رسولؤن اعمال 16
16
تیموتائوس، پولس و سیلاسِ همراه بنه
1پولُس دِرِبه و لستره شهرون بوشؤ. اوره یکته شاگرد به ایسم تیموتائس زندگی گود که اونه مئر یهودی و ایماندار بو، ولی اونه پئر یونانی بو. 2برأرؤن لِستْره و قونیه دیرون، اونه خوبیِ گوتن. 3پولُس چون خوأس که تیموتائوس سفر دیرون اونه همراهی بكونی، یهودیانه واسه که او منطقه دیرون زندگی گودن، اونه ختنه بوده، چون که همه دونَسَن تیموتائوس پئر یونانی ایسّه. 4اوشؤن وختی ایی شهرَ جی یکته شهر دیگه شوئن، او قانونی که رسولؤن و شیخون، اورشلیم دیرون بوته بوئن، مردمِ به گوتن تا اوشونِ رعایت بکونَن. 5پس، كلیساأن ایمؤن دیرون قوت بیتَن و هر روز ایشؤنِ تعداد زیادَ بو.
پولُسِ رویا، مقدونی مرداکه باره
6بازین، اوشون فْریجیه و غَلاطیه سرتاسره منطقه بگرستن، چون روح‌القدس ایشؤنِ اجازه ندَه که آسیا میئن خدا كلامِ برسؤنن. 7وختی میسیه منطقه دیرون برسئن، حق سعی بودن که بوشوئن بیطینیه ولایت، ولی عیسی روح ایشؤن اجازه ندا. 8هینه وَسه، میسیه جی بوگذشتن و تْروآس شهر بوشؤئن. 9بازین پولس شؤ وخت، رویا دیرون بدِه که یکته مقدونی مردکه اینه چشمون جلو ایسا و اونه التماس كوئنه که «مقدونیه بیأ و اَمره كمك بكون.» 10وختی پولس ایی رویا بدِه، درجا مقدونیه طرف بوشوئیم، چون مطمئنَ بوئیم که خدا اَمره دوخُنده تا ایشؤنِ انجیل خوروم خبر بدیم.
لیدیه ایمؤن اَردَن
11پس، تْروآسَ جی كشتی أمره یكراست ساموتْراكی جزیره سو بوشویم، و فردایی نیاپولیس شهر برسِیم. 12از اوره فیلیپی سو را دکتیم که یکته شهرون بو، که رومیان اوره زندگی گودن و مقدونیه خاک دیرون هنه بو. چند روز او شهر دیرون بئیسایم.
13مقدس شنبه روز، او شهرَ جی بیرون بوشویم و روخونه كنار برسیم، گومان گودیم که اوره دعا بِه، جایی هَنّه بی. بنیشتیم و زنأكؤنی أمره که جومَه بوبؤئن، گب بزیم. 14اوشونه میئنای یکته خداپرست زناک که تیاترا شهر شی بو ایسا بو که اَمه گبؤنِ گوش دَئدبو. اونه ایسم لیدیه بو و ارغوانی پارچه فورت که خیلی گرون قیمت بو. خداوند اونه دل بازَ گوده تا پولُس پیغؤمِ گوش بکونی. 15وختی لیدیه خو خانواده أمره غسل تعمید هیته، خیلی اصرار اَمره بوته:« اگه یقین دئنین که خداوندِ ایمؤن بأردم، بأین و می خونه بَیسین.» سرآخر تسلیم اونه خواسته بوبویم.
پولُس و سیلاس زندؤن دیرون
16یبار أمه او جایی که دعا گودیم شو دبیم، که یکته کولفت بدِیم که غیبگویی روح داشت . او فالگیری أمره سود زیادی خوشه اربابؤنِ بِه رسؤنی. 17او پولُس و امه دومبال راه أمه و داد زی: «ایی مَردأكؤن، خدای متعال خدمت گزارن و شمره نجات راه‌ِ اعلام کوئنن.» 18او کولفت خیلی روزون ای کار گود. سرآخر پولُس صبر به سربومَه و وگرسه و او کولفت روح بوته: « عیسی مسیح ایسم أمره تَه دستور دِئنَم که ایی لاکؤکا جی بیرون بأی!» هو دم روح او لاکؤکا جی بیرون بومَه.
19ولی او کولفت اربابؤن وختی بدِئن اونی که اون أمره کاسبی گودن برباد بوشؤ خوشون امید از دست بدان، پولُس و سیلاس بیتن و اوشونِ هکش دکش أمره شهر میدون دیرون، رئیسون ورجه ببردن. 20هو وخت ایشؤنِ قاضی أن ورجه بأردَن و بوتَن: «ایی مَردأكؤن یهودی‌أن و اَمه شهرِ میئن آشوب تؤئدادرَن. 21اوشون رسمؤنیِ تبلیغ کوئنن که اوشون قبول گودن و به‌جا اَردَن امه رومی أنِ بِه جایز نیه.»
22مردم پولس و سیلاس سر بکتن و اوشون أمره همدست بوبوئن. قاضی أنم دستور بدَئن که اوشون رختؤنِ بَكنن و چوب بزنَن. 23بعد اونکه ایشؤن خیلی چوب بزِن، اوشون زندؤن دیرون تؤدَئن، و زندونبؤن دستور بدئن که حیسابی ایشونه بپّای. 24زندانبؤن وختی ای دستور هیته اوشون زندون دیرون توده و اوشون پاهونه زنجیر أمره یکته کنده دوسته.
فیلیپیه زندؤنبؤن ایمون ابنه
25نصف شؤ، پولُس و سیلاس دعا کأدبون و سرود أمره خدا پرستش گودن و بقیه زندؤنی أنم ایشؤنِ گوش دئن 26که یدفاری یکته پیله زلزله بومَه، جوری که زندؤنِ پی أن لرزه دکته و زندؤن دَرؤن هو لحظه بازَبو و زندونیون زنجیرؤن همته بشکسن. 27زندؤنبؤن خواب ا جی ویرسهَ، و وختی زندؤن دَرؤنِ وأگوده بدِه شمشیر هکشه تا خوشِ بکوشی، چون فكر گود زندؤنی أن فرار بودَن. 28ولی پولُس پیلّه صدا أمره، بوته: «تَه آسیب نرسؤن چون که امه همه اِره ایسایم!» 29زندانبؤن فانوس بخواسّه و تأ تأدی زندؤن دیرون بوشو و درحالی که ترس ا جی پَرکَسِ دبو پولُس و سیلاس پا جیر بکته. 30بازین، ایشؤنه بیرون بأرده و بپرسه: « آقایؤن، چی بكونم تا نجات هگیرم؟»
31اوشون جواب بدئن: « عیسی مسیح خداوند ایمؤن بأر که تو و تی خونه آدمؤن نجات پیدا کوئنین.» 32پولس و سیلاس خداوندِ كلام ا جی، اونه به و تموم كسؤنی که اونه خونه دیرون ایسا بوئن، بوتَن. 33هووخت او شؤ، زندانبؤن اوشونِ بیرون بَرده، اوشونِ زخمؤنِ بوشوسّه، و درجا او و تموم اونه خونه آدمؤن غسل تعمید هیتن. 34زندانبؤن ایشؤنه خوشه خونه ببورده و ایشؤنه بِه سفره وارگنه. زندانبؤن و تموم اونه خونه آدمؤن بخاطر اونکه به خدا ایمؤن بأرده‌بوئن خیلی خوشحال بوئن.
35وختی روزَ بو، قاضی أن مأمورؤنی زندانبؤن ورجه سرادئن، بوتَن: «او مَردأكؤن آزادَ كون!» 36زندانبؤن پولُس ایی پیغؤم جی واخوبَ گودِه و بوته: «قاضی أن دستور بدئن که شمره آزاده کونَم. پس الؤن بیرون بأین و به‌سلامت بشین.»
37ولی پولُس اوشونه جواب بده: «امه که روم شهروند ایسیم و اَمره بدون محاكمه همّته ورجه چوب بزئن و زندؤن تؤدَئن الؤن خوائنن مخفیؤنه آزاده كونن؟ نه، اصلاً! بلكه خوشؤن بأئن و اَمره اِرای بیرون بأرَن.»
38مأمورؤن اینه خبر قاضی أن بوتَن، و اوشؤن وختی بشتؤسَن که پولُس و سیلاس روم شهروند ایسّن، خیلی بترسِئن 39پس بومَئن و ایشؤنای معذرت بخواستَن و تا زندؤن بیرون ایشؤنه أمره بوشؤئن و خواهش بودَن که شهرَ جی بوشوئن. 40بعدِ اونکه پولس و سیلاس زندونَ جی بیرون بمئن، لیدیه خونه بوشؤن. اوره برارونِ بدِئن، ایشؤنِ تشویق بودَن. بازین اورای ترک بودن.
ទើបបានជ្រើសរើសហើយ៖
رسولؤن اعمال 16: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
