Psalms 71
71
1အို ဘုရားရှင်၊ ကိုယ်တော်၌ ကျွန်ုပ်ခိုလှုံပါသည်။ ကျွန်ုပ်ကို မည်သည့်အခါမျှ အရှက်တကွဲဖြစ်စေတော်မမူပါ။ 2ကိုယ်တော်၏ဖြောင့်မတ်ခြင်းအားဖြင့် ကျွန်ုပ်ကိုကယ်တင်၍ ကျွန်ုပ်ကို လွတ်မြောက်စေတော်မူပါ။ ကျွန်ုပ်ကို ဂရုစိုက်နားထောင်ပြီး ကျွန်ုပ်ကိုကယ်တင်တော်မူပါ။ 3ကျွန်ုပ်အစဥ်မပြတ်ဝင်ရောက်မှီခိုနိုင်သော ကျောက်ဆောင်ဖြစ်တော်မူပါ။ ကျွန်ုပ်ကို ကယ်တင်ရန် ကိုယ်တော်အမိန့်ရှိတော်မူပြီ။ အကြောင်းမူကား ကိုယ်တော်သည် ကျွန်ုပ်၏ကျောက်နှင့် ကျွန်ပ်၏ရဲတိုက်ဖြစ်ပါသည်။ 4အို ကျွန်ုပ်၏ဘုရားရှင်၊ ဆိုးယုတ်သောသူတို့၏လက်မှလည်းကောင်း၊ မတရားသောသူနှင့် ကြမ်းတမ်းသောသူ၏လက်ထဲမှလည်းကောင်း ကျွန်ုပ်အား လွတ်မြောက်စေတော်မူပါ။ 5အကြောင်းမူကား အို ကျွန်ုပ်တို့၏အရှင်ဖြစ်တော်မူသော ဘုရားရှင်၊ ကိုယ်တော်သည် ကျွန်ုပ်၏မျှော်လင့်ရာဖြစ်ပါသည်။ ကျွန်ုပ်ငယ်ရွယ်စဥ်မှစ၍ ကျွန်ုပ်၏ကိုးစားရဖြစ်ပါသည်။ 6ကျွန်ုပ်သည် မွေးဖွားချိန်မှစ၍ ကိုယ်တော်အား မှီခိုအားထားပါသည်။ ကျွန်ုပ်၏မိခင်ဝမ်းထဲမှ ကျွန်ုပ်ကိုထုတ်ဆောင်ခဲ့သောအရှင်မှာ ကိုယ်တော်သာဖြစ်ပါသည်။ ကိုယ်တော်ကို အမြဲထာဝရ ချီးမွမ်းပါမည်။ 7ကျွန်ုပ်သည် များစွာသောသူတို့အတွက် အံ့ဖွယ်သောအရာကဲ့သို့ဖြစ်သည်။ သို့သော် ကိုယ်တော်သည် ကျွန်ုပ်၏ခိုင်ခံ့သောခိုလှုံရာဖြစ်ပါသည်။ 8ကျွန်ုပ်၏နှုတ်သည် ကိုယ်တော်၏ကျေးဇူးတော်နှင့် ဘုန်းအသရေတော်ဖြင့် တစ်နေ့တာလုံး ပြည့်လျက်ရှိပါသည်။ 9ကျွန်ုပ်အိုမင်းသောအခါ ကျွန်ုပ်အား ပစ်ထားတော်မမူပါနှင့်။ ကျွန်ုပ်၏ခွန်အားကုန်ခန်းသောအခါ ကျွန်ုပ်အား စွန့်ပစ်တော်မမူပါနှင့်။ 10အကြောင်းမူကား ကျွန်ုပ်၏ရန်သူတို့သည် ကျွန်ုပ်အား ဆန့်ကျင်ပြောဆိုကြပါသည်။ ကျွန်ုပ်အသက်အား စောင့်ကြည့်နေသောသူတို့သည်လည်း အတူတကွလျှို့ဝှက်ကြံစည်ကြလျက် 11"ဘုရားရှင်သည် သူ့အားစွန့်ပစ်လေပြီ။ ကယ်တင်မည့်သူမရှိသည်ဖြစ်၍ သူ့အား လိုက်၍ဖမ်းဆီးကြပါလော့"ဟု ဆိုကြပါသည်။ 12အို ဘုရားရှင်၊ ကျွန်ုပ်နှင့် ဝေးဝေးနေတော်မမူပါနှင့်။ ကျွန်ုပ်၏ဘုရားရှင် ကျွန်ုပ်အားကူညီမစရန် အလျင်အမြန်ကြွလာတော်မူပါ။ 13ကျွန်ုပ်အား တိုက်ခိုက်ကြသောသူတို့သည် အရေးနိမ့်၍ ပျက်စီးကြရပါစေသော။ ကျွန်ုပ်ထိခိုက်ဒဏ်ရာရအောင် ကြိုးစားကြသူတို့သည် အရှက်ကွဲ၍ အသရေပျက်ကြပါစေသော။ 14ကျွန်ုပ်မူကား ကိုယ်တော်အား အစဥ်မပြတ်မျှော်လင့်ကိုးစား၍ ကိုယ်တော်၏ကျေးဇူးတော်ကို ပို၍ပင် ချီးမွမ်းပါမည်။ 15ကိုယ်တော်၏ဖြောင့်မတ်ခြင်းနှင့် ကယ်တင်ခြင်းကို ကျွန်ုပ်အကုန်အစင်မသိနိုင်သော်လည်း ကျွန်ုပ်၏နှုတ်သည် ထိုအကြောင်းတို့အား တစ်နေ့လုံးပြောကြားပါမည်၊ 16ကျွန်ုပ်သည် အရှင်ဖြစ်တော်မူသော ဘုရားရှင်၏တန်ခိုးတော်အား အမှီပြု၍ သွားလာ၍ ကိုယ်တော်၏ဖြောင့်မတ်ခြင်းကိုသာ ထုတ်ဖော်ပြောဆိုပါမည်။ 17အို ဘုရားရှင်၊ ကိုယ်တော်သည် ကျွန်ုပ်ငယ်ရွယ်စဥ်မှစ၍ ကျွန်ုပ်သွန်သင်တော်မူပါသည်။ သို့ဖြစ်၍ ကျွန်ုပ်သည် ကိုယ်တော်၏အံ့ဖွယ်အမှုတို့အား ယခုတိုင်အောင် ပြောကြားပါမည်။ 18ယခုအခါတွင် ကျွန်ုပ်သည် အသက်ကြီး၍ ဆံပင်ဖြူနေပါသည်။ အို ကျွန်ုပ်၏ဘုရားရှင်၊ ကျွန်ုပ်အား စွန့်ပစ်တော်မမူပါနှင့်။ ကျွန်ုပ်သည် နောင်လာနောင်သားမျိုးဆက်အပေါင်းတို့အား ကိုယ်တော်၏ဘုန်းတန်ခိုးတော်အကြောင်းအား ထုတ်ဖော်ပြောကြားလျက်ရှိနေစဥ် ကျွန်ုပ်နှင့်အတူရှိတော်မူပါ။ 19အို ဘုရားရှင်၊ ကိုယ်တော်၏ဖြောင့်မတ်ခြင်းသည် မိုးထိတိုင်အောင်ရောက်ပါသည်။ အဘယ်ကြောင့်ဆိုသော် ကိုယ်တော်သည် ကြီးမြတ်သောအမှုအရာများကို ပြုတော်မူပြီဖြစ်သောကြောင့်ပင်ဖြစ်သည်။ ကိုယ်တော်နှင့်တူသောသူ တစ်စုံတစ်ယောက်မျှမရှိပါ။ 20ကိုယ်တော်သည် ကျွန်ုပ်အား များစွာသောဆင်းရဲက္ခနှင့် ဘေးအန္တာရာယ်တို့အား ကြုံတွေ့စေတော်မူသော်လည်း ကိုယ်တော်သည် ကျွန်ုပ်အားပြန်၍ အသက်ရှင်စေတော်မူ၍ မြေကြီး၏နက်ရှိုင်းရာအရပ်ထဲမှ ကျွန်ုပ်အား ပြန်တက်စေတော်မူပါလိမ့်မည်။ 21ကိုယ်တော်သည် ကျွန်ုပ်အား ပိုမိုကြီးမြတ်စေလျက် ကျွန်ုပ်အား တစ်ဖန်နှစ်သိမ့်ပေးတော်မူလိမ့်မည်။ 22အို ကျွန်ုပ်၏ဘုရားရှင်၊ ကျွန်ုပ်သည် ကိုယ်တော်၏သစ္စာတော်အတွက် စောင်းတီး၍ ကိုယ်တော်၏ကျေးဇူးတော်အား ချီးမွမ်းပါမည်။ အစ္စရေးလူမျိုးတို့၏မြင့်မြတ်သောအရှင်၊ ကျွန်ုပ်သည် ကိုယ်တော်အား စောင်းတီး၍ သီဆိုချီးမွမ်းပါမည်။ 23ကိုယ်တော်အတွက် စောင်းကိုတီးစဥ် ကျွန်ုပ်သည် ဝမ်းမြောက်စွာသီချင်းဆိုပါမည်။ ကိုယ်တော်သည် ကျွန်ုပ်အား ကယ်တင်တော်မူသည်ဖြစ်၍ ကျွန်ုပ်သည် စိတ်ရောကိုယ်ပါ သီချင်းဆိုပါမည်။ 24ကျွန်ုပ်၏လျှာသည်လည်း ကိုယ်တော်၏ဖြောင့်မတ်ခြင်းအား တစ်နေ့လုံးမြွက်ဆိုပါသည်။ အကြောင်းမူကား ကျွန်ုပ်ဒုက္ခရောက်စေရန် ရှာကြံသောသူတို့သည် အရှက်ကွဲ မျက်နှာပျက်ကြရပြီဖြစ်သည်။
ទើបបានជ្រើសរើសហើយ៖
Psalms 71: TPV-RV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.