ကမ္ဘာႏစ 23
23
သာရာသီထိုꩻ
1သာရာ သက်လ တရျာꩻနီဆီနွတ်ꩻ နေင်ႏနဝ်ꩻ၊ 2ဝွေꩻမူႏ သီသော့ꩻ ဟေဗြုန်ဝေင်ꩻ ခါနန်ခမ်းကိုတဲင် ပွိုးဝွေꩻမူႏ သီထိုꩻနဝ်ꩻမꩻ အဗြာဟံ ငွိုးအွီႏထာꩻသွူ။
3ဝွေꩻအဝ်ႏ ဝွေꩻမာသီထျꩻ လွေꩻထေ့ ဟိတ္တိလိုꩻမျိုꩻဖုံႏထျꩻ တဲင်ဒေါ့ꩻ၊ 4#ဟေဗြဲ ၁၁:၉၊၁၃၊ တ ၇:၁၆။ “ခွေအုံသီထျꩻနဝ်ꩻ ခွေယိုထွာဒျာႏထဉ်ႏသွူ၊ အီႏသင်္ဂြိုဟ်ႏသော့ꩻ ခွေမာတာႏနဝ်ꩻ စာဖေႏဗဲင်းခွေ ဟံႏယာႏ တစိꩻငါႏမွိုင်” နုဲင်းနဝ်ꩻသွူ။
5ဝွေꩻသီးလဝ်း၊ 6“နာႏက နီသွဉ်းသီး ငဝ်းမွိုင်ဗွေႏ၊ နီသွဉ်းသီးတာႏ နီဗွေႏနဝ်ꩻ ထွာဒျာႏ တန်ꩻခိုꩻအာႏဏာႏတန် ခေါင်းဆောင် တဖြာꩻသွူ။ နီသဲင်ႏခဲင်ꩻအောင် အဟဝ်သွတ်ꩻကိုနဝ်ꩻ သင်္ဂြိုဟ်ႏသော့ꩻသွော့ နာꩻမာဟုဲင်း၊ အီႏသင်္ဂြိုဟ်ႏသော့ꩻ နာꩻမာတာႏ သင်ႏခဲင်ꩻထမ်းအောင်နဝ်ꩻ နီအဝ်ႏစွဉ်ႏ ထာꩻသꩻဟဝ်သꩻရေꩻ အီႏဖေႏနာꩻ” နုဲင်းနဝ်ꩻသွူ။ 7နဝ်ꩻထွူ အဗြာဟံ ခံႏနွမ်ꩻလင်ꩻ 8တဲင်ဒေါ့ꩻ “သီမဉ်ႏမဉ်အွဉ်ႏ သင်္ဂြိုဟ်ႏ ခွေမာယိုကိုနဝ်ꩻ မာꩻကေꩻဇူꩻတဲင် ရီဖေႏသွော့ခွေ ဇောဟာပိုခို ဧဖါရုန်ဟုဲင်း၊ 9မက်ဖေလ ထမ်းအောင် ကအဝ်ႏဗော့ꩻဒါႏ ဝွေꩻခြံမော့ ဖေႏနေးကစာဖေႏခွေ၊ ဖေႏနေးခွေကလꩻပဲင်ႏ နုဲင်းသင်ႏခဲင်ꩻဟံႏနဝ်ꩻ တန်ႏရာꩻ အငိုꩻ ၊ ဖေႏကစာဖေႏခွေ သီအမျာꩻငါနဝ်ꩻဒေါ့ꩻဖေႏသွော့ဝွေꩻ” နုဲင်းနဝ်ꩻသွူ။
10ဧဖါရုန်နမ်း အဝ်ႏအုံလင်ꩻငီꩻတွမ်ႏ ဟိတ္တိလိုꩻအလင်ဖုံႏ ဝေင်ꩻတခါꩻတန်ထျꩻ ကစီꩻဝွေꩻဒါႏဝင်ꩻ ခင်ႏလမ်းကိုတဲင် လိုꩻစွုမ်ႏဖြာꩻ ဖေႏကဟွိုန်နဝ်ꩻ ဝွေꩻလဝ်းချာ၊ 11“နာႏခံႏဗဲင်း ခွေငဝ်းမွိုင်ဗွေႏ၊ သင်ႏခဲင်ꩻထမ်းအောင် ကအဝ်ႏသော့ꩻဒါႏဟံႏယာႏ တဟိုႏလွုမ်းနဝ်ꩻ ခွေသွဥ်းလိုꩻမျိုꩻဖုံႏဆꩻငါ ခွေသွဉ်း အီႏဖေႏဒျာႏ နာꩻသွူ။ ဖေႏနေးနာꩻ ကသင်္ဂြိုဟ်ႏသော့ꩻဗာႏ နာꩻမာနဝ်ꩻ ခွေသွဉ်းဖေႏဒျာႏ” နုဲင်းနဝ်ꩻသွူ။
12ကွဲတွော့ꩻ အဗြာဟံ ခမ်းနွမ်ꩻလင်ꩻ ဟိတ္တိလိုꩻမျိုꩻဖုံႏ ဆꩻငါတဲင် 13ဖေႏနေးလိုꩻအမျာꩻ စွုမ်ႏဖြာꩻ ကဟွိုန်ဗာႏနဝ်ꩻ ဝွေꩻဒေါ့ꩻဖေႏ ဧဖါရုန် “မာꩻကေꩻဇူꩻတဲင် နာႏဗဲင်းခွေသွဉ်း ကဒင်ႏနယ်နာꩻယို၊ ဟံႏတဟိုႏလွုမ်းနဝ်ꩻ ခွေအီႏဖြေꩻ လက်ခံႏသွော့ခွေရွဉ်တဲင် ခွေအီႏသင်္ဂြိုဟ်ႏဗာႏ ခွေမာ နဝ်ꩻကို” နုဲင်းနဝ်ꩻသွူ။
14ဧဖါရုန်လဝ်းချာ၊ 15“ဗွေႏဟံႏတန်ႏဖိုꩻနဝ်ꩻ တန်ႏဒျာႏ ရွဉ်ယာႏ အဗီႏလစ်ꩻရျာꩻလွုမ်ꩻနဝ်ꩻ နီအခါႏ ရွဉ်ယာႏတတွာနဝ်ꩻနဝ်ꩻ နီဝင်ꩻနီတာႏ ဒေါ့ꩻခရာႏလိုႏနေဟောင်း၊ သင်္ဂြိုဟ်ႏသော့ꩻသွော့ နာꩻမာ နဝ်ꩻကို” နုဲင်းနဝ်ꩻသွူ။ 16အဗြာဟံ သဘော်ꩻတူႏတဲင် နုဲင်းဧဖါရုန် ကဆွုံꩻဖျတ်ဒါႏ အငိုꩻအတွိုင်ꩻ ရွဉ်ယာႏ အဗီႏ၄၀ဝနဝ်ꩻ နုဲင်းကွုန်ႏသယ်ႏဖုံႏ ကသွုံꩻဒါႏ အယာႏခဉ်ႏအတွိုင်ꩻ တွိုင်ဖေႏဧဖါရုန် လိုꩻအမျာꩻဖုံႏ ဆꩻငါသွူ။
17ဧဖါရုန် ကပဲင်ႏဒါႏ ဟံႏယာႏကအဝ်ႏ မံရေဝေင်ꩻဖဲ့ꩻကွဉ်ႏ မက်ဖေလအရပ်နဝ်ꩻ ထွာလွဥ် အဗြာဟံ ဟံႏတဲင် ပါလို့စွဉ်ႏ သင်ႏခဲင်ꩻထမ်းအောင် ကအဝ်ႏသော့ꩻဒါႏ နဝ်ꩻကို တွမ်ႏ သေင်ႏမွူးဖုံႏ ခြံကို၊ ခြံကူလောင်း ကားကအဝ်ႏသွူ။ 18ဟံႏနဝ်ꩻနဝ်ꩻ အစီꩻဝွေꩻကို ကအဝ်ႏပါသော့ꩻဒါႏ ဟိတ္တိလိုꩻတန်ဖုံႏနဝ်ꩻတဲ့ မတ်အဗြာဟံပဲင်ႏ ဟံႏယာႏသွူ။
19နဝ်ꩻထွူ အဗြာဟံသင်္ဂြိုဟ်ႏသော့ꩻ ဝွေꩻမာသာရာ သင်ႏခဲင်ꩻထမ်းအောင် ခါနန်ခမ်းကိုသွူ။ 20ကွပ်နဝ်ꩻမꩻ ဟိတ္တိလိုꩻမျိုꩻ ကပဲင်ႏဒါႏ ဟံႏယာႏတွမ်ႏ သင်ႏခဲင်ꩻထမ်းအိုနဝ်ꩻ ထွာလွဉ်တော အဗြာဟံပဲင်ႏ သင်ႏခဲင်ꩻဟံႏသွူ။
ទើបបានជ្រើសរើសហើយ៖
ကမ္ဘာႏစ 23: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.