တမန်ႏတောႏ 8
8
1ကမာꩻသီဒါႏ ဝွေꩻနဝ်ꩻ သျောလုတဲ့ အဝ်ႏဖေႏအာႏနဝ်ꩻသွူ။
သျောလုနစ်စက်အသေန်းတောႏ
တယ်ႏစစွဉ်ႏ အနီꩻနဝ်ꩻ အသေန်းသားဖုံႏ ကအဝ်ႏသော့ꩻဒါႏ ဝေင်ꩻယေရုသလမ်ႏကိုနဝ်ꩻ စတဲင် ခံႏစာꩻဗာႏမွေးနေး ထာꩻနစ်စက်ဖုံႏသွူ။ လွိုတဲင် တမန်ႏတောႏဖုံႏနဝ်ꩻ လိုꩻကယွုမ်း သားဖုံႏ ကားကအဝ်ႏနဝ်ꩻ လီစွစ်ꩻစဲစ်ꩻ ဗꩻတွိုႏလွေꩻ ဂျူးခမ်းစွဉ်ႏ သျာမရိခမ်းဖုံႏနဝ်ꩻသွူ။ 2လိုꩻကယွုမ်းခြေင်းသားဖုံႏ ယင်ဟန်ႏနဝ်ꩻ သင်္ဂြိုဟ်ႏ တတေဖန်၊ ငွိုးကော့ꩻသန် ဖေႏမွေးနေးစွဉ်ႏ ဝွေꩻတာႏသွူ။
3 #
တ ၂၂:၄၊ ၅၊ ၂၆:၉–၁၁။ ကွဲႏတွော့ꩻ သျောလုနဝ်ꩻ ကျံႏယားကုဲင် အသေန်းတောႏသွူ။ အဝ်ႏလွေꩻထင်ႏ တလမ်းထွူတလမ်း ကယွုမ်းသား အခိုတွမ်ႏ အမူႏဖုံႏနဝ်ꩻ ဝွေꩻတွာႏထန်ႏတဲင် အွဉ်ႏခံသော့ꩻစွဉ်ႏ ထောင်ႏကိုနဝ်ꩻသွူ။
ဟော်ꩻသတင်ꩻဟဝ်တရာꩻသျာမရိခမ်းကို
4လိုꩻကယွုမ်းသားဖုံႏနဝ်ꩻ အဝ်ႏစွစ်ꩻလီလွေꩻ ခင်ႏလမ်းမုဲင်ꩻကို တယဝ်းဟော်ꩻစွဉ်ႏ တရာꩻဖုံႏနဝ်ꩻသွူ။ 5ဖိလိပ္ပုလွေꩻ ဝေင်ꩻတောႏတန် သျာမရိခမ်းကိုတဲင် ဟော်ꩻဖေႏ လိုꩻနဝ်ꩻကိုဖုံႏ မေသျိယ ခရာႏနဝ်ꩻသွူ။ 6ဖိလိပ္ပုမာꩻနယ် နိမိတ်လက္ခဏာႏဖုံႏ၊ နုဲင်းဖိလိပ္ပုကဒေါ့ꩻဖုံႏနဝ်ꩻ လိုꩻစွိုꩻဖုံႏထီႏတဲင် အွဉ်ႏရေꩻ နာႏစဲင်းမွေးစွဉ်ႏသွူ။ 7လူꩻကုဲင်ဖုံႏ ကစောင်ꩻဒါႏ လိုꩻအာဖုံႏနဝ်ꩻ ခြောဝ်သန်စွဉ်ႏ အငဝ်းဖုံႏတွော့ꩻ ထန်ႏထိုꩻစွဉ်ႏသွူ၊ လိုꩻမာႏရေႏ အာငါႏဖုံႏတွမ်ႏ လိုꩻစူခင်ႏ ပနဲဉ်ႏသားဖုံႏနဝ်ꩻ ဟဝ်ရေꩻစွဉ်ႏနဝ်ꩻသွူ။ 8နဝ်ꩻမꩻ ဝေင်ꩻနဝ်ꩻကိုသားဖုံႏနဝ်ꩻ သꩻဟဝ်သꩻရေꩻ မွေးနေးစွဉ်ႏဖုံႏသွူ။
9ပါꩻခိုတဖြာꩻ မဉ်ꩻသိမုန်နဝ်ꩻ အဝ်ႏအုံသော့ꩻ နဝ်ꩻကိုသွူ၊ မော့ꩻလဲင်ႏခါ သျာမရိ လိုꩻမျိုꩻဖုံႏ အံႏဖြာႏမွေးနေးစွဉ်ႏ ဝွေꩻမျက်ကလဲ့ ပညာႏသွူ။ ဝွေꩻနဝ်ꩻထွာ လိုꩻတန်မျတ် တဖြာꩻနဝ်ꩻ ဝွေꩻကေႏညာႏတဲင်၊ 10လိုꩻဝေင်ꩻကိုသားဖုံႏ စွုမ်ႏဖြာꩻ ကထွာလိုꩻဆင်ႏရန်း အမျိုꩻမျိုꩻဖုံႏနဝ်ꩻဒေါ့ꩻ၊ “ဝွေꩻနဝ်ꩻထွာ ဗွေႏဘုရာꩻ ကသေဒါႏထာꩻ တန်ꩻခိုꩻနုဲင်း ‘တန်ꩻခိုꩻအတန်သွတ်ꩻ’” နုဲင်းနဝ်ꩻတဲင် နာႏမွေးနေးစွဉ်ႏ ဝွေꩻငဝ်းသွူ။ 11ကွပ်ပွိုး ဝွေꩻမာꩻနယ် ဝွေꩻသီး အံႏဖြာႏခရာႏ စွဉ်ႏဝွေꩻမျက်ကလဲ့ ပညာႏအစားနဝ်ꩻ ညငါႏလဲဉ်းအတွက် ဝွေꩻသီး အွဉ်ႏရေꩻမွေးစွဉ်ႏ ဝွေꩻနဝ်ꩻသွူ။ 12ကွဲႏတွော့ꩻ ဖိလိပ္ပုထွိုင်ႏဟော်ꩻ ပွိုင်းဝွို့တွမ်ႏ ဗွေႏဘုရာꩻခမ်းထီ နဲင်ႏငံႏခရာႏတွမ်ႏ ဗွေႏယေသျု ခရစ်တောႏခရာႏ သတင်ꩻဟဝ်နဝ်ꩻ ဝွေꩻသီး ယွုမ်းလွဉ်တဲင် မူႏမူႏခိုခို ခံꩻစွဉ်ႏ ဗတ္တိဇံႏ ထီမင်္ဂလာႏဖုံႏနဝ်ꩻသွူ။ 13သိမုန်နမ်းနဝ်ꩻတဲ့ ယွုမ်းတဲင် ခံႏစွဉ်ႏဗတ္တိဇံႏ ထီမင်္ဂလာႏသွူ။ ဝွေꩻအုံဗော့ꩻ ဖိလိပ္ပုထျꩻတဲင် ဝွေꩻထီႏဗာႏ ကအဝ်ႏမာꩻနယ်ဒါႏ ထာꩻအံႏဖြာႏခရာႏတွမ်ႏ နိမိတ်လက္ခဏာႏဖုံႏ တန်ငါႏနဝ်ꩻမꩻ အံႏဖြာႏမွေးစွဉ်ႏသွူ။
14လိုꩻသျာမရိ ခမ်းဖုံႏ လက်ခံႏလဲဉ်း ဗွေႏဘုရာꩻငဝ်းနဝ်ꩻ တမန်ႏတောႏဖုံႏ ကအဝ်ႏဒါႏ ဝေင်ꩻယေရုသလမ်ႏကိုနဝ်ꩻ ဟွိုန်စွဉ်ႏသွူ။ နဝ်ꩻမꩻ ဝွေꩻသီး အွဉ်ႏစွꩻလွေꩻ ပေတရုတွမ်ႏ ယောဟန် ဝွေꩻသီးထျꩻသွူ။ 15ဝွေꩻသီး ထွိုင်ႏဖျော်လွဉ်ချိန်ႏ လိုꩻယွုမ်းသားဖုံႏ ဖေႏနေး ဝွေꩻသီး ကလက်ခံႏလꩻ ကြောင်းစင် ဝိညာဉ်ႏတောႏနဝ်ꩻ ဝွေꩻသီး ဆုတောင်ꩻဖေႏနဝ်ꩻသွူ။ 16စွဉ်ႏဗွေႏယေသျု အမဉ်ႏနာႏမ ဝွေꩻသီးခံႏလဲဉ်း ဗတ္တိဇံႏ ထီမင်္ဂလာႏစွဉ်ႏတဲ့၊ ပွိုးကြောင်းစင် ဝိညာဉ်ႏတောႏ တလꩻလင်ꩻလွဉ် တဝ်းဒွိုန်း ဝွေꩻသီး တဖြာꩻဖြာꩻလောင်းသွူ။ 17နဝ်ꩻထွူ ပေတရုတွမ်ႏ ယောဟန် အွဉ်ႏဒင်ႏစူ ဝွေꩻသီး လောင်းတဲင် ဝွေꩻသီး လက်ခံႏလꩻစွဉ်ႏ ကြောင်းစင် ဝိညာဉ်ႏတောႏနဝ်ꩻသွူ။
18တမန်ႏတောဖုံႏစူ ထွိုင်ႏအွဉ်ႏဒင်ႏ လိုꩻယွုမ်းသားဖုံႏ လောင်းချိန်ႏ ဝွေꩻသီး လက်ခံႏလꩻလဲဉ်း ဝိညာဉ်ႏတောႏနဝ်ꩻ သိမုန်ထီႏသွူ။ နဝ်ꩻမꩻ ဝွေꩻဖေႏ ပေတရုတွမ်ႏ ယောဟန်ရွဉ်တဲင်၊ 19ဒေါ့ꩻ၊ “ခွေစူဖုံႏ မဉ်ႏအွဉ်ႏဒင်ႏ လိုꩻတဖြာꩻဖြာꩻလောင်းချိန်ႏ ဖေႏနေးကလက်ခံႏလꩻ ကြောင်းစင် ဝိညာဉ်ႏတောႏနဝ်ꩻ တန်ꩻခိုꩻယို ဖေႏပါသွော့ခွေ” နုဲင်းနဝ်ꩻသွူ။
20ကွဲႏတွော့ꩻ ပေတရု လဝ်းချာဝွေꩻ၊ “ဗွေႏဘုရာꩻ ဆုကေꩻဇူꩻနဝ်ꩻ ဖြေꩻနေးတွမ်ႏ ရွဉ်လꩻ၊ ပွိုးနာꩻအဝ်ႏထင်းဒျာႏ နုဲင်းနဝ်ꩻအတွက် ယံဖေႏ နာꩻတွမ်ႏ နာꩻရွဉ်ဖုံႏနဝ်ꩻ ကလွေꩻသွော့ ငါးရုဲင်ꩻ။ 21ပွိုးနာꩻသꩻဘော်ꩻနဝ်ꩻ တမဲဉ်ႏတဝ်း စွဉ်ႏဗွေႏဘုရာꩻ အလိုႏတောႏနဝ်ꩻမꩻ နာꩻနဝ်ꩻ ပါငီꩻနီ မဉ်ႏမွေးတဝ်း မာꩻငီꩻနီထာꩻမာꩻ တလꩻတဝ်းသွူ။ 22နဝ်ꩻထွူ နာꩻကအဝ်ႏကျံႏကုဲင်ဒါႏ ထာꩻယိုဖုံႏနဝ်ꩻ လꩻသွော့ ထာꩻကော့ꩻမာႏတဲင် ပွိုးကအဝ်ႏယူႏ စဉ်ꩻစာꩻဒါႏထာꩻ နုဲင်းယိုစား ဖေႏနေး ဝွေꩻဗွေႏ ကအွဉ်ႏစွꩻလွစ် နာꩻအပဲစ်နဝ်ꩻ ဆုတောင်ꩻထေ့သွော့ ဗွေႏဘုရာꩻထျꩻ။ 23နာꩻနဝ်ꩻ အဝ်ႏဗွေစွဉ်ႏ ထာꩻတကေးတဲင် အဝ်ႏခံသော့ꩻဒျာႏ အပဲစ်ထောင်ႏကိုနဝ်ꩻ ပွိုးခွေအဝ်ႏထီႏ” နုဲင်းနဝ်ꩻသွူ။ 24သိမုန်ဒေါ့ꩻဖေႏ ပေတရုတွမ်ႏ ယောဟန်၊ “ဖေႏနေး နုဲင်းသီကဒေါ့ꩻဒါႏ ထာꩻယိုဖုံႏ ဖေႏခွေကထွာဗာႏမွိုန်းနဝ်ꩻ ခွေတာႏ မာꩻကေꩻဇူꩻတဲင် ဆုတောင်ꩻ ထေ့ဖေႏသွော့ ဗွေႏဘုရာꩻထျꩻ” နုဲင်းနဝ်ꩻသွူ။ 25ဝွေꩻသီးအဝ်ႏခံႏဖေႏ သက်သေႏတွမ်ႏ ကေႏညာႏ ဗွေႏဘုရာꩻ တရာꩻထွူ၊ ပေတရုတွမ်ႏ ယောဟန် သဲင်ꩻချာယင်း ဝေင်ꩻယေရုသလမ်ႏသွူ။ တဖူꩻလောင်းနဝ်ꩻ ဝွေꩻသီးဟော်ꩻဖေႏ သတင်ꩻဟဝ်တရာꩻ သျာမရိဒုံဖုံႏကိုနဝ်ꩻ အာငါႏသွူ။
ဖိလိပ္ပုစွဉ်ႏအီတီယိုးပီးယားအမတ်တန်
26မို့ꩻလောင်းတမန်ႏ တပါꩻ ဒေါ့ꩻဖေႏဖိလိပ္ပု၊ “ထွိုင်ႏတဲင် လွေꩻနဝ်လွေꩻသွော့ တဖူꩻတန် အဝ်ႏဝေင်ꩻယေရုသလမ်ႏ ကလွေꩻဒါႏ ဂါဇဝေင်ꩻနဝ်ꩻဟုဲင်း” နုဲင်းနဝ်ꩻသွူ။ (တဖူꩻတန်ယိုနဝ်ꩻ ဟန်ႏနီꩻယို လိုꩻတလွေꩻတဝ်းဒွုမ်သွူ)။ 27-28နဝ်ꩻမꩻ ဖိလိပ္ပုထွိုင်ႏ တဲင်လွေꩻစွဉ်ႏသွူ။ ယိုခါ အီတီယိုးပီးယား အမတ်တန်တဖြာꩻ ကထွာ လိုꩻအရေꩻတန် တဖြာꩻ ကအဝ်ႏထိန်ꩻထွား ဗာႏဒါႏ အီတီယိုးပီးယားခွန်မူႏ ဥစ္စာႏ ဘဏ္ဍာႏဖုံႏနဝ်ꩻ အဝ်ႏသဲင်ꩻချာ ဝွေꩻလမ်း တဖူꩻလောင်းနဝ်ꩻသွူ။ အီႏလွေꩻဝုဲင်ႏ ကိုꩻကွယ်ႏ ဗွေႏဘုရာꩻနဝ်ꩻ ဝွေꩻအဝ်ႏလွေꩻ ဝေင်ꩻယေရုသလမ်ႏတဲင် အဝ်ႏသဲင်ꩻချာလမ်း အဝ်ႏထုမ်းသော့ꩻ ဝွေꩻသေလောကိုသွူ။ နုဲင်းဝွေꩻကအဝ်ႏထုမ်းလွေꩻ တဖူꩻတလီးလွုမ်းနဝ်ꩻ ဝွေꩻအဝ်ႏဖတ် ပရောဖဲစ် ဟေသျာယ ကျမ်ꩻအုပ်သွူ။ 29ကြောင်းစင် ဝိညာဉ်ႏတောႏနဝ်ꩻ မိန်းဖေႏဖိလိပ္ပု၊ “လွေꩻသေလောထျꩻနဝ်ꩻတွော့ꩻ အုံဗော့ꩻဗော့ꩻ သေလောနဝ်ꩻဟုဲင်း” နုဲင်းနဝ်ꩻသွူ။ 30ဖိလိပ္ပု ဖင်းလွေꩻထွꩻစွဉ်ႏတဲင် ဟွိုန်ဝွေꩻအဝ်ႏဖတ် ပရောဖဲစ် ဟေသျာယ ကျမ်ꩻအုပ်သွူ။ ဖိလိပ္ပုရီဝွေꩻ၊ “နုဲင်းနာꩻ ကအဝ်ႏဖတ်နဝ်ꩻ နာꩻသေနာႏနေဟောင်း” နုဲင်းနဝ်ꩻသွူ၊၊
31အမတ်တန် လဝ်းချာ၊ “ပေါႏလိုꩻတဖြာꩻဖြာꩻ တသျင်ꩻနယ်ဖေႏတဝ်း ခွေနဝ်ꩻ ခွေသေနာႏနွောင်ꩻ နုဲင်းမုဲင်ꩻဟောင်း” နုဲင်းနဝ်ꩻတဲင် ဖေႏကထင်ႏ သေလောလောင်းတွော့ꩻ ကအုံလင်ꩻငီꩻ ဝွေꩻသေလောကိုနဝ်ꩻ ဝွေꩻဖစ်ဟဲ့ꩻ ဖိလိပ္ပုသွူ။ 32#ဟေသျာ ၅၃:၇၊ ၈ (LXX)။ ဝွေꩻကအဝ်ႏဖတ်ဒါႏ လိတ်ကျမ်ꩻပိုဒ်နဝ်ꩻ နုဲင်းယိုသွူ။
“ဝွေꩻနဝ်ꩻ ဗွိုန်နုဲင်း ကအဝ်ႏထူႏလွေꩻ ကအီႏမာꩻသီဒါႏ သွိုꩻတဗာႏ၊
ဗွိုန်နုဲင်း သွိုꩻပေႏတဗာႏ ဝင်ꩻကအီႏရိပ်ꩻထိုꩻ အဆွဉ်ႏတဲင် တမာꩻတဝ်း အငဝ်းသွူ။
ဝွေꩻနဝ်ꩻတဲ့ အီႏတဒေါ့ꩻတဝ်း ငဝ်းတငွါငွါသွူ။
33ဝွေꩻနဝ်ꩻ အဝ်ႏခံႏဗာႏ ထာꩻဝင်ꩻသꩻတဲင် ကောမာꩻတရာꩻဖေႏဝွေꩻ တအဲဉ်ထဝ်းသွူ။
ပွိုးတွော့ꩻ အီႏအွဉ်ႏသွတ်ꩻထိုꩻ ဝွေꩻအသက် ဟံႏတန်လောင်းယို နဝ်ꩻမꩻ
ဝွေꩻပိုလီꩻ စွိုးခွိုꩻခရာႏနဝ်ꩻ ပါꩻမုဲင်ꩻတဖြာꩻတဲ့ အီႏဒေါ့ꩻနယ်တလꩻနွောင်ꩻတဝ်း၊” နုဲင်းနဝ်ꩻသွူ။
34အမတ်တန်ရီ ဖိလိပ္ပု၊ “ပရောဖဲစ် ကအဝ်ႏဒေါ့ꩻဒါႏ ယိုနဝ်ꩻ ထွာပါꩻမုဲင်ꩻဟောင်း။ ရိုꩻချာဒျာႏ အနမ်းနဲ့ မဉ်ႏတမွေးတဝ်း အမဉ်ရိုꩻဒျာႏ ပါꩻလင် တဖြာꩻဖြာꩻနဲ့ဟောင်းနဝ်ꩻ ဒေါ့ꩻနယ်ဖေႏခွေ၊” နုဲင်းနဝ်ꩻသွူ။ 35တွိုႏနဝ်ꩻ စွဉ်ႏလိတ်ကျမ်ꩻပိုဒ်ယို ပွိုင်းဝွို့တွမ်ႏ ဗွေႏယေသျု ခရာႏသတင်ꩻဟဝ်နဝ်ꩻ ဖိလိပ္ပု ဒေါ့ꩻနယ်ဖေႏစွဉ်ႏ ဝွေꩻသွူ။ 36နုဲင်းဝွေꩻသီး ကအဝ်ႏလင်ꩻလွေꩻ တဖူꩻတန်နဝ်ꩻ ဝွေꩻသီးဖျော် ခင်ႏလမ်းတထွောင်း၊ နဝ်ꩻကိုနဝ်ꩻ ထီပြန်ꩻပြော်ꩻတဲင် အမတ်တန်ဒေါ့ꩻ၊ ယိုကိုနဝ်ꩻ ထီပြန်ꩻပြော်ꩻသွူ။ ကအီႏခံႏဗာႏ ဗတ္တိဇံႏ ထီမင်္ဂလာႏ ကအီႏရဲဆီꩻခွေနဝ်ꩻ အဝ်ႏဒွိုန်းကဟောင်း” နုဲင်းနဝ်ꩻသွူ။ 37(ဖိလိပ္ပု ဒေါ့ꩻဖေႏဝွေꩻ၊ “စွဉ်ႏသွိုန်ႏလို့ သꩻစင် နာꩻမဉ်ႏယွုမ်းနဝ်ꩻ နာꩻအီႏခံႏ ဗတ္တိဇံႏ ထီမင်္ဂလာႏလꩻဒျာႏသွူ။ ဝွေꩻလဝ်းချာ၊ ဗွေႏယေသျု ခရစ်တောႏထွာ ဗွေႏဘုရာꩻ ပိုခိုတောႏနဝ်ꩻ ခွေသွဉ်းယွုမ်းဒျာႏ” နုဲင်းနဝ်ꩻသွူ။)
38ဖေႏနေး ကအွဉ်ႏထွိုင်ႏ သေလောနဝ်ꩻ အမတ်တန် ဖေႏအမိန်းတွော့ꩻ ဖိလိပ္ပုတွမ်ႏ အမတ်တန် ဝင်ꩻနီလွုမ်း လင်ꩻသော့ꩻ ထီကိုတဲင် ဖိလိပ္ပုဖေႏစွဉ်ႏဝွေꩻ ဗတ္တိဇံႏ ထီမင်္ဂလာႏနဝ်ꩻသွူ။ 39ဝွေꩻသီးအဝ်ႏထီကို ထွိုင်ႏထန်ႏလွဉ်ချိန်ႏ ဗွေႏဘုရာꩻ ဝိညာဉ်ႏတောႏနဝ်ꩻ ထူႏလွေꩻညာꩻထိုꩻ ဖိလိပ္ပုနဝ်ꩻသွူ။ အမတ်တန်နဝ်ꩻ ထီႏဗာႏဖျင်ထဲင်း တဝ်းဒွုမ် ဝွေꩻသွူ။ ကွဲႏတွော့ꩻ ဝွေꩻနဝ်ꩻ အဝ်ႏဗွေစွဉ်ႏ ထာꩻသꩻဟဝ်သꩻရေꩻ သဲင်ꩻသွုပ်သွုပ်ဒျာႏ အတဖူꩻနဝ်ꩻသွူ။ 40ဖိလိပ္ပု ထွိုင်ႏသေနမ်းနဝ်ꩻ ဝွေꩻဖျော်လဲဉ်း ဝေင်ꩻအာသုတ်တဲင် ဝွေꩻလွေꩻသွုပ် ကဲသရိဝေင်ꩻတွော့ꩻ တဖူꩻလောင်းနဝ်ꩻ ဝွေꩻဟော်ꩻ သတင်ꩻဟဝ်တရာꩻ စွုမ်ႏဝေင်ꩻဝေင်ꩻနဝ်ꩻသွူ။
ទើបបានជ្រើសរើសហើយ៖
တမန်ႏတောႏ 8: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
