متّای انجیل 27
27
یهودا خودکشی
1صوبه دم، همه کاهینون سرون و قوم شیخون جومَه بوئن، همدیگره اَمره مشورت بودَن که عیسی بکوشَن. 2پس اونه دست دوسّه ببوردَن و پیلاتوس فرماندارِ تحویل بدَئن.
3وختی یهودا، اونه تسلیم کننده بدِه که عیسی محکومَ گودَن، خو کارای پشیمونَ بوُ و سی‌ته سکّه نقره، کاهینون سرون و شیخون وگاردوئنه و بوته: 4«گوناه بودَم و باعث بوبوم یکته بی‌گوناهِ خون فبی.» امّا اوشؤن جواب بدَئن: «به اَمه چی؟ خودت دؤنی!» 5هوموقع یهودا، سکّهأنِ معبد میئن زمینِ سر فوده و بوشو و خوشِ دار بزه. 6کاهینون سرون سکّهأن زمینای جومَه گودَن و بوُتن: «ایی سکّهأنِ معبدِ خزؤنه میئن تؤدَئن شرعاً درست نیه، چونکه خون‌بها ایسه.» 7بعدِ اونکه صلاح مشورت بودَن، او پولِ اَمره، کوزهگر زمینِ بَهیِن تا اونه غریبه أن قبرستؤن چاکونَن. 8هینه وسه او محل تا امروز به ’زمین خون‘ معروفه. 9ایطو بوبؤ که، اِرِمیای پیغمبر پیشگویی حقیقت پیدا گوده که، بوته بو: «اوشؤن سی سکه نقرهَ ویتَن، یعنی قیمتی که بنی اسرائیل اونه سر بنَئن، 10و اونه اَمره کوزهگره زمین بهیِن، جوری که خداوند مَه اَمر بفرمأسّه بو.»
محاکمه پیلاتوسِ ورجه
11امّا عیسی، پیلاتس، فرماندار روم جلو بیسَه. فرماندار عیسی جی بپورسه: «تو یهودِ پادشاه ایسّی؟» عیسی جواب بده: «تو ایطو بوتی!» 12امّا وختی که کاهینون سرون و شیخون اونه افترا بزئن، عیسی هیچ جوابی ندَه. 13پس پیلاتوس عیسی جی بپورسه: «نشتؤنی چنی چی تی ضد گوائی دِئنَن؟» 14امّا عیسی حتّی یکته ایی افترائنَم جواب نده. جوری که فرماندار ماتَ بو.
15فرماندار رسم ایی بو که عیدِ موقع یکته زندؤنیِ که مردوم خواستنِ آزادَ کونی. 16او زمؤن یکته مردکای به ایسمِ باراباس زندؤن ایسابو که مردوم اونه شناختن. 17پس وختی که مردوم جومَه بوبُوئن، پیلاتوس اوشؤنای بپورسه: «کیه خوانین که، شیمه بِه ویلَه کونم، باراباس یا عیسی نامدار به مسیحِ؟» 18اینه، هینه واسه بوته که دؤنس عیسی، حسادتای اونه دست هَدَئن. 19وختی که پیلاتوس داوری تخت سر نیشتهبو، اونه زن یکته پیغوم اونه بِه سرا دا که بنویشته هنه بو: «ایی صالح مرداکِ اَمره کار ندار، چونکه امروز یکته خوؤ اونه باره بدِئمکه، خیلی مه اذیت بوده.» 20امّا کاهینؤن سرون و شیخون، مردومِ واداشتن تا باراباس آزادی و عیسی مرگِ بخوان. 21پس وختی فرماندار بپورسه: « ایی دوتای، کویکتَه شیمه بِه ویلَه کونم؟» جواب بدَئن: «باراباسِ». 22پیلاتوس بپورسه: «پس عیسی نامدار به مسیحِ اَمره چیبکونم؟» همته بوُتن: «صلیب سر هکش!» 23پیلاتوس بپورسه: «چرأ؟ چی بدی بُوده؟» امّا اوشؤن بلندتر فریاد بزِئن: «صلیب سر هکش!»
24پس پیلاتوس بدِه که اینه حقسعی فایده ندئنه، و حتی بده که شورش بودره، آؤ بخواسّه و خوشِ دستؤنِ مردومِ جلو بوشوسته و بوته: «ایی مرداک خون می گردن نیه. خودتؤن دؤنین!» 25مردوم همه جواب بدئن و بوتن: «اونه خون امه گردن و امه زاکؤنِ گردن ببی!» 26هوموقع پیلاتُس، باراباسِ اوشونه بِه ویلَه گوده و عیسی شلاق بزه و هده تا صلیب سر هکشَن.
عیسی رُخشنَیتن
27پیلاتوسِ سربازؤن، عیسی، فرماندار كاخِ صاراکی میئن ببوردَن و تمؤمِ سربازؤن اونه دور جومَه بون. 28اوشؤن عیسی لُختَ گودَن، یکته ارغوؤنی رخت اونه دودَن. 29و یکته تاج، تیفاجی ببافتن و اونه سر بنَئن و یکته شَترکه اونه راستِ دست هدئن. بازین اونه جلو زانو بزِئن و روخشنِ أمره بوتَن: «سلام بر یهودِ پادشاه!» 30و اونه سر فیلی فودَن. شَترکه اونه دستای هیتَن و اونه سر زِئن. 31بعد از اونکه اونه روخشنه گیتَن، ارغوونی ردا اونه تناجی بیرون بأردن و خوشِ رختِ اونه دودَن. بازین عیسی بیرون ببوردَن تا صلیب سر هَکشن.
صلیب سر هکشِئنه عیسی
32وختی که بیرون شوئودبون، یکته مردکه قیروؤن اهالی جی به ایسم شمعون بدِئن و اونه واداشتَن که عیسی صلیبِ ببوری. 33وختی او جایی که جُلجُتا ایسم داشت که اونه معنی جمجمه ایسّه، برسئن، 34عیسی، شرابی که زرخِ آؤه اَمره قاطی بوُ، هدَئن. وختی عیسی اونه وچیشته، نخواسّ دِه وودوشی. 35وختی که اونه صلیب سر هکشِئن، اونه رختِ تقسيم گودنِ بِه، خوشؤنِ میئن قرعه تؤدَن. 36بازین بنیشتن و عیسی بپاسّتَن. 37یکته حوکم هم ایطوری یکته تخته سر بنویشتَن و اونه‌سره جور بزِئن: «ایی ایسه عیسی، یهودِ پادشاه!»
38دوته راهزنم اونه اَمره صلیب سر هکشه بوبؤئن یکته راست طرف و اوته اونه چپِ طرف. 39اوشونی که اورای شوئدبون خوشونِ سرِ تکون دئن و فحش دئن 40گوتَن: «اَی تو، که خوأستی معبده فگردنی و سه روزه اونه چأکونی! تَه نجات بدی! اگر خدا ریکاکی، صلیب سَرای جیر بیأ!» 41کاهینون سرون و تورات معلمون و شیخون هم اونه روخشنه گیتن و گوتَن: 42«دیگرؤنِ نجات بدا، خوشِ منئه نجات بدای! اگه اسرائیلِ پادشاهایسه، الؤن صلیبای جیر بائ تا اونه ایمؤن بأریم. 43او، خدا توکّل دئنه. پس اگه خدا اونه دوست دَئنه، الؤن اونه نجات بدای. چون ادّعا گود که، خدا ریکاکه!» 44او دوته راهزنم که اونه اَمره صلیب سر هکشه بوبؤبُن، هیطوری اونه توهین گودَن.
عیسی موردَن
45از ساعت دوازده ظهر تا ساعت سه بعدظهر، تاریکی تموم او ولایت بَیته. 46دوروبرِ ساعت سه بعدظهر، عیسی ژگله بزه: «ایلی، ایلی، لمّا سَبَقتَنی؟» یعنی «می خدا، می خدا، چرِء مه ویلَه گودی؟» 47بعضی از اوشونی که اوره ایسابون وختی اینه بشتؤسَن، بوُتن: «ایلیا دوخُبِئنه.» 48یکته از اوشؤن درجا بودؤسه و یکته اَبر بارده، اونه تُرشَ بوُ شرابِ میئن فورو گوده و یکته چوبه سر بَنه و عیسی دَهنِ ورجه ببورده تا وودوشی. 49امّا بقیّه بوُتن: «اونه به خوشِ حال بنی تا بَینیم ایلیا اونه نجات دَئنه بِه هَنه؟» 50عیسی یبار دیگه ژگله بزه و خوشِ روحِ تسلیمَ گوده. 51هو وخت میئن، معبد پرده از جؤر تا جیر دوپاره بوبُو. زمین بلرزه و سنگؤن بشکافتَن. 52قبرؤن بازه بوئن و خیلی از مُقدسؤنِ جنازه أن که بمورده بوئن، زنده بوبوئن. 53اوشؤن قبرؤنای بیرون بومئن و بعد از اینکه عیسی زنده بوبو، مقدّس شهرِ میئن بوشوُئن و خوشؤنِ خیلی از مردومونِ نیشون بدئِن. 54وختی سربأزؤنِ فرمؤنده و اونه نفرات که ماموریت نگهبؤنی عیسی جیِ داشتن، زمین لرزه و ایی همه اتفاقون بدئن، خیلی بترسِئن و بوُتن: «راست راستِ او خدا ریکه بو.»
55خیلی از زنأکؤنم اوره ایسأبون و از دور نیگاه کائدبُون. اوشؤن جلیلای عیسی دومبالسر راه دکتبون تا اونه به خدمت بکونَن. 56اوشونه میئن مریم مجدلیّه و مریم، یعقوب و یوسف مَئر و زبدی ریکاکونِ مَئرم ایسأبُوئن.
عیسی دفنَ گودن
57غروب دمی، یکته دارا مرداک که رامه شی بو، به ایسم یوسف که، خودوش عیسی شاگرد بوبُو بو، 58پیلاتوس ورجه بوشو و عیسی جنازه بخواسّه. پیلاتوس دستور بدا اونه هَدِئن. 59یوسف، جنازه ویته، یکته تمیز کتونِ میئن فیبیته 60و یکته مقبره میئن که تازه خوشِ به صخره میئن بتاشته بو، بَنه و یکته پیله سنگ مقبره دهنه جلو گرادَه و بوشو. 61مریم مجدلیّه و اوته مریم اوره مقبره جلو نیشته بُوئن.
مقبره نیگَهبونؤن
62فردایی، که بعد از ’روزِ آماده بوئن عیدِ‘ بو، کاهینون سرون و فریسی ان فرقه عالمون پیلاتُسِ ورجه جومَه بوئن و بوُتن: 63«آقا! أمره یاد دره که، وختی ایی فریبکار زنده بو، گوت که ”سه روز بعد ویریسنَم.“ 64پس دستور بدین مقبره، تا سه روز بپائن، نبی اونه شاگردؤن بَئن و اونه جنازه بدوزدَن و مردومِ بوگون که او مُردهأنای ویریسا، که ایطوری، ایی آخری کلک، از اوّلی کلکَم بدتر بنه.» 65پیلاتوس جواب بده: «شمه خودتؤن سربازون، پاستنِ دَئنین. بشین و اونه اوجور که صلاح دؤنین، بپاین.» 66پس بوشوُئن و مقبره سنگِ مُهر و موم بودَن و چنته سرباز اوره بنَئن تا مقبره بپائن.
ទើបបានជ្រើសរើសហើយ៖
متّای انجیل 27: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
