متّای انجیل 22
22
عروسی جشن حیکایت
1عیسی هنده حیکایت اَمره ایشؤنِ بِه گب بزه و بفرماسّه: 2«آسمونِ پادشاهیِ تینیم به شاهی شباهت بدیم که، خوشِ ریکاکه به عروسی جشن بیته. 3او خوشِ خدمتکارونِ سرا دا تا دعوت بوبُؤکؤنِ جشن به دوخؤئنَن، امّا اوشؤن نخواسّن بأن. 4پس خدمتکارونِ دیگهيی سرا دا و بوته: ”دعوت بوبُوکؤنِ بوگؤین الؤن جشن سفره حاضیرهَ گودیم. گامیشؤن و چاقِ گوکوله أنِ هم سیرَ بِئم و همه چیز حاضیره. پس عروسی جشن به باین.“ 5امّا اوشؤن محل نوُدَن و هرته خوشؤنِ راهِ بوشؤن یکته زمین سر و اویکته خوشِ کاسبی سر. 6دیگرؤنم اونه خدمتکارونِ بَیتَن و بی حرمتی بودَن و بکوشتَن. 7شاه وختی اینه بشتؤسه، برزخَ بُو، خوشِ سربازؤنِ سرا دا و قاتلؤنِ بکوشته و اوشونِ شهرِ آتش بزه. 8بازین خوشِ خدمتکارونِ بوته: ”عروسی جشن حاضیر ایسّه، امّا دعوت بوبُؤکؤن لیاقت نداشتن بائن اونه میئن. 9پس شهرِ میدؤن سر بشین و هر کیِ پیدا گودین، عروسی جشن به دعوت بکونین.“ 10نوکرون کوچهأن مِیئن بوشوُئن و هر کیِ پیدا گودَن، چی خوب و چی بد، خوشؤنِ اَمره بأردن و عروسی تالار، مهمونؤنَ جی پوره بوُ.
11«امّا وختی که شاه مهمونؤنِ دِئنه بِه مجلسِ مِیئن بومَه، یکته مردکاکه بدِه که، عروسی رخت دوُنده بو. 12او مرداکَ جی بپورسه: ”ریفق، چطو بی عروسی رخت إرِه بومای؟“ مردکای جواب نداشت. 13هو وخت پادشاه خوشِ خدمتکارون بوته: ”اونه دست و پا دَوَدین و اونه بیرون تاریکی میئن باگنین. اوره که ونگ و گاز، گاز سر بوسؤئسه بنه.“ 14چونکه دعوت بوبُؤکؤن زیادن، امّا سیوا بوبؤکؤن کم.»
امپراطور مالیات هَدَئن
15بازین فریسی فرقه عالمون بیرون بوشوُئن و مشورت بودَن تا بَینَن که چطو تینَن عیسی خوشِ گبون اَمره دؤم میئن تؤدئن. 16اوشؤن خوشؤنِ شاگردؤنِ هیرودیسِ هوادارؤنِ اَمره اونه ورجه سرا دَئن و بوُتن: «اوستاد، دؤنیم که تو صاف و صادق مرداکی و خدا راهِ به درستی یاد دِئنی و کسَ جی واهیمه ندئنی چونکه ظاهیره نیگاه نوکُوئنی. 17پس تی رای اَمره بگو: امپراطور خراج هدئن درست ایسّه یا نه؟» 18عیسی ایشؤنِ پلیدِ نیت بفَهمسه و بوته: «ای ریاکارؤن، چرِء مه امتحؤن کأدرین؟ 19او سکّهای که باید اونه اَمره خراج هَدَین، مَه نیشون بدین. اوشؤن یکته سکّه یک دیناری عیسی هَدَن.» 20عیسی اوشؤنای بپورسه: «نام و نیشونی که ایی سکّه سر هَنّه، کیشی ایسه؟» 21جواب بدَئن: «امپراطور شی.» اوشونه بوته: «پس امپراطور مالِ امپراطور هَدَین و خدا مالِ خدا.» 22اوشون هیطوکه اینه بشتؤسَن، ماتَ بوئن و عیسی بنَئن و بوشُئن.
سئوال مرده أنَ جی زنده بوئن
23هو روز میئن، صَدّوقی فرقه عالمون که مرده أنِ جی زنده بوئنِ قبول نداشتن، اونه ورجه بومَئن و عیسی جی یکته سوال بودن 24بوُتن: «اوستاد، موسای پیغمبر اَمَره بفرمأسّه که اگه یکته مردکای بی اولاد بمیری، اونه برأر باید اونه بیوَه به زنی بیگیری تا اونای خوشِ برأره بِه نسلی باقی بنای. 25الون، امه میئن هفتته برأر بؤئن، اولی برار، زن ببورده و بمورده و چونکه زأک نداشت، خوشِ بیوه زناکِ خوشِ برأره بِه بَنه. 26بازین دوّمی وسوّمی، تا هفتمی. 27سَرآخر او زناکَم بمورده. 28پس وختی که مرده أن زنده بنن، او زناک کویکته از او هفتته برأره زن بنه، چون هَمَته اونه به زنی بِیته بؤئن؟»
29عیسی جواب بدا: «شمه گُمراهین، چون نه خدا کلامَ جی واخوبین و نه خدا قوّتَ جی! 30وختی که مرده أن زنده بنن نه کسی زن گینه و نه مَردِ بنه، بلکه همه آسمونِ فرشتهأنِ مورسون بنن. 31مگه مرده أنَ جی زنده بوئنِ باره، نوخوندین که خدا تورات میئن شمره چی بوته؟ 32او بفرماسّه که، ”مو ایسّم ابراهیم خدا و اسحاق خدا و یعقوب خدا.“ او مُردهأن خدا نیه، بلکه زندهأنِ خدا ایسّه.» 33مردوم ایی گبؤنِ ایشتؤسَنِ أمره و اونه آموتنای ماتَ بوئن.
پيله ترین حوکم
34امّا وختی فریسی أن بشتؤسَن که عیسی خوشِ جواب اَمره چطو صَدّوقی أنِ دهنِ دوَسّه، جومَه بوئن. 35یکته از اوشؤن که قاضی بو، ایی قصد أمره که عیسی امتحون بکونی، اونای بپورسه: 36«اوستاد، شریعتِ میئن پيله ترین حوكم کؤته ایسه؟» 37عیسی جواب بده: «”خداوندْ تی خداِ تمومی تی جونِ اَمره و تمومی تی دیل أمره و تمومیِ تی فکره اَمره دوست بدار.“ 38ایی اولین و پيلّه‌ترین حوکمِ. 39دوّمی حوکمم، اوّلی حوکمِ مورسون، ”تی همسایه، تی مورسون دوست بدار.“ 40تموم موسی شریعت و پیغمبرونِ بنویشته أن ایی دوته حوکم سر برقراره.»
مسیح موعود کی ریکای ایسّه؟
41وختی فریسی ان همه جومَه بؤبوئن، عیسی اوشونای بپورسه: 42«شیمه نظر مسیح موعود باره چی ایسه؟ او کی ریکاکه؟» اوشون جواب بدئن: «داوودِ پادشاه ریکه.» 43عیسی بوته: «پس چطو داوود، روح میئن اونه خداوند دوخُوئبِئنه؟ چونکه گونه:
44«”خداوندْ، می خداوندِ بوته:
می راستِ دست ور بنیش
تا زمونی که تی دشمنون تی پِا جیر کورسی بسازم.“
45اگه داوود اونه خداوند دوخُوبِئنه، چطو او تینه داوودِ ریکای ببی؟» 46هینه وسه هیشکس منیس اونه جوابِ بدای و بازین هیشکسم ده نیارَس اونای سئوال بکونی.
ទើបបានជ្រើសរើសហើយ៖
متّای انجیل 22: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
