رسولؤن اعمال 10
10
پطرس و کُرنِلیوس
1قیصریه شهر میئن یکته رومی افسر ایسا بو، که کُرنِلیوس ایسم داشت، او یکته از رومی گردان فرمانده‌أن، معروف به ’ایتالیایی گردان‘ بو. 2كُرنِلیوس یکته دیندار مرداک بو، او و اونه خانواده همته خدا ترس بوئن. كُرنِلیوس دست و دیلبازی أمره فقیرونِ صدقه هده و همیشه خدا حضور دیرون دعا گود. 3یکته روز دوروبرِ ساعت سه بعدظهر، رویا میئن واضح بده که یکته از خداوند فرشته اونه ورجه بومَه و بوته: «كُرنِلیوس!»
4كُرنِلیوس ترس أمره اونه چال بزه و جواب بده: «چیسه، آقا!»
فرشته اونه بوته: «تی دعاأن و صدقه‌أن یکته یادگاری هدیه مورسون خدا ورجه برسه. 5الؤن چندنفرِ یافا شهر سرادی تا شمعون، شناس به پطرسِ اِره بأرن. 6او یکته دباغ ورجه که شمعون ایسم دئنه مهمون ایسه، که اونه خونه دریا ورجه هنّه.»
7وختی او فرشته‌ای که اونه أمره گب زئده بو اونه ورجای بوشو، كُرنِلیوس دو ته خو خدمتکارون و یکته از خوشه وفادار سربازِ، خوشه سربازونِ میئنای، که اونه خدمت کائدبون دوخُنده، 8كُرنِلیوس تمومِ قضیه ایشؤنِ بوته و اوشونِ یافا شهر سرا دا.
9فردایی، ظهر وخت، وختی راه میئن ایسابؤن و شهرِ نزدیكَ بودبوئن، پطرس، خونه پشت بؤم بوشو تا دعا بکونی. 10پطرس وشته بوبو و خوأس یچی بوخوری. ولی وختی غذا چکادبؤئن، پتروس خَلسه میئن بوشؤ. 11هو وخت میئن بدِه که آسمؤنون باز بؤ و یه چی پیله سفره مورسون که چار گوشای آئوزین ایسّه، زمینِ طرف جیر اَمَئدره 12و همه جور چارپاأن و خزنده‌أن و پرنده‌أن جی پوراگوده ایسّه. 13هو وخت یکته صدا اونه برسه که: «پطرس، ویریس، سیرَ بین و بوخور!»
14پطرس بوته: «هرگی نبنه خداوندا، چون مو هرگی حرام یا نجس چیز نوخوردم.»
15دومی بار صدا بومَه که «اوچی که خدا پکا گوده، تو نجس نودوئن!»
16ایی رویا سُه بار تکرار بوبؤ و بازین سفره درجا آسمؤن سو، جؤر ببورده بوبؤ.
17هو حال میئن که پطرس ماتَ بو او رویا معنیِ فکر کادبؤ، كُرنِلیوسِ سراداکؤن، شمعونِ خونه دومبال بگشتن و اونه خونه دَر جلو برسئن. 18اوشؤن بلند صدا أمره بپورسِئن: «شمعون معروف به پطرس اِره مهمون ایسه؟»
19هوطو که پطرس او رویا که بده فكر كادبو، خدا روح اونه بوته: «بَین، سُه نفر تی دومبال گردنن. 20ویریس و جیر بشو و شك نكون که اوشونِ أمره بشی، چونکه مو اوشونه سرادَئم.»
21پطرس جیر بوشو و اوشونه بوته: «مو هونَم که اونه دومبال گردنین. شمه چی وَسه بومَاین؟» 22اوشون بوتَن: «رومی فرمونده كُرنِلیوس اَمره سرا دا. او یکته خداترس و درستکار مرداک ایسّه و یهودی أن همته اونه جی خورومی تعریف کوئنن. او یکته مقدس فرشته جی دستور هیته که أمه تی دومبال سرادی و تَه خو خونه دعوت بکونی، تی گبؤنِ بشتؤئی.» 23پس پطرس اوشونه ببورده خونه تا اونه مهمؤن بوبؤئن.
پطرس فردایی ویریسَه و اوشونه أمره راه دکته. یسری برأرؤن که یافا شهرِ شی بوئن هم اونه أمره بوشوئن. 24فردایی برسئن قیصریه شهرِ. كُرنِلیوس که خوشه فامیلؤن و ریفقؤنِ نزدیکم جومَه گوده بو اوشؤن أَمَئن ریفا ایسابو تا بَئن. 25وختی پطرس بومَه خونه، كُرنِلیوس اونه پیشواز بوشو و اونه پِا جیر بکته اونه پرستش بوده. 26اما پطرس اونه ویریسؤنه و بوته: «ویریس؛ منم یکته آدمم.»
27بازین هوطو که اونه أمره گب زئدبو، خونه دیرون بوشؤ و بده که خیلی آدم اوره جومَه بوئن. 28پطرس اوشونه بوته: «شمه خودتون دؤنین که یهودی أن بِه شرأن جایز نیه که دیگر قومون أمره دمخور بوبوئن یا اوشونِ خونه بوشوئن. اما خدا مه نیشون بده که هیشكسِ نجس یا ناپاک نوگوئم. 29پس وختی می دومبال سراداین، بی چون و چرا بومئم. الؤن بوگوین، چی وَسه می دومبال سراداین؟»
30كُرنِلیوس جواب بده: «چهار روز پیش هی وخت، دوروبرِ ساعت سه بعدظهر، می خونه میئن دعا کائدبوم که ناخبر یکته مردکه که نورؤنی رخت دوده بو می جلو بِیسَه 31و بوته: ”كُرنِلیوس، تی دعا قبول بوبُو و تی صدقه‌أن خدا حضور میئن به یاد بومَه. 32الون چندنفرِ یافا شهر سرادی تا شمعونِ معروف به پطرسِ، اِره بأرَن. او شمعونِ دباغِ ورجه که اونه خونه دریا ورجه ایسّه مهمونه.“ 33پس درجا تی دومبال سرادئم و تنم لطف بودی و بمای. الؤن امه همه خدا حضور میئن حاضریم تا هرچی که خدا تَه بفرمأسّه، بشتوئیم.»
34بازین پطرس ایطو، بینا به گب زئن بوده: «الؤن بفهمسم که راست راستِ خدا مردم میئن هیچ فرقی ننِئنه؛ 35بلكه هرته قومای، هر کس که خدا جی بترسی و اوچی که درست ایسه انجوم بدی، خدا اونه قبول کوئنه. 36خدا طبقِ خو کلام که یهودِ مردومِ بِه سرادا، صلح و سلامتی و خوروم خبرِ بواسطه عیسی مسیح که همه نفرِ خداوند ایسّه اعلام بوده. 37شمه خودتون همته دؤنین که ایی جریون چوطو بعدِ او تعمیدی که یحیی اونه بِه موعظه گود، جلیل ولایت میئن شروع بوبؤ و سراسر یهودیه ولایت میئن پخشَ بؤ، 38و خدا چوطو عیسای ناصریِ روح‌القدس و قوت أمره مسح بوده، هوطو که همه جا گرس و خوروم كارؤن گود و همه اوشؤنی که ابلیس ظلم جیر ایسابوئن شفا دا، اینه وسه که خدا اونه أمره بو.
39«و امه تموم او کارؤنِ گواهون ایسیم که او یهودِ ولایت و اورشلیم شهرِ میئن انجام بدا. اوشؤن اونه دار سر هکشِئن، بکوشتن. 40اما خدا اونه سومی روز دیرون زنده بوده و آشكار گوده، 41اما نه همّته مردومِ بِه، بلكه فقط أمه بِه که خدا خودوش انتخاب بودِه بو تا گواهون ببیم، اَمه که بعد اونه زنده بوئن مُرده‌أنِ جی، اونه أمره بوخوردیم و وودوشتیم. 42او اَمره دستور بده تا ایی حقیقت مردوم به اعلوم بکونیم و گوایی بدیم که خدا اونه معیّن بوده تا زنده‌أن و مُرده‌أن داور ببی. 43همته پیغمبرؤن عیسی باره گوایی دِئنن که هر که اونه ایمؤن بأره، به واسطه اونه ایسم، اونه گوناأن ببخشه بنه.»
44حله پطرس گب زِئدبو که روح‌القدس اوشؤن همّته سر که ایی پیغؤم ایشتؤسِدبؤن قرار بیته. 45او ایماندارؤنی که ختنه گودنِ رسمِ داشتن یعنی اوشؤنی که اصالتاً یهودی بوئن و پطرس أمره بومَه بوئن، وختی بدِئن روح‌القدس حتی غیر یهودی أنِ به هم بومَه، حیرونَ بوئن. 46چون بشتؤسَن که ایشون به زبؤنای دیگه گب زِئدرن و خدا جلال دئدرن. هووخت پطرس بوته: 47«الؤن که ایشون، روح‌القدسِ عینِ اَمه مورسون هَیتَن، كی تینه اوشونه جلوئه بگیری که آؤ میئن غسل تعمید هنگیرن؟» 48پس دستور بده تا ایشؤنِ، به ایسم عیسی مسیح تعمید بدِئن. هووخت پطرسای بخواستَن چند روز ایشؤنِ أمره بِیسی.
ទើបបានជ្រើសរើសហើយ៖
رسولؤن اعمال 10: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
