꩻ ကထောင်လွေꩻဒါႏ ထာꩻခေ့ꩻကိုနဝ်ꩻ ဝွေꩻအီႏလွေꩻ မုဲင်ꩻကိုတဲ့ တသေတဝ်းသွူ။ 36ထာꩻလေ အဝ်ႏငီꩻနေဒွိုန်းက သီယံꩻတွင်ꩻ ယွုမ်းသွော့ ထာꩻလေဟုဲင်း၊ ဖေႏနေးသီ ကထွာဗာႏ လိုꩻထာꩻလေ အကိုဖုံႏဟုဲင်း” နုဲင်းနဝ်ꩻသွူ။
လိုꩻထာꩻယွုမ်းအဲဉ်ထဝ်းသားဖုံႏ
ဗွေႏယေသျုဒေါ့ꩻ နုဲင်းယိုထွူနဝ်ꩻ ဝွေꩻဗွေႏ ထန်ႏလွေꩻထိုꩻတဲင် ဝွေꩻဗွေႏနမ်းနဝ်ꩻ သျောင်ႏလဲ့ထိုꩻဒျာႏဝွေꩻသီးသွူ။ 37ဝွေꩻသီးဆꩻငါနဝ်ꩻ ဝွေꩻဗွေႏလဲင်ꩻ အွဉ်ႏနယ်ဖေႏလဲဉ်း နိမိတ်လက္ခဏာႏ စားယိုဖုံႏ ကားကအဝ်ႏစွဉ်ႏတဲ့ ဝွေꩻသီး တယွုမ်းအံႏတဝ်း ဝွေꩻဗွေႏ၊ 38#ဟေသျာ ၅၃:၁ (LXX)။ ဖေႏနေး ကမဲဉ်ႏလွဉ်ꩻ နုဲင်းပရောဖဲစ် ဟေသျာယ ကဒေါ့ꩻနဝ်ꩻသွူ။
“ဗွေႏ၊ နီကဒေါ့ꩻနယ်ဖေႏဒါႏ ငဝ်းသတင်ꩻနဝ်ꩻ ပါꩻမုဲင်ꩻ အီႏယွုမ်းဟောင်း။
ဗွေႏဘုရာꩻ တန်ꩻခိုꩻနဝ်ꩻ ဝွေꩻဗွေႏ အီႏအွဉ်ႏနယ် ထင်ႏသျာꩻ ပါꩻမုဲင်ꩻဟောင်း” နုဲင်းနဝ်ꩻသွူ။
39နဝ်ꩻမꩻ ဝွေꩻသီး အီႏတယွုမ်းနွောင်ꩻတဝ်းနဝ်ꩻ ကွပ်ပွိုး ဟေသျာယနဝ်ꩻ ဒေါ့ꩻပါက၊
40 # ဟေသျာ ၆:၁၀ (LXX)။ ဗွေႏဘုရာꩻနဝ်ꩻ မာꩻခေ့ꩻထိုꩻ ဝွေꩻသီးမဲ့ဖုံႏတဲင်
အွဉ်ႏဒို့ꩻခါꩻထိုꩻ ဝွေꩻသီးသꩻဖုံႏ၊
ဖေႏနေး ဝွေꩻသီးမဲ့ဖုံႏ ကထီႏနွောင်ꩻမွိုန်းတွော့ꩻ
ဝွေꩻသီးသꩻဖုံႏ ကသေနာႏနွောင်ꩻမွိုန်းနဝ်ꩻ၊
ဗွေႏဘုရာꩻမိန်း၊ ခွေတာႏ ကအီႏလုမ်ꩻလာꩻဟဝ်ဖေႏ ဝွေꩻသီးနဝ်ꩻ၊
ဝွေꩻသီး အီႏတခွယ်သဲင်ꩻချာတဝ်း ခွေထျꩻ” နုဲင်းနဝ်ꩻသွူ။
41ကွပ်ပွိုး ဝွေꩻထီႏဗာႏ ဝွေꩻဗွေႏ ဘွုန်ꩻသရေႏတောႏ အတွက် ဝွေꩻဗွေႏ ခရာႏနဝ်ꩻ ဟေသျာယ ဒေါ့ꩻဗာႏ နုဲင်းယိုသွူ။
42လဲင်ꩻတွိုႏစွဉ်ႏ နုဲင်းနဝ်ꩻတဲ့ ဂျူးအာႏဏာႏပဲင်ႏ သားဖုံႏနဝ်ꩻ ယွုမ်းဗွေႏယေသျု အာငါႏသွူ။ ကွဲႏတွော့ꩻ ကွပ်ပွိုး ဖါရိသဲဖုံႏ အတွက် ဖေႏနေး အဝ်ႏတရာꩻစရွပ်ကို ကခံႏဗာႏမွိုန်း ဝါးထန်ႏထိုꩻနဝ်ꩻ ဝွေꩻသီး ဒေါ့ꩻထင်ႏသျာꩻ ဝွေꩻဗွေႏခရာႏ တဗွိုန်ႏတဝ်းသွူ။ 43လိုꩻကဖေႏဒါႏ ဘွုန်ꩻသရေႏနဝ်ꩻ ဝွေꩻသီး ကျွိုက်နစ်သက် ကယ်ꩻလဲဉ်းက ဗွေႏဘုရာꩻ ကဖေႏ ဘွုန်ꩻသရေႏနဝ်ꩻသွူ။
ဗွေႏယေသျုကဒေါ့ꩻဒါႏငဝ်းဖုံႏနဝ်ꩻထွာတရာꩻဆွုံꩻဖျတ်ချက်
44ဗွေႏယေသျု ဒေါ့ꩻသင်ႏသန် တွမ်ႏငဝ်းတငွါ၊ “ပါꩻမုဲင်ꩻယွုမ်းခွေနဝ်ꩻ ယွုမ်းခွေလွုမ်ꩻ တကာႏတဝ်း၊ ယွုမ်းပါက ဝွေꩻဗွေႏ ကအွဉ်ႏစွꩻလွဉ်ခွေ နဝ်ꩻသွူ။ 45ပါꩻမုဲင်ꩻထီႏခွေနဝ်ꩻတဲ့ ထီႏပါက ဝွေꩻဗွေႏ ကအွဉ်ႏစွꩻလွဉ် ခွေနဝ်ꩻသွူ။ 46ဖေႏနေး လိုꩻစွုမ်ႏဖြာꩻ ကယွုမ်းဒါႏခွေ ဖေႏကအဝ်ႏသော့ꩻ စွူစွူဗာႏမွိုန်း ထာꩻခေ့ꩻကိုနဝ်ꩻ ခွေကျွꩻလွဉ် ကမ္ဘာႏလောကကို နုဲင်းထာꩻလေသွူ။ 47လိုꩻဖုံႏမဉ်ႏ ဟွိုန်ခွေတရာꩻငဝ်းတဲင် တလွောက်ꩻနာႏတဝ်း တရာꩻငဝ်းနဝ်ꩻ ခွေအီႏတစီႏရင်ႏတဝ်း ဝွေꩻသီး၊ ခွေကကျွꩻလွဉ်နဝ်ꩻ အီႏစီႏရင်ႏ ကမ္ဘာႏလောကသား တမွေးတဝ်း၊ အီႏကယ်ႏဒျာႏသွူ။ 48လိုꩻကပယ်ႏဒါႏခွေတဲင် တလက္ခံႏတဝ်း ခွေတရာꩻငဝ်းနဝ်ꩻ ကအီႏစီꩻရင်ႏဒါႏ ဝွေꩻသီးနဝ်ꩻ အဝ်ႏတပါꩻသွူ။ ခွေကအဝ်ႏဒေါ့ꩻဖေႏဒါႏ ငဝ်းဖုံႏနဝ်ꩻ အဆုဲင်ꩻသွတ်ꩻမွူးနီꩻ အီႏထွာဗာႏ ဝွေꩻသီး တရာꩻလိုꩻတန်နဝ်ꩻသွူ။ 49ပွိုးတွမ်ႏ ခွေနမ်း အခွင်ꩻအာႏဏာႏတွော့ꩻ ဒေါ့ꩻဖေႏမွေးတဝ်း၊ ဖါတောႏ ကအွဉ်ႏစွꩻလွဉ်ခွေနဝ်ꩻ မိန်းဖေႏခွေ၊ ဖေႏခွေကဒေါ့ꩻအတွက် ယိုနဝ်ꩻထွာ အမွေးအမဲဉ်ႏသွူ။ 50ဖါတောႏအမိန်းနဝ်ꩻ အီလွဉ်ဖေႏ ထာဝရ အသက်ကျောင်ꩻ ခွေအဝ်ႏသေသွူ။ နဝ်ꩻထွူ နုဲင်းဖါတောႏ ကဒေါ့ꩻဖေႏလဲဉ်းဒါႏ ခွေအတွိုင်ꩻ ခွေဒေါ့ꩻဖေႏဗာႏ” နုဲင်းနဝ်ꩻသွူ။
ទើបបានជ្រើសរើសហើយ៖
ယောဟန် 12: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
