Baroma 16
16
Paulo ákesa ebemeresi be'Roma
1Nábatumira mwali wetu Foibe. Àli mukosi mubuya mwa bemeresi bo'mwa musi we'Kengureya. 2Mùmuhuukasaa kubuya kwe'sina lya Enawetu, ngo'kwa ebandu ba Ongo běmire kuira. Mango angénde ába àlaire ku kandu karebe, mundaa mwámweresa'ko. Bushi nai àasise bandu banene, anabe nanyi anányiasise.
3Munyíkesesaa Purisila na Akila, bu nénjire nákola nabo emulimo wa Yesu Kirisito. 4Abu babiri babúraa báfa bushi nanyi. Nàtechire mbu akoko era bàli. Atá na nyeine nyínatechire bacha, si anabe ne'bemeresi boshi ba bàtatula Bayuta. 5Munyíkesesaa ne'bemeresi ba bénjire bábuanana mwa mwa Akila na Purisila. Mwánanyikesesaa na munyaketu musiirwa Epeneto. Oyu Epeneto, iwábaa mubere-bere kwêmerera Kirisito* mwa chio che'Asiya. 6Munyíkesesaa na Mariya. Oyu Mariya, abáa énjire áshika endubano kwa kubakorera. 7Munyíkesesaa na Andoroniko na Yuniya bo'mwa lubaa lwetu, bu twabáa tùminyirwe nabo mwa buroko. Abu babiri, bète ngulu ibuya mwa kachi-kachi ke'ndumwa*. Kanji bu bábaa bábere-bere kwêmerera Kirisito* era muhondo sanyi.
8Munyíkesesaa na Ambuliyato, munyaketu musiirwa kurengera ebuuma bwetu na Kirisito*. 9Munyíkesesaa na Urubano, itwénjire twákola nai emulimo wa Kirisito*. Mwánanyikesesa na munyaketu musiirwa Sitaki. 10Munyíkesesaa na Apele. Oyu Apele álosise kanangana kwa émerere Kirisito*. Mwánanyikesesaa na besha mwa mwa Arisitobulo. 11Munyíkesesaa na Herotiyo wo'mwa lubaa lwetu. Mwánanyikesesa ne'bemeresi be'Enawetu ba batúla mwa mwa Narikiso. 12Munyíkesesaa na Tirifena na Tirifosa. Abu bakasi babiri bénjire báshika endubano mwa kukorera Enawetu. Mwánanyikesesa na mwali wetu musiirwa Peresi. Oyu Peresi nai éndee áshika endubano mwa kukorera Enawetu. 13Munyíkesesaa na Rufo, iwénde wákorera Enawetu na bushiru bunene. Mwánanyikesesa na nyina. Bushi nanyi, nyinátula nyimútolire nga mama. 14Munyíkesesaa na Asinikirisito, na Fulengo, na Hereme, na Paturoba, na Herema na banyaketu ba batúla nabo. 15Munyíkesesaa Filolongo na Yuliya, na Nereo, na mwali wabo, na Olimba ne'bemeresi boshi ba bàli nabo.
16Mundaa mwákesanya mwa kuoberana nga bauma, kurengera ebuuma bwenyu na Kirisito*. Ebandu boshi bo'mwa nyuhu sa Kirisito*, babákesise.
Eano lisinda
17Banyaketu náběma busese, mundaa mwáchilanga kwa bandu ba bénjire bálikanya ebemeresi. Abu bandu bénjire báteta bulio era luulu se'myasi era mwakángirisibwaa. Ne'chi chénjire cháesa ebemeresi. Rero, murékanaa nabo. 18Bushi ebandu ba bàli nga'bo batákorera Enawetu Kirisito*, si bénde bákorera emola mabo beine. Kanji kurengera emyasi yabo era ìlokerere kanji ya kuchisimisa, bénde bêngeera ebandu ba bàtakalangire. 19Ebandu boshi banêshi kwa mwénde mwáira ngo'kwa Enawetu àtechire. Echera chi chénjire chátuma námowa bushi nenyu. Si náhonda mubáa benge kwa kunde mwáira emabuya, na kunde mwáchilanga kwa mabi. 20Ongo iwénde wéresa ebandu ebôlo, atémange kufungorera wa Musimu era chibanda se'maulu menyu.
Enawetu Yesu Kirisito éndaa ábaahanyira!
21Timoteo, i'nénjire nákola nai, abákesise. Lukiyo na Yasoni na Sosipateri, bo'mwa lubaa lwetu, nabo babákesise.
22Nanyi Teritiyo, nyi naánjikaa mano maruba#16:22 Teritiyo i'Paulo áburaa mbu àmuanjikiraa mano maruba., nàbakesise kwe'sina lya Enawetu.
23Kayo iwànyihuukasaa kanji anáchiri áhuukasa ebemeresi boshi ba bénde bábuanana ala mwai, abákesise. Erasito, iwénde wálanga ehao ye'musi, na munyaketu Kwarito, nabo babákesise.
[ 24Enawetu Yesu Kirisito éndaa ábaahanyira muboshi. Bibe bacha!]
Emyasi era yábaa ìbishirwe yérire yábihukala
25Ongo atóngwe, iwète ebuashi bwa bùngatuma mwásimika mwa bwemeresi, kukulikana no'kwa Mwasi Mubuya-buya àtechire, ola nénjire náhubanganya era luulu sa Yesu Kirisito. Oyu Mwasi Mubuya-buya iwénjire wábihula emyasi era Ongo ábaa atúla àbishire kutengera mira. 26Si rero ei myasi yérire yábihulibwa kurengera emaanjiko me'barebi*, kukulikana ne'loso lwa Ongo i'utúla'o esuku ne'mango. Ei myasi yábihulibwe kwa bandu be'mbaa soshi, chasiya bamwêmerere na kunde báira ngo'kwa àtechire.
27Ongo yeine i'utúsa ebwenge, éndaa átongibwa esuku ne'mango kurengera Yesu Kirisito! Bibe bacha!
ទើបបានជ្រើសរើសហើយ៖
Baroma 16: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.
