Mikolo ye'ndumwa 27
27
Paulo áya kutonganyira eRoma
1Chasinda, Festo era kuisha elwango kwa twěkibwaa mwa chio che'Italiya. Bera kubika Paulo na banji bandu bauma be'buroko mwa mino sa mukulu-kulu muuma we'basula mbu i'Yuliyo. Oyu Yuliyo, ábaa wo'mwa chikembe che'basula cha béndee bérika mbu Chikembe che'basula ba Mwami Okisito. 2Twera kwérukira mu bwato buuma bwa bwábaa bwátengera mwa musi we'Atiramiti. Obu bwato, bwábaa bungêmanga-emanga kwa bihabukiro bye'chio che'Asiya. Twera kuenda ala'uma na mwesha Maketoniya muuma mbu i'Arisitariko, wo'mwa musi we'Tesalonika. 3Mwe'i mishangya, twera kuhabukira mwa musi we'Sitona. Yuliyo, bushi éndee ákorera Paulo mabuya, era kumureka áye kulola ku bera bai chasiya bamwérese bya ábaa àlaire'ko. 4Mwa kutenga eSitona, twera kurenga kwa musike-musike we'chisimba che'Chipuro, bushi ne'kwámbuka emulaba ola wábaa wátengera era muhondo setu. 5Twera kuhabuka enyanja twáenda twárenga kwa musike we'chio che'Kirikiya ne'che'Pamufiriya. Chasinda, na twáika mwa musi we'Mira, mwa chio che'Likiya. 6Oyu mukulu-kulu we'basula, era kubuana bwato buuma mwo'yu musi. Obu bwato, bwábaa bo'mwa musi we'Alesanduriya bwa bwábaa bwáya mwa chio che'Italiya. Era kutwěrusa mubo.
7Twera kumala suku sinene kwa meshi, bushi twábaa twáenda mbala-mbala. Ne'ra nyuma sa malibuko manene, twera kuika ofu ne'musi we'Kinito. Mwa kutenga'mo, twera kwire twárengera kwa lunda lwera masina se'chisimba che'Kerete twérekera eSalimuni, bushi echusi chátwangikaa kuendekera ne'lubalamo kwo'lu lunda. 8Twera kunaendekera ne'lubalamo na malibuko manene, twáenda twárenga kwa musike-musike we'nyanja. Chasinda, twera kuika mu chisiki chiuma cha chitúla chěrikirwe mbu Bihabukiro bibuya ofu ne'musi we'Laseya.
9Ábere twamála suku sinene mwo'lu lubalamo, twera kunálinda twáika mwa suku sa sitúla sikáramire mwa kubalama kwa meshi. Kanji bushi elusuku lukulu lwe'memo ma ménde máirwa busira kulya lwábaa lwàrengire mira, Paulo era kwire ábura balikabo mbu: 10«Ebalume, nyiséne kwa luno lubalamo lwetu lungába lwa bisibu binene, bya bìngatuma buno bwato ala'uma ne'ne misio byákumba. Anabe netu, kuli mango tùnganasika.»
11Eri eano lya Paulo, oyu mukulu-kulu era kulinana, era kukulikira emianyisa yo'la wénde wáenza ebwato ne'ya ena'bo. 12Kanji echi chihabukiro chábaa chìtakomire ebandu kuba'ko mwa suku se'mbeo. Bushi no'ku, banene mu tubano bera kwêmeresanya kwa tuténgaa kwo'lu lunda, tuíke eFoinike akaba bìngaalikana, turenzese'yi esi suku. eFoinike chìri chihabukiro cha chitúla chèrekere kwa chisimba che'Kerete. Echi chihabukiro, chitúla chèrekere kwa lunda esuba lyénde lyáchirowa.
Emulaba áchihuta kwa nyanja
13Chasinda, kwera kuulukira kausi kaeke ka kábaa kátengera kwa lunda lwera masina. Besha ebwato bera kuchichinga mbu bangánaenaendekera ne'lubalamo ngo'kwa bábaa bàsimire. Bushi no'ku, bera kwire berusa echuma cha chénde chêmanza ebwato. Twera kutenga aola, na twárenga kwa musike-musike we'nyanja ofu ne'chisimba che'Kerete. 14Si ábere kwàrenga bihangi bieke, mwa miruko ye'chi chisimba mwera kuulukira chusi chisibu, cha chábaa chátengera kwa lunda lwe'ra luulu no'kwa lunda esuba lyénde lyáulukira. 15Echi chusi chera kuruwa-ruwa obu bwato, bwera kunaina kute kwa bùngalwisa'chi. Cha chusi, twera kwire twáreka chìtwêke era chináhonjire kwa nyanja.
16Twera kurenga kwa lunda lwe'ra bufuli bwa kachisimba kaeke ka bénde bérika mbu Kauta. Aku ke'chisimba, kera kutulanga hicha kwe'chi chusi. Si twera kulibuka busese mwa kulanga eke'bwato kaeke ka bwato bwa twábaa tuli'mo bwábaa bwákulula. 17Ábere bera bakérusisaa mwa bwato, bera kubusungusa kwe'mirisi bungesha kubereka. Kanji bushi bábaa bôbaa kusinda kwa nundo ye'chishee cho'kwa lunda lwe'chio che'Libiya, bera kwěndaasa echiito cha chénde chémanza ebwato, bera kwire bábureka bwěkibwe ne'chusi.
18Emulaba era kunaendekera áruwa-ruwa ebwato busese. Mwe'i mishangya, bera kwire bátangirisa báumanga emisio mwa nyanja. 19Ábere mwe'li lishisho, ne'bindu bya béndee bákoresa mwa bwato, beine bera kunálinda bákabulanga'bi mwa nyanja. 20Kwera kurenga suku sinene tutáchilola kwe'suba nesi kwa ngununu. Emulaba nao, era kunaendekera ákarama busese. Netu twera kwire twánaesa emunyiiro we'kulama.
21Ebandu bábaa bamála suku sinene busira kulya. Paulo era kwire êmanga era muhondo sabo, na ábura'bo mbu: «Ebera banyi! Lye'ano lyanyi, akaba mweméreraa'li mango nabáburaa mbu tùtafuraa kutenga eKerete, tùtangalolire kwe'bine bisibu byoshi na kuesa ebi bindu. 22Rero nera náběma musésaa emuchima, bushi kutáli chiro na muuma mu mwabo ola ungáfa, si ebwato bweine bu bungánakumba. 23Nàtechire bacha bushi nyìri muanda wa Ongo, kanji i'nénde nêra. Na lwarero mwa butufu, malaika* wai muuma anyípamukiraa, 24na ányibura mbu: ‹ePaulo! Ùtobaaa, bushi kwémire utónganyire era muhondo sa Mwami we'Baroma. Kanji uményereraa kwa woyo na bano bandu boshi ùli nabo, Ongo mwa bubuya bwai, angábaasa mwo'luno lubalamo lwenyu.› 25Bushi no'ku, musésaa emichima bushi bya Ongo anyíburaa, nyéte emunyiiro kwa angánabiira. 26Si chiro bacha, ebwato buchíri bùnganaturowa ku chisimba chiuma.»
27Mwo'lu, twera kumala mainga mabiri emulaba áenda átweka yeyi-ne'yi kwa nyanja ye'Atiriya. Ábere kachi-kachi ka butufu bwe'lusuku lwe'kumi ne'ne, ebakosi bo'mwa bwato bera kuchichinga mbu twáhonda kuika kwa musike se'nyanja. 28Bera kwire bândaasa echipimo era mubi cha chénde chálosa ala meshi maíkira, bera kulola kwa mwa kuikira kwa chishee, sichíri metere mane. Ábere bachífunda bure hicha, bera kuhuba kwândaasa echi chipimo, na bálola kwa mwa kuikira kwa chishee, sera metere mahatu. 29Bera kwôbaa mbu ebwato bungásinda kwa makoi, kanji mwa kulinjira ebutufu buche, bera kwire bândaasa byuma bine bye'ra nyuma se'bwato bya byénde bya bwêmanza. Bera kwéma buche fuba. 30Mwo'lu, bera kuhonda bǒngoloke. Bera kwire bǎndasisa eke'bwato kaeke kwa meshi mwa kuchêngeeresa mbu báya kwandǎsa ebyuma bye'ra muhondo mwa meshi bya byénde byêmanza ebwato. 31Paulo kukwera kubura emukulu-kulu we'basula ala'uma ne'basula bai mbu: «Bano balume bákatenga mwo'buno bwato, muményaa kwa nenyu mwasíkire!» 32Ebasula bômvire bacha, kukwera kuishanga emirisi era yábaa ìminyirwe kwa'ku ke'bwato kaeke na bákareka katówere mwa nyanja.
33Ábere ebutufu bwáhonda kucha, Paulo era kubura ebandu mbu batángiraa kulya. Era kuteta mbu: «Mainga mabiri mano màlumirira lwarero mùli mwa malibuko, kanji mutálya na kalyo kasibya. 34Rero náběma múlye kwa biryo, bushi bi bingábaasa mungesha kufa. Si muményereraa kwa kutáli muuma mu mwabo ola ungáesa chiro na lufiri kwe'twe lyai.» 35Mango Paulo ábaa era àtetaa ei myasi, era kutola emukati, era kutonga Ongo era muhondo sabo. Chasinda, era kuisha muo, na átangirisa álya. 36Bushi no'ku, ebandu boshi bera kuhuba kusera emichima, nabo bera kutangirisa bálya. 37Mwo'bu bwato, twábaa tùli bandu maana mabiri na malinda na ndatu. 38Ábere chira mundu era alyáa, anêuchire, bera kutangirisa báumanga emisio ye'bulo mwa nyanja, mwa kuhonda ebwato bwǎnguwe.
Ebwato bwábereka
39Mango ebutufu bwábaa bwera bwacháa, besha ebwato chiro bákamenyerera echio cha bábaa bera bàli'mo. Si bera kulola ku chisiki chiuma ala nyanja yábaa ichiúmire kwa chio, kanji ábaa àli na chihabukiro. Bera kuhonda kuruwa ebwato búye kusinda aola akaba bìngaalikana. 40Bera kwire báboola emirisi ye'bya biito, na bábitosangisa mwa nyanja. Bera kuboola ne'mirisi era yábaa ìminyirwe kwa mbao se'kuenza ebwato. Chasinda, bera kumina engwaya era muhondo se'bwato mwa kuhonda echusi chibwêke kwe'chi chihabukiro. 41Si mwo'lu, echimbi chera muhondo che'bwato chera kuchiukulira ku nundo ya chishee mwa kachi-kachi ke'meshi, na chásinda aola. Si echimbi chera nyuma cheke, chera kuberekanga bushi ne'mulaba.
42Ebasula bera kwire báata mianyisa ya kwíta ebandu be'buroko, kungesha kuba ola wáhaa mwa kukaraba. 43Si emukulu-kulu we'basula yeke ábaa áhonda alámye Paulo. Era kwânga abu basula mbu bàtairaa bacha. Bushi no'ku, era kuteta mbu ba bèshi kukaraba, bu babáa bábere-bere kuchiuma tanga kwa meshi bahábukire kwa mushirirya. 44Na'ba bangáshiba batólaa embao, nesi kwa byande-ande bye'bwato bahábuke nabi. Ku tuboshi twáhabukiraa kwa mushirirya bacha ne'bôlo.
ទើបបានជ្រើសរើសហើយ៖
Mikolo ye'ndumwa 27: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.
