ကမ္ဘာႏစ 37
37
ယောသပ်တွမ်ႏအဖူးအဝေးဖုံႏ
1ယာကုပ်နဝ်ꩻ အုံသွုပ်ယင်း အဖါကအုံဒါႏ ခင်ႏလမ်း ခါနန်ခမ်းသွူ။ 2ယိုနဝ်ꩻထွာ ယာကုပ်တမွိုးဖါပိုစွိုꩻ ရာႏဇဝင်ႏသွူ။
ယောသပ် သက်လꩻတဆီနွတ်ꩻနေင်ႏ ထွာခိုဗင်ႏပေႏတွင်ꩻနဝ်ꩻ တွမ်ႏဝွေꩻဝေးခိုဖုံႏ ကထွာဒါႏ အဖါမာပေႏ ဗိလဟာတွမ်ႏ သိလဖသီး အပိုခိုဖုံႏနဝ်ꩻ တီငီꩻဗာႏလို့ဝင်ꩻ သွိုꩻဗဲဖုံႏသွူ။ အဝေးခိုဖုံႏ ကမာꩻဒါႏ ထာꩻတဟဝ်တဝ်းနဝ်ꩻ ဝွေꩻကုဲင်းသဲင်ꩻတွိုင်ႏ အဖါသွူ။
3ယာကုပ် သက်တန်မꩻ လွူးလွဉ် ယောသပ်တဲင် ဝွေꩻကရက် ယောသပ်နဝ်ꩻ လွိုလဲဉ်းက ဝွေꩻပို အလင်ဖုံႏသွူ။ ယောသပ်တာႏနဝ်ꩻ ဝွေꩻဆꩻခေါ်ဖေႏနေး ဆဲင်ꩻတန်ဆွာꩻ အရောင်ႏစွုမ်ႏ တရေꩻငါႏသွူ။ 4ဝွေꩻဝေးခိုဖုံႏထွိုင်ႏထီႏ ဝွေꩻသီးဖါရက် ယောသပ် လွိုလဲဉ်းက ဝွေꩻသီးနဝ်ꩻ၊ ဝွေꩻသီး လွꩻထီႏမွေးနေးစွဉ်ႏ အဖူးခိုသွူ၊ ဝွေꩻသီး တဒေါ့ꩻရီဟဝ်တဝ်းဒွုမ် အဖူးသွူ။
5တနီꩻသား ယောသပ် ဗေင်ႏမင်းထာꩻတဲင် ဝွေꩻထွိုင်ႏခြုဲင်းနယ် အဝေးခိုဖုံႏ ထာꩻဗေင်ႏမင်းခရာႏနဝ်ꩻ အဝွေးခိုဖုံႏ ယိန်းလွꩻထီႏစွဉ်ႏ ဝွေꩻနဝ်ꩻသွူ။ 6ယောသပ်ရိုꩻ “နီဝေးသီး၊ နာႏခွေ ထာꩻဗေင်ႏမင်းမွိုင်။ 7နီကအဝ်ႏ ကျꩻလွောင်ႏဗွူ လုဲင်းကိုတွင်ꩻ ခွေဗွူလွောင်ႏနဝ်ꩻ အဝ်ႏလုဲင်းကို အုံထွိုင်ႏစွဉ်ႏထာꩻတဲင် နီဝေးသီး ဗွူလွောင်ႏဖုံႏ လွဉ်အုံဝဲင်ꩻခူစွဉ်ႏ ခွေဗွူလွောင်ႏတွော့ꩻ ခံႏနွမ်ꩻရောင်လွစွဉ်ႏ” နုဲင်းနဝ်ꩻသွူ။
8ဝွေꩻဝေးခိုဖုံႏရိုꩻ “နာꩻထင်းဒျာႏ နာꩻအီႏထွာ ခွန်တပါꩻတွော့ꩻ အီႏအုပ်စိုꩻနီနဲ့ဟောင်း” နုဲင်းနဝ်ꩻသွူ။ ကွပ်ပွိုး ခြုဲင်းနယ် ဝွေꩻထာꩻဗေင်ႏမင်း နုဲင်းနဝ်ꩻတွော့ꩻ အဝေးဖုံႏနဝ်ꩻ ယိန်းလွꩻထီႏထီႏစွဉ်ႏ ဝွေꩻသွူ။
9နဝ်ꩻထွူ ယောသပ်ဗေင်ႏမင်းဖျင် တစွိုးတဲင် ခြုဲင်းနယ်ယင်း ဝွေꩻဝေးဖုံႏ “ခွေဗေင်ႏမင်းဖျင်ယင်းလဲဉ်း တစွိုး ထာꩻဗေင်ႏမင်းကိုနဝ်ꩻ ခွေထီႏမွူး၊ လာတွမ်ႏ ဆာႏ တဆီပုဲင်တဖြုံႏ အဝ်ႏခံႏနွမ်ꩻခွေ” နုဲင်းနဝ်ꩻသွူ။
10ဝွေꩻထာꩻဗေင်ႏမင်းနဝ်ꩻ ခြုဲင်းနယ်ပါ အဖါတဲင် အဖါခွန်း “နာꩻထာꩻဗေင်ႏမင်းနဝ်ꩻ အစားမုဲင်ꩻဟောင်း၊ နာꩻထင်းဒျာႏ နာꩻမွိုး နာꩻဝေးခိုဖုံႏတွမ်ႏ ခွေနဝ်ꩻ အီႏလွဉ်ခံႏနွမ်ꩻဗာႏနာꩻနဲ့ဟောင်း” နုဲင်းနဝ်ꩻသွူ။ 11#တ ၇:၉။ ယောသပ် ဝေးခိုဖုံႏ လွꩻထီႏ မွေးစွဉ်ႏဝွေꩻသွူ၊ ကွဲႏတွော့ꩻ အကျောင်ꩻခရာႏနဝ်ꩻဖုံႏနဝ်ꩻ အဖါ ယူႏမတ်တောင်ꩻသေꩻခါꩻသွူ။
စာထိုꩻယောသပ်
12တနီꩻသား ယောသပ်အဝေးခိုဖုံႏ အဝ်ႏတီအဖါသွိုꩻ သျေခိမ်ဝေင်ꩻထျꩻအတွင်ꩻ၊ 13ယာကုပ်ဒေါ့ꩻဖေႏ ယောသပ် “ခွေမဲဉ်ထွဉ်ႏနာꩻလွေꩻ နာꩻဝေးခိုဖုံႏထျꩻ အဝ်ႏတီသွိုꩻဖုံႏ သျေခိမ်ဝေင်ꩻထျꩻသူꩻ” နုဲင်းနဝ်ꩻသွူ။
ယောသပ်လဝ်းချာ “ဩ၊ ခွေလွေꩻဖေႏ လꩻဒျာႏဖါ” နုဲင်းနဝ်ꩻသွူ။ 14အဖါဒေါ့ꩻဖေႏဝွေꩻ “နာꩻဝေးခိုဖုံႏတွမ်ႏ သွိုꩻဖုံႏ ဘေꩻကင်ꩻရန်ႏသျင်ꩻတဲင်၊ အုံဟဝ်ခြွိုင်ႏသန်ꩻဒျာႏဟောင်း။ လွေꩻထွားတွော့ꩻ နာꩻသဲင်ꩻဒေါ့ꩻနယ်ချာသွော့ ခွေဟုဲင်း” နုဲင်းနဝ်ꩻသွူ။ အဖါအွဉ်ႏစွꩻလွေꩻဝွေꩻ တဖူꩻကလွေꩻဒါႏ ဟေဗြုန် ထာꩻခြောင်ႏဖဲ့ꩻတဲင်
ယောသပ်တွိုႏလွေꩻစွဉ်ႏ သျေခိမ်ဝေင်ꩻထျꩻနဝ်ꩻသွူ။ 15ဝွေꩻအဝ်ႏလယ်ႏထုမ်ႏ ဝွေꩻဝေးခိုဖုံႏ ဝေင်ꩻသောင် ဝေင်ꩻထျꩻထာꩻခြာကိုတွင်ꩻ ပါꩻတဖြာꩻ ထီႏဝွေꩻတဲင် ရီ “နာꩻထုမ်ႏထွား တမုဲင်ꩻဟောင်း” နုဲင်းနဝ်ꩻသွူ။
16ဝွေꩻလဝ်းချာ “ခွေထုမ်ႏ ခွေဝေးခိုဖုံႏ အဝ်ႏတီသွိုꩻ၊ ဝွေꩻသီး အဝ်ႏမုဲင်ꩻကိုနဝ်ꩻ နာꩻဒေါ့ꩻနယ်နွောင်ꩻနေဟောင်း” နုဲင်းနဝ်ꩻသွူ။
17ပါꩻနဝ်ꩻဒေါ့ꩻ “ဝွေꩻသီး ထန်ႏလွေꩻလဲဉ်း၊ ခွေဟွိုန်ဝွေꩻသီးဒေါ့ꩻ အီႏလွေꩻဝေင်ꩻ ဒေါတန်” နုဲင်းနဝ်ꩻသွူ။ နဝ်ꩻမꩻ ယောသပ်ထောင်လွဉ်ꩻ အဝေးဖုံႏဆꩻချာတဲင် မော့ꩻစွဉ်ႏဝွေꩻသီး ဝေင်ꩻဒေါတန်ထျꩻသွူ။
18ဝွေꩻသီးထွိုင်ႏထီႏ ယောသပ် လꩻဖျော်လွဉ်ဒွိုန်း ဝွေꩻသီးထျꩻ အဝ်ႏညာꩻနေကတွင်ꩻ အဝေးခိုဖုံႏ ရေႏကျံႏမာꩻသီဝွေꩻတဲင် ဆွုံꩻဖျတ် အီႏမာꩻသီဝွေꩻသွူ။ 19ဝွေꩻသီး အချင်ꩻချင်ꩻ ဒေါ့ꩻဖေႏလို့ဝင်ꩻ “အွိုးသူꩻ ထာꩻဗေင်ႏမင်းသား လွဉ်လဲဉ်း။ 20လွဉ်ဟုဲင်း နီမာꩻသီတွမ် ဝွေꩻတွော့ꩻ အနမ်းနဝ်ꩻ နုဲင်ႏသော့ꩻတွမ် ထီအုံႏသဲင် တဖြုံႏကို၊ နီဒေါ့ꩻဗော့ꩻ ထာꩻသားမီꩻတဗာႏ အဲင်ႏသီထိုꩻလဲဉ်းဝွေꩻ၊ တွိုႏနဝ်ꩻမꩻ ဝွေꩻထာꩻဗေင်ႏမင်းအတွိုင်ꩻ ထွာလွဉ်မွေးနဲ့ တမွေးတဝ်းနဲ့နဝ်ꩻ နီအီႏသေဗာႏ” နုဲင်းနဝ်ꩻသွူ။
21ရုဗေင်ထွိုင်ႏဟွိုန် ဝွေꩻသီးငဝ်း နုဲင်းနဝ်ꩻနဝ်ꩻ ဝွေꩻကျံႏကယ်ႏ ယောသပ်တဲင်၊ ဝွေꩻရိုꩻ “မာꩻသီမွိုန်းဝွေꩻဟုဲင်း။ 22မာꩻဆာမွိုန်း ဝွေꩻတွော့ꩻ လွဉ်းသော့ꩻဗော့ꩻဝွေꩻ ထီအုံႏသဲင် ထာꩻခြာကိုယို” ဝွေꩻကဒေါ့ꩻဖေႏဒါႏ အကျံႏဉာဏ်ႏ နုဲင်းယိုနဝ်ꩻ ဝွေꩻရေႏကယ်ႏထန်ႏ ယောသပ် အဝေးခိုဖုံႏ စူကိုတွော့ꩻ ဝွေꩻကျံႏပသာယင်း အဖါထျꩻသွူ။ 23ပေါႏယောသပ်ဖျော်လွဉ် ဝွေꩻဝေးခိုဖုံႏထျꩻတဲင်၊ ဝွေꩻသီး ဗွောင်ႏဆွုမ်ႏ အဆဲင်ꩻတန် ယွုံးဆွာꩻ တရေꩻနဝ်ꩻသွူ။ 24နဝ်ꩻထွူ ဝွေꩻသီးဆွမ်ꩻဝွေꩻတဲင် လွဉ်းလင်ꩻသော့ꩻစွဉ်ႏ ထီအုံႏသဲင်ကိုသွူ။
25ဝွေꩻသီး ကအဝ်ႏအံႏ ထာꩻအံႏတွင်ꩻ ဝွေꩻသီးထီႏ ဣသျမေလ လိုꩻမျိုꩻတစွိုꩻ အဝ်ႏဂိလဒ်ခမ်း အီႏလွေꩻအီဂျစ်ခမ်းတဲင် ဝွေꩻသီး ကုလာအုပ်ဖုံႏလောင်းနဝ်ꩻ ဒင်ႏလွဉ် နံꩻသာႏဟွမ်ဖုံႏတွမ်ႏ ဗာလံစီႏ၊ မုရန်စီႏဖုံႏသွူ။ 26ယုဒဒေါ့ꩻဖေႏ အဖူးခို အဝေးခိုဖုံႏ “နီမာꩻသီနီဖူးခိုတွော့ꩻ ဒို့ꩻဗဉ်ႏခါꩻထိုꩻ အမဲဉ်ႏတရာꩻနဝ်ꩻ အကျိုꩻတမုဲင်ꩻ အဝ်ႏဟောင်း။ 27ခလားနီကမာꩻဆာ ဝွေꩻနဝ်ꩻ နီစာဖေႏတွမ်ဝွေꩻ ဣသျမေလ လိုꩻမျိုꩻထျꩻနယ် ဝွေꩻနဝ်ꩻနီဖူးခိုဒျာႏ နီသွီႏယာႏဒျာႏ မွေးတဝ်းနဲ့” နုဲင်းနဝ်ꩻတဲင် ဝွေꩻဖူးဝေးဖုံႏ သဘော်ꩻတူႏစွဉ်ႏနဝ်ꩻသွူ။ 28#တ ၇:၉။ အတွင်ꩻနဝ်ꩻ မိဒျန်ကွုန်ႏသယ်ႏဖုံႏ ယင်ဟန်ႏ အဝ်ႏဖျတ်လွေꩻ ဝွေꩻသီးထျꩻသွူ။ ဝွေꩻသီးထွို့ꩻထန်ႏချာယင်း ယောသပ် ထာꩻအောင်ကိုတွော့ꩻ စာဖေႏစွဉ်ႏ ဣသျမေးလ ကွုန်ႏသယ်ႏထျꩻ ရွဉ်ယာႏ အဗီႏနီဆီသွူ။ ကွုန်ႏသယ်ႏဖုံႏ ဟဲ့ꩻလွေꩻထိုꩻစွဉ်ႏ ယောသပ် အီဂျစ်ခမ်းသွူ။
29ရုဗေင်ထွိုင်ႏလွဉ်ချာ ထီအုံႏသဲင်ထျꩻနဝ်ꩻ ဝွေꩻထီႏတဝ်းဒွုမ် ယောသပ်တဲင် ဝွေꩻသꩻပေႏငါႏတွော့ꩻ အဲ့ꩻသဲ့ချာစွဉ်ႏ အဆဲင်ꩻသွူ။ 30ဝွေꩻသဲင်ꩻချာ အဖူးခိုဖုံႏထျꩻတဲင်ဒေါ့ꩻ “နီဖူးပေႏ အဲဉ်ထဝ်းဒွုမ် ထီအုံႏသဲင်ကို၊ ခွေအီႏမာꩻဗာႏနုဲင်းမုဲင်ꩻဟောင်း” နုဲင်းနဝ်ꩻသွူ။
31နဝ်ꩻထွူ ဝွေꩻသီး မာꩻသီဗဲတဗာႏတဲင် ယောသပ်ဆဲင်ꩻတန် ယွုံးဆွာꩻနဝ်ꩻ စုပ်ꩻသော့ꩻစွဉ်ႏ ဗဲသွီႏကိုသွူ။ 32ဝွေꩻသီး ထူႏသဲင်ꩻလွဉ် ဆဲင်ꩻတန်ယွုံးဆွာꩻ ဝွေꩻသီးဖါထျꩻတဲင် ဒေါ့ꩻ “နီမော့ꩻ ဆဲင်ꩻတန် ယွုံးဆွာꩻယိုနဝ်ꩻ နီဖါပိုခိုပေႏဆဲင်ꩻ မွေးနေဟောင်း” နုဲင်းနဝ်ꩻသွူ။
33အဖါအဝ်ႏတောင်ꩻချာ ဆဲင်ꩻနဝ်ꩻတဲင်ဒေါ့ꩻ “မွေး နဝ်ꩻနဝ်ꩻ ခွေပိုဆဲင်ꩻဒျာႏ၊ ထာꩻသားထာꩻခြာ အဲင်ႏသီထိုꩻလဲဉ်းဝွေꩻ၊ ခွေပိုခိုယောသပ်နဝ်ꩻ အဝ်ႏထိုꩻလဲဉ်း ပဲဉ်ကွို့ꩻကွို့ꩻဒျာႏရင်ꩻ” နုဲင်းနဝ်ꩻသွူ။ 34ယာကုပ် သꩻပေႏငါႏတဲင် အဲ့ꩻသဲ့ချာစွဉ်ႏ ဝွေꩻဆဲင်ꩻတွော့ꩻ ကွဉ်ကꩻလုဲင်ႏတောစွဉ်ႏ ဆဲင်ꩻခွမ်ꩻလာꩻ တခီယာႏသွူ။ ဝွေꩻတလွိုး ငွိုးသောင်ကော့ꩻ အပိုခိုနဝ်ꩻ ညတန်သွူ။ 35ဝွေꩻပိုမူႏ ပိုခိုဖုံႏ ကားကအဝ်ႏနဝ်ꩻ လွဉ်ဖေႏအာႏ ချောက်ဝွေꩻစွဉ်ႏတဲ့ꩻ ထာꩻသပေႏ သꩻကုဲင် တပြေႏထိုꩻတဝ်းတဲင် “ခွေပိုခိုတာႏနဝ်ꩻ ဗꩻတွိုႏစွဉ်ႏ ခွေကသီထံ ခွေအဝ်ႏတလွိုး သောင်ခြင်ꩻ ငွိုးကော့ꩻစွူစွူဒျာႏ” နုဲင်းနဝ်ꩻတဲင် ဝွေꩻတလွိုးငွိုးကော့ꩻ သောင်ခြင်ꩻသွုပ် အပိုခို ယောသပ်တာႏသွူ။
36အချိန်ႏနဝ်ꩻနဝ်ꩻ မိဒျန်ကွုန်ႏသယ်ႏစာထိုꩻ ယောသပ် အီဂျစ်ခွန် အမတ်လိုꩻတန် ကပွေါးဒါႏ ဟော်နန်ꩻစဲ့ꩻတပ် ပေါတိဖါထျꩻသွူ။
ទើបបានជ្រើសរើសហើយ៖
ကမ္ဘာႏစ 37: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.