انجیل متی 13
13
کَشاورزه مثال
1هَ روجک، عیسی کییَک بَر برشه و دریاچه وَر بِنِشت. 2پِره جماعتی عیسی دویر و بر بیدا آبنده ایزه که عیسی قایقی کی دنِشته، و همه‌ی مردم ساحلک وِندَرسه بِنده. 3چاوَش چوان را خیلی مَثلش بیزینده. باتشه: «ای روجی ایگله کَشاورزی دانه آشاندنه را بر بشه. 4وختی دانَش آشاندَرده، بعضی دانه راه دِلَه اَرَبنده و پرنده نی بامنده و اَوشان بِخَرده. 5بَعضی دانه نی سِگینه زمینان دلک اَربنده که پر خاک نداشتشه؛ پس البحل اَرامنده، چون که خاک درین نبه. 6امّا وقتی اُوفتوعه بَرامیا، بوسوتنده و چون که بنه شان نِداشته، خشک آبنده. 7بَعضی دانه نی بِران دله اَربندِه. بِره نی اَوانه اَرامنده، و خفه شان بِکَردنده. 8امّا اَدَرین دانه چاکه خاکه دلک اَربنده و بار بوعردشانه: بعضی صد برابر، بعضی نی شصت و بعضی سی برابر. 9هر کی گوش اَشنوسنه را داره، بَشنوه.»
10اَدمی شاگردان عیسی وَر بامنده، و آپرسسشانه: «چیه را مردمنه مَثَلانه لاوَه کردری؟» 11عیسی جواوش بدا: «آسمانه پادشاهی اَسراره درک کردن شاما آدییه بییه، امّا اَوان آدییَه نیبیه. 12چون اَ کسی که داره، اَوه پِر تر آدییه بی، تا فراوانی نه بِداره، امّا اَ کسی که نداره، حتی اَ چی که داره نی اَوِک اَرکته بی. 13چِمه واسِنه از اَواننه مثلاننه لاوَه کَرم، چون:
«اَوه دیَسنده، امّا نیویننده،
چِمن لاوَه گوش نه گوش آدییَرنده، امّا نه اَشنَوِنده و نه فَهمنده.
14حقیقتا اِشعیا پیغمبره پیشگویی چَوان را اتفاق دگنه که واجه:
«”شاما گوشان نه اَشنَوا، امّا هرگز نِفّهما
و شاما چَشمانه وینا، امّا هرگز درک نکرا.
15چون اِم قومه دلَه سِگ آبییا،
چَوان گوشِه سنگین آبیینده،
و اِشتن چَشمِه شان دِوَستنده،
تا مبادا اِشتن چَشماننه بیننده،
و اِشتن گوشانه بشنَونده
و اِشتن دلاننه بفهمنده
و آگردنده و از اَوان شفا آدَیم.“
16امّا خَسه ببا شاما چشمه که ویننده و شاما گوشه که اَشنونده. 17حقیقتن، شاما نه واتَرم، که خیلی از پیغمبران و صالحان ناجَشان داشته اَ چیانی که شاما ویندرا، بیننده امّا نیویندشانه، و اَ چیانی که شاما اَشنوسرا، بشنَونده امّا نَشنوسشانه.
18«پس شاما کَشاورزه مَثاله معنا بَشنوا: 19اَ زمانی که کسی خدا پادشاهی کلامه اَشنوه امّا اَوه درک نِکَره، اَ شریر آیه و چیانی که چوه دِلِه دلَک کاشته بییه دِزده. اِم هَ دانه اییه که راه دلک کاشته آبه. 20و دانه ای که سِگیه زمینک اَربینده کسییه که خدا کلامه اَشنوه و اَلَبحل اَوه شادی نه قبول کره، 21امّا چون بنه نداره، ای کَملی دوام آوَره. وختی خدا کلام واسِنه، اذیت و آزاری اَوه آرَسه، البَحَل جیگینه. 22دانه ای که بران دلَک اَربینده، کَسیه که خدا کلامه اَشنوه، امّا دنیا نگرانیان و ثروت وَسوَسه، خدا کلامه خفه کره و بی ثمر کره. 23امّا دانه ای که چاکه زمینک اَربینده کسی یه که خدا کلامه اَشنوه و اَوه فهمه. اَوه حقیقتا ثمر آدینده بعضی صد برابر، بعضی شصت برابر و بعضی نی سی برابر.»
هرزه عالَفان مثال
24عیسی علوده مَثالی چَوان را بوعردشه: «آسمانه پادشاهی مَردکی شواره که اِشتن زمیک چاکَه دانه آشاندَشه. 25امّا اَدمی که نوکره خُنک بنده، چَوه دشمن بامه و گندمه میانک، هرزه عالَفش بکاشت و بِشه. 26پس وختی گندم اَرامه و اُوشه بیزیشه، عالفه نی دییار آبنده. 27زمین صاحابه نوکره چَوه وَر بشنده و باتشانه: ”ارباب، مگم تِه اِشته زمینکر چاکه دانه کاشته نی؟ پس هرزه عالَفه کاردنه بامنده؟“ 28ارباب اَوانه باتشه: ”اِم دشمنه کاره.“ نوکره اَوکشان آپَرسس: ”آیا گَره بِشام و اَوان بیدا آگیرام؟“ 29ارباب باتشه: ”نه! اَگم بگورانه عالفان بیدا آگیرا، ممکنه گندمه نی اَوانه بنَک بیچینا. 30بِنَیا هر دو گله تا دَسبِجَه موقع هندیگرنه رشد بکرنده. دسَبِجه موقع دسَبِجه کراره نه واجم که اوّل هرزه عالفان بیدو آگیرنده دسته بکرنده تا سوجانسه بیبینده، امّا گندمه چِمن انبارک بیدو آگیرنده.“»
خردله دانۀ مثال و خمیرمایه مثال
31عیسی چَوان را ایگله علوده مَثَلشی بوعردشه و باتشه: «آسمانه پادشاهی ایگله خردله دانه ای شواره که ای نفر اَوش اَرکت و ببَردشه اِشتن زمیک بکاشتشه. 32خَردله دانه همه‌ی دانه هانک ویلی ترا، امّا وختی رشد کریه تمان باغ گیاهانک پیله تر بییه، و ایگله داری آبییه، ایزه که آسمانه پرندان آیِنده و چَه لاخَه ان میانک اِشتن را خومَه رَچ آکَرنده.»
33چاوَش چَوان را ایگله علوده مَثَلشی بوعرده و باتشه: «آسمانه پادشاهی خمیره مایه ای شواره که ایگله زلی اَوه گیریه و سُه کیسه آرده خمیرنه پَشی زَنیه تا همه‌ی خمیر بِیزِه.»
34عیسی تمان اِم لاوان مثله نه جماعته را باتشه و مَثله غیراز اَوانش لاوَه نکه. 35اِم چیه همه اتفاق دگسنده تا اَ پیغمبره پیشگویی اتفاق دگنه که واتش به:
«از مثلانه لاوَه کَرم،
و چیانی که دنیا اَوَل آفرینشنه نُین مانده، واجم.»
عیسی هرزه عالفان مثاله توضیح دَیه
36چاوش عیسی جماعته وَرنه بشه و کییه بشه. اَدمی چه شاگرده بامنده چَوه وَر و باتشانه: «مزرعه هرزه عالفان مَثاله معنی چاما را باجه.» 37عیسی چَوان جوابکش باته: «اَ کسی که چاکه دانه کارّه، انسانه زایه. 38زمین، اِم دنیایه، و چاکه دانه نی خدا پادشاهی خُوردننده. هرزه عالفه، اَ شرور خُوردننده؛ 39دشمنی که اَوان کاره، ابلیسه. گندمه دَسَبجه موقع، اِم دنیا آخره؛ و دَسَبجه کَراره، فرشته اِسنده. 40اَجورَه زه که هرزه عالفِشان بیدو آکرده آتشک سوجانِنده، اِم دنیا آخرکین نی اِنجوره بی. 41انسان زا، اِشتن فرشتان خِرسانه، اَوه هر کسی که گناهه باعث بی و همه‌ی آدمانی که خدا قوانین اِشکنده چَوه پادشاهیک جدا آکرنده. 42و اَوان آتَشه کورۀ دلک دِرَننده، یاگایی که برمنده و دندانان دندانان سرک سِخ دَینده. 43اَدمی صالحان اُوفتوعه شوار اِشتن پییر پادشاهیک، سُو زَننده. هر کی گوش اَشنوِسنه را داره، بشنوه.
نُینه گنج و گرانه مرواریده مثال
44«آسمانه پادشاهی گنجی شواره که زمینه دِلَک نوینه ای نفر اَوش بینده، چاوش هنی اَوه نوین آکَره و شادی نه شی و اَ چی که داره، خورشه و اَ زمینه خِره.
45«هنی آسمانه پادشاهی تاجری شواره که چاک و گرانه مُرواریده پشه اِسه. 46وختی چاک و گرانه مروارید وینه، شی و اَ چیانی که داره، خورشه و اَ مرواریده خِره.
ماهیگیری توره مثال
47«هَنی آسمانه پادشاهی مایی گیری توری شواره که دریا دله درننده و همه مدل ماهی گیره. 48اَ زمانی که تورَه فِت آبییه، ماهیگیره اَوه اُوک دُرانجنده ساحلک. چاوش نِشِنده و چاکَه ماهیان سبدک بیدا آگیرنده، امّا بَده ماهیان فِر آدینده. 49اِم دنیا آخرک نی اِنجوره بی. فرشتان آینده و بده آدمان صالحه آدمانک جدا آکرنده. 50و بده آدمان آتشه کورَک درننده، اَ یاگایی که بِرَمنده و دندان دندانان سرک سخ دینده.
51چاوش آپرسسشه: «آیا همه‌ی اِم لاوَانران بزانسنده؟» جواوشان آدا: «بله!» 52عیسی باتشه: «پس، هر کامین از توراته معلمین که آسمانه پادشاهی درباره آموتش بیبی، کییه صاحاب ای شواره که اِشتن خزانک تازه و کویینه چیان بَراوره.»
ناصره مردم عیسی ایمان ناورنده
53وختی عیسی اِم مَثَلِش اُجردنده، اَگارنه بِشه 54و اِشتن شهر بامه، یهودیان عبادتگاک مردمش تعلیم آداه. ایزه که مردم مات آبنده و آپرسردشانه: «اِم مردک ایزِنه حکمت و معجزه انجام دینه قدرتش کاردنه آوَرده؟ 55مگم، اَ نجّاره زا نی؟ مگم، چَه مار نام مریم نییِه؟ و چوه براره یعقوب و یوسف و شَمعون و یهودا نینده؟ 56مگم چَوه همه‌ی خوعره چاما دویره وَرک زندگی نِکَرنده؟ پس اِم مردک همه‌ی اِم چیش کاردنه آموته؟» 57پس عیسی لاوانک ناراحت ببنده. امّا عیسی اَوانش باته: «پیغمبر همه یاگاک حرمت داره جز اِشتن شهر و اِشتن کییَک!» 58و اَگاک چوان بی ایمانی واسنه، پِرش معجزه نِکه.
ទើបបានជ្រើសរើសហើយ៖
انجیل متی 13: TIT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
