يوحنای انجیل 19
19
عیسی صلیب سر هکشِئنِ ببوردن
1هو زمون پیلاتُس، عیسی بِیته و دستور بدا اونه شلاّق بزنَن. 2سربازؤن اونه بِه یکته تاج، تیفای ببافتن و اونه سر بنَئن و یکته ارغوونی ردا اونه دؤدَن. 3و اونه ورجه بومَئن و بوُتن: «سلام بر تو، ای یهودی أنِ پادشاه!» و اونه چَک زِئن. 4پیلاتُس دومَرته بیرون بومَه و یهودی أنِ بوته: «الؤن اونه شیمه ورجه بیرون أَبِنَم تا بدونین که مو هیچ جرمی اونه محکوم گودنِ بِه پیدا نودَم.» 5پس عیسی، تاجِ تیفای و ارغونی ردا أمره بیرون بومه. پیلاتُس اوشونه بوته: «بینین، اینم هو مردکای!» 6وختی کاهنؤن سرون و معبد نیگهبونؤن اونه بده أن، فریاد بزِئن و بوُتن: « صلیب سر هَکش! صلیب سر هَکش!» پیلاتُس اوشونه بوته: «شمه خودتون اونه ببرین و صلیب سر هکشین، چونکه مو هیچ جرمی اونه محکومَ گودنِ بِه پیدا نودَم.» 7یهودی أن جواب بدَئن: «امه شریعتی دئنیم که طبق أمه شریعت، او مردکه بأید بمیری، چونکه ادعا کوئنه خدا ریکه ایسّه.»
8وختی پیلاتُس اینه بشتؤسه، بیشتر بترسه. 9هنده کاخ میئن وگرسه و عیسی جَی بپورسه: «تو کوره جی بومای؟» امّا عیسی اونه جواب ندا. 10پس پیلاتُس اونه بوته: «مه هیچی نگونی؟ مگه نودؤنی که قدرت اینه دئنم تَه آزادَ کونَم و ایی قدرتم دئنم که تَه صلیب سر هَکشم؟» 11عیسی بوته: «اگه ایی قدرت خدا طرفَ جی تَه هده نوبوبی، تو هیچ قدرتی می سر نداشتی؛ هینه وَسه گوناه اونی که مه تی دست هَدَء، خیلی بیشترِ.» 12بازین پیلاتُس حقسعی بُوده که عیسی ویلَه کونی، امّا یهودی أن فریاد زِئن و گوتَن: «اگر ایی مرداکِ ویلَه کونی، امپراطور ریفق نی‌ئی. هر کس ادعای پادشاهی بکونی، امپراطور ضید گب زِئنه.»
13وختی پیلاتُس ایی گبؤنِ بشتؤسه، عیسی بیرون بارده، خودوش تخت قضاوت سر بنیشته، جایی که معروف بو به«سنگفرش» و عبرانی زوبؤنِ میئن اونه «جَبّاتا» گوتن. 14او روز، روزِ آماده بوئن عید پسخِ بو. ظهر نزدیکی بوُ. پیلاتُس یهودی أنِ بوته: «بینین اینَم شیمه پادشاه.» 15اوشؤن فریاد بزِئن: «اونه بکوش! اونه بکوش و صلیب سر هَکش!» پیلاتُس اوشونِ بوته: «شیمه پادشاه صلیب سر هَکشم؟» کاهنؤن سرؤن جواب بدئن: اَمه جز امپراطور پادشاهی ندَئنیم.» 16سر آخر پیلاتُس، عیسی اوشؤن دست هَده تا صلیب سر هَکشن.
پس عیسی بَیتَن و ببوردَن.
17عیسی که صلیب اینه دوش سر هنه بو بیرون بوشو، یکته محلّ میئن بایسم جمجمه، که عبرؤنی زُبؤن میئن اونه «جُلجُتا» گونَن. 18اوره اونه صلیب سر هکشِئن. اونه اَمره دونفر دیگرم اونه دو طرف، صلیب سرهکشِه بوبوئن و عیسی اوشونِ وسط ایسأ بو. 19پیلاتُس اینم دستور بدَه و اوشون یه تیکه تخته سر بنویشتن و اونه صلیبِ جؤر بزئن که اونه سر بنویشته هنّه بو: ’عیسای ناصری، یهودی أنِ پادشاه.‘ 20خیلی از یهودی أن او تخته بنویشته بوخؤندَن، چون اوره که عیسی صلیب سر هکشه بوبُو، شهرِ نزدیکی بو و او تخته بنویشته به زبؤن عبرانی و لاتین و یونانی بنویشته بوبُو بو. 21پس یهودی أن کاهنؤن سرون، پیلاتُس بوُتن: «ننویس، ’یهودی أن پادشاه‘ بلکه بنویس «ایی مردکه بوته که مو یهودِی أنِ پادشاه ایسّم.» 22پیلاتُس جواب بدا: «هرچی بنویشتَم، ده بنویشتَم.»
23وختی سربازؤن؛ عیسی صلیب سر هکشِئن، اونه رختؤنِ ویتَن و چهار سهم بودَن. هر کس یکته سهمِ ویتَه. وختی اونه ردا برسِئن بدئن که یکسره ایسّه و درز ندئنه. 24پس همدیگرِ بوُتن: «اینه ردا پاره نوکؤنیم، بلکه قرعه تؤدِیم تا بَینیم کی شی بنه.» ایطوری بو که زبور کتابِ بنویشته به حقیقت برسه که:
«می رختؤن خوشؤن میئن سهم کؤئنن
و می ردا بِه قرعه تؤدِئنَن.
پس سربازؤن هیطو بودَن.
25اما عیسی صلیب نزدیکی، اونه مَئر و اونه خاله و مریم کْلوپاس زن و مریم مَجْدَلیّه ایسأ بوئن. 26وختی عیسی خوشِ مَئر و او شاگردیِ که دوست داشت، اونه کنار ایسأ بو، بدِه، خوشِ مئره بوته: «ای زن، بین، اینم تی ریکه». 27بازین او شاگردِ بوته: «بین، اینم تی مَئر!» از او ساعت، او شاگرد، عیسی مئرِ خو خونه ببورده.
عیسی موردَن
28بازین عیسی که دؤنس همه چی تمنه بو، اینه وسه که مقدس کیتابونِ بنیویشته ان به انجوم برسی، بوته: «تشنه ایسّم.» 29اوره یکته خُم هَنّه بو تُرشَه بوُ شرابَ جی پورا گوده. پس یکته اَبر، ترشِ شراب میئن فورو گودَن و بنَئن یکته زوفا دارِ شاخه سر و ببوردَن عیسی دهنِ جلو. 30وختی عیسی شرابِ وَچیشته. بوته: «تمنه بو.» بازین خو سرِه جیر تؤدَه و خو روحِ تسلیمَ گوده.
31اوراجی که او روز، ’آماده بوئن‘ عیدِ پسخِ بو، و نباید او جنازه أنی که صلیب سر هکشه بوبوئن او مقدس شنبه میئن که پیله شنبه بو، صلیب سر بومونی، یهودِ سرؤن پیلاتوس جی بخواستن تا او سه نفرِ پا قلمِ بشکنن، و اوشونِ جنازه أنِ صلیبِ سرای جیر بأرَن. 32پس سربازؤن بومئن و او دونفره پِا قلم که عیسی اَمره صلیب سر هکشه بوبوبؤئنِ، بشکنِئن. 33امّا وختی عیسی برسئن، بدئن که بمورده، اونه پِا قلم نشکنِئن. 34ولی یکته از سربازؤن اونه تکِ نیزه فورو گوده و هودَم اونای خون و آؤ بیرون بومه. 35اونی که اینه بدِه گوایی دِئنه، تا شَمَرَم ایمؤن بأرین. اونه گوایی راست و او دؤنه که حقیقتِ گونه. 36ایی اتفاقؤن دکته تا مقدس کتابونِ بنیویشته، حقیقت پیدا کونی که «هیتِه اونه خشؤن بشکنِه نبنه.» 37هوطورم یه قسمت دیگه از کیتاب که گونه: «اونیه که نیزه فورو گودنِ، نیگاه کوئنن.»
عیسی دفنَ گودن
38بعدِ ایی اتفاقون یوسف، که رامه شی بو، پیلاتُسای اجازه بخواسته که عیسی جنازه ببوری. یوسف یکته از عیسی دومباله روئؤن بو، ولی خلوتی، چونکه یهودی أنَ جی واهیمه داشت. پیلاتُس اونه اجازه بدا. یوسف بومَه و عیسی جنازه ببورده. 39نیقودیموسم که پیشتر شبونه عیسی ورجه بوشوبو، بومَه و خوشِ اَمره سی کیلو مُرّ و عود قاطی بوده، بأرده. 40پس اوشؤن عیسی جنازه ویتَن و اونه طبق یهودی أنِ دفنَ گودنِ باب، عطرؤنِ اَمره کفن میئن فیبیتَن. 41اوجایی که عیسی صلیب سر هکشئن، یکته باغ هنّه بو که او باغِ میئن یکته تازه مقبره هنّه بو که حلِه هیچ مرده ای اونه میئن ننَه بوئن. 42پس چونکه یهودی أنِ ’آماده بوئن روز عیدِ پسخ وسه بو‘ و او مقبره هم، او نزدیکی هنه بو، عیسی جنازه اونه میئن بنئن.
ទើបបានជ្រើសរើសហើយ៖
يوحنای انجیل 19: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
