ကမ္ဘာႏစ 27
27
ဣသဲစ်ဖေႏယာကုပ်မင်္ဂလာႏ
1ယိုခါလဲင်ႏ ဣသဲစ် ဖြားလဲဉ်းတဲင် မဲ့တမို့လွဉ်ꩻနဝ်ꩻမꩻ ထီႏတဝ်းဒွုမ်ထာꩻသွူ။ ဝွေꩻဟဲ့ꩻလွဉ် ပိုခိုတန် ဧသောရိုꩻ၊ “ပိုခိုဟွေး။”
ဧသောလဝ်းချာ၊ “အဝ်ႏဒျာႏဖါ။”
2ဣသဲစ်ဒေါ့ꩻ၊ “ခွေနဝ်ꩻ ဖြားလဲဉ်းတဲင် တညတဝ်း အီႏသီထိုꩻနဝ်ꩻ နာꩻအဝ်ႏသေဒျာႏသွူ။ 3ထူႏနာꩻခြီႏတွမ်ႏ ပြာႏတွော့ꩻ လွေꩻထာꩻခြာတဲင် ခꩻလွဉ်ဖေႏခွေ ထာꩻသားထာꩻခြာ တဗာႏဟုဲင်း။ 4နုဲင်းခွေကကျွိုက်ဒါႏ အနယ်ꩻနဝ်ꩻ ဒွိုႏအွီႏအွီႏဖေႏခွေ ထာꩻအံႏတဲင် ထူႏလွဉ်ဖေႏသွော့ခွေ၊ ခွေအံႏထာꩻအံႏနဝ်ꩻ မဉ်ႏထွူ ခလားခွေကသီ မင်္ဂလာႏ အဆုဲင်ꩻသွတ်ꩻနဝ်ꩻ ခွေအီႏဖေႏနာꩻ” နုဲင်းနဝ်ꩻသွူ။
5ဣသဲစ် အဝ်ႏဒေါ့ꩻနယ် ဧသောတွင်ꩻ ရီဗက္က အဝ်ႏနာႏတေ့ꩻထာꩻသွူ။ ကွပ်ပွိုးနဝ်ꩻမꩻ ဧသော ထွိုင်ႏထန်ႏ လွေꩻဟောႏထာꩻချိန်ႏ၊ 6အမွိုးဒေါ့ꩻဖေႏ ယာကုပ်၊ “သီဖါဒေါ့ꩻဖေႏ ဧသောနဝ်ꩻ ခွေအဝ်ႏဟွိုန်၊ 7လွေꩻဟောႏလွဉ် ထာꩻသားထာꩻခြာတဲင် ဒွိုႏဖေႏခွေ၊ ခွေမဉ်ႏအံႏထွူ ခလားခွေကသီ ထာဝရဘုရာꩻဆꩻငါ ခွေအီႏဖေႏနာꩻမင်္ဂလာႏ” နုဲင်းနဝ်ꩻသွူ။” 8ရီဗက္ကဒေါ့ꩻသွုပ် “ယိုခါပိုခို၊ နာႏမွိုးငဝ်းတဲင် မာꩻနုဲင်း မွိုးကဒေါ့ꩻဖေႏနာနဝ်ꩻဟုဲင်း။ 9လွေꩻဗဲဖုံႏခြာတဲင် ထူႏလွဉ်သွော့ ဗဲပြွောင်ႏနီဗာႏ၊ သီဖါကကျွိုက်ဒါႏ ဟန်ႏနဝ်ꩻ ခွေအီႏဒွိုႏဖေႏတဲင် 10နာꩻထူႏလွေꩻဖေႏ သီဖါထျꩻ ဖေႏအံႏဝွေꩻတဲင် ခလားဝွေꩻကသီနဝ်ꩻ ဝွေꩻအီႏဖေႏနာꩻ မင်္ဂလာႏ” နုဲင်းနဝ်ꩻသွူ။
11ကွဲႏတွော့ꩻ ယာကုပ်ဒေါ့ꩻဖေႏအမွိုး၊ “နီဝေးဧသောနဝ်ꩻထွာ လိုꩻဆွဉ်ႏဒွိုန်တဖြာꩻတဲင် ခွေနဝ်ꩻထွာ လိုꩻယာႏချော်ꩻဒျာႏနဝ်ꩻ နီမွိုးအဝ်ႏသေသွူ။ 12နီဖါမဉ်ႏခွိုင်းစမ်ꩻခွေတဲင် မဉ်ႏသေခွေလဲဉ်ဝွေꩻနဝ်ꩻ ထာꩻယိုနဝ်ꩻ ကွပ်စွဥ်ႏ ခွေအီႏလꩻ မင်္ဂလာႏ မဲ့ꩻခွေလတောဒျာႏ ငဝ်းစိန်ႏတရေႏ” နုဲင်းနဝ်ꩻသွူ။
13ဝွေꩻမွိုးလဝ်း၊ “ပိုခို၊ ငဝ်းစိန်ႏတရေႏနဝ်ꩻ ယံကထဲ့လူးဒျာႏသွော့ ခွေလောင်း၊ မာꩻသွော့ နုဲင်းခွေကဒေါ့ꩻတဲင် ဗဲဖုံႏနဝ်ꩻ ထူႏလွဉ်ဖေႏသွော့ ခွေထျꩻ။” 14နဝ်ꩻမꩻ ဝွေꩻလွေꩻထူႏ ဗဲဖုံႏတဲင် အီလွဉ်ဖေႏစွဉ်ႏ အမွိုးထျꩻ၊ အမွိုးဒွိုႏဖေႏ နုဲင်းအဖါကကျွိုက်သꩻနဝ်ꩻသွူ။ 15နဝ်ꩻထွူ အမွိုးထူႏလွဉ် ဧသောခွမ်ꩻလာꩻ အဟဝ်သွတ်ꩻ ဝွေꩻမူႏ ကအွဉ်ႏဟဝ်ခါꩻ လမ်းကိုနဝ်ꩻတဲင် အွဉ်ႏကꩻစွဉ်ႏ ယာကုပ်သွူ။ 16အမွိုးထူႏဗဲဖြို့ꩻတွော့ꩻ အွဉ်ႏဗဲဉ်ဖေႏ ဝွေꩻစူဗောင် တွမ်ႏဆွဉ်ႏတဒေါ့ꩻတဝ်း ငွဉ်ꩻလောင်းနဝ်ꩻသွူ။ 17ဟန်ႏအိုတွမ်ႏ တခိုးနဝ်ꩻတဲ့ ဝွေꩻမူႏဖေႏ ယာကုပ်သွူ။
18ယာကုပ်လွေꩻ အဖါထျꩻတဲင်ဟဲ့ꩻ၊ “အွိုးဖါ”
အဖါလဝ်းချာ၊ “ဟွေး ခွေပိုခို အဖြာꩻမုဲင်ꩻဟောင်း။”
19ယာကုပ်လဝ်း၊ “ခွေနဝ်ꩻ နီဖါပိုခိုတန် ဧသောဒျာႏ။ နုဲင်းနီဖါကထွဉ်ႏအတွိုင်ꩻ ခွေမာꩻထွူလို့လဲဉ်း၊ ခွေအီလွဉ်ဖေႏလဲဉ်းသွူ နီဖါ ဟံႏအို၊ ဖေႏကဖေႏနွောင်ꩻခွေ မင်္ဂလာႏနဝ်ꩻ ထွိုင်ႏတဲင် အံႏခန်းဟုဲင်း” နုဲင်းနဝ်ꩻသွူ။
20ဣသဲစ်ဒေါ့ꩻ၊ “နာꩻမွော့ꩻ မော့ꩻမွိုင်ငါႏ နဝ်ꩻပိုခို” နုဲင်းနဝ်ꩻသွူ။
ယာကုပ်လဝ်း၊ “နီဖါထာဝရဘုရာꩻ အဗွေႏဘုရာꩻ စွဲကိုခွေနဝ်ꩻမꩻ မွော့ꩻမွိုင်ဒျာႏ” နုဲင်းနဝ်ꩻသွူ။
21ဣသဲစ်ဒေါ့ꩻဖေႏ ယာကုပ် “လွဉ်ဗော့ꩻနီဖါထျꩻယိုမွိုင် ခွေခွိုင်းထွားစမ်ꩻနာꩻ၊ နာꩻနဝ်ꩻ ဧသော မွေးနေဟောင်း” နုဲင်းနဝ်ꩻသွူ။ 22ယာကုပ် လွဉ်ထေ့ဗော့ꩻ အဖါထျꩻတဲင် အဖါစမ်ꩻထွားစမ်ꩻဝွေꩻ တဲင်ဒေါ့ꩻ “နာꩻငဝ်းနဝ်ꩻ ဗွိုန်ယာကုပ်ငဝ်းတွော့ꩻ နာꩻစူဗောင်နဝ်ꩻ ဗွိုန်စွဉ်ႏဧသော” နုဲင်းနဝ်ꩻသွူ။ 23ကွပ်ပွိုး ဝွေꩻစူဗောင်နဝ်ꩻ အဆွဉ်ႏဒွိုန်နုဲင်း ဧသောနဝ်ꩻမꩻ ယာကုပ်ဒျာႏကျောင်ꩻနဝ်ꩻ အဖါတတောင်ꩻစဲင်းတဝ်းသွူ။ ဝွေꩻအီႏဖေႏသွူ မင်္ဂလာႏနဝ်ꩻမꩻ 24ရီထဲင်းယင်းတလဲင်ႏ၊ “နာꩻနဝ်ꩻ ဧသော မွေးနေဟောင်း” နုဲင်းနဝ်ꩻသွူ။
ယာကုပ်လဝ်းချာ၊ “ခွေနဝ်ꩻ ဧသောဒျာႏမွေး” နုဲင်းနဝ်ꩻသွူ။
25တွိုႏနဝ်ꩻ ဣသဲစ်ဒေါ့ꩻ၊ “ထူႏလွဉ်ဖေႏခွေ နာꩻဟန်ႏအိုဟုဲင်း ခွေအံႏမဉ်ႏထွူမꩻ ခွေအီႏဖေႏနာꩻ မင်္ဂလာႏ” နုဲင်းနဝ်ꩻသွူ။ ယာကုပ် ထူႏလွဉ်ဖေႏ ဝွေꩻတဲင် အဖါအွꩻတာႏနဝ်ꩻ ဝွေꩻထူႏလွဉ်ဖေႏပါက ဝုဲင်သွူ။ 26နဝ်ꩻထွူ ဝွေꩻဖါဒေါ့ꩻဖေႏဝွေꩻ၊ “ပိုခို လွဉ်ဗော့ꩻတဲင် နို့ꩻခွေဟုဲင်း”။ 27#ဟေဗြဲ ၁၁:၂၀။ ယာကုပ် လွဉ်နို့ꩻအဖါတွင်ꩻ ဣသဲစ် နွုမ်ꩻဝွေꩻဆဲင်ꩻလွီးတဲင် ဖေႏမင်္ဂလာႏဒေါ့ꩻ၊ “ခွေပိုခိုလွီးနဝ်ꩻ နွုမ်ꩻဟွမ်ငါႏ ဗွိုန်နုဲင်း လုဲင်းအလွီး ထာဝရဘုရာꩻ ကဖေႏလဲဉ်း မင်္ဂလာႏသွူ။ 28ဗွေႏဘုရာꩻ ယံကဖေႏနာꩻ တစမ်ꩻထီ မို့ꩻလောင်းတဲင် နာꩻလုဲင်းနဝ်ꩻ ဟံႏဩႏဇာႏ ယံဖေႏကတလာ ယံကလꩻအာဗာႏသွော့ အရာႏအကဝ်ႏတွမ်ႏ ဝုဲင်။ 29#ကမ္ဘာႏ ၁၂:၃။ ခမ်းထီနဲင်ႏငံႏဖုံႏနဝ်ꩻ ယံကထွာဗာႏ နာꩻသွဉ်းတဲင် လိုꩻမျိုꩻကားကအဝ်ႏနဝ်ꩻ ယံကခံꩻနွမ်ꩻ ရိုႏသေႏသွော့ နာဆꩻငါ။ ယံဖေႏ နာꩻကအုပ်စိုꩻဗာႏသွော့ နာꩻဖူးဝေးဖုံႏ ကားကအဝ်ႏတဲင် နာꩻမွိုးပိုလီꩻစွိုးခွိုꩻဖုံႏနဝ်ꩻ ယံဖေႏ ကခံႏနွမ်ꩻသွော့ နာꩻဆꩻငါ။ ပါꩻကစိန်ႏတရေႏဒါႏ နာꩻနဝ်ꩻ ယံကခံႏဗာႏသွော့ စိန်ႏတရေႏတဲင် ပါꩻကဖေႏနာꩻ မင်္ဂလာႏနဝ်ꩻ ယံကလꩻသွော့ မင်္ဂလာႏ” နုဲင်းနဝ်ꩻသွူ။
ဧသောကွီမင်္ဂလာႏ
30ဣသဲစ်ဖေႏ ယာကုပ်မင်္ဂလာႏ အဝ်ႏအဖါထျꩻ ထန်ႏလွေꩻထိုꩻထွူ တညတဝ်း အဝေးခိုဧသော အဝ်ႏလော်တခြာ သဲင်ꩻလွဉ်သွူ။ 31ဝွေꩻနဝ်ꩻတဲ့ꩻ ဒွိုႏအွီႏနုဲင်းနုဲင်း ဟန်ႏအိုတဲင် အီလွဉ်ဖေႏ အဖါထျꩻတွော့ꩻဒေါ့ꩻ၊ “ဖါ၊ ထွိုင်ႏအံႏခန်းသွော့ ခွေထူႏလွဉ်ဖေႏလဲဉ်းသွူ ဟန်ႏအိုယို၊ အံႏထွူ ဖေႏခန်းခွေမင်္ဂလာႏ” နုဲင်းနဝ်ꩻသွူ။ 32ဣသဲစ်ရီ၊ “နာꩻနဝ်ꩻ ပါꩻမုဲင်ꩻဟောင်း။”
ဝွေꩻလဝ်းချာ၊ “ခွေနဝ်ꩻ နီဖါပိုခိုတန် ဧသောဒျာႏ” နုဲင်းနဝ်ꩻသွူ။
33ဣသဲစ် နမ်းတဗာႏလွုမ်း တနွော့ꩻနေးစွဉ်ႏတဲင်ရီ၊ “လꩻထာꩻသားတဲင် ကထူႏလွဉ်ဟံႏအို ခွေထျꩻ ယိုဟွဉ်ႏနဝ်ꩻ ပါꩻမုဲင်ꩻဟောင်း၊ ဟန်ႏအိုနဝ်ꩻ ခလားနာꩻကဖျော် ခွေအံႏထွူလဲဉ်း ခွေမင်္ဂလာႏ အဆုဲင်ꩻသွတ်ꩻနဝ်ꩻတဲ့ ခွေဖေႏထွူလို့လဲဉ်း ဝွေꩻနဝ်ꩻမꩻ ဝွေꩻအီႏစံႏစာꩻဗာႏ သေႏသေႏလဲဉ်း” နုဲင်းနဝ်ꩻသွူ။
34ဧသော ထွိုင်ႏဟွိုန် နုဲင်းယို ဝွေꩻငွိုးခြဝ်သန် ထာꩻတွော့ꩻဒေါ့ꩻ “နီဖါ မင်္ဂလာႏနဝ်ꩻ ဖေႏဗဲင်းပါယင်း ခွေမွိုင်” နုဲင်းနဝ်ꩻသွူ။
35ဣသဲစ်လဝ်းချာ၊ “နာꩻဖူးခိုနဝ်ꩻ လွဉ်လဲဉ်လဲဉ်းခွေ၊ နာꩻကအီႏစံႏစာꩻဗာႏ မင်္ဂလာႏဖုံႏနဝ်ꩻ ဝွေꩻထူႏလွေꩻထိုꩻလို့လဲဉ်း” နုဲင်းနဝ်ꩻသွူ။
36 #
ကမ္ဘာႏ ၂၅:၂၉–၃၄။ ဧသောဒေါ့ꩻ၊ “ဝွေꩻလဲဉ်ခွေ ယိုနဝ်ꩻ ထွာနီလဲင်ႏသွူ၊ နဝ်ꩻမꩻ စွဉ်ႏကဟဲ့ꩻအမဉ်ꩻ ယာကုပ်နဝ်ꩻ မွော့ꩻလွောက်ꩻမွေးဝင်ꩻတန်နဲ၊ ပိုခိုတန် ခွေအရာႏနဝ်ꩻတဲ့ ဝွေꩻထူႏလွေꩻလဲဉ်း၊ ခွေကအီႏစံႏစာꩻဗာႏ မင်္ဂလာႏဖုံႏ ကားကအဝ်ႏနဝ်ꩻ ယိုခါ ဝွေꩻထူႏလွေꩻ ဖျင်ယင်းလဲဉ်းသွူ။ ခွေတာႏနဝ်ꩻ မင်္ဂလာႏ တစွိုးငါတဲ့ꩻ အဝ်ႏကုဲင်တဝ်းဒွုမ်ဟောင်း” ကွီနုဲင်းနဝ်ꩻသွူ။
37ဣသဲစ်ဒေါ့ꩻချာ၊ “ဝွေꩻနဝ်ꩻ ထွာလဲဉ်း နာꩻအဗွေႏတဲင် ဖူးဝေးစွိုးခွိုꩻဖုံႏ ကားကအဝ်ႏနဝ်ꩻ ခွေအွဉ်ႏထွာလဲဉ်း ဝွေꩻအသွဉ်းဖုံႏသွူ။ ခွေဖေႏလို့လဲဉ်းဝွေꩻအရာႏအကဝ်ႏ တွမ်ႏဝုဲင်၊ ပိုခို ယိုခါနာꩻတာႏ ခွေအီႏမာꩻဖေႏနွောင်ꩻဒွိုန် နုဲင်းမုဲင်ꩻဟောင်း” နုဲင်းနဝ်ꩻသွူ။
38 # ဟေဗြဲ ၁၂:၁၇။ ဧသောအဝ်ႏကွီ နွိုင်ႏနွိုင်ႏအဖါ၊ “ဖေႏခရာႏမင်္ဂလာႏ တစွိုးပေႏငါတဲ့ꩻ နီဖါထျꩻနဝ်ꩻ အဲဉ်ထဝ်းဒွုမ်နဲ့၊ မင်္ဂလာႏနဝ်ꩻနဝ်ꩻ ဖေႏပါခွေမွိုင်ဖါ” ဝွေꩻငွိုးကွီ နုဲင်းနဝ်ꩻသွူ။
39 # ဟေဗြဲ ၁၁:၂၀။ နဝ်ꩻထွူ ဣသဲစ်ဒေါ့ꩻဖေႏဝွေꩻ၊
“မို့ꩻလောင်းကီ နာꩻတာႏနဝ် တစမ်ꩻထီအဲဉ်ထဝ်း။
လုဲင်းကိုနဝ်ꩻ နာꩻတာႏ ဟံႏဩႏဇာႏအဲဉ်ထဝ်း
40 #
ကမ္ဘာႏ ၃၆:၈၊ ၂ရာႏ ၈:၂၀။ နာꩻအီႏလွူးအီဗာႏနမ်း တွမ်ႏနာꩻနꩻ၊
နာꩻအီႏခံႏဗာႏ နာꩻဖူးသွဉ်း။
ကွဲႏတွော့ꩻ နာꩻမဉ်ႏတွိုက်ꩻဆန်မွေးမꩻ၊
အီႏလွစ်ထန်ႏဗာႏ ဝွေꩻထာꩻအုပ်စိုꩻ” နုဲင်းနဝ်ꩻသွူ။
41ကွပ်ပွိုး အဖါဖေႏလို့ထိုꩻ ယာကုပ် မင်္ဂလာႏအတွက် ဧသော လွꩻထီႏယာကုပ်သွူ။ ဝွေꩻစဉ်ꩻစာꩻ၊ “နီဖါနဝ်ꩻ အီႏဗော့ꩻသီဒျာႏသွူ။ မဉ်ႏသီထွူ ခွေအီႏမာꩻသီယာကုပ်” ဒိုႏနုဲင်းနဝ်ꩻသွူ။
42ကွဲႏတွော့ꩻ ရီဗက္ကထွိုင်ႏဟွိုန်သေထွꩻ ဧသောထာꩻကျံႏနဝ်ꩻ၊ ဝွေꩻမူႏဟဲ့ꩻလွဉ် ယာကုပ်တဲင်ဒေါ့ꩻ “နာႏခွေငဝ်းဟုဲင်း၊ နာꩻဝေးခိုဧသောနဝ်ꩻ အဝ်ႏကျံႏမာꩻ လုမ်းလီးတဲဥ်ꩻချာ နာꩻတဲင် အီႏမာꩻသီနာꩻသွူ။ 43ပိုခိုယိုခါ နုဲင်းခွေကဒေါ့ꩻဖေႏနာꩻနဝ်ꩻ မာဟုဲင်း၊ တလဲင်ႏချင်ꩻ နာꩻဖင်းလွေꩻသွော့ ခွေဝေးခို လာဗန်ထျꩻ ဟာရန်ခမ်းသူꩻ။ 44အုံငီꩻသွော့ဝွေꩻနဝ်ꩻကို၊ ဗတွိုႏစွဉ်ႏ နာꩻဝေးခို သꩻကရောင်း။ 45နာꩻကမာꩻလဲဉ်းဒါႏဝွေꩻ ဝွေꩻမဉ်ႏအွဉ်ႏဖေင်ꩻထိုꩻ ထွူမꩻ ခွေအီႏအွဉ်ႏစွꩻလွဉ် လိုꩻတဖြာꩻတဲင် အီႏဟဲ့ꩻသဲင်ꩻချာနာꩻသွူ။ ပွိုးတမုဲင်ꩻ တနီꩻချင်ႏ ခွေခံႏသွုမ်ꩻဗာႏတွိုႏ ခွေပိုခိုဝင်ꩻနီဟောင်း” နုဲင်းနဝ်ꩻသွူ။
ဣသဲစ်အွဉ်ႏစွꩻလွေꩻယာကုပ်
46ရီဗက္ကဒေါ့ꩻဖေႏ ဣသဲစ်၊ “ကွပ်ဧသော ကထူႏမာ ခမ်းလင်သားမူႏ နဝ်ꩻမꩻ ခွေသꩻရွိုးငါႏ၊ ယာကုပ်တဲ့ꩻ မဉ်ႏတောႏလမ်းထိုꩻယင်း ဟိတ္တိလိုꩻမူႏ အရပ်ယိုနဝ်ꩻ ခွေအီႏသီထိုꩻဒျာႏရင်ꩻ” နုဲင်းနဝ်ꩻသွူ။
ទើបបានជ្រើសរើសហើយ៖
ကမ္ဘာႏစ 27: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.