مرقس انجیل 15
15
محاکمه پیلاتُس ورجه
1هوتو که صوب ببو، کاهینون سرؤن، شیخؤن و تورات معلمون و تموم یهودِ آدمؤن شورا تشکیل بدئن. اوشون عیسی دَست دَوَسّه بَبَردَن و پیلاتُس روم فرموندارِ تحویل بدَئن. 2پیلاتُس عیسی جی بپورسه: «تو یهودِیون پادشایی؟» عیسی جواب بَدَه: «تو خودت ایطؤ گونی!» 3کاهینون سرؤن خیلی اونه ایفترا زِئن. 4پَس پیلاتُس هنده عیسی جی بپورسه: «هیچ جوابی ندَئنی بدی؟ بین چقَدَر تَه ایفترا زِئدَرَن!» 5ولی عیسی هنده هیچی جواب نَدَه، جوری که پیلاتُس ماتَ بؤ.
6پیلاتُس یکته رسم داشت که عید وخت، یکته زندؤنیِ که مَردوم خواستن آزادَ کونی. 7شورشی أن میئن که زندون میئن ایسا بوئن یکته مرداک بو که باراباس ایسم داشت. او قتل واسه یکته آشوبِ میئن زندؤن دکته بو. 8مَردم پیلاتُس ورجه بومَئن و اونای بخواسّن که همیشگی رسم ایشونِ به انجوم بدای. 9پیلاتُس اوشونای بپورسه: «خوائنین یهودِیونه پادشاه شیمه به آزادَ کونم؟» 10پیلاتُس هینه واسه اینه بوته بو که بفَهمسه بو کاهینون سرؤن، عیسی، حسودی وسه، اونه تحویل بدَئن. 11امّا کاهینون سرؤن جَمعیتَ تیرَ گودَن تا پیلاتُس جی بخوائن بجای عیسی باراباسِ ایشونِ به آزادَ کونی. 12پیلاتُس هنده اوشونای بپورسه: «پَس ایی مَرداک أمره که شمه اونه یهودیونه پادشاه دوخبئنین، چی بُکونم؟» 13دومَرته پیله داد أمره بوتن: « اونه صلیب سر هکش!» 14پیلاتُس اوشونای بپورسه: «چرِه؟ چی بدی بوده؟» امّا اوشون پیلتر فریاد زئن: «اونه صلیب سر هکش!» 15پَس پیلاتُس که خواس مَردم راضی بکونی، باراباسِ ایشونِ به آزادَ گوده و دستور بده عیسی شلاق بزنن، اونه سربازون دست هده تا صلیب سر هکشن.
سربازون عیسی روشخنایتَن
16بزین سربازؤن، عیسی کاخ صارا میئن، یعنی فرماندار کاخ، ببوردَن و همۀ سربازؤنِ دوخوندن که جومَه بوئن. 17بازین یکته ارغوؤنی رخت اونه دودَن و یکته تاج تیفای ببافتن و عیسی سَر بنَئن. 18بازین اون جلو زانو بزئن و گوتَن: «سلام بر یهودیون پادشاه !» 19اوشون چوب امره عیسی سَرِ زئن و اونه سَر فیلی فودَن، اونه جلو زانو زئن و تعظیم گودن. 20بعد اونکه اونه روشخنایتن، ارغوؤنی عبا اونه تنَ جی بکندن، خوشه رختَ اونه دودَن. بازین عیسی بیرون بَبَردَن تا صلیب سر هکشَن.
عیسی صلیب سر هکشِئن
21سربازون راه میئن ینفر که شَمعون ایسم داشت و از قیروؤن مردم بو واداشتَن تا عیسی صلیب کولَ گیری.شمعون، اسکندر و روفُس پئر بو و زمین طرف أمه دبو. 22اوشون عیسی یکته جیگا که جُلجُتا ایسم داشت بَبَردَن، که اونه معنی محل جمجمه ایسّه. 23هووقت عیسی شرابی که مُر اَمَرِه قاطی بوبوُ بو هَدئن، امّا او قبول نوده. 24بازین عیسی صلیب سر هکشِئن و اونه رختؤن خوشونِ میئن سهم بودَن، هرکسِ سَهم وسه قرعه تودَئن.
25ساعت نُه صبح بو که اوشون عیسی صلیب سر ببردَن. 26اونه تقصیرنؤمه سر بنویشته بوبوُ: «یهودِیونه پادشاه.» 27دو ته راهزنم عیسی امره صلیب سر هکشِئن، یکته راست وَر و اویکته اونه چپ وَر. 28ایطو بوبؤ که مُقدس کِتابؤنِ بنویشته أن به حقیقت برسه که گونه: «او تقصیرکارون مورسون محکوم بوبؤ.» 29اوشونی که اورای شوئدبون خوشونِ سرؤنِ توکون دَئن و فحش أمره گوتَن: «ای تو که خواسی معبدِ فگردوئنی و سُه روز میئن اونه هنده چاکونی، 30تَه نجات بدی! صلیب جی جیر بیه!» 31کاهینون سرؤن و تورات معلمونم خوشونِ میئن اونه روشخنایتَن و گوتَن: «بقیه نجات بدا، امّا خوشِ منئه نجات بدای! 32بدارین مسیح موعود، اسراییل پادشاه، الؤن صلیب جی جیر بای تا بَینیم و ایمؤن بأریم.» او دوته که اونه امره صلیب سر هکشه بوبؤبوئن هم عیسی فحش دئن.
عیسی موردَن
33ساعت دوازده ظهر تاریکی سراسر او ولایت بیته و تا ساعت سه بعدظهر، طول بکشه 34ساعت سه بعدظهر بو که عیسی ژگله بزه: «ایلویی، ایلویی، لَمّا سَبَقْتَنی؟» یعنی «ای می خُدا، ای می خُدا، چرِه مَه ترک بوئدی؟» 35بعضی از اوشون هم که اوره ایسه بُن هیطو که اینه بِشتوئسَن، بوتَن: «گوش بدین، ایلیا پیغمبر دُخوُندره.» 36پَس یه نفر جلو بُدُؤسه و یکته ابر ترش شرابَ میئن بزه و یکته چوب سر بَنه، عیسی دَهَن جلو بَبَرده تا وودوشی، و بوته: «بیسین تا بَینیم ایلیا هنه، اونه صلیب جی جیر بئره ؟» 37پَس عیسی ژگله بزه و آخری نفسَ بکشه. 38هووقت معبد پرده جؤر تا جیرای دو پَئره بوبوُ. 39وختی سربازون فرمانده که عیسی جلو ایسا بو، بدِه که عیسی چُطو خودشه جؤن تسلیم بوده، بوته: «راست راست ایی مرَداک خُدا ریکه بو.»
40بعضی از زناکؤنم دورادوری ای ایتفاق نیگاه کائدبون. اوشون میئن مریم مَجَدلیهَ، مریم کوشتای یعقوب و یوشا مئر و سالومه ایسابوئن. 41ایی زناکؤن هووقت که عیسی، جلیل ولایت میئن ایسابو، اونه دومباله رو بوئن و اونه خدمت گودَن. خیلی زناکون دیگه هم که عیسی أمره اورشلیم بومه بوئن، اوره ایسابوئن.
عیسی دفنَ گودَن
42او روز، ’تهیه‘روز بو، روزی که یهودی أن خودشونه عیدِ واسه آماده گودن، یعنی یک روز قبلِ مقدس شنبه روز. 43پس غروب دمی یکته مردکای که یوسف ایسم داشت، و رامه شی بو بی واهیمه، پیلاتُس ورجه بوشؤ و عیسی جنازه بخواسته. یوسف یهود شورا عضو بو که اونه خیلی احترام گودن و خُدا پادشایی ریفا ایسا بو. 44پیلاتُس که باور نؤد، عیسی، به ایی زودی بمورده بی، سربازؤن فرمانده دوخونده تا بَینی عیسی بمورده یا نه. 45وختی که پیلاتُس، ای فرماندَه جی بشتوسه که عیسی بمورده، اجازه بده عیسی جنازه یوسفِ هدئن. 46یوسف هم یکته پارچه کتان بیه و عیسی جنازه صلیبای جیر بأرده، کتان میئن فیبیته و یکته مَقبره میئن که صخره میئن بتاشته بوبوُ بو، بَنه. بازین یکته سنگِ، مقبره دَهَنه جُلُو گرا دا. 47مریم مَجَدلیهَ و مریم یوشا مَئر، بدِئن که عیسی کوره بَنه بوبؤ.
ទើបបានជ្រើសរើសហើយ៖
مرقس انجیل 15: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company