Mikolo ye'ndumwa 21
21
Paulo érukira eYerusalemu
1Era nyuma se'kulikana ne'bangumwa be'luhu lwa Ongo lwe'Efeso, twera kutola ebwato na twáhabukira kwa chisimba che'Kosi. Mwe'i mishangya, twera kuhabukira kwa che'Roto. Mwa kutenga kwe'chi chisimba che'Roto, twera kuika mwa musi we'Patara. 2Mwo'yu musi, twera kubuana'mo bwato bwa bwábaa bwáya mwa chio che'Foinikiya. Twera kwéngira mubo na twáchiuma. 3Ábere twera twálangusa kwa chisimba che'Chipuro, twera kureka'chi kwa lunda lwe'marembe na twérekera mwa chio che'Suriya. Twera kwemanga kwa chihabukiro che'musi we'Tiro, bushi mwo'yu musi mu ebwato bwábaa bwémire kukanulira emisio era bwábaa bwéte.
4Twera kubuanana ne'bemeresi ba mwo'yu musi, twera kumala einga liuma nabo. Abu bemeresi, bushi bábaa bákoresibwa ne'Muchima Mubuya-buya, bera kubura Paulo mbu àtayaa eYerusalemu. 5Si era nyuma se'kumala eri einga liuma, twera kutenga eTiro twáendekera ne'lubalamo lwetu. Abu bemeresi boshi, ala'uma ne'bakasi, ne'bana bera kutwerekesa kutengera mwa musi kuikira kwa chihabukiro. Twáikire kwe'chi chihabukiro, twera kukoma emafi na twéma Ongo. 6Era nyuma se'kulaana, twera kwêngirira mwa bwato. Abu bemeresi nabo, bera kuhuba mwa musi.
7Kutenga eTiro, twera kuendekera ne'lubalamo lwetu lo'kwa meshi mwa musi we'Tolemai. Twáikire mwo'yu musi, twera kulamusa banyaketu bemeresi, twera kumala lusuku luuma ala'uma nabo. 8Ábere mwe'i mishangya, twera kuhuba kuchiuma, na twáika mwa musi we'Kaisariya. Twera kwêngirira mwa nyumba ya muhubanganyi Firipo, na twábera'mo. Oyu Firipo ábaa muuma mwa ba bandu balinda ba bálondolwaa kwa kunde báasa endumwa*.#21:8 Somaa Mikolo ye'ndumwa 6. 9Ábaa éte banyere bai bane ba bábaa bàtasa kuhweribwa, kanji béndee báreba.
10Ábere twamála suku sitasieke mwo'yu musi we'Kaisariya, mwera kuika murebi* muuma mbu i'Akabo. Oyu Akabo, ábaa átengera mwa chio che'Yuteya. 11Áikire ala twábaa tùli, era kutola emukaba wa Paulo, kuna kuchimina emaboko ne'maulu muo. Era kuteta mbu: «Mǔmvaa, eMuchima Mubuya-buya àtechire mbu: ‹Ena ono mukaba, ku eBayuta be'Yerusalemu bangámumina bacha ne'kumwana mwa maboko me'bandu be'sinji mbaa.›»
12Twômvire bacha, tubano ala'uma ne'banji bemeresi be'Kaisariya, twera kwéma Paulo busese mbu àtayaa eYerusalemu. 13Si yeke era kutwǎkula mbu: «Chi chátuma mwálira ne'kuhonda kunyobairisa? Nyono, nàchikunganyise mira kwa kuya kuminwa eYerusalemu bushi ne'sina lya Enawetu Yesu. Na akaba kufa, nànêmerere kufa bushi nai.» 14Mango twálolaa kwa àtufunjire, twera kwire twáteta mbu: «Ekuhonda kwa Enawetu ku kunábaa», na twásira.
15Era nyuma sa suku burebe, twera kuohola, na twérukira eYerusalemu. 16Bemeresi bauma bo'mwa musi we'Kaisariya, bera kutwerekesa na bátuisa kwe'humbi ala mwa mulume muuma mbu i'Munasoni. Oyu Munasoni ábaa mwesha kwa chisimba che'Chipuro, kanji ábaa muuma mwa bemeresi babere-bere.
Paulo átambira Yakobo
17Mango twáikaa eYerusalemu, banyaketu bemeresi bera kutuhúukasa na lumoo lunene. 18Ábere mwe'i mishangya, Paulo ala'uma netu twera kutambira Yakobo. Ebangumwa be'luhu lwa Ongo boshi, nabo bábaa babúananyire'o. 19Paulo era kubalamusa na ábabalikisisa chiuma kwa chiuma, byoshi bya Ongo abáa énjire áira mwa kachi-kachi ke'bandu be'sinji mbaa, kurengera emulimo wai.
20Abu bangumwa bômvire bacha, bera kutonga Ongo. Bera kwire bábura Paulo mbu: «E munyaketu! Ulólaa kwa Bayuta bangana ba bàhubire bemeresi, kanji boshi banátula bàtunjire eMwaso* wa Musa busese. 21Rero, bòmvire emwasi mira kwa woyo wénjire wákangirisa eBayuta boshi ba batúla mwa kachi-kachi ke'sinji mbaa kwa baténdaa bátunda oyu Mwaso* wa Musa. Kanji mbu wénjire wábabura kwa baténdaa báchimonya ebana babo, ne'kubàanga mbu baténdaa báchikulikira emyanya yetu ye'Bayuta. 22Kute twíree twáira? Abu Bayuta bangánômva emwasi kwa waíkire kuno mira. 23Bushi no'ku, chine twáhonda kukubura chi unáiraa: Twéte balume bane anola, ba baláisise era muhondo sa Ongo. 24Ubátolaa, wánaya nabo mwa mwiya we'kuchikomya*. Na byoshi bya bangémibwa woyo ungábaongera'bi chasiya bakúmulwe. Echera chingálosa ebandu boshi kwa emyasi era bòmvaa era luulu sao, iri ya bisha tenene. Kanji bangánamenyerera kanangana kwa kasi nao, unáchiri ùtunjire eMwaso* wa Musa. 25Kwa bya byerékere ebandu be'sinji mbaa ba báhubire bemeresi, twàbaanjikirire mira era luulu se'lwango lwa twàishaa mbu baténdaa báchirya biryo bya byàtulwaa ebasimu, nesi kulya mwamba, nesi kulya nyama era yàchitumbiraa, nesi kubanda ekiri.»#21:25 Somaa 15:19-20.
26Ábere mwe'i mishangya, Paulo era kutola ba balume bane, na áya nabo mwa mwiya we'kuchikomya*. Chasinda, era kuya mwa Luhu lwa Ongo* abúre ebandu mangochi oyu mwiya wabo angáwa, ne'mitulo* era ingânyibwa bushi na chira muuma mubo.
eBayuta básimba Paulo
27Sa suku sirinda se'kuchikomya* mango sábaa sera sáhonda kuwa, Bayuta bauma ba bábaa bátengera mwa chio che'Asiya, bera kulola ku Paulo mwa Luhu lwa Ongo*. Bera kushíirisa eluamba loshi lwe'bandu, na bámusimba. 28Bera kubanda endulu mbu: «Emu balume boshi be'Isiraeli, mubáhaa mutúase! Ola mulume ono, ola wénjire wárenga mu chira chisiki áenda ákangirisa ebandu boshi kwa béndaa bátukena, na kubabura kwa baténdaa bátunda eMwaso* wa Musa, ne'kukena luno Luhu lubuya-buya lwa Ongo. Érire ánabalasa'lo mwa kwêngisa mwe'bandu be'sinji mbaa.» 29Bátetaa bacha, bushi bálolaa kwa Paulo àli mwa musi na mwesha Efeso muuma mbu i'Torofimo. Bera kuchichinga mbu amwêngisise mira mwa Luhu lwa Ongo*.
30Elwayo lwera kwêhula mwa musi woshi we'Yerusalemu. Ebandu bera kulibichiranga ala Paulo ábaa àli, bera kumusimba na bámukululira era butala. Unao-unao kuna kuchinganga enyisi se'Luhu lwa Ongo*. 31Mango bábaa bera báhonda kumwita, emukulu-kulu munene we'basula be'Baroma era kûmva emwasi kwa lwayo lwehwíre mwa musi woshi we'Yerusalemu. 32Unao-unao, era kutola basula bai bauma ala'uma ne'bakulu-kulu babo, era kulibichira nabo ala abu bandu bábaa babúananyire. Eluamba lwe'bandu lwámulolire'ko ala'uma ne'basula bai, bera kwire báreka kupunda Paulo.
33Oyu mukulu-kulu munene, kukwera kuchifunda ala Paulo ábaa àli. Era kumusimba ne'kuteta kwa bamúminaa na mareure mabiri. Chasinda, era kubusa ebandu mbu: «Ono mundu i'nde? Na chiye chi aírire?» 34Si mwa kumwǎkula, abu bandu bábaa bálakanga chira bauma kwabo-kwabo. Echera chera kutuma oyu mukulu-kulu munene we'basula átachimenyerera kanangana cha chàbere. Era kwire áteta mbu běkaa Paulo mwa chikali che'basula. 35Mango Paulo ábaa era ánahonda kwêngirira mwe'chi chikali, ebasula bera kulola kwa byěmire bamúbatule, bushi ebandu bábaa bàkaliire busese. 36Boshi bábaa banákulikire Paulo báenda bábanda endulu mbu: «Umúkulaa mwe'muka!»
Paulo átongana era muhondo se'Bayuta
37Mango ebasula bábaa bera báhonda kwêngisa Paulo mwa chikali chabo, era kubusa emukulu-kulu wabo mbu: «Ewaliya! Ùnganyêmerera nyikubure chinwa chiuma?» Nai mbu: «Wìshi Chikiriki? 38Eri atá woyo u'ola mwesha Misiri wasíndaa kureta elwayo mwo'no musi, wera kwéka na byumbi bine bya bihumusi mwa buyeye*?» 39Paulo nai mbu: «Nyono, nyìri Muyuta, nyibutwa mwa musi we'Tariso. Oyu musi, áire ngulu busese mwa chio che'Kirikiya. Rero waliya, nákwêma unyémerere nyihámbale na bano bandu.» 40Oyu mukulu-kulu era kumwemerera mbu atétaa. Paulo era kwémangira kwa chiso, era kwêmusa emino mwa chanya ábura ebandu mbu barékaa elwayo. Ábere boshi bera basíraa, Paulo kukwera kubabura mwe'teta lyabo lye'Chieburaniya mbu:
ទើបបានជ្រើសរើសហើយ៖
Mikolo ye'ndumwa 21: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.
