ကမ္ဘာႏစ 46
46
ယာကုပ်တမွိုးဖါပိုစွိုꩻဖုံႏ
1ယာကုပ်ရဲဉ်ꩻလို့ ဝွေꩻထာꩻခြိုꩻဖုံႏ ကားကအဝ်ႏ ထွူထန်ႏလွေꩻ ဗေသျာဗအရပ်တဲင်၊ နဝ်ꩻကိုနဝ်ꩻ ဝွေꩻဖါ ဣသဲစ် ဗွေႏဘုရာꩻတာႏ ဝွေꩻပူႏဇောႏထင်ႏဖေႏ ယဇ်သွူ။ 2အဟာနဝ်ꩻ ဗွေႏဘုရာꩻဟဲ့ꩻဝွေꩻ ရူႏပါႏရုံႏကို “ယာကုပ်၊ ယာကုပ်” နုဲင်းနဝ်ꩻတဲင်
ဝွေꩻလဝ်းချာ “ဗွေႏ၊ ခွေသွဉ်းအဝ်ႏဒျာႏ” နုဲင်းနဝ်ꩻသွူ။
3“ခွေနဝ်ꩻထွာဗွေႏဘုရာꩻ သီဖါအဗွေႏဘုရာꩻသွူ။” ဝွေꩻဗွေႏမိန်း၊ “ကအီႏလွေꩻဗာႏ အီဂျစ်ခမ်းနဝ်ꩻ တွမ်ႏငမ်းမွိုန်းတဝ်း နာꩻပိုလီꩻစွိုးခွိုꩻနဝ်ꩻ ခွေအီႏမာꩻထွာလွဉ် လိုꩻမျိုꩻတန် ခမ်းသူꩻသွူ။ 4ခွေအီႏလွေꩻလွဉ်ꩻနာꩻ အီဂျစ်ခမ်းတဲင် နာꩻပိုလီꩻစွိုးခွိုꩻနဝ်ꩻ ခွေအီႏဟဲ့ꩻသဲင်ꩻ ချာယင်းဒျာႏ ခမ်းယိုသွူ။ ယောသပ်နဝ်ꩻ အီႏအဝ်ႏငီꩻနာꩻ ဗꩻတွိုႏစွဉ်ႏ နာꩻကသီ” နုဲင်းနဝ်ꩻသွူ။
5ယာကုပ် အဝ်ႏဗေသျာဗအရပ် ထန်ႏလွေꩻသွူ။ ယာကုပ် အပိုခိုဖုံႏနဝ်ꩻ အွဉ်ႏထုမ်းသော့ꩻငီꩻ ဝွေꩻတွမ်ႏ ဝွေꩻသီးပိုပေႏဆားဖုံႏ၊ ဝွေꩻသီးမာဖုံႏ၊ ခွန်တန် ကဖေႏသေꩻဒါႏ သေလောကိုနဝ်ꩻသွူ။ 6#တ ၇:၁၅။ ဝွေꩻသီးထူႏ ဝွေꩻသီးကပဲင်ႏဒါႏ တိရစ္ဆာန်ႏဖုံႏ တွမ်ႏကထုမ်ႏလꩻဒါႏ ထာꩻခြိုꩻဥစ္စာႏ ခါနန်ခမ်းကိုတဲင် ဝွေꩻသီးလွေꩻထိုꩻစွဉ်ႏ အီဂျစ်ခမ်းသွူ။ ယာကုပ် ဟဲ့ꩻလွေꩻပါလို့စွဉ်ႏ ဝွေꩻပိုလီꩻစွိုးခွိုꩻဖုံႏ၊ 7ဝွေꩻပိုခိုဖုံႏ၊ ဝွေꩻပိုမူႏဖုံႏတွမ်ႏ ဝွေꩻလီꩻခိုလီꩻမူႏ ကားကအဝ်ႏနဝ်ꩻသွူ။
8ယာကုပ်တွမ်ႏ အတမွိုးဖါပိုစွိုꩻဖုံႏ ကပါလွဉ်ꩻဒါႏ ဝွေꩻအီဂျစ်ခမ်းနဝ်ꩻ ဝွေꩻပိုခိုယင်းရုဗေင်၊ 9ရုဗေင်ပိုခို ဟာနုတ်၊ ဖါလု၊ ဟေဇရုန်တွမ်ႏ ကာမိဖုံႏနဝ်ꩻသွူ။ 10သိမောင်တွမ်ႏ ဝွေꩻပိုခို ယေမွေလ၊ ယာမိန်၊ ဩဟတ်၊ ယာခိန်၊ ဇောဟာတွမ်ႏ ခါနန်မူႏကလꩻဒါႏ ပိုခိုသျောလနဝ်ꩻသွူ။ 11လေဝိတွမ်ႏ ဝွေꩻပိုခိုဖုံႏ ကထွာဂေရသျုန်၊ ကောဟတ်တွမ်ႏ မေရာရိသွူ။ 12ယုဒတွမ်ႏ ဝွေꩻပိုခိုဖုံႏ ကထွာသျေလ၊ ဖါရဲက်တွမ်ႏသာရား (ယုဒပိုခိုအလင်ဖုံႏ ကထွာဒါႏ ဧရတွမ်ႏဩနန်နဝ်ꩻ သီထိုꩻဒျာႏ ခါနန်ခမ်းကိုသွူ) ဖါရဲက်ပိုခို ဟေဇရုန်တွမ်ႏ ဟာမုလ။ 13ဣသခါတွမ်ႏ ဝွေꩻပိုခိုဖုံႏ တောလ၊ ဖုဝါ၊ ယိုဗတ်တွမ်ႏ သိမရုန် ။ 14သေဗုလုံတွမ်ႏ ဝွေꩻပိုခိုဖုံႏ ကထွာသာရဲစ်၊ ဧလုန်တွမ်ႏ ယာလေလ။ 15နဝ်ꩻဖုံႏနဝ်ꩻ ယာကုပ်တွမ်ႏ အမာလေအာ ကအဝ်ႏအုံဒါႏ မဲက်သိုပိုတေးမီးယားခမ်း အခဝ်ထင်ꩻတွင်ꩻ လွူးလွဉ်ပိုဖုံႏ နဝ်ꩻလွုမ်ꩻတကာႏတဝ်း ပိုမူႏဒိန အဝ်ႏနေဒွိုန်းကသွူ။ နဝ်ꩻမꩻ လေအာ ကလွူးလွဉ်ဒါႏ ပိုလီꩻကားကအဝ်ႏနဝ်ꩻ အဝ်ႏ(၃၃)ဖြာꩻသွူ။
16ဂဒ်တွမ်ႏ ဝွေꩻပိုခိုဇေဖုန်၊ ဟဂ္ဂိ၊ သျုနိ၊ ဧဇဗုန်၊ ဧရိ၊ အရောဒိတွမ်ႏ အာရဲလိသွူ။ 17အာသျာတွမ်ႏ ဝွေꩻပိုခို အိမန၊ ဣသျဝါ၊ ဣသျဝိ၊ ဗာရိယတွမ်ႏ ဝွေꩻသီးဖူးမူႏ သေရနဝ်ꩻသွူ။ ဗာရိယ ပိုခိုနဝ်ꩻ ဟေဗာတွမ်ႏ မာခီးလသွူ။ 18ယိုတဆီသူဖြာꩻနဝ်ꩻ ယာကုပ်တွမ်ႏ သိလဖပိုလီꩻဖုံႏသွူ။ သိလဖနဝ်ꩻထွာ ယာကုပ် အဖူလာဗန် ကလက်ခွဉ်ဖေႏဒါႏ အပိုမူႏလေအာနဝ်ꩻ အသွဉ်းမူႏသွူ။
19ယာကုပ်မာ ရာခေလနဝ်ꩻ လွူးဖေႏပိုခို ယောသပ်တွမ်ႏ ဗေင်ယာမိန်နဝ်ꩻဝင်ꩻနီသွူ။ 20#ကမ္ဘာႏ ၄၁:၅၀–၅၂။ ယောသပ်နဝ်ꩻလꩻတွမ်ႏ အီဂျစ်ခမ်း ဟီလီယိုပိုလစ် ဝေင်ꩻသား၊ ယဇ်ပရောဟိတ် ပေါတိဖေရ ပိုမူႏ အာသီနတ်နဝ်ꩻ လွူးလွဉ် မနာသျေတွမ်ႏ ဧဖါရိမ်ဝင်ꩻနီသွူ။ 21ဗေင်ယာမိန်ပိုခို ဗေလ၊ ဗေခါ၊ အသျဗေလ၊ ဂေရ၊ နေမန်၊ ဧဟိ၊ ရောသျ၊ မုပိမ်၊ ဟုပိမ်တွမ်ႏ အာရသွူ။ 22ယိုတဆီလစ်ꩻဖြာꩻနဝ်ꩻ ယာကုပ်တွမ်ႏ ရာခေလ ပိုလီꩻစွိုးခွိုꩻဖုံႏသွူ။
23ဒန်တွမ်ႏ ဝွေꩻပိုခိုနဝ်ꩻ ဟုသျိမ်၊ 24နပ်တလိတွမ်ႏ ဝွေꩻပိုခိုဖုံႏနဝ်ꩻ ယာသျီးလ၊ ဂုနိ၊ ယေဇာတွမ်ႏ သျိလိမ်သွူ။ 25ယိုဝင်ꩻနွတ်ꩻနဝ်ꩻ ထွာယာကုပ်တွမ်ႏ ဗိလဟာပိုလီꩻဖုံႏသွူ။ ဗိလဟာနဝ်ꩻထွာ အဖူလာဗန် ကလက်ခွဉ်ဖေႏ အပိုမူႏ ရာခေလနဝ်ꩻ အသွဉ်းမူႏသွူ။
26ကထိုꩻလွေꩻဒါႏ အီဂျစ်ခမ်း ယာကုပ်ပိုသွီႏယာႏဖုံႏ တတွက်ပါတဝ်း ပါႏနမ်နဝ်ꩻ အဝ်ႏသူဆီသူဖြာꩻသွူ။ 27#တ ၇:၁၄။ အီဂျစ်ခမ်းကိုနဝ်ꩻ ယောသပ်လꩻ ပိုခိုဝင်ꩻနီသွူ။ ပွိုးနဝ်ꩻမꩻ ယာကုပ်တမွိုးဖါပိုစွိုꩻဖုံႏ ကထိုꩻလွဉ်သော့ꩻဒါႏ အီဂျစ်ခမ်းကိုနဝ်ꩻ အဝ်ႏအဖြာꩻနွတ်ꩻဆီ(၇၀)သွူ။
ယာကုပ်တမွိုးဖါပိုစွိုꩻဖုံႏအဝ်ႏအီဂျစ်ခမ်းကို
28ယာကုပ် ထွဉ်ႏလွေꩻရီးယုဒ ဒေါ့ꩻဖေႏယောသပ် အွဉ်ႏလွဉ်မော့ꩻခွဲတွမ်ႏ ဝွေꩻသီး ဂေါသျန်အရပ်သွူ။ ဝွေꩻသီးဖျော်လွဉ် ဂေါသျန်အရပ်ချိန်ႏ 29ယောသပ်နဝ်ꩻ အီႏလွေꩻမော့ꩻခွဲအဖါ ဂေါသျန်အရပ်တာႏ ထုမ်းလွေꩻစွဉ်ႏ ဝွေꩻစဲ့ꩻသေလောသွူ။ ထွိုင်ႏမော့ꩻခွဲဝင်ꩻနဝ်ꩻ ယောသပ် တဖေါ့ဝွေꩻဖါငွဉ်ꩻတဲင် ငွိုးညစွဉ်ႏထာꩻသွူ။ 30ယာကုပ်ဒေါ့ꩻဖေႏ ယောသပ် “ယိုခါ ခွေထီႏဗာႏလဲဉ်းနာꩻတဲင် နာꩻသက် အဝ်ႏမွန်ဒျာႏဒွိုန်းကနဝ်ꩻမꩻ ခွေသီပျောႏလဲဉ်း” နုဲင်းနဝ်ꩻသွူ။
31နဝ်ꩻထွူ ယောသပ်ဒေါ့ꩻဖေႏ ဝွေꩻဝေးခိုဖုံႏ တွမ်ႏဝွေꩻဖါ တမွိုးဖါပိုစွိုꩻဖုံႏ၊ “ခွေဝေးခိုဖုံႏတွမ်ႏ ခွေတမွိုးဖါပိုစွိုꩻဖုံႏ ကအဝ်ႏဒါႏ ခါနန်ခမ်းနဝ်ꩻ အဖျော်လွဉ်လဲဉ်းသွူ ခွေထျꩻကျောင်ꩻ ခွေအဝ်ႏလိုႏ ဒေါ့ꩻနယ်က ခွန်တန်သွူ။ 32သီနဝ်ꩻ အဝ်ႏတီအံႏသွိုꩻ လွူး ထာꩻသောင်ꩻထာꩻသားဖုံႏတဲင် သီထူႏလွဉ်လဲဥ်းသွူ ထာꩻသောင်ꩻ ထာꩻသားဖုံႏတွမ်ႏ သီကပဲင်ႏဒါႏထာꩻခြိုꩻ ကားကအဝ်ႏ အကျောင်ꩻ ခွေအီႏလဝ်းထင်ႏဖေႏ ခွန်တန်ထျꩻသွူ။ 33ခွန်တန်ဟဲ့ꩻလွဉ်သီတွော့ꩻ မဉ်ႏရီသီ ထာꩻလုပ်ꩻထာꩻမာꩻနဝ်ꩻ၊ 34သီအီႏဒေါ့ꩻနယ်ဗာႏ ခွန်တန်နုဲင်းယို၊ ‘နီနဝ်ꩻတယ်ႏစွဉ်ႏ မွိုးဖြားဖါဖြားသီး စိုးကာႏ တသက်လွုမ်း လွူးအံႏဒျာႏ ထာꩻသောင်ꩻထာꩻသား’ ရိုꩻဗာႏနုဲင်းနဝ်ꩻသွူ။ နုဲင်းနဝ်ꩻမꩻ ခွန်တန် အီႏဖေႏအုံသီ ဂေါသျန်အရပ်နဝ်ꩻသွူ။” ယောသပ်ကဒေါ့ꩻဗာႏ နုဲင်းယိုနဝ်ꩻ ကွပ်ပွိုး အီဂျစ်လိုꩻမျိုꩻဖုံႏနဝ်ꩻ ပသို့ꩻ မဲဉ်အုံငီꩻတဝ်းတွမ်ႏ သွိုꩻတီသားဖုံႏသွူ။
ទើបបានជ្រើសរើសហើយ៖
ကမ္ဘာႏစ 46: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.