لوقای انجیل 4
4
عیسی امتحون گودن
1عیسی پور از روح القدس، اردن روخونه جَی وگرسه و روح، اونه بیابونِ میئن راهنمایی گود. 2اونه اوره ابلیس، چِهل روز امتحون بُوده. عیسی او روزؤنِ میئن هیچی نوخورده، وختی او مدتی که روزه داشت تمنه بو، اینه وشتَه بو. 3ابلیس اونه بوته: «اگه تو خُدا ریکه ایسی، ایی سنگ بگو نون بَبی.» 4عیسی جواب بَدَه: تورات میئن «بنویشته بوبوُ که ”آدمی که فقط نونِ امره زنده نیه.“»
5بازین ابلیس اونه یکته بلندی سر ببُورده و هودَم تمام دنیا ممالک اونه نیشون بَدَه 6و بوته: «مو همه ی ایی قدرت و ایختیار و اوشؤنه جا و جلال تَه هدِئنم، چونکه مَه بسپورده بوبوُ و مُختارم اونه هرکسی که بخوام هَدِم. 7پس اگه مَه پرستش بکونی ایی همه، تی شی بنه.» 8عیسی جواب بَدَه: «تورات میئن بنویشته بوبوُ،
«”خداوندْ تی خُدا، بپرست
و فقط اونه عبادت بکون.“»
9ابلیس اونه، اورشلیم شهر و معبد گوف سر ببورده و بوته: «اگه خُدا ریکاکی، تَه اِرای جیر تَؤدی. 10چونکه زبور میئن بنویشته بوبوُ:
«”تی واسه خوشِ فرشته أن فرمون دِئنه
تا تَه بپّان.
11و اوشون تَه خوشونِ دَستون سر دَئنن
نبی که تی پَا یکته سنگ بَزنی.“»
12عیسی اونه جواب بَدَه: «تورات میئن بوته بوبؤ ”خداوندْ تی خُدا، امتحون نکون.“» 13هیطو که ابلیس امتحونون تمنه بو، اونه تا یکته فرصت دیگه، ویلَه گوده.
شروع بوئنِ عیسی خدمت جلیل میئن
14عیسی روح القدوس قُوت میئن جلیل ولایت وگرسه و اونه خبر، تمام او اطراف فیبیته. 15عیسی یهودی أن عبادتگاهانِ میئن مردم آموت و همه اونای تعریف گودَن.
ناصره اهالی عیسی قبول نوکوئنن
16پَس عیسی ناصره شهر که اونه میئن پیله بوبُو بو بومَه و یهودی أن مقدس شنبه میئن، بنا به خو عادت عبادگاه یهود میئن بوشؤ. و خو پَاسه بیسه تا خدا کلامِ بوخؤنی. 17اِشعیای پیغمبر طومارِ اونه هَدَئن. هیطو که اونه بازا گوده، او قسمت بیاتّه که فرماسّ:
18«خُداوند روح می سَر هَنّه،
چونکه مَه مَسح بوده
تا خوروم خبر ندارؤنِ بَدِم
او مَه سرا دا تا آزادیِ اسیرؤن به اعلام بکونم
کور چیشمؤنِ بینائیِ جار بزنم،
ستم بکشه کؤنِ آزادَه کونَم،
19و اعلام بکونم که او سال برسه که خداوند، مردم به لطف بکونی.»
20بازین عیسی طومارِ فیبیته و عبادتگاه خدمتکار بسپورده و بنیشته. همه عبادتگاه میئن اونه چیشم بُدوته بُن. 21هوموقع ایطوری بنا به گب زئن بوده: «ایمرو ایی کلامِ بنویشته، وختی که اونه گوش کائده بین، عملی بوبوُ.» 22همه عیسای تعریف گودن و از او فیضی که اینه کلام میئن دبو حیرونَ بوُبوئن و گوتَن: «مگه ایی یوسفِ ریکه نیه؟» 23عیسی ایشونه بوته: «حتم دئنم ایی حیکایت مِه به اَبنین که ”اَی طبیب تَه شفا بَدی! اوچیه که کفرناحوم شهر میئن بودی و امه بشتؤسیم، اِره، تی شهر میئن هم انجؤم بَدی.“» 24بازین بفرماسّه: «راست راستِ، شمره گونم که هیچ پیغمبری خوشِ شهر میئن قُبول نبنه. 25حَتم بدؤنین که ایلیا زمونِ میئن، وختی که آسمؤن سه سال و نیم دَوَسته بوبوُ و سراسر او ولایت پیله قحطی بومه، خیلی بیوه زناکون اسراییل میئن ایسّه بُن. 26امّا ایلیا هیشکس ورجه سرا دا نُبو بغیرِ یکته بیوه زناک، که صَرِفَه شهر صِیدون ولایت میئن ایسابو. 27اِلیشَع پیغمبر زمون هم اسراییل میئن خیلی أن جزام داشتن، ولی هیتّه از خوشونِ جزامای پاکا نُبوئن بغیر از نَعْمانِ سُریانی.» 28بازین همۀ اوشونی که عبادتگاه میئن ایسابُن، ایی گبؤن ایشتؤسنه امره ایشون غیضَیته. 29و ویریسئن، اونه شهر مئنای بیرون هکشِئن و کوه توک سر که شهر اونه سر بنا بوبوُ بو، بَبوردن تا اونه از اورای جیر تؤدَن. 30امّا عیسی ایشونه میئنای ردّ بؤ و بوشُو.
دیو بزِه مَرداک شفا
31بازین عیسی کفر ناحوم سو، یکته از جلیلِ شهرون میئن، بُشو و شنبه روز میئن مَردم آموتنِ به دس بکارَ بؤ. 32اوشون اونه آموتنِ أمره ماتَ بوئن، چونکه اونه گبون میئن قدرت هنّه بو. 33عبادتگاه میئن، یکته دیوبزه مَرداک ایسابو که پلید روح داشت. او مردکه ژگله اَمره بوته: 34«اَی عیسای ناصری، تو امه اَمره چی کار دئنی؟ بومای اَمَره سر به نیستا کونی؟ دؤنیم تو کیسی تو او قدوس خُدائی!» 35اما عیسی پلید روحَ تَشَر بزِه و بوته: «تام بزَن و او مرداک جی بیرون بیه!» یدفاری دیو، او مَرداک همکس چیشمون جلو به گِل بزه و بی اونکه اونه آسیب بزنی، اونای بیرون بومه. 36مَردم همه غاغه بؤئن و همدیگره گوتن: «ایی چوطو گُفتاری ایسّه؟ او قدرت و ایختیار امره پلید روحؤن فرمون دِئنه و اوشونم بیرون هَنن!» 37هیطو بو که اونه کارون خبر تمام او منطقه میئن فیبیته.
پطرسَ زومئرشفا و خیلی أن دیگه
38عیسی عبادتگای بیرون بومه و شعمون خونه سو بُشو. شَمعون زومئر خیلی تب داشت و ناخوش بو. پَس، عیسی جی بخواسّن اونه شفا بدای. 39عیسام اونه سر جؤر هچیمسه و تبِ تَشَر بزِه، و اونه تب قطعَ بو. او درجا ویرسا و مشغولِ مِیمؤن دأری بوبوُ.
40غروب دمی، مردم تمؤم خوشون کسؤنی که جورواجور ناخوشی داشتنِ، عیسی ورجه بأردن، عیسام تمام اوشون سر دَس بنه و همته شفا بَدَه. 41دیوون هم خیلی ان جَی بیرون أمَئن و فریاد زئن و گوتَن: «تو خُدا ریکه ایسّی!» امّا عیسی اوشونه تَشَر زی و نوگذاشت گب بزَنن، چونکه دؤنَسن که مسیح موعود ایسّه.
عیسی موعظه گودن عبادتگاه میئن
42صوبه دمؤن، عیسی یکته دوردکته جیگه بُشو. امّا مَردم اونه دومبال گشتن و چون او جایی که ایسّابو برسئن، تقلّا بودَن نوگذارَن اوشونه ورجای بشی. 43ولی عیسی اوشونه بوته: «مو باید خُدا پادشایی، ایی خوروم خبر دیگر شهرؤنِ به هم برسونم، چرِه که اینه به سرا دا بوبؤم.» 44پَس او موعظه گودنِ یهودیه عبادتگاأنِ میئن دومباله بده.
ទើបបានជ្រើសរើសហើយ៖
لوقای انجیل 4: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
