တမန်ႏတောႏ 16
16
တိမောတေလွေꩻလွဉ်ꩻပေါလုတွမ်ႏသိလ
1ပေါလုထန်ႏလွေꩻ တဖူꩻဝေင်ꩻ ဒေရဗေတွမ်ႏ ဝေင်ꩻလုတ္တရ၊ နဝ်ꩻကို ခရစ်ယာန်ႏတဖြာꩻ အမဉ်ꩻကဟဲ့ꩻဒါႏ တိမောတေနဝ်ꩻ အဝ်ႏအုံသွူ။ ဝွေꩻအမွိုးနဝ်ꩻတဲ့ အဝ်ႏထွာ ဂျူးလိုꩻမျိုꩻ ခရစ်ယာန်ႏတဖြာꩻ၊ ကွဲႏတွော့ꩻ ဝွေꩻဖါနဝ်ꩻ ထွာဒျာႏ ဂရိလိုꩻမျိုꩻ တဖြာꩻသွူ။ 2လိုꩻယွုမ်းသားဖုံႏ ကအဝ်ႏသော့ꩻဒါႏ ဝေင်ꩻလုတ္တရကိုတွမ်ႏ ဝေင်ꩻဣကောနိကိုသားဖုံႏ ကားကအဝ်ႏနဝ်ꩻ အုပ်ꩻဟဝ် မွေးနေးစွဉ်ႏ တိမောတေသွူ။ 3တိမောတေနဝ်ꩻ ပေါလု မဉ်ဟဲ့ꩻလွေꩻငီꩻတွမ်ႏဝွေꩻ နဝ်ꩻမꩻ ဝွေꩻသွို့ꩻဖေႏစွဉ်ႏ လိုꩻခိုအင်္ဂါႏနာပီ မင်္ဂလာႏနဝ်ꩻသွူ။ ဝွေꩻကမာꩻဗာႏ နုဲင်းယိုနဝ်ꩻ တိမောတေ အဖါနဝ်ꩻထွာ ဂရိလိုꩻမျိုꩻကျောင်ꩻ ပွိုးတွော့ꩻ ဂျူးလိုꩻမျိုꩻ ကအုံသော့ꩻဒါႏ ခင်ႏလမ်းနဝ်ꩻကိုသားဖုံႏ ကားကအဝ်ႏနဝ်ꩻ အဝ်ႏသေနဝ်ꩻသွူ။ 4နုဲင်းဝွေꩻသီး ကဖျတ်ကာႏလွေꩻဒါႏ ဝေင်ꩻဖုံႏနဝ်ꩻ တမန်ႏတောႏဖုံႏတွမ်ႏ အသေန်းလိုꩻတန်ဖုံႏ ကအဝ်ႏအုံသော့ꩻဒါႏ ဝေင်ꩻယေရုသလမ်ႏကို ကဆွုံꩻဖျတ်ခါꩻဒါႏ စီꩻမျဉ်ꩻဥပဒေႏဖုံႏနဝ်ꩻ ဝွေꩻသီး သျင်ꩻနယ်ဖေႏ လိုꩻကယွုမ်းသားဖုံႏ၊ ဖေႏကလွောက်ꩻနာႏနဝ်ꩻသွူ။ 5နဝ်ꩻမꩻ အသေန်းတောႏဖုံႏနဝ်ꩻ ထာꩻယွုမ်း အာႏတလာ လွဉ်တဲင် အသေန်းသား အဖြာꩻ တိုꩻပွါꩻအာလွဉ်စွဉ်ႏ စွုမ်ႏနီꩻနဝ်ꩻသွူ။
ပေါလုထီႏရူႏပါႏရုံႏဝေင်ꩻတရော်ꩻကို
6ဝွေꩻသီး ထန်ႏလွေꩻတဖူꩻ ကာႏလွေꩻ ဖြုဂိခမ်းတွမ်ႏ ဂလာတိခမ်း၊ ပွိုးတွော့ꩻ ကအီႏဟော်ꩻဗာႏ တရာꩻ အာသျနယ်ႏကိုနဝ်ꩻ ကြောင်းစင် ဝိညာဉ်ႏတောႏ တဖေႏတဝ်း ဝွေꩻသီးအခွင်ꩻသွူ။ 7ဝွေꩻသီး ထွိုင်ႏဖျော်လွဉ် မုသိခမ်းကူနဝ်ꩻ ဝွေꩻသီး ကျံႏနွို့သော့ꩻ ဗိတုနိခမ်းကိုနဝ်ꩻသွူ။ ကွဲႏတွော့ꩻ ဗွေႏယေသျု ဝိညာဉ်ႏတောႏနဝ်ꩻ တဖေႏတဝ်း ဝွေꩻသီး အခွင်ꩻနဝ်ꩻသွူ။ 8နဝ်ꩻမꩻ ဝွေꩻသီးလွေꩻတဖူꩻ ဖျတ်စွို့ꩻလွေꩻ မုသိခမ်းတဲင် လွေꩻစွဉ်ႏ ဝေင်ꩻတရော်ꩻနဝ်ꩻသွူ။ 9အဟာနဝ်ꩻ ပေါလုလꩻရူႏပါႏရုံႏ တစွိုး ဝွေꩻထီႏ မာကေဒေါနိ ခမ်းသားတဖြာꩻ အဝ်ႏအုံထွိုင်ႏထာꩻတဲင် တောင်ꩻပြန်ႏဝွေꩻ၊ “လွဉ် မာကေဒေါနိခမ်းတွော့ꩻ စွဲကိုဖေႏနီဟုဲင်း” နုဲင်းနဝ်ꩻသွူ။ 10ပေါလုလꩻ ရူႏပါႏရုံႏ နုဲင်းယိုတလဲင်ႏချင်ꩻ၊ နီဖျင်ရဲဉ်ꩻစွဉ်ႏ အီႏထန်ႏလွေꩻ မာကေဒေါနိခမ်းနဝ်ꩻသွူ။ ပွိုးတွော့ꩻ ဖေႏကဟော်ꩻ လိုꩻဖုံႏနဝ်ꩻကို သတင်ꩻဟဝ်တရာꩻနဝ်ꩻ ဗွေႏဘုရာꩻ အဝ်ႏဟဲ့ꩻလဲဉ်းနီ နဝ်ꩻမꩻ နီဆွုံꩻဖျတ်စွဉ်ႏသွူ။
ဝေင်ꩻဖိလိပ္ပိကိုလစ်ဒျားပြောင်ꩻကြုဲင်ꩻလွဉ်
11အဝ်ႏဝေင်ꩻတရော်ꩻနဝ်ꩻ ထုမ်းသင်္ဘောꩻတဲင် နီထန်ႏလွေꩻ ဖျတ်ကာႏစွို့ꩻလွေꩻစွဉ်ႏ သာမောတရတ် ကြွန်တွော့ꩻ ဆုဲင်ꩻတနီꩻနဝ်ꩻ တွိုႏလွေꩻ ဝေင်ꩻနာပေါလိသွူ။ 12အဝ်ႏနဝ်ꩻကို နီထန်ႏလွေꩻထိုꩻ ဝေင်ꩻဖိလိပ္ပိ ကထွာဒါႏ မာကေဒေါနိခမ်း ပထမနယ်ႏ ဝေင်ꩻတဖြုံႏနဝ်ꩻသွူ။ ဝေင်ꩻနဝ်ꩻတဲ့ အဝ်ႏထွာ ရောမအုပ်စိုꩻ ဝေင်ꩻတဝေင်ꩻနေနေသွူ။ နီအုံနဝ်ꩻကို မွူးနီꩻပေါင်ꩻ အာငါႏသွူ။ 13ဥပုသ်မွူးနီꩻကိုနဝ်ꩻ နီအဝ်ႏဝေင်ꩻ ထန်ႏလွေꩻ ထီခြောင်တန်ထျꩻတွော့ꩻ နဝ်ꩻကိုနဝ်ꩻ နီယူႏ ဂျူးလိုꩻမျိုꩻဖုံႏ စုဗူႏလို့ဝင်ꩻ အီႏဆုတောင်ꩻ ခင်ႏလမ်းနဝ်ꩻသွူ။ ပါꩻမူႏဖုံႏ ကအဝ်ႏစုဗူႏလို့ဝင်ꩻ နဝ်ꩻကိုနဝ်ꩻ နီအုံလင်တဲင် ဒေါ့ꩻဟော်ꩻဖေႏသွူ။ 14ဝွေꩻသီးကို အဝ်ႏဝေင်ꩻတွာတိရကို အဝ်ႏစာခွမ်ꩻလာꩻ ကတ္တီႏပါႏ တနျာႏ ကဟွိုန်ဒါႏ နီတရာꩻငဝ်း ပါꩻမူႏမဉ်ꩻလစ်ဒျား အဝ်ႏတဖြာꩻသွူ။ ဝွေꩻမူႏနဝ်ꩻထွာ လိုꩻမူႏ အဝ်ႏဝုဲင်ႏကိုꩻကွယ်ႏ ဗွေႏဘုရာꩻတဲင် ဖေႏကအွဉ်ႏရေꩻ နုဲင်းပေါလု ကအဝ်ႏဒေါ့ꩻဒါႏနဝ်ꩻ ဗွေႏဘုရာꩻဗွောင်ဖေႏ ဝွေꩻမူႏသꩻသွူ။ 15နဝ်ꩻထွူ ဝွေꩻမူႏတွမ်ႏ ဝွေꩻမူႏ တမွိုးဖါပိုစွိုꩻဖုံႏနဝ်ꩻ ခံႏဗတ္တိဇံႏ ထီမင်္ဂလာႏတွော့ꩻ၊ ဝွေꩻမူႏ ဖစ်စွဉ်ႏနီ၊ “ခွေသွဉ်းမူႏ ထွာလဲဉ်း လိုꩻယွုမ်း ဗွေႏဘုရာꩻ စင်ႏစဲစ်တဖြာꩻကျောင်ꩻ သီမဉ်ႏဆွုံꩻဖျတ်နဝ်ꩻ ကျွꩻလွဉ်တဲင် အုံသွော့ ခွေသွဉ်းလမ်းဟုဲင်း”၊ နုဲင်းနဝ်ꩻတဲင် ဖေႏနီကလွေꩻနဝ်ꩻ ဝွေꩻမူႏ တောင်ꩻပြန်ႏ ချနားဖေႏစွဉ်ႏနီသွူ။
အဝ်ႏသော့ꩻဝေင်ꩻဖိလိပ္ပိထောင်ႏကို
16တနီꩻသား နုဲင်းနီကအဝ်ႏလွေꩻဒါႏ ဆုတောင်ꩻ ခင်ႏလမ်းနဝ်ꩻ နီမော့ꩻစွဉ်ႏ သွဉ်းမူႏတဖြာꩻ လူꩻကုဲင်တဗာႏ အဝ်ႏစောင်ꩻသော့ꩻ အဝ်ႏဟော်ꩻဖေႏဝင်ꩻ ပေႏတင်ႏနဝ်ꩻသွူ။ စွဉ်ႏကဟော်ꩻဖေႏ ပေႏတင်ႏနဝ်ꩻ ထုမ်ႏလꩻအာဖေႏ မွေးနေးစွဉ်ႏ အဗွေႏရွဉ်နဝ်ꩻသွူ။ 17ဝွေꩻမူႏနဝ်ꩻ ထောင်လွဉ်ꩻ ပေါလုတွမ်ႏ နီတွော့ꩻ ခြောဝ်သန်၊ “ပါꩻခိုယိုဖုံႏနဝ်ꩻ ထွာဒျာႏ အထိုသွတ်ꩻ ဗွေႏဘုရာꩻ အသွဉ်း။ သီအီႏလꩻနွောင်ꩻ ထာꩻကယ်ႏတင်ႏ နုဲင်းမုဲင်ꩻနဝ်ꩻ ဝွေꩻသီး အဝ်ႏဟော်ꩻကေႏညာႏဖေႏသီ” နုဲင်းနဝ်ꩻသွူ။ 18ဝွေꩻမူႏမာꩻနုဲင်းယိုနဝ်ꩻ ပွိုးမွူးနီꩻပေါင်ꩻ အာငါႏနဝ်ꩻမꩻ ပေါလုသꩻလဲင်ꩻကုဲင်လွဉ်နေးတွော့ꩻ ဝွေꩻခွယ်လဲ့ချာတဲင် ဒေါ့ꩻဖေႏ ဝိညာဉ်ႏကုဲင်၊ “အဝ်ႏပါꩻမူႏကိုနဝ်ꩻ နာꩻထန်ႏထိုꩻခန်းဟုဲင်း၊ တွမ်ႏဗွေႏယေသျု ခရစ်တောႏ အမဉ်ꩻနာႏမ ခွေဖေႏနာꩻအမိန်း” နုဲင်းနဝ်ꩻတဲင် တလဲင်ႏချင်ႏ လူꩻကုဲင်နဝ်ꩻ အဝ်ႏဝွေꩻမူႏအကို ထန်ႏထိုꩻစွဉ်ႏသွူ။
19ဝွေꩻသီး ရွဉ်နွို့တဖူꩻ ပေ့ꩻထိုꩻလဲဉ်းကျောင်ꩻ ဝွေꩻမူႏအဗွေႏ ထွိုင်ႏသေစဲင်းနဝ်ꩻ ဝွေꩻသီး ဆွမ်ꩻထိုꩻစွဉ်ႏ ပေါလုတွမ်ႏ သိလတဲင် စွီႏလွေꩻထေ့စွဉ်ႏ အာႏဏာႏ ပဲင်ႏသားဖုံႏ ကအဝ်ႏသော့ꩻ လိုꩻအမျာꩻ ဟံႏကွက်ခြေင်ကိုနဝ်ꩻသွူ။ 20အာႏဏာႏပဲင်ႏသားဖုံႏနဝ်ꩻ ဟဲ့ꩻလွေꩻဝွေꩻသီး ရောမ အာႏဏာႏပဲင်ႏ ဆꩻငါတဲင်ဒေါ့ꩻ၊ “လိုꩻစားယိုဖုံႏနဝ်ꩻ ထွာဂျူးလိုꩻမျိုꩻဖုံႏတဲင် ဝွေꩻသီး အဝ်ႏမာꩻဒုက္ခသော့ꩻထာꩻ နီဝေင်ꩻကိုဖုံႏသွူ။ 21ထွုံꩻစံႏကဆန်ဒါႏ နီပညတ်တရာꩻဖုံႏနဝ်ꩻ ဝွေꩻသီး အဝ်ႏသွဉ်သင်ဖေႏသွူ။ နီနဝ်ꩻထွာဒျာႏ ရောမခမ်းရင်ꩻသားဖုံႏတဲင် ထွုံꩻစံႏစားယိုဖုံႏတွမ်ႏ ထာꩻကံကျင်ꩻ နုဲင်းနဝ်ꩻဖုံႏနဝ်ꩻ နီတလက္ခံႏနွောင်ꩻတဝ်း” နုဲင်းနဝ်ꩻသွူ။ 22တဲင်လိုꩻစွိုꩻဖုံႏနဝ်ꩻ ပေါင်ꩻငီꩻလို့စွဉ်ႏဝင်ꩻတွော့ꩻ ဆန်ချာစွဉ်ႏ ပေါလုတွမ်ႏ သိလနဝ်ꩻသွူ။
နဝ်ꩻထွူ အာႏဏာႏပဲင်ႏသားဖုံႏနဝ်ꩻ အဲ့ꩻသဲ့စွဉ်ႏ ပေါလုတွမ်ႏ သိလ ခွမ်ꩻလာꩻဖုံႏတွော့ꩻ ချအမိန်း ဖေႏစွဉ်ႏ ဝွေꩻသီး ခွဉ်းတံႏနဝ်ꩻသွူ။ 23တွဲႏထွူ အွဉ်ႏခံသော့ꩻ ဝွေꩻသီး ထောင်ႏကိုတဲင် မိန်းဖေႏထောင်ႏမူꩻ ဖေႏကအွဉ်ႏခံ ခတ်ꩻခါꩻဟဝ်ဟဝ်သွူ။ 24လꩻအမိန်း နုဲင်းယိုနဝ်ꩻမꩻ ထောင်ႏမူꩻ အွဉ်ႏခံသော့ꩻစွဉ်ႏ ဝွေꩻသီး အခန်ꩻအဲဉ်ႏကိုတဲင် ဝွေꩻသီး ခင်ႏဖုံႏနဝ်ꩻ အွဉ်ႏခံသော့ꩻခါꩻနေး သေင်ႏခြုံးထွူႏကိုနဝ်ꩻသွူ။
25တွိုႏမွူးကွို့ꩻနာꩻချိန်ႏ ပေါလုတွမ်ႏ သိလ အဝ်ႏဆုတောင်ꩻ ဘုရာꩻတွော့ꩻ အဝ်ႏရွစ်အုပ်ꩻ ဗွေႏဘုရာꩻ ဓမ္မသချင်ꩻတဲင် ထောင်ႏသား အလင်ဖုံႏနဝ်ꩻ အဝ်ႏနာႏ ဝွေꩻသီး ငဝ်းဖုံႏသွူ။ 26တလဲင်ႏချင်ꩻ ဟံႏတသွိုးသန် စွော့ꩻမွေးနေးစွဉ်ႏတဲင် ထောင်ႏအရွီးခင်ႏဖါ တသွိုးထံစွဉ်ႏနဝ်ꩻသွူ။ တလဲင်ႏချင်ꩻ တခါꩻတန်ဖုံႏ ဗွောင်ထိုꩻလို့တဲင် ထောင်ႏသားဖုံႏ ကားကအဝ်ႏအလောင်း ပသီႏချင်ꩻဖြွီꩻဖုံႏနဝ်ꩻ ဖြတ်ꩻထဲ့လင်ꩻလို့စွဉ်ႏသွူ။ 27ထောင်ႏမူꩻနဝ်ꩻ မဲ့သေတဲင် ဝွေꩻထွိုင်ႏထီႏ ထောင်ႏတခါꩻဖုံႏ ဗွောင်ထိုꩻလို့လဲဉ်းနဝ်ꩻ ဝွေꩻထင်းဒျာႏ ထောင်ႏသားဖုံႏ ဖင်းထိုꩻလဲဉ်း နဝ်ꩻမꩻ ဝွေꩻဗဲ့ꩻဝွေꩻနꩻတဲင် ရေႏမာꩻသီချာ အနမ်းနဝ်ꩻသွူ။ 28ကွဲႏတွော့ꩻ ပေါလု ခြောဝ်ထန်ႏသန်မွေး အငဝ်း၊ “တွမ်ႏမာꩻဆာချာမွိုန်း နာꩻနမ်းဟုဲင်း၊ နီကားကအဝ်ႏနဝ်ꩻ အဝ်ႏဒျာႏယိုကို” နုဲင်းနဝ်ꩻသွူ။
29ထောင်ႏမူꩻနဝ်ꩻ ကွီမေႏတေန်ꩻ ဖင်းနွို့သော့ꩻ ထောင်ႏကို ငမ်းထာꩻ တနွော့ꩻနေးတဲင် အွပ်ꩻလင်ꩻစွဉ်ႏ ပေါလုတွမ်ႏ သိလခင်ႏထျꩻနဝ်ꩻသွူ။ 30နဝ်ꩻထွူ ဝွေꩻအွဉ်ထန်ႏ ဝွေꩻသီးတဲင်ရီ၊ “ဗွေႏဆရာႏသီး၊ ဖေႏကလꩻ ထာꩻကယ်ႏတင်ႏနဝ်ꩻ ခွေအီႏမာꩻဗာႏ တမုဲင်ꩻဟောင်း” နုဲင်းနဝ်ꩻသွူ။
31ဝွေꩻသီးလဝ်းချာ၊ “ယွုမ်းသွော့ ဗွေႏယေသျု၊ နာꩻတွမ်ႏ နာꩻတမွိုးဖါပိုစွိုꩻဖုံႏ အီႏလꩻ ထာꩻကယ်ႏတင်ႏ” နုဲင်းနဝ်ꩻသွူ။ 32နဝ်ꩻထွူ ဝွေꩻတွမ်ႏ လိုꩻလင် ကအဝ်ႏသော့ꩻ ဒါႏလမ်းကိုသား ကားကအဝ်ႏနဝ်ꩻ ဝွေꩻသီးဟော်ꩻဖေႏစွဉ်ႏ ဗွေႏဘုရာꩻ တရာꩻငဝ်းနဝ်ꩻသွူ။ 33အနာꩻနဝ်ꩻစွဉ်ႏ ထောင်ႏမူꩻဟဲ့ꩻ ဝွေꩻသီး ပသေဖေႏ ဝွေꩻသီး ထာꩻဆာကဲင်ဖုံႏထွူ ဝွေꩻတွမ်ႏ ဝွေꩻတမွိုးဖါပိုစွိုꩻဖုံႏနဝ်ꩻ ခံႏစွဉ်ႏ ဗတ္တိဇံႏထီ မင်္ဂလာႏ တလဲင်ႏချင်ꩻသွူ။ 34နဝ်ꩻထွူ ဝွေꩻဟဲ့ꩻနွို့သော့ꩻ ပေါလုတွမ်ႏ သိလ ဝွေꩻလမ်းကိုတဲင် ဖေႏအံႏစွဉ်ႏ ဝွေꩻသီး ထာꩻအံႏဖုံႏနဝ်ꩻသွူ။ ဝွေꩻတွမ်ႏ ဝွေꩻတမွိုးဖါပိုစွိုꩻဖုံႏနဝ်ꩻ ယိုခါ ပွိုးဝွေꩻသီး ယွုမ်းလဲဉ်း ဗွေႏဘုရာꩻအတွက် အဝ်ႏဗွေတွမ်ႏ ထာꩻသꩻဟဝ်သꩻရေꩻဖုံႏသွူ။
35ဆုဲင်ꩻတရဝ်ꩻ မွူးထွိုင်ႏလေ ရောမ အာဏာႏပဲင်ႏသားဖုံႏနဝ်ꩻ စွဉ်ႏအမိန်း အွဉ်ႏစွꩻလွဉ် ယဲꩻပိုႏဖုံႏ ၊ “ဖေႏကအွဉ်ႏစွꩻလွစ်ဖေႏ လိုꩻစားနဝ်ꩻဖုံႏ” နုဲင်းနဝ်ꩻသွူ။
36နဝ်ꩻမꩻ ထောင်ႏမူꩻ ဒေါ့ꩻနယ်ဖေႏ ပေါလု၊ “ဖေႏကအွဉ်ႏစွꩻလွစ်ခန်း နာꩻတွမ်ႏ သိလနဝ်ꩻ အာႏဏာႏပဲင်ႏဖုံႏ ချꩻဖေႏ အမိန်းသွူ။ နာꩻထန်ႏတွော့ꩻ လွေꩻငိမ်ꩻချမ်ꩻ ခွꩻသꩻလꩻလဲဉ်း” နုဲင်းနဝ်ꩻသွူ။
37ကွဲႏတွော့ꩻ ပေါလု ဒေါ့ꩻဖေႏ ယဲꩻပိုႏဖုံႏ၊ “နီနဝ်ꩻထွာဒျာႏ ရောမခမ်းရင်ꩻသားဖုံႏ၊ တမော့ꩻတဝ်း နီရာႏဇဝွတ်မုပဲစ် တစွိုးတမျိုꩻ စွဉ်ႏတဲ့ ဝွေꩻသီးတွဲႏနီ လိုꩻအမျာꩻငါတဲင် ဝွေꩻသီး အွဉ်ႏခံသော့ꩻနီ ထောင်ႏကိုနဝ်ꩻသွူ။ ယိုခါ ဝွေꩻသီး မဉ်အွဉ်ႏစွꩻ ညာꩻတေ့ꩻထိုꩻနီ နုဲင်းမုဲင်ꩻဟောင်း။ နုဲင်းနဝ်ꩻ တလꩻတဝ်း၊ ရောမ အာႏဏာႏပဲင်ႏသား နမ်းကိုယ်ႏတဲင်ႏ လွဉ်ဗာႏယိုကိုတဲင် အွဉ်ႏစွꩻထန်ႏဗာႏ နီ” နုဲင်းနဝ်ꩻသွူ။
38ငဝ်းယိုဖုံႏနဝ်ꩻ ယဲꩻပိုႏဖုံႏ အွဉ်ႏဟွိုန်ဖေႏ ရောမ အာႏဏာႏပဲင်ႏသားဖုံႏ နဝ်ꩻသွူ။ ပေါလုတွမ်ႏ သိလနဝ်ꩻထွာဒျာႏ ရောမ ခမ်းရင်ꩻသားဖုံႏကျောင်ꩻ ဝွေꩻသီး ထွိုင်ႏဟွိုန် ဝွေꩻသီး ငမ်းသꩻစွဉ်ႏသွူ။ 39နဝ်ꩻမꩻ ဝွေꩻသီး လွေꩻတဲင် တောင်ꩻပြန်ႏ ပေါလုတွမ်ႏ သိလသွူ။ နဝ်ꩻထွူ ဝွေꩻသီး အွဉ်ႏစွꩻလွစ်ထန်ႏဖေႏ ပေါလုစွဉ်ႏ သိလ ထောင်ႏတွော့ꩻ ထွဉ်ႏဝွေꩻသီး ဖေႏကထန်ႏထိုꩻ ဝေင်ꩻနဝ်ꩻသွူ။ 40ပေါလုစွဉ်ႏ သိလ အဝ်ႏထောင်ႏကို ထန်ႏတဲင် လွေꩻထိုꩻ လစ်ဒျားလမ်းနဝ်ꩻသွူ။ နဝ်ꩻကို ဝွေꩻသီး မော့ꩻခွဲစွဉ်ႏ လိုꩻယွုမ်းသားဖုံႏတွော့ꩻ ဒေါ့ꩻဖေႏ ဝွေꩻသီး ငဝ်းတမာ ဖေႏအာႏတဲင် ထန်ႏထိုꩻနဝ်ꩻသွူ။
ទើបបានជ្រើសរើសហើយ៖
တမန်ႏတောႏ 16: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
