اِنجیل مَتّی 17
17
عیسی دیمی آگَردِستِه
1شیش روزه پَش، عیسی، پطرس، یعقوب و یعقوبی بِرا یوحنا، پِگِتِشه و اَوون اِشتَن نَه بَردِشه بِلندَه کوهی سَر، تا اوآکا تنخا بِبون. 2اوآکا، چَوون چِمی پیشی کا، عیسی دیم عوض آبَه: چَیی دیم آفتاوی شیوار شَفق ژَنی و چَیی خَلا نوری شیوار، اِسبی آبَه بَه. 3اِم موقع، موسی پیغمبر و ایلیای پیغمبر، چَوون چِمی پیشی کا ظاهر آبینَه و عیسی نَه گف ژَندِشونَه. 4پطرس عیسی نَه واتِشه: «اِی آقا، چِه چاکَ كه اَمَه اییا کا ایمونَه. اَگم پیستِره، اَز اییا کا سِه گِله سایَه وون وَج آکَرِم، ایلَه تِرا، ایلَه موسی را و ایلَه نی ایلیا را.» 5پِطرسی گَف حَلا تمون آبَه نِبَه كه ایلَه خِری چَوون سَری کا سا دَرَفَندِشه که شَفَق ژَنی و خِری کا سَسی اومَه که بَواتی: «اِم چِمِن عزیزَه زوعَه یَه كه از اَیی کا وِر راضی ایمه؛ چَیی گفون گوش بِدییَه.» 6وختی شاگِردِن اِم سَسی دَرَسِشونَه، بَرک تَرسی نَه و دیمی نَه زمینی سَر بَلَکینَه. 7ولی عیسی اومَه و اَوون دَس پِنوشه و واتِشه: «پِرِزَه، مَتَرسه.» 8وختی شاگِردِن کفا دَیشتینَه، عیسی غِیراز کسی نِویندِشونَه.
9هَتَه کِه کوه کا بومَین جیر، عیسی اَوون دستور دوشَه، واتِشه: «اَ چیی که ویندَرونَه کَسی را مَواجَه، تا روزی که اِنسانی زوعَه مَردَه پَش زِنده آبو.» 10شاگِردِن عیسی کا دَفَرسِشونَه: «بَس چیرا توراتی معلِمِن بَواتین اوّل بَسی ایلیای پیغمبر با؟» 11عیسی جَواو دوشَه: «اَلبت که ایلیا بومَی و همه چی، چَیی اوّلی شیوار وَج آکَرِه. 12امّا اَز شِمَه نَه بَواتیم که ایلیا حِسَه نی اومَه، ولی اَیی آنِزونیشونَه و هَر کاری که پیستِشونَه اَیی نَه کَردِشونَه. هِنتَه نی اِنسانی زوعَه، چَوون دَسی کا عذاب بَکَشدی.» 13اَ موقع شاگِردِن زونِستِشونَه که عیسی، یحیی تعمید دَهَنده درباره اَوون نَه گف ژَنِه.
دیو گِتَه زوعَه شَفا
14وختی اَوِن کوه کا اومینَه جیر مردمی وَر، مِردی اومَه عیسی وَر و چَیی پیشی کا زِنگ ژَندِشَه و واتِشه: 15«اِی آقا، چِمِن زوعَه رحم بِکَه. چوم که اَ غَشی یَه و بَرک عذاب بَکَشدی. بعضی موقع آتشی دیلَه و بعضی موقع نی آوی دیلَه کا دَلَکِه. 16اَئی وَردِمه اِشتِه شاگِردون وَر، امّا اَوِن نِشاستِشونَه اَئی شفا بِدن.» 17عیسی جَواو دوشَه: «اِی بی ایمان و منحرف نسل، تا کَینی بَسی شِمَه نَه بِبوم؟ تا کَینی بَسی شِمَه تاو بواَرم؟ اَئی بواَرَه اییا چِمِن وَر.» 18عیسی دیوی را زِرَه گِتِشه و دیو زوعَه کا بَرشَه و زوعَه هَ لحظه شَفا گِتِشه. 19اَ موقع عیسی شاگِردِن اومینَه عیسی وَر و خَلوتَکی اَیی کا دَفَرسِشونَه: «چیرا اَمَه نِشاستِمونَه اَ دیوی بَرکَرَم؟» 20عیسی جَواو دوشَه: «چوم شِمَه ایمان كَمَه! حَقیقتن شِمَه نَه بَواتیم، اَگم ایلَه روکه خَردَل دونه ای قَدر ایمان بِدارَه، بَشایرون اِم كوه نَه بوآجَه ”اِم وَری نَه بِش اَ وَر“ و اَ کوه نی بَشی و هیچ چیی شِمَه را مَحال نییَب.[ 21امّا اِم جِنس دیو، دعا و روزه غِیراز هیچی نَه بِرون نِبَرشو.]»
عیسی دومین پیشگویی اِشتَنِش مَرگ و زِنده آبییِه درباره
22وختی عیسی و چَیی شاگِردِن جلیلی ولایتی کا یَندی نَه جمع آبینَه، عیسی اَوون نَه واتِشه: «اِنسانی زوعَه، مردمی دَسی نَه تسلیم بَبی. 23اَوِن اَئی کِشِن و اَ سِوّمین روزی کا زِنده آبو.» شاگِردِن وِر غمگین آبینَه.
معبدی مالیات
24وختی عیسی و چَیی شاگِردِن آرَستینَه كَفَرناحومی شهر، مأمورِنی که دِ دِرهَمی یَه مالیاتی که معبدی شِن بَه، ویگِرین، اومینَه پطرسی وَر و اَییکا دَفَرسِشونَه: «شِمَه اُستاد معبدی مالیات آنِدَه؟» 25پطرس واتِشه: «اَلبت که آدَه!» وختی پطرس شَه کَ، پیش اَز اِم که چیی بوآجِه، عیسی اَیی نَه واتِشه: «شَمعون، تِه چِه فیکر بَکَردیش؟ دنیا پاُتشااِن کیون کا باج و مالیات ویگِرِن؟ اِشتَن مردمی کا یا خَلکی کا؟» 26پطرس واتِشه: «خَلکی کا.» عیسی واتِشه: «بَس اِشتَنشون مردم مالیاتی کا مُعافی نَه! 27امّا اِمی واسی که اَوون توهین مَکَرَم، بِش دریاچه وَر و ایلَه غِرماقی دَرَفَن آوی دیلَه. اوّلین مایی که گِتِرَه، چَیی گَ آکَه. ایلَه چهار دِرهَمی یَه سِکه ای چَیی دیلَه کا بَویندیش. اَیی پِگِه و اَیی نَه چِمِن و اِشتِه مالیاتی سهمی آدَه.»
ទើបបានជ្រើសរើសហើយ៖
اِنجیل مَتّی 17: ITB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
