يوحنای انجیل 7
7
عیسی عیدِ خیمه أن به شنه
1بازین عیسی چندوخت جلیل ولایت میئن گردَس. او نخواسّ یهودیه ولایت میئن بیسی، چونکه یهودی أن اونه کشتن دومبال بوئن. 2عیدِ خیمهأن که یهودی أنِ یکته عید بو، نزدیک بوُ، 3پس عیسی برأرؤن اونه بوُتن: «اِره نیس و بشو یهودیه، تا تی شاگردؤنم کارؤنی که کوئنیِ، بَینَن، 4چون هر کی خوأئنه بشناخته ببی، خلوتی میئن کار نوکُوئنه. تو که ایی کارؤن کؤئنی، تَه دونیا نیشون بدی.» 5چونکه حتی اونه برأرؤنَم اونه ایمؤن نأرده بُوئن. 6عیسی اؤشونِ بوته: «حلِه می وخت نرسه، ولی شیمه بِه هر وختی مناسب ایسّه. 7دونیا منئه شمرای متنفر ببی، امّا می جَی متنفره، چونکه مو گوایی دِئنم که اونه کارؤن، بَد ایسّه. 8شمه عیدِ به بشین. مو الون ایی عیدِ نأنَم، چونکه می وخت حلِه کامیل نرسه.» 9عیسی اینه بوته و جلیل میئن بیسه.
10ولی بعدِ اونکه اونه بَرأرؤن عید وسه بوشؤئن، خودشم بوشو، ولی نه آشکارا، بلکه خفا میئن. 11یهودی أن، عیدِ موقع اونه دومبال گشتن و پورسِئن: «او مردکه کورا ایسا؟» 12و مردم میئن عیسی باره خیلی میسمیره بو. بعضیأن گوتَن: «یکته خوروم مرداکِ» اما یسری دیگرم گوتَن «نه، بلکه مردمِ گمراهَ کوئنه.» 13ولی چونکه یهودی أنَ جی واهیمه داشتن، هیشکس اونای آشکارا گب نزی.
14وختی که نیصف عید بوگذشته بو، عیسی معبد صاراکی مِیئن بومَه و بنا بوده مردومِ آموتَن. 15یهودی أن ماتَ بوئن و بپورسِئن: «ایی مردکای که هرگی دین درس یاد نَیته، چطو تینه ایجور علم بدأری؟» 16پس عیسی اوشونه جواب بده: «ایی چیزونی که شمره آموجنِئنَم، می جَی نییه، بلکه اونای ایسّه که مه سرا دا. 17اگه کسی خوائنه که خدا اراده انجوم بدای، اونه که فَهمنه که ایی تعلیمؤن خدا جَی ایسه یا اونکه مو می جَی گونم. 18اونی که خوشَ جی گونه، خوشِ جلالِ دومبالِ، امّا اونی که خوأنه خوشِ سرا دائن کسِ جلال بدای، راست گونه و اونه میئن هیچ دروغی ننأ. 19مگه موسای پیغمبر، شریعتِ شمره هَنده؟ با ایی حال هيچكدوم از شمه اونه عمل نوکُوئنه. چرِء اینه دومبالین که مه بکوشین؟» 20مردم جواب بدئن: «تو دیو بزه ایسّی، کیایسه که تی کشتنِ دومبال ببی؟» 21عیسی اوشؤنِ جواب بده: «مو یکته کار بودَم و شمه همته او کارای حیرونَ بوین. 22موسی خَتَنه گودنِ حکم شمره هدَه -البته ایی موسی طرفای نبو، بلکه اجداد قوم جی بو- و هینه واسه شمه ریکاکونِ مقدس شنبه روز میئنم ختنه کؤنین. 23اگه یکته آدم مقدس شنبه روز میئن ختنه بنه تا موسی شریعت زیر پا بنه نبی، پس چرِء اینه وسه که تمؤم یکته آدم جؤنِ گینِ مقدس شنبه روز میئن سلامتی ببخشِئم برزخَ بوئین؟ 24ظاهیرَ جی قضاوت نکونین، بلکه به حق قضاوت بکونین.»
مگه بنه او مسیح ببی؟
25بعضی از اورشلیم مردوم بوُتن: «مگه ایی هونی نیه که اونه کوشتنِ دومبال ایسَّن؟ 26بینین چوطو آشکارا گب زئنه و اونه هیچی نگونَن! بنه که پیله ترونِ قوم واقعا بفَهمسن که ایی، هو مسیح موعود ایسّه؟ 27اَمه دؤنیم که ایی مردکه کورای بومَه، ولی وختی که مسیح موعود ظهور بکونی، هیشکس نودؤنه که کورای بومَه.» 28هووخت عیسی آموتن موقع معبدِ میئن، پیله صدا أمره بوته: «مه شنأسنین و دؤنین که کورای بومَئم، ولی مو مِه به نومَئم، اونی که مه سرا دا، حقّ ایسّه، و شمه اونه نشنأسنین. 29امّا مو اونه شنأسنم، چونکه مو اونه طرفَ جی بومَئم و او مه سرا دا.» 30پس اوشون اینه دومبال بوئن که عیسی، دستگیرَ کونَن، ولی هیشکس اونه دست درازی نؤده، چونکه حلِه اونه وخت نرسه بو. 31با ایی حال خیلی از او جماعت، عیسی ایمؤن بأردن. اوشؤن گوتَن که: «مگه وختی مسیح موعود بائ، ایی مردکه جی بیشتر نیشونه و معجزه انجوم دِئنه؟»
32فریسی فرقه عالمون گوش برسه که مردم عیسی باره ایجور گبونِ زِئدرن، پس کاهنون سرون و فریسی أن، معبدِ نیگهبونؤنِ سرا دَئن تا اونه بگیرَن. 33هووخت عیسی بوته: «اَنی دِه شیمه اَمره ایسَم، و بازین می سرا دا کسِ ورجه شنَم. 34می دومبال گردنین، امّا منئِین مه بیاجین، و او جایی که مو ایسَم، شمه منیئن بأین.» 35پس یهودی أن همدیگره گوتَن که: «ایی مردکه کوره خوأنه بشی که أمه منیئم اونه بیاجیم؟ خوأئنه یهودی أن ورجه که یونانی أنِ میئن پخشَ بوئن بشی و یونانی أن باموجی؟ 36اونه منظور چی بو که بوته «”می دومبال گردنین، ولی مَه منئین بیاجین؛ و او جایی که مو ایسَم، شمه منیئن بأین“؟»
روخونه ای که زندگی آؤِ هدِئنه
37آخری روز که عیدِ مهمترین روز بو، عیسی بیسَه و پیله صدا أمره فریاد بزه: «هر کس تشنَه ایسه، می ورجه بائ و وودوشی. 38هر کس مَه ایمؤن بأره، هوطو که مقدس کیتابون گونن، اونه دیل مئنای، آؤی که زندگی هدِئنه، روخونه مورسؤن راه دکِئنه.» 39عیسی ایی گبِ روح القدس باره بوته، که کسؤنی که اونه ایمؤن بأرَن، اونه هگینن. چونکه روح القدس حلِه ببخشه نوُبو بو، هینه وسه که عیسی حلِه جلال هینته بو.
40بعضی از مردوم ایی گبؤن أیشتؤسنه أمره گوتَن که، «راست راستِ ایی مردکه هو پیغمبری ایسّه که موسی وعده بده بو هنه.» 41دیگرؤن گوتَن: «مسیح موعود ایسّه.» امّا یه دسته دیگه بپورسِئن که: «مگه مسیح جلیلَ ولایتَ جی هنه؟ 42مگه مقدس کیتابؤنِ میئن نوته که مسیح داوود پادشاه نسل ایسّه و بِیت‌لِحِم جی، دهاتی که داوود اون میئن زندگی گود، ظهور کوئنِه؟» 43پس عیسی وسه مردمِ میئن اختلاف دکته. 44یسری أن خواسّن اونه بگیرن، امّا هیشکس اونِ دست درازی نؤده.
45بازین معبد نیگهبؤنؤن، وَگرسن کاهنؤن سرؤن و فریسی أن ورجه. ایشون، معبد نیگهبونونای بپورسِئن: «چرِء عیسی نأردین؟» 46نیگَهبونؤن جواب بدئن: «تا الؤن ایی مردکه مورسؤن هیشکس گب نزه!» 47فریسی أن بوُتن: «مگه شَمَرَم گول بخوردین؟ 48مگه پیله ترون قوم یا فریسی أنَ جی کسی ایسأ که اونه ایمؤن بارده بی؟ 49ولی ایی جماعت که هیچی شریعتای نودؤنَن، ملعون ایسَّن.»
50نیقودیموس، که پیشتر عیسی ورجه بوشوبو و یکته از فریسی أن بو، بوته: 51مگه امه شریعت، کسیه محکوم کؤنه بدون اونکه اوّل گبی اوناجی بشتؤئی و بفهمی که چی بوده؟» 52اوشون جواب بدَئن: «مگر تنم جلیلِ ولایت شی ایسّی؟ بگرد و بَین که هیچ پیغمبری جلیلای نومَه.» 53بازین هرکس بوشؤ خوشِ خونه.
ទើបបានជ្រើសរើសហើយ៖
يوحنای انجیل 7: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
