တမန်ႏတောႏ 18
18
အဝ်ႏသော့ꩻဝေင်ꩻကောရိန္တု
1ယိုထွူ ပေါလု အဝ်ႏဝေင်ꩻ အေတေင် ထန်ႏတဲင် လွေꩻထိုꩻစွဉ်ႏ ဝေင်ꩻကောရိန္တုသွူ။ 2နဝ်ꩻကို ဝွေꩻမော့ꩻခွဲ လိုꩻဇာႏတိ အဝ်ႏပုန္တုခမ်း၊ ဂျူးလိုꩻမျိုꩻ တဖြာꩻ မဉ်ꩻကဟဲ့ꩻဒါႏ အာကုလ အဝ်ႏအီတလီခမ်း ဖျော်လွဉ် တပေါႏညတဝ်းဒွိုန်း စွဉ်ႏဝွေꩻမာ ဖီသီးလ နဝ်ꩻသွူ။ ဂျူးလိုꩻမျိုꩻဖုံႏ ကားကအဝ်ႏ ဖေႏကထန်ႏထိုꩻ ရောမခမ်းနဝ်ꩻ ပွိုးဧကရာဇ်ခွန်တန် ကလောဒိ ချအမိန်းသွူ။ နဝ်ꩻမꩻ ပေါလု လွေꩻမော့ꩻခွဲစွဉ်ႏ ဝွေꩻသီးတဲင်၊ 3ပွိုးပေါလု အဝ်ႏလွူးချာ အီအနမ်းစွဉ်ႏ ကမာꩻဒါႏ သုမ်းမောက်ꩻကာꩻမွန် ဗွိုန်နုဲင်း ဝွေꩻသီးကမာꩻ နဝ်ꩻအတွက် အုံနဝ်ꩻကိုတွော့ꩻ မာꩻငီꩻစွဉ်ႏ ဝွေꩻသီးထာꩻမာꩻသွူ။ 4ဂျူးလိုꩻမျိုꩻတွမ်ႏ ဂရိလိုꩻမျိုꩻ နီမျိုꩻလွုမ်း ဖေႏကလက္ခံႏ ယွုမ်းအံႏလို့ဝင်ꩻနဝ်ꩻ ဥပုသ်မွူးနီꩻ စွုမ်ႏလဲင်ႏ ဝွေꩻဖျော်တွိုႏ အုံကွံသော့ꩻ တရာꩻစရွပ်ကိုသွူ။
5သိလတွမ်ႏ တိမောတေ အဝ်ႏမာကေဒေါနိခမ်း ထွိုင်ႏဖျော်လွဉ်နဝ်ꩻ ဗွေႏယေသျု ထွာဒျာႏ မေသျိယခရာႏနဝ်ꩻ ပေါလု အချိန်ႏလို့အီဒျာႏ ဟော်ꩻတရာꩻ၊ ခံႏနယ်ဖေႏ ဂျူးလိုꩻမျိုꩻဖုံႏ သက်သေႏသွူ။ 6ဝွေꩻသီး ထွိုင်ႏဆန်ချာဝွေꩻတွော့ꩻ ဒေါ့ꩻကုဲင် ဝွေꩻခရာႏချိန်ႏ ဝွေꩻထွားချာနမ်း၊ ဟံႏဖွန်ႏဖုံႏ ဝွေꩻခွမ်ꩻလာꩻလောင်းနဝ်ꩻ ဝွေꩻတဒေါက်ꩻလင်ꩻထိုꩻတဲင် ရိုꩻဖေႏ ဝွေꩻသီး၊ “သီမဉ်ႏသွုမ်ꩻကုဲင်ထိုꩻနဝ်ꩻ သီနမ်း ထူႏချာသွော့ တာႏဝွန်ႏဟုဲင်း။ ခွေတာႏဝွန်ႏ တအဲဉ်ထဝ်းသွူ။ တယ်ႏယိုမာꩻငါ ခွေအီႏလွေꩻဒျာႏ လိုꩻမျိုꩻလင်ဖုံႏထျꩻ” နုဲင်းနဝ်ꩻသွူ။ 7နဝ်ꩻမꩻ ပေါလု အဝ်ႏဝွေꩻသီးထျꩻနဝ်ꩻ ထန်ႏထိုꩻတဲင် လွေꩻအုံငီꩻတောစွဉ်ႏ လိုꩻမျိုꩻလင်တဖြာꩻ မဉ်ꩻကဟဲ့ꩻဒါႏ တိတု ယုတ္တု၊ ကအဝ်ႏဝုဲင်ႏကိုꩻကွယ်ႏ ဗွေႏဘုရာꩻနဝ်ꩻ အလမ်းသွူ။ ဝွေꩻလမ်းနဝ်ꩻ အဝ်ႏပယ်ဗော့ꩻစွဉ်ႏ တရာꩻစရွပ်နဝ်ꩻသွူ။ 8ပါꩻကအဝ်ႏထွာ တရာꩻစရွပ်မူꩻ ဂရိပ္ပု စွဉ်ႏဝွေꩻတမွိုးဖါပိုစွိုꩻဖုံႏ ကားကအဝ်ႏနဝ်ꩻ ယွုမ်းလွဉ် ဗွေႏဘုရာꩻတဲင် ဝေင်ꩻကောရိန္တုကို လိုꩻအာအလင်ဖုံႏ ထွိုင်ႏဟွိုန်တရာꩻနဝ်ꩻ ယွုမ်းတဲင် ခံႏဗတ္တိဇံႏ ထီမင်္ဂလာႏဖုံႏနဝ်ꩻသွူ။
9တဟာသား ပေါလုလꩻ ဗျာဒိတ်ရူႏပါႏရုံႏ တစွိုး၊ ဗွေႏဘုရာꩻ ဒေါ့ꩻဖေႏဝွေꩻ၊ “တွမ်ႏငမ်းသꩻမွိုန်း၊ ဒေါ့ꩻသွုပ်သွုပ်ဒျာႏတွော့ꩻ တွမ်ႏဖေႏသွုမ်ꩻ ထိုꩻမွိုန်းဟုဲင်း။ 10ပွိုးခွေ အဝ်ႏငီꩻဒျာႏ နာꩻနဝ်ꩻသွူ။ ပါꩻမုဲင်ꩻတဖြာꩻတဲ့ အီႏတမာꩻဆာ ဗာႏတဝ်းနာꩻ၊ ပွိုးဝေင်ꩻကိုယိုနဝ်ꩻ ခွေလိုꩻဖုံႏ အဝ်ႏအာငါႏ” နုဲင်းနဝ်ꩻသွူ။ 11နဝ်ꩻမꩻ ပေါလု အုံနဝ်ꩻကို တနေင်ႏပုဲင်သူလာ၊ သွဉ်သင်ဖေႏ လိုꩻဖုံႏ ဗွေႏဘုရာꩻ တရာꩻတောႏနဝ်ꩻသွူ။
12ဂါလီယို ထွိုင်ႏထွာ ရောမခွန်ခံႏ အခါယခမ်းကိုချိန်ႏ ဂျူးလိုꩻမျိုꩻဖုံႏ ကအဝ်ႏနဝ်ꩻကိုနဝ်ꩻ စုဗူႏလို့ဝင်ꩻတွော့ꩻ ဆွမ်ꩻပေါလုတဲင် ဟဲ့ꩻလွေꩻဝွေꩻ တရာꩻရွုမ်ꩻကိုနဝ်ꩻသွူ။ 13ဝွေꩻသီးဒေါ့ꩻ၊ “ပါꩻခိုယိုနဝ်ꩻ စွဉ်ႏအနယ်ꩻ ဆန်ချာပညတ်တရာꩻတွော့ꩻ လိုꩻဖုံႏ ဖေႏကဝုဲင်ႏကိုꩻကွယ်ႏ ဗွေႏဘုရာꩻနဝ်ꩻ အဝ်ႏကျံႏကျိုꩻစာꩻ သွေꩻကုဲင်” နုဲင်းနဝ်ꩻသွူ။
14နဝ်ꩻခရာႏ ပေါလု ကအီႏဒေါ့ꩻချိန်ႏ ဂါလီယိုဒေါ့ꩻဖေႏ ဂျူးလိုꩻမျိုꩻဖုံႏ၊ “ကိစ္စယိုနဝ်ꩻ ထွာဒျာႏ ပဲစ်မာႏ ရာႏဇဝွတ်မုပဲစ် တစွိုးစွိုး၊ မဉ်ႏတမွေးတဝ်း မဉ်ႏထွာပဲစ်မာႏဒျာႏ၊ စွဲꩻတရာꩻ အကျောင်ꩻခရာႏ နုဲင်းနဝ်ꩻနဝ်ꩻ ခွေအီႏသင်ႏချင်ႏတွော့ꩻ အီႏသယ်ꩻခံႏဒျာႏသီ ဂျူးလိုꩻမျိုꩻဖုံႏသွူ။ 15ကွဲႏတွော့ꩻ အမုယို မဉ်ႏပွိုင်းဝွို့ဒျာႏ ငဝ်းအသွုံꩻဖုံႏ၊ အမဉ်ꩻဖုံႏတွမ်ႏ သီပညတ် တရာꩻတောႏဖုံႏဒျာႏတွော့ꩻ ငဝ်းအာလို့ဝင်ꩻ နုဲင်းယိုနဝ်ꩻ သီနမ်း ဆွုံꩻဖျတ်ချာဒျာႏ၊ အမုစားယိုဖုံႏနဝ်ꩻ ခွေအီႏ တဆွုံꩻဖျတ်ဖေႏတဝ်း” နုဲင်းနဝ်ꩻတဲင်၊ 16ဝွေꩻဝါးထန်ႏထိုꩻစွဉ်ႏ ဝွေꩻသီး တရာꩻရွုမ်ꩻ ကောင်းထန်ႏနဝ်ꩻသွူ။ 17ဝွေꩻသီး ကားကအဝ်ႏနဝ်ꩻ ဆွမ်ꩻစွဉ်ႏ တရာꩻစရွပ်မူꩻ သုဿင်တဲင် တွဲႏစွဉ်ႏဝွေꩻ တရာꩻရွုမ်ꩻဆꩻငါနဝ်ꩻသွူ။ ကွဲႏတွော့ꩻ ဂါလီယိုနဝ်ꩻ တစိꩻစိꩻတဲ့ တထူႏရေꩻတဝ်းသွူ။
သဲင်ꩻချာဝေင်ꩻအန္တိအုတ်
18 #
ကွ ၆:၁၈။ ပေါလု အုံငီꩻစွဉ်ႏ လိုꩻယွုမ်းသားဖုံႏ ဝေင်ꩻကောရိန္တုကို မွူးနီꩻအာငါႏသွူ။ နဝ်ꩻထွူ အဝ်ႏဝွေꩻသီးထျꩻ ထန်ႏလွေꩻတဲင် စွဉ်ႏဖီသီးလတွမ်ႏ အာကုလနဝ်ꩻ ထုမ်းသင်္ဘောꩻတွော့ꩻ ဖြုဲင်ꩻလွေꩻထိုꩻ သီးရီးယားခမ်းနဝ်ꩻသွူ။ အဝ်ႏကေင်ချေ ခလားကဖြုဲင်ꩻထန်ႏနဝ်ꩻ ဝွေꩻအွဉ်ႏဂတိလဲဉ်း ဗွေႏဘုရာꩻနဝ်ꩻမꩻ ဝွေꩻကြော့ꩻစွဉ်ႏ ဝွေꩻကလူꩻသွူ။ 19ဝွေꩻသီး ဖျော်လွဉ်သော့ꩻ ဝေင်ꩻဧဖဲစ်ကိုတဲင် နဝ်ꩻကိုနဝ်ꩻ ပေါလု အွဉ်ႏကုဲင်ထိုꩻ ဖီသီးလစွဉ်ႏ အာကုလသွူ။ ဝွေꩻလွေꩻနွို့သော့ꩻ တရာꩻစရွပ်ကိုတဲင် ဆွေꩻနွေꩻစွဉ်ႏ ဂျူးလိုꩻမျိုꩻဖုံႏသွူ။ 20ဖေႏကအုံငီꩻည ဝွေꩻသီးနဝ်ꩻ လိုꩻဖုံႏ တောင်ꩻပြန်ႏဝွေꩻ စွဉ်ႏတဲ့ ဝွေꩻတအုံတဝ်းနဝ်ꩻသွူ။ 21ဝွေꩻကအီႏ ထန်ႏလွေꩻချိန်ႏ ဝွေꩻဒေါ့ꩻဖေႏ ဝွေꩻသီး၊ “ဗွေႏဘုရာꩻ အလိုႏတောႏ မဉ်ႏအဝ်ႏနဝ်ꩻ ခွေအီႏသဲင်ꩻလွဉ်ချာယင်း သီထျꩻ” နုဲင်းနဝ်ꩻတဲင် ဝွေꩻအဝ်ႏ ဝေင်ꩻဧဖဲစ် ဖြုဲင်ꩻစွဉ်ႏ သင်္ဘောꩻနဝ်ꩻသွူ။
22ဝွေꩻထွိုင်ႏဖျော်လွဉ် ဝေင်ꩻကဲသရိနဝ်ꩻ ဝွေꩻလွေꩻ ဝေင်ꩻယေရုသလမ်ႏတွော့ꩻ နုတ်ဆက် အသေန်းတောႏ ထွူတဲင် လွေꩻထိုꩻ ဝေင်ꩻအန္တိအုတ်နဝ်ꩻသွူ။ 23ဝွေꩻအုံနဝ်ꩻကို အချိန်ႏညတန်သွူ။ ဝွေꩻထန်ႏတဲင် ဖျတ်ကာႏလွေꩻ ဂလာတိတွမ်ႏ ဖြုဂိနယ်ႏတွော့ꩻ တမာဖေႏအာႏ နိုꩻဆော်ႏ လိုꩻကယွုမ်းသားဖုံႏ ကားကအဝ်ႏနဝ်ꩻသွူ။
အာပေါလုအဝ်ႏသော့ꩻဝေင်ꩻဧဖဲစ်စွဉ်ႏဝေင်ꩻကောရိန္တု
24အချိန်ႏနဝ်ꩻ ဂျူးလိုꩻမျိုꩻတဖြာꩻ မဉ်ꩻကဟဲ့ꩻဒါႏ အာပေါလုနဝ်ꩻ အဝ်ႏအဇာႏတိဝေင်ꩻ အလဲက်သန်းဒီးယားနဝ်ꩻ လွဉ်ဝေင်ꩻဧဖဲစ်နဝ်ꩻသွူ။ ဝွေꩻဟော်ꩻတရာꩻ ဒါႏငါႏတဲင် လဲပ်ငါႏ လိတ်ကျမ်ꩻနဝ်ꩻသွူ။ 25ဗွေႏဘုရာꩻ အနယ်ꩻနဝ်ꩻ ဝွေꩻအဝ်ႏသွဉ်ထူႏ စွုံႏလင်ႏဟဝ်လဲဉ်းတဲင် ဗွေႏယေသျု ခရာႏနဝ်ꩻ စွဉ်ႏသွိုန်ႏပါသꩻပါ ဝွေꩻဟော်ꩻ ကေႏညာႏတွော့ꩻ သွဉ်သင်မဲဉ်ႏသေႏချာႏ ဖေႏမွေးစွဉ်ႏသွူ။ ကွဲႏတွော့ꩻ ဝွေꩻသေဒျာႏ ယောဟန် ဗတ္တိဇံႏ ထီမင်္ဂလာႏလွုမ်ꩻနဝ်ꩻသွူ။ 26ဝွေꩻဟော်ꩻရုဲင်းသော့ꩻ မွေးနေးစွဉ်ႏ တရာꩻစရွပ်ကိုတဲင် ဖီသီးလစွဉ်ႏ အာကုလ ထွိုင်ႏဟွိုန် ဝွေꩻတရာꩻနဝ်ꩻ ဝွေꩻသီး ဖစ်ဟဲ့ꩻသဲင်ꩻဝွေꩻ လမ်းကိုတွော့ꩻ ပွိုင်းဝွို့တွမ်ႏ ဗွေႏဘုရာꩻ အနယ်ꩻ တဖူꩻနဝ်ꩻ သျင်ꩻနယ်စဲင်းဖေႏယင်း ဝွေꩻသွူ။ 27နဝ်ꩻထွူ အာပေါလု အီႏလွေꩻထိုꩻ အခါယခမ်းနဝ်ꩻ ဆွုံꩻဖျတ်စွဉ်ႏသွူ။ နဝ်ꩻမꩻ ဝေင်ꩻဧဖဲစ်ကို လိုꩻယွုမ်းသားဖုံႏနဝ်ꩻ စွဉ်ႏကတဲမ်းထေ့လွေꩻဖေႏ လိုꩻယွုမ်းသား အခါယခမ်းကို လိတ်နဝ်ꩻ စွဲကိုဝွေꩻတဲင် ဖေႏကကျိုႏရပ်ဆွုမ်ႏ အာပေါလုနဝ်ꩻ တမာဖေႏအာႏ ဝွေꩻသီးသွူ။ ဝွေꩻထွိုင်ႏဖျော်လွဉ်ချိန်ႏ စွဉ်ႏဗွေႏဘုရာꩻ ကေꩻဇူꩻတောႏ ကထွာလွဉ်လဲဉ်းဒါႏ လိုꩻယွုမ်းသားဖုံႏနဝ်ꩻ စွဲကိုမွေးနေးစွဉ်ႏ ဝွေꩻသွူ။ 28ပွိုးစွဉ်ႏ ဝွေꩻထာꩻဒေါ့ꩻယံ နဝ်ꩻမꩻ ဗွေႏယေသျုနဝ်ꩻထွာ မေသျိယကျောင်ꩻ စွဉ်ႏကျမ်ꩻပိုဒ် သက်သေႏ ဝွေꩻဒေါ့ꩻအုံကွံ သျင်ꩻနယ်စဲင်းဖေႏ မွေးစွဉ်ႏ ဂျူးလိုꩻမျိုꩻ အမျာꩻငါနဝ်ꩻသွူ။
ទើបបានជ្រើសរើសហើយ៖
တမန်ႏတောႏ 18: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
တမန်ႏတောႏ 18
18
အဝ်ႏသော့ꩻဝေင်ꩻကောရိန္တု
1ယိုထွူ ပေါလု အဝ်ႏဝေင်ꩻ အေတေင် ထန်ႏတဲင် လွေꩻထိုꩻစွဉ်ႏ ဝေင်ꩻကောရိန္တုသွူ။ 2နဝ်ꩻကို ဝွေꩻမော့ꩻခွဲ လိုꩻဇာႏတိ အဝ်ႏပုန္တုခမ်း၊ ဂျူးလိုꩻမျိုꩻ တဖြာꩻ မဉ်ꩻကဟဲ့ꩻဒါႏ အာကုလ အဝ်ႏအီတလီခမ်း ဖျော်လွဉ် တပေါႏညတဝ်းဒွိုန်း စွဉ်ႏဝွေꩻမာ ဖီသီးလ နဝ်ꩻသွူ။ ဂျူးလိုꩻမျိုꩻဖုံႏ ကားကအဝ်ႏ ဖေႏကထန်ႏထိုꩻ ရောမခမ်းနဝ်ꩻ ပွိုးဧကရာဇ်ခွန်တန် ကလောဒိ ချအမိန်းသွူ။ နဝ်ꩻမꩻ ပေါလု လွေꩻမော့ꩻခွဲစွဉ်ႏ ဝွေꩻသီးတဲင်၊ 3ပွိုးပေါလု အဝ်ႏလွူးချာ အီအနမ်းစွဉ်ႏ ကမာꩻဒါႏ သုမ်းမောက်ꩻကာꩻမွန် ဗွိုန်နုဲင်း ဝွေꩻသီးကမာꩻ နဝ်ꩻအတွက် အုံနဝ်ꩻကိုတွော့ꩻ မာꩻငီꩻစွဉ်ႏ ဝွေꩻသီးထာꩻမာꩻသွူ။ 4ဂျူးလိုꩻမျိုꩻတွမ်ႏ ဂရိလိုꩻမျိုꩻ နီမျိုꩻလွုမ်း ဖေႏကလက္ခံႏ ယွုမ်းအံႏလို့ဝင်ꩻနဝ်ꩻ ဥပုသ်မွူးနီꩻ စွုမ်ႏလဲင်ႏ ဝွေꩻဖျော်တွိုႏ အုံကွံသော့ꩻ တရာꩻစရွပ်ကိုသွူ။
5သိလတွမ်ႏ တိမောတေ အဝ်ႏမာကေဒေါနိခမ်း ထွိုင်ႏဖျော်လွဉ်နဝ်ꩻ ဗွေႏယေသျု ထွာဒျာႏ မေသျိယခရာႏနဝ်ꩻ ပေါလု အချိန်ႏလို့အီဒျာႏ ဟော်ꩻတရာꩻ၊ ခံႏနယ်ဖေႏ ဂျူးလိုꩻမျိုꩻဖုံႏ သက်သေႏသွူ။ 6ဝွေꩻသီး ထွိုင်ႏဆန်ချာဝွေꩻတွော့ꩻ ဒေါ့ꩻကုဲင် ဝွေꩻခရာႏချိန်ႏ ဝွေꩻထွားချာနမ်း၊ ဟံႏဖွန်ႏဖုံႏ ဝွေꩻခွမ်ꩻလာꩻလောင်းနဝ်ꩻ ဝွေꩻတဒေါက်ꩻလင်ꩻထိုꩻတဲင် ရိုꩻဖေႏ ဝွေꩻသီး၊ “သီမဉ်ႏသွုမ်ꩻကုဲင်ထိုꩻနဝ်ꩻ သီနမ်း ထူႏချာသွော့ တာႏဝွန်ႏဟုဲင်း။ ခွေတာႏဝွန်ႏ တအဲဉ်ထဝ်းသွူ။ တယ်ႏယိုမာꩻငါ ခွေအီႏလွေꩻဒျာႏ လိုꩻမျိုꩻလင်ဖုံႏထျꩻ” နုဲင်းနဝ်ꩻသွူ။ 7နဝ်ꩻမꩻ ပေါလု အဝ်ႏဝွေꩻသီးထျꩻနဝ်ꩻ ထန်ႏထိုꩻတဲင် လွေꩻအုံငီꩻတောစွဉ်ႏ လိုꩻမျိုꩻလင်တဖြာꩻ မဉ်ꩻကဟဲ့ꩻဒါႏ တိတု ယုတ္တု၊ ကအဝ်ႏဝုဲင်ႏကိုꩻကွယ်ႏ ဗွေႏဘုရာꩻနဝ်ꩻ အလမ်းသွူ။ ဝွေꩻလမ်းနဝ်ꩻ အဝ်ႏပယ်ဗော့ꩻစွဉ်ႏ တရာꩻစရွပ်နဝ်ꩻသွူ။ 8ပါꩻကအဝ်ႏထွာ တရာꩻစရွပ်မူꩻ ဂရိပ္ပု စွဉ်ႏဝွေꩻတမွိုးဖါပိုစွိုꩻဖုံႏ ကားကအဝ်ႏနဝ်ꩻ ယွုမ်းလွဉ် ဗွေႏဘုရာꩻတဲင် ဝေင်ꩻကောရိန္တုကို လိုꩻအာအလင်ဖုံႏ ထွိုင်ႏဟွိုန်တရာꩻနဝ်ꩻ ယွုမ်းတဲင် ခံႏဗတ္တိဇံႏ ထီမင်္ဂလာႏဖုံႏနဝ်ꩻသွူ။
9တဟာသား ပေါလုလꩻ ဗျာဒိတ်ရူႏပါႏရုံႏ တစွိုး၊ ဗွေႏဘုရာꩻ ဒေါ့ꩻဖေႏဝွေꩻ၊ “တွမ်ႏငမ်းသꩻမွိုန်း၊ ဒေါ့ꩻသွုပ်သွုပ်ဒျာႏတွော့ꩻ တွမ်ႏဖေႏသွုမ်ꩻ ထိုꩻမွိုန်းဟုဲင်း။ 10ပွိုးခွေ အဝ်ႏငီꩻဒျာႏ နာꩻနဝ်ꩻသွူ။ ပါꩻမုဲင်ꩻတဖြာꩻတဲ့ အီႏတမာꩻဆာ ဗာႏတဝ်းနာꩻ၊ ပွိုးဝေင်ꩻကိုယိုနဝ်ꩻ ခွေလိုꩻဖုံႏ အဝ်ႏအာငါႏ” နုဲင်းနဝ်ꩻသွူ။ 11နဝ်ꩻမꩻ ပေါလု အုံနဝ်ꩻကို တနေင်ႏပုဲင်သူလာ၊ သွဉ်သင်ဖေႏ လိုꩻဖုံႏ ဗွေႏဘုရာꩻ တရာꩻတောႏနဝ်ꩻသွူ။
12ဂါလီယို ထွိုင်ႏထွာ ရောမခွန်ခံႏ အခါယခမ်းကိုချိန်ႏ ဂျူးလိုꩻမျိုꩻဖုံႏ ကအဝ်ႏနဝ်ꩻကိုနဝ်ꩻ စုဗူႏလို့ဝင်ꩻတွော့ꩻ ဆွမ်ꩻပေါလုတဲင် ဟဲ့ꩻလွေꩻဝွေꩻ တရာꩻရွုမ်ꩻကိုနဝ်ꩻသွူ။ 13ဝွေꩻသီးဒေါ့ꩻ၊ “ပါꩻခိုယိုနဝ်ꩻ စွဉ်ႏအနယ်ꩻ ဆန်ချာပညတ်တရာꩻတွော့ꩻ လိုꩻဖုံႏ ဖေႏကဝုဲင်ႏကိုꩻကွယ်ႏ ဗွေႏဘုရာꩻနဝ်ꩻ အဝ်ႏကျံႏကျိုꩻစာꩻ သွေꩻကုဲင်” နုဲင်းနဝ်ꩻသွူ။
14နဝ်ꩻခရာႏ ပေါလု ကအီႏဒေါ့ꩻချိန်ႏ ဂါလီယိုဒေါ့ꩻဖေႏ ဂျူးလိုꩻမျိုꩻဖုံႏ၊ “ကိစ္စယိုနဝ်ꩻ ထွာဒျာႏ ပဲစ်မာႏ ရာႏဇဝွတ်မုပဲစ် တစွိုးစွိုး၊ မဉ်ႏတမွေးတဝ်း မဉ်ႏထွာပဲစ်မာႏဒျာႏ၊ စွဲꩻတရာꩻ အကျောင်ꩻခရာႏ နုဲင်းနဝ်ꩻနဝ်ꩻ ခွေအီႏသင်ႏချင်ႏတွော့ꩻ အီႏသယ်ꩻခံႏဒျာႏသီ ဂျူးလိုꩻမျိုꩻဖုံႏသွူ။ 15ကွဲႏတွော့ꩻ အမုယို မဉ်ႏပွိုင်းဝွို့ဒျာႏ ငဝ်းအသွုံꩻဖုံႏ၊ အမဉ်ꩻဖုံႏတွမ်ႏ သီပညတ် တရာꩻတောႏဖုံႏဒျာႏတွော့ꩻ ငဝ်းအာလို့ဝင်ꩻ နုဲင်းယိုနဝ်ꩻ သီနမ်း ဆွုံꩻဖျတ်ချာဒျာႏ၊ အမုစားယိုဖုံႏနဝ်ꩻ ခွေအီႏ တဆွုံꩻဖျတ်ဖေႏတဝ်း” နုဲင်းနဝ်ꩻတဲင်၊ 16ဝွေꩻဝါးထန်ႏထိုꩻစွဉ်ႏ ဝွေꩻသီး တရာꩻရွုမ်ꩻ ကောင်းထန်ႏနဝ်ꩻသွူ။ 17ဝွေꩻသီး ကားကအဝ်ႏနဝ်ꩻ ဆွမ်ꩻစွဉ်ႏ တရာꩻစရွပ်မူꩻ သုဿင်တဲင် တွဲႏစွဉ်ႏဝွေꩻ တရာꩻရွုမ်ꩻဆꩻငါနဝ်ꩻသွူ။ ကွဲႏတွော့ꩻ ဂါလီယိုနဝ်ꩻ တစိꩻစိꩻတဲ့ တထူႏရေꩻတဝ်းသွူ။
သဲင်ꩻချာဝေင်ꩻအန္တိအုတ်
18 #
ကွ ၆:၁၈။ ပေါလု အုံငီꩻစွဉ်ႏ လိုꩻယွုမ်းသားဖုံႏ ဝေင်ꩻကောရိန္တုကို မွူးနီꩻအာငါႏသွူ။ နဝ်ꩻထွူ အဝ်ႏဝွေꩻသီးထျꩻ ထန်ႏလွေꩻတဲင် စွဉ်ႏဖီသီးလတွမ်ႏ အာကုလနဝ်ꩻ ထုမ်းသင်္ဘောꩻတွော့ꩻ ဖြုဲင်ꩻလွေꩻထိုꩻ သီးရီးယားခမ်းနဝ်ꩻသွူ။ အဝ်ႏကေင်ချေ ခလားကဖြုဲင်ꩻထန်ႏနဝ်ꩻ ဝွေꩻအွဉ်ႏဂတိလဲဉ်း ဗွေႏဘုရာꩻနဝ်ꩻမꩻ ဝွေꩻကြော့ꩻစွဉ်ႏ ဝွေꩻကလူꩻသွူ။ 19ဝွေꩻသီး ဖျော်လွဉ်သော့ꩻ ဝေင်ꩻဧဖဲစ်ကိုတဲင် နဝ်ꩻကိုနဝ်ꩻ ပေါလု အွဉ်ႏကုဲင်ထိုꩻ ဖီသီးလစွဉ်ႏ အာကုလသွူ။ ဝွေꩻလွေꩻနွို့သော့ꩻ တရာꩻစရွပ်ကိုတဲင် ဆွေꩻနွေꩻစွဉ်ႏ ဂျူးလိုꩻမျိုꩻဖုံႏသွူ။ 20ဖေႏကအုံငီꩻည ဝွေꩻသီးနဝ်ꩻ လိုꩻဖုံႏ တောင်ꩻပြန်ႏဝွေꩻ စွဉ်ႏတဲ့ ဝွေꩻတအုံတဝ်းနဝ်ꩻသွူ။ 21ဝွေꩻကအီႏ ထန်ႏလွေꩻချိန်ႏ ဝွေꩻဒေါ့ꩻဖေႏ ဝွေꩻသီး၊ “ဗွေႏဘုရာꩻ အလိုႏတောႏ မဉ်ႏအဝ်ႏနဝ်ꩻ ခွေအီႏသဲင်ꩻလွဉ်ချာယင်း သီထျꩻ” နုဲင်းနဝ်ꩻတဲင် ဝွေꩻအဝ်ႏ ဝေင်ꩻဧဖဲစ် ဖြုဲင်ꩻစွဉ်ႏ သင်္ဘောꩻနဝ်ꩻသွူ။
22ဝွေꩻထွိုင်ႏဖျော်လွဉ် ဝေင်ꩻကဲသရိနဝ်ꩻ ဝွေꩻလွေꩻ ဝေင်ꩻယေရုသလမ်ႏတွော့ꩻ နုတ်ဆက် အသေန်းတောႏ ထွူတဲင် လွေꩻထိုꩻ ဝေင်ꩻအန္တိအုတ်နဝ်ꩻသွူ။ 23ဝွေꩻအုံနဝ်ꩻကို အချိန်ႏညတန်သွူ။ ဝွေꩻထန်ႏတဲင် ဖျတ်ကာႏလွေꩻ ဂလာတိတွမ်ႏ ဖြုဂိနယ်ႏတွော့ꩻ တမာဖေႏအာႏ နိုꩻဆော်ႏ လိုꩻကယွုမ်းသားဖုံႏ ကားကအဝ်ႏနဝ်ꩻသွူ။
အာပေါလုအဝ်ႏသော့ꩻဝေင်ꩻဧဖဲစ်စွဉ်ႏဝေင်ꩻကောရိန္တု
24အချိန်ႏနဝ်ꩻ ဂျူးလိုꩻမျိုꩻတဖြာꩻ မဉ်ꩻကဟဲ့ꩻဒါႏ အာပေါလုနဝ်ꩻ အဝ်ႏအဇာႏတိဝေင်ꩻ အလဲက်သန်းဒီးယားနဝ်ꩻ လွဉ်ဝေင်ꩻဧဖဲစ်နဝ်ꩻသွူ။ ဝွေꩻဟော်ꩻတရာꩻ ဒါႏငါႏတဲင် လဲပ်ငါႏ လိတ်ကျမ်ꩻနဝ်ꩻသွူ။ 25ဗွေႏဘုရာꩻ အနယ်ꩻနဝ်ꩻ ဝွေꩻအဝ်ႏသွဉ်ထူႏ စွုံႏလင်ႏဟဝ်လဲဉ်းတဲင် ဗွေႏယေသျု ခရာႏနဝ်ꩻ စွဉ်ႏသွိုန်ႏပါသꩻပါ ဝွေꩻဟော်ꩻ ကေႏညာႏတွော့ꩻ သွဉ်သင်မဲဉ်ႏသေႏချာႏ ဖေႏမွေးစွဉ်ႏသွူ။ ကွဲႏတွော့ꩻ ဝွေꩻသေဒျာႏ ယောဟန် ဗတ္တိဇံႏ ထီမင်္ဂလာႏလွုမ်ꩻနဝ်ꩻသွူ။ 26ဝွေꩻဟော်ꩻရုဲင်းသော့ꩻ မွေးနေးစွဉ်ႏ တရာꩻစရွပ်ကိုတဲင် ဖီသီးလစွဉ်ႏ အာကုလ ထွိုင်ႏဟွိုန် ဝွေꩻတရာꩻနဝ်ꩻ ဝွေꩻသီး ဖစ်ဟဲ့ꩻသဲင်ꩻဝွေꩻ လမ်းကိုတွော့ꩻ ပွိုင်းဝွို့တွမ်ႏ ဗွေႏဘုရာꩻ အနယ်ꩻ တဖူꩻနဝ်ꩻ သျင်ꩻနယ်စဲင်းဖေႏယင်း ဝွေꩻသွူ။ 27နဝ်ꩻထွူ အာပေါလု အီႏလွေꩻထိုꩻ အခါယခမ်းနဝ်ꩻ ဆွုံꩻဖျတ်စွဉ်ႏသွူ။ နဝ်ꩻမꩻ ဝေင်ꩻဧဖဲစ်ကို လိုꩻယွုမ်းသားဖုံႏနဝ်ꩻ စွဉ်ႏကတဲမ်းထေ့လွေꩻဖေႏ လိုꩻယွုမ်းသား အခါယခမ်းကို လိတ်နဝ်ꩻ စွဲကိုဝွေꩻတဲင် ဖေႏကကျိုႏရပ်ဆွုမ်ႏ အာပေါလုနဝ်ꩻ တမာဖေႏအာႏ ဝွေꩻသီးသွူ။ ဝွေꩻထွိုင်ႏဖျော်လွဉ်ချိန်ႏ စွဉ်ႏဗွေႏဘုရာꩻ ကေꩻဇူꩻတောႏ ကထွာလွဉ်လဲဉ်းဒါႏ လိုꩻယွုမ်းသားဖုံႏနဝ်ꩻ စွဲကိုမွေးနေးစွဉ်ႏ ဝွေꩻသွူ။ 28ပွိုးစွဉ်ႏ ဝွေꩻထာꩻဒေါ့ꩻယံ နဝ်ꩻမꩻ ဗွေႏယေသျုနဝ်ꩻထွာ မေသျိယကျောင်ꩻ စွဉ်ႏကျမ်ꩻပိုဒ် သက်သေႏ ဝွေꩻဒေါ့ꩻအုံကွံ သျင်ꩻနယ်စဲင်းဖေႏ မွေးစွဉ်ႏ ဂျူးလိုꩻမျိုꩻ အမျာꩻငါနဝ်ꩻသွူ။
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.