متّای انجیل 24
24
آخرِ زمؤنِ نشؤنه أن
1وختی که عیسی معبدای حرکت بوده و خوشِ راهِ شؤدبو، اونه شاگردؤن بومَئن تا معبدِ ساختمونونِ اونه نیشون بدِئن. 2عیسی اوشونه بوته: «ایشونِ همه دینین؟ راست راستِ شمره گونم که دِه سنگ سنگِ سر نومؤنه، بلکه همه فگردنه.»
3وختی عیسی زیتون کوه سر نیشته بوُ، اونه شاگردؤن خلوتی اونه ورجه بومئن و بوُتن: «اَمه به بگو ایی اتفاقون کِی دکِئنه و تی أَمئنه و آخر ایی زمؤنِ نیشؤنه چیسّه؟» 4عیسی جواب بدا: «واخُوب ببین که کسی شمره گمراهَ نکونی. 5چونکه خیلی‌ین به ایسم مو هنن و گونن که، ”مو مسیح موعود ایسّم،“ و خیلیأنِ گمراه کؤئنَن. 6هیطورم جنگؤنِ باره أیشتؤنین و جنگؤنِ خبر شیمه گوش رسنه. امّا واهیمه ندارین، چون ایجور اتفاقون باید دکای، ولی حلِه آخرزمون نرسه. 7قومی بر ضدقوم دیگه و مملکتی بر ضد مملکت دیگه ویریسنَه، و قحطیأن و زلزلهأن خیلی جاأن هنه. 8امّا ایشون همه فقط شروع زایمؤنِ دردِ موئنه که زمون، از ایی درد تا او درد کمتر و کمتر بنه.
9«او زمون شمره تسلیمَ کوئنن تا خیلی مصیبت بَینین و شمره کوشنَن. هَمَته قومؤن می ایسمِ وسه شمرای نفرت دَئنن. 10او روزؤن خیلیأن خوشؤنِ ایمؤنای وگردنَن، همدیگرِ خیانت کؤئنَن و همدیگرِ پیراسته بو منِئن. 11دروغی پیغمبرون زیادی ویریسَنَن، خیلیأنِ گمراهَ کؤئنَن. 12شرارت اونقدر زیادَ بنه که خیلی أنِ محبت سردَه بنه. 13ولی هرکی که تا آخر بَیسی، نجات پیدا کؤئنه. 14و ایی پادشاهی خوروم خبر تموم دنیا اعلؤم بنه تا هَمته قومؤنِ به گوائی ببی، هووخت دنیا به آخر رَسنه.
15«پس اوچیزیکه دانیال پیغمبر اونه ’ویرانگری که اونه دئنِ أمره آدمِ اَجیشَ گینه‘ ایسم بنَه، مقدّس جیگاه میئن سرپا دینین 16هووخت هر کس یهودیّه میئن بیسه، کوهؤنِ میئن در شنه. 17و هر کس خونه بومِ جور بیسه، هیچی ویتنه بِه جیر نَئنه؛ 18و هر کس زمین سر بیسه، خوشِ قبا ویتنه بِه خونه ونگردنه. 19وای بر شوکوم دار زناکون و مئرونی که ایی روزؤنِ میئن خوشونِ زاکونِ شیر دِئنَن! 20دعا بکونین که شیمه فرار گودن زمستون یا مقدس شنبه روز میئن نبی. 21چونکه او زمون چنون پیله مصیبتی اتفاق دکِئنه که اونه مورسون دنیا بناجی تا اَلؤن اتفاق دنکته بو و هیچوختم اتفاق دنکِئنه. 22اگه او روزؤن کوتاه نوبوُبی، هیچ آدمی جؤن سالم بدر نبوردَنابو، امّا سیوا بوبوکوئنه کوتاه بنه.
23«او زمون اگه ینفر شمره بوگوی، ”بینین، مسیح موعود إرِه ایسه!“ یا ”مسیح اوره ایسه!“ باور نکونین. 24چونکه دروغِ مسیحی ان و پیغمبرؤن الکی ویریسَنَن، نیشؤنه و پیله معجزه أن أَبِئنَن تا اگه ممکن ببی، حتّی سیوا بوبوکوئنم گمراه بکونَن. 25بینین، پیشتر شمره بوُتم. 26پس اگه شمره بوگُوئن، ”او بیابان میئن ایسه،“ اوره نشین. و اگه بوگُوئن: ”خونه میِئن ایسأ،“ باور نکونین. 27چون هیطو که برق آسمون شرق میئنای بیرون هنه و اونه نور تا غرب هم رسنه، انسونِ ریکه ظهور گودنم هیطو بنه. 28هر جا لاشه بنای، لاشخورون اوره جومَه بَنن.
29هو دَم، بعدِ او روزؤن مصیبت
«”آفتاؤ تاریک بنه
و ماهم ده نوتؤنه
ستارهأن آسمونای جیر کِئنن،
و آسمونؤن قوتؤن به لرزه دکِئنه.“
30هووخت انسونِ ریکه نیشؤنه، آسمونِ میئن ظاهر بنه و همه دنیا قومون خوشؤنِ سینه سر کوتنِئنَن و انسونِ ریکه دینَن که قوت و پیله جلال اَمره، آسمونِ، اَبرؤنِ سر أَمَئدَره. 31او خوشِ فرشتهأنِ شیپور پیله صدا أمره، سرا دِئنه و اوشؤن اونه سیوا بوبوکوئنه چهارکُنج دنیاجی، ایی طرف آسمونَ جی تا اویکته طرف جومَه کوئنن.
32«الون، انجیر دارَ جی، ایی درسِ بگیرین: وختی اونه شاخهأن تی تی کوئنه و وَلگ دئنه، فَهمنین که تابستون نزدیکِ. 33هیطورم، هروقت که ایی چیزؤنِ بینین، فَهمنین که انسون ریکه اَمَئن نزدیکِ، بلکه دَرِ سر ایسه. 34راست راستِ شمره گونم که تا ایی همه اتفاق دنکای، ایی نسل از بین نشنه. 35آسمؤن و زمین از بین شنه، امّا می گبؤن هرگی از بین نشنه.
هیشکس اونه روز و ساعت نودؤئنه
36«اما هیشکس او روز و او ساعتِ نودؤنه، جز پئر؛ حتّی آسمونِ فرشتهأن و اونه ریکاکَم اونای واخُوب نییَن. 37انسونِ ریکه ظهور وقت، نوح روزؤن مورسون بنه. 38قبل او روزونی که سیل بای، پیشتر از اونکه نوح کشتی میئن بشی، مردوم خوردَن و وودوشتن و زن گیتن و مَردِ بوئن. 39و نودونسَن که چی در پیشه، تا اونکه سیل بومَه و هَمَه خوشِ اَمره ببورده. انسونِ ریکه ظهورم هیطو بنه. 40هوموقع از دو ته مرداکی که زمین سر ایسَئن، یکته ویته بنه و اویکته بنَئه بنه. 41و از دو ته زناکی که با هم آسیاؤ کأدرن، یکته ویته بنه و اویکته بنَئه بنه. 42پس بیدار ببین، چون ندؤنین شیمه آقا چی روزی هنه. 43اینه بدونین که اگه صابخونه دؤنسی که دوز چه ساعتی هنه، نوگزاشت اونه خونای دوزی بکونن. 44پس شَمَرَم حاضیر بیسین، چونکه انسونِ ریکه، ساعتی هنه که اونه انتظارِ ندَئنین.»
45«پس او غلامِ اَمین و دانا کی ایسّه که، اونه ارباب اونه خوشِ خونه پیلتر چاگوده تا اوشونه خوراکِ به موقع هدَی؟ 46خوشبحال او غلؤمی که وختی اونه ارباب وگردنه، اونه هو کار سر بَینی. 47راست راستِ شمره گونم که اونه خوشِ تموم دارایی سر نِئنه. 48امّا اگه او غلوم، شرور ببی و خوشِ أمره فکر بکونی که ”می ارباب دیرهَ گوده،“ 49و خوشِ همکارؤنِ آزار بدای، و عیاشون اَمره بخوری و وودوشی، 50او زمون اونه ارباب، روزی که انتظار ندَئنه و ساعتی که اونای واخوب نیه، هنه. 51و اونَه از وسط دوخائله کؤئنه و ریاکارؤنِ جیگاه میئن تؤدنه، جایی که ونگ زئنن و گاز، گاز سر سوئنَن.
ទើបបានជ្រើសរើសហើយ៖
متّای انجیل 24: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
