Jenɛɛsë 28
28
1Isaakë nya we Jakɔɔbë, 'ɔnya 'pa 'ɔɔn 'nɩ, 'ɔnya ‑gbala 'ɔɔn ‑maa: «‑Nyɩ kä ‑a kä ‑mä Kanaan yerüa ‑tɔrʋpɩɔ 'ŋlʋʋ 'ba, ‑mä 'ɔɔn kä. 2Sɔwʋ, mi Padan Aramëa 'blɩ ‑gälɩ, ‑na 'yioa tʋ Betuɛlëa ‑nyɛɛ. 'A ‑nyɛɛ, tɛ ‑na 'yioa ‑wlajʋ Labaan a 'ŋlëkayörüa ‑tɔrʋpɩɔ, ‑a ‑baalɩ ‑na 'ŋlʋʋ. 3Abɩa Ɛlë Sadaii#28.3 Ɛlë Sadaii: «Ɛlë» a ‑gbaa bä: Nyɔsʋa Ebrööwii 'lɩ. «Sadaii» a ‑gbaa bä: 'Wʋsɔrɔnyɔɔ. Bakwʋɛwii 'lɩ 'ii 'mrɛɛ 'i bä 'Nɩmrɛɛ Nyɔsʋa. 'pa ‑mɩ 'nɩ: ɔ ‑nyɩ ‑mɩ 'jü 'kɔkɔmlɛ, 'ümä 'lɩ ‑goglo ‑bɛ ‑mä ‑glügbü 'kɔkɔmlɛ kɔkɔmlɛa tʋ bä. 4Ɔ ‑nyɩ ‑mɩ, ‑nyra ‑na 'jüa 'jü kɔsɔ, Abraamëa 'papanɩ, ‑mä ‑tʋtʋlʋ kä ‑gälɩ kʋa', i ‑bäläa' nyɔtugbanyɔɔ, ‑mä 'uun kä. Nyɔsʋa ‑nyɩ kä 'uun Abraamë» 5'Asɩ Isaakë nʋ 'ɔnya blɔ kä Jakɔɔbë Padan Aramëa 'blɩ ‑gälɩ; Aramönyɔɔ Betuɛlë Labaan a ‑nyɛɛ; Rebekalɔ ‑gua' Jakɔɔbë nyra Esau, 'ɔa ‑wlajʋ bäsaa.
6Esau 'jä 'üün 'taɩn 'lɩ Isaakë 'paa' Jakɔɔbë 'nɩ ‑bɛ 'ɔ blɔa' 'ɔɔn Padan Aramëa 'blɩ ‑gälɩ 'ɔmä 'lɩ 'ŋlʋʋ 'bakalɩ mi 'ɔmä 'ti. 'Ɔ 'jä bɩa 'üün 'taɩn 'lɩ 'ɔ 'pa käa' 'ɔɔn 'nɩ, ‑bɛ 'ɔ ‑gbala käa' Jakɔɔbë ‑maa: «‑Nyɩ kä ‑a kä ‑mä Kanaan yerüa ‑tɔrʋpɩɔ 'ŋlʋʋ 'ba, ‑mä 'ɔɔn kä.» 7Esau jre 'iin 'sɩrɩ Jakɔɔbë ‑träärälɩ 'ɔa tʋ nyra 'ɔa 'yio, 'ɔnya mi Padan Aramëa 'blɩ ‑gälɩ. 8'Ɔnya jresaa Kanaanyerü 'nyɩ 'ɔa tʋ Isaakë 'tʋ ‑a kä. 9'Ɔnya mi Abraamëa 'jʋ Isëmaɛɛlëa ‑nyɛɛ; 'ɔnya 'balɩ 'ŋlʋʋ ‑moloo. 'Ɔa 'nyrɩ bä Maala, Abraamëa 'jʋ Isëmaɛlëa 'ŋlëkayria Nebayiotëa ‑wladia.
Nyɔsʋa jaa' Jakɔɔbë sanyü 'nyü ‑gälɩ
10Jakɔɔbë sɔa' Bɛɛseba, ‑bɛ 'ɔ mö Araan bätä. 11‑Gbia jräa' 'ɔɔn nɩ, 'ɔnya 'prere 'nyʋfɔ 'wʋ. 'Ɔnya nrörö 'täkä 'ɔa 'pina 'lɩ, 'ɔnya 'pi. 12Sanyüa 'mlɩ nɩ, 'ɔ 'jä ‑gbletei, 'ɛ sɔ ‑tʋtʋ ‑gälɩ 'ɛnya 'ku cɛ. Nyɔsʋaa 'aanjëɩɩ 'jrara 'ɛɛn ‑gälɩ ‑bɛ 'ü 'ciere 'ɛɛn ‑gälɩ. 13Yawe 'nyüglö ‑gbleteilɛa ‑gälɩ#28.13 ‑gbleteilɛa ‑gälɩ: ‑Pɔɔkɩ ‑mɩdoo nö: Jakɔɔbëa ‑gba. 'ɔ ‑nëma: «'Mɔɔ bä Yawe, ‑na tʋ Abraamë, nyra Isaakëa Nyɔsʋa. ‑Tʋtʋlʋ kä ‑gälɩ ‑piia' 'n ‑nyɩ ‑mɩ 'uun, ‑nyra ‑na 'jüa 'jü 'sɔ. 14‑Na 'jüa 'jüa 'jü, nya ‑sümlöa ‑beere ‑tʋtʋa 'mlʋ. 'Anya 'ana ‑paŋlɩ ‑gbasia sɔrɔ 'jrʋa 'wʋsɔrɔfa 'wʋ ‑a mi 'jrʋa 'pifa 'wʋ; sɔ 'ua 'wʋsɔrɔfa 'wʋ, ‑a mi 'ua 'wʋsɔrɔfaa kʋmla 'pɛlɩ, nyra 'ua 'wʋsɔrɔfaa 'dupa 'pɛlɩ 'kä ‑tʋtʋ ‑gälɩa ‑glügbüa 'fɩɔ nya ‑mɔ ‑bɛ ‑na 'jüa 'jü kälɩ ‑srörö, 'kä 'ünya 'nɩ 'pala. 15'N bä ‑mɩ dɛrɩ, ‑pɩɔa 'fɩɔ möa' 'n ‑gäälä ‑mɩ 'nyiöli; 'kä 'nyaa ‑mɩ bätäläa 'mlɩ dɛrɩ 'blöö. 'Be 'nëmä ‑mɩ dɛrɩ ‑a sɔ. Wiili kä 'fɩɔ 'n ‑gbala ‑mɩ, 'nyaa 'iin nʋa.»
16Jakɔɔbë ‑gbapriea' 'mʋmʋ 'lɩkä 'ɔ ‑nëma: «‑Yaa! Yawe bä ‑plɩɩlɩ kʋa' ‑pɩ ‑bɛ 'nyɩ 'iin jre!» 17'Ɔa plɛ ‑gbakä; 'ɔ ‑nëma: «‑Taa ‑plɩɩlɩ bä ŋalɛ 'wʋ! ‑Pɩ bä Nyɔsʋaa kʋfa; 'i bä cɛɩɩa palafa!» 18‑Suwla ‑ŋʋɩsɩɩ Jakɔɔbë tɛa' 'kä nɩ, 'täkälä 'ɔ nrörö ɩa' 'ɔa 'pina 'lɩ nɩ, 'ɔnya dɔrɔ 'ään 'wʋ, 'ɔnya 'sri 'ään 'kä plɛpatäkäa 'sa. 'Ɔnya ‑gblɔɔ 'äa ‑gälɩ 'kpɩ 'kä#28.18 Üma 'jä kä ‑pɩɔ ima pa kä nɩ, 'täkä 'ü ma ‑tʋʋä 'ia ‑plɩɩlɩ; 'kä 'ü ‑gblɔɔ 'ään 'kpɩ 'wʋ kä 'imä pa.. 19'Ɔnya 'dara ‑plɩɩlɩ Bɛtɛlë#28.19 Bɛtɛlë: 'Ia ‑gbaa bä: Nyɔsʋaa nyuku.. ‑Kätɩsa bätäläa 'nyrɩ ma bä Lusë. 20Jakɔɔbë nya 'sɔrɩ, 'ɔ ‑nëma: «Yawe Nyɔsʋa ma bä 'mɩ dɛrɩ, ɔma ‑gäälä 'mɩ 'nyiöli 'nyʋfɔ 'wʋ, ɔma ‑nyɩ 'mɩ jijri nyra 'koti, 21‑bɛ 'na plɛ ‑gälɩ ma flɛrɛ ama 'blöö 'na tʋa nyɛɛ dɛrɩ nɩ, 'ia 'taɩn 'lɩ Yawe nya 'na Nyɔsʋa bäa. 22‑Taa 'täkälä 'n 'sria' kä 'nyɩ ‑pɩa' trɔ nɩ, 'änya Nyɔsʋa nyuku bäa; 'kä 'nyaa ‑mɩ diili kä 'fɩɔ ‑nëmäa' 'mɩ ‑nyɩ, 'ia ‑pʋa ni 'pɛ ‑nyɩ.»
ទើបបានជ្រើសរើសហើយ៖
Jenɛɛsë 28: Bakwé
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc.