Baefeso 4

Ebuuma bwe'mubiri wa Kirisito

1Nyìminyirwe bushi nénde nákorera Enawetu. Rero náběma busese múnde mwáata mibere era ìtungenene kukulikana no'kwa Ongo ábamaalaa. 2Mundaa mwáchirembeka na kuba balomvu na kunde mwáata ebushibirisi. Kanji mundaa mwásesa emuchima we'kuba ala'uma mwa nzii. 3Muchisesaa kuba mwa buuma ngo'kwa eMuchima Mubuya-buya atúla àtubikire mwa buuma. Kanji mundaa mwálanga ebôlo bwa bubábikire mwo'bu buuma. 4Kutúla mubiri muuma, kwánaba na Muchima Mubuya-buya muuma. Ne'munyiiro ola Ongo ábamaaliraa, nao anátula muuma. 5Enawetu anátula muuma, ne'bwemeresi bunátula buuma ne'bubatiso nabo bunátula buuma. 6Ongo anátula muuma, i'She we'bandu boshi. I'utúla wěmire kwa bandu boshi, na iwénde wákola kurengera ebandu boshi, kanji i'unátula mwa ndanda sa boshi.

7Si chira mundu mwa kachi-kachi ketu êresibwe elwai lwêmbo kukulikana ne'mwango ola Kirisito* ámuabiraa. 8Ne'chi chìkulikene no'kwa Maanjiko Mabuya-buya matúla màtechire mbu:

«Mango érukaa mwa chanya,

êkaa ebarenda bai ba ásimbaa,

era kwêresa ebandu enyêmbo.»#4:8 Somaa Saburi 68:19.

9Ekwéruka mwa chanya, kukuteta kute? Kuli kuteta mbu ândaaliraa muno butala, era kunálinda áika ne'ra bufuli busese. 10Oyu wândaaliraa muno butala, i'no'yu kanji iwánerukaa mwa chanya busese kwa nguba, chasiya alúmirire mwa butala boshi. 11Yeine iwêresise ebandu enyêmbo. Áirire bauma kuba ndumwa*, ne'banji kuba barebi*, ne'banji kuba bandu ba kunde báhubanganya eMwasi Mubuya-buya, ne'banji kuba balanzi na bakangirisi. 12Áirire bacha, kwa kukunganya ebandu ba Ongo, bakóle emulimo wai, chasiya emubiri wa Kirisito* aímbibwe. 13Mwa bacha, tuboshi tungáikirira kuba mwa buuma bwe'bwemeresi bwetu, na kumenya eMwana wa Ongo kanangana. Aola, tungába bandu ba bákula kuikirira twába ngo'kwa Kirisito* yeine atúla. 14Rero tutáchibe nga bana batoto ba bêkibwa na chira kausi. Kanji tutáchengeerwe ne'myasi ye'bisha era bandu bénjire bákangirisa mwa bukalange bwabo. 15Si akaba tùngende twáteta ekanangana mwa nzii, tungákula mwa myasi yoshi. Tungáikirira no'kwa chihangi twába nga Kirisito*, i'utúla etwe. 16Kanji iwénde wátuma ebitera byoshi bye'mubiri woshi byásimbana kubuya. Emubiri woshi ánasimbana kubuya kurengera emvunyiro soshi. Rero, mango chira chitera chénde chákola kwa binemire, emubiri woshi énde êhuka na kukula mwa nzii.

Kuhuba bandu bayayaya mwa ndanda sa Kirisito

17Rero cha náběma busese kwe'sina lya Enawetu chi chechine: mùtachiataa mibere era ìri nga ye'bandu ba bàteshi Ongo, ba bénde bákulikira emianyisa yabo ye'buha-buha. 18Ebwenge bwabo, butúla mwa musimya. Abu bandu, batéte mwango kwa kalamo ka Ongo énde âna, bushi sìri mbuta kanji bàli ba michima isibu. 19Kanji bàtachifa honyi sisibya. Bénde báira ebuhungu na kunde báira chira mwasi mubi busira lubibi.

20Si mwabo, atá kumwákangirisibwaa era luulu sa Kirisito* bacha. 21Kubinali, mwômvire emyasi era ìhambere era luulu sai. Kanji bushi mùli bemeresi, mwákangirisibwe emyasi ye'kanangana era ìri mwa ndanda sa Yesu Kirisito. 22Bushi no'ku, mwěmire kureka emyanya yenyu yo'kwa mira. Kanji murékanaa ne'mibere yenyu yo'kwa mira ye'buhuma-huma ye'bwengeere era yéndee yábeka mwa muero. 23Muíribwaa bayayaya mwa michima no'mwa mianyisa yenyu. 24Kanji muhúbaa bandu bayayaya, ba bábumbirwe kwe'huhi lya Ongo, mwa kunde mwáata mibere era ìtungenene, kanji ibuya-buya era ìtenganyire ne'kanangana.

25Bushi no'ku, murékaa kunde mwáfula ebisha. Chira mundu éndaa ábura mulikabo ekanangana, bushi tùli bitera bya mubiri muuma. 26Emango musíbukire, muményaa mwêngira mwa bibi.#4:26 Somaa Saburi 4:5. Ekusibuka kwenyu kwémire kuwe era muhondo esuba lìchirowe. 27Mutábooreraa Wamusimu enjira. 28Rero, ola wábaa wénjire wêba, arékaa ebwisi. Achísesaa kunde áchikorera mwa njira sa sìtungenene, chasiya abóne cha àngaasa'mu ba bàli mwa bulae. 29Mwa bunu bwenyu muténdaa mwátenga myasi ibi. Si mundaa mwáteta myasi ibuya, era ìngaasa ebanji mwa malae mabo, kanji era ìngareta ngahanyi kwa ba bákwomvirisa. 30Muténdaa mwásibusa eMuchima Mubuya-buya wa Ongo. Oyu Muchima Mubuya-buya, ku kalorero Ongo ábabikire'ko kwa kulosa kwa munáli bandu bai kuikira elusuku lwa akábanunula. 31Ene myasi yoshi mukábuliraa'i bure: ekubikirana emungo, ebute, ne'busibuke, ne'bwaka ne'ngambo. Ebi byoshi ala'uma ne'bukali, murékanaa nabi. 32Mundaa mwáirirana emabuya na kuatana kwe'chamba. Mundaa mwábabalirana ngo'kwa Ongo nai ánabababaliraa kurengera Kirisito*.

ទើបបានជ្រើសរើសហើយ៖

Baefeso 4: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya