Psalms 65
65
1အို ဘုရားရှင်၊ ချီးမွမ်းခြင်းသည် ဇိအုန်တောင်၌ ကိုယ်တော်ကို စောင့်ကြိုနေပါ၏။ ပြုထားသောကတိသစ္စာကိုလည်း ကိုယ်တော်ထံတွင် ပြည့်စုံစေပါမည်။ 2ဆုတောင်းချက်ကို နားထောင်တော်မူသောအရှင်၊ လူအပေါင်းတို့သည် ကိုယ်တော်ထံသို့ လာကြပါလိမ့်မည်။ 3အပြစ်ဒုစရိုက်များသည် အကျွန်ုပ်ကိုလွှမ်းမိုးသောအခါ ကိုယ်တော်သည် အကျွန်ုပ်တို့ကျူးလွန်သောအပြစ်များကို ဖြေလွှတ်တော်မူ၏။ 4ကိုယ်တော်၏တံတိုင်းတော်များအတွင်း နေထိုင်စေရန် ကိုယ်တော်ရွေးချယ်၍ ကိုယ်တော်ထံသို့ ခေါ်ဆောင်လာသောသူသည် မင်္ဂလာရှိ၏။ အကျွန်ုပ်တို့သည် ကိုယ်တော်၏ သန့်ရှင်းမြင့်မြတ်သော ဗိမာန်တော်တည်းဟူသော ကိုယ်တော်၏အိမ်တော်မှ ကောင်းမြတ်သောအရာဖြင့် ပြည့်စုံကြွယ်ဝကြပါလိမ့်မည်။ 5အကျွန်ုပ်တို့ကို ကယ်တင်တော်မူသောဘုရားရှင်၊ ကိုယ်တော်သည် အံ့ဩဖွယ်အမှုများဖြင့် ဖြောင့်မတ်ခြင်းထဲ၌ အကျွန်ုပ်တို့ကို ထူးတော်မူ၏။ ကိုယ်တော်သည် ကမ္ဘာမြေအစွန်းရှိသမျှနှင့် ဝေးလံသောပင်လယ်၌ နေကြသောာသူတို့၏ အားကိုးရာဖြစ်တော်မူ၏။ 6ကိုယ်တော်သည် တန်ခိုးတော်အားဖြင့် တောင်များကို နေရာချထားတော်မူလျက်၊ ဘုန်းတန်ခိုးအာနုဘော်ကို ပြတော်မူပါ၏။ 7ကိုယ်တော်သည် သမုဒ္ဒရာတို့၏မြည်ဟည်းသံ၊ လှိုင်းတံပိုးများ၏မြည်ဟည်းသံနှင့် တိုင်းသူပြည်သားတို့၏ အုတ်အော်သောင်းနင်းဖြစ်ခြင်းတို့ကို ငြိမ်သက်စေတော်မူ၏ 8သို့ဖြစ်၍ အဝေးဆုံးသောအရပ်တို့၌ နေထိုင်ကြသောသူတို့သည် ကိုယ်တော်၏နိမိတ်လက္ခဏာများကြောင့် ကြောက်ရွံ့ကြပါ၏။ ကိုယ်တော်သည် နံနက်မိုးသောက်ချိန် ၊ နေဝင်ချိန်တို့၌ ရွှင်လန်းဝမ်းမြောက်စွာ သီချင်းသီဆိုသံကို ထွက်ပေါ်စေတော်မူပါ၏။ 9ကိုယ်တော်သည် မိုးကိုရွာသွန်းစေတော်မူခြင်းအားဖြင့် ကမ္ဘာမြေကြီးကို ကြည့်ရှုစောင့်ရှောက်လျက်နေတော်မူကြောင်းကို ဖော်ပြတော်မူပါ၏။ ကမ္ဘာမြေကြီးအား မြေဩဇာထက်သန်စေတော်မူပါ၏၊ ကိုယ်တော်သည် မြစ်ချောင်းတို့ကို ရေဖြင့်ပြည့်စေတော်မူပါ၏။ ကမ္ဘာမြေကြီးတွင် ကောက်ပဲသီးနှံများကို ဖြစ်ထွန်းစေတော်မူပါ၏။ 10ကိုယ်တော်သည် ထိုမြေပေါ်မှ ထွန်ကြောင်းတို့ကို စိုစွတ်စေ၍ ထယ်စာတို့ကို ညီညာစေတော်မူ၏။ ရွာသွန်းသောမိုးအားဖြင့် ထိုမြေကိုပျော့ပျောင်းစေ၍ ထိုမြေ၌ပေါက်သောအပင်ကို ကောင်းချီးပေးတော်မူ၏။ 11ကိုယ်တော်သည် တစ်နှစ်တာကာလပတ်လုံး မိမိ၏ကောင်းမြတ်ခြင်းသရဖူကို ဆောင်းပေးတော်မူ၏။ ကိုယ်တော်၏ လမ်းတော်တို့သည်လည်း ကြွယ်ဝခြင်းနှင့် ပြည့်လျှံလျက်ရှိပါ၏။ 12တောကန္တာရမှ ကျက်စားရာအရပ်တို့သည် ပြည့်လျှံလျက်ရှိ၍ တောင်ကုန်းများသည် ရွှင်လန်ဝမ်းမြောက်ခြင်းဖြင့် လွှမ်းခြံလျက်ရှိကြပါ၏။ 13မြက်ခင်းပြင်တို့သည် သိုးအုပ်နှင့်ပြည့်စုံလျက် ချိုင့်ဝှမ်းတို့သည် ဂျုံစပါးနှင့်ဖုံးလွှမ်းလျက်ရှိပါ၏။ ထိုအရာများသည် ဝမ်းမြောက်စွာကြွေးကြော်၍ သီချင်းဆိုကြပါ၏။
ទើបបានជ្រើសរើសហើយ៖
Psalms 65: TPV-RV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.