2 Bakorindo 8

Ekuasa ebemeresi be'Yerusalemu

1Banyaketu, twáhonda muménye kute Ongo alósise ebubuya bwai kwa bikembe bye'bemeresi bo'mwa chio che'Maketoniya. 2Abu bandu, baérekibwaa busese kurengera emalibuko ma bàrengaa'mo. Si banáendekeraa kuata lumoo lunene, kuikira echihangi báata emuchima we'kwâna kurenza ebuashi bwabo, chiro angaba mbu babáa bàli bakene. 3Náteta bya nyìshi era luulu sabo, kwa banáa kukulikana no'kwa babáa bàngaala. Bera kuikira echihangi bâna kurenza no'kwa babáa bàngaala busira kuchichikibwa. 4Bàtwěmaa busese mbu nabo bahónda bémererwe kuhangira kwa mulimo we'kuasa ebandu ba Ongo.#8:4 Ebandu ba Ongo ba bâmaanyibwa anola, bàli ebemeresi bo'mwa musi we'Yerusalemu. Somaa Baroma 15:25-26, 1 Bakorindo 16:3. 5Bânaa kurenza ngo'kwa twabáa tulángalire. Bàchânaa tanga era mwa Enawetu, chasinda bera kuchâna beine bushi netu kurengera ekuhonda kwa Ongo. 6Echera chi chàtumaa twéma Tito mbu áyaa eyi mwenyu, chasiya amálirise oyu mulimo mubuya we'kunde mwâna kwa kuasa ebandu ba Ongo, ngo'kwa ánatangirisaa'o. 7Mwabo mùli baare mwa myasi yoshi: mwěte bwemeresi, mùli ndechi, mwìshi myasi, mwěte ebushiru mu chira mwasi, kanji mùtwěte kwe'nzii. Rero, twáběma mubáa baare no'mwa kuata emuchima we'kunde mwâna.

8Ndàtechire bacha kwa kuberesa muomba*. Si nabáa náhonda kubalosa ebushiru bwe'banji bemeresi. Mwa kuira bacha, nàbêresise enjira ye'kúlosa kwa enzii yenyu ináli ya kanangana. 9Bushi mwìshi ebubuya bwa Enawetu Yesu Kirisito, chiro angaba mbu ábaa muare, si yeine áchiíraa mukene bushi nenyu, chasiya múbe baare kurengera obu bukene bwai.

10Mwa bacha, náberesa emianyisa yanyi mwe'i myasi: kukomire muéndekere kuata ebushibirisi, bushi mu mwabáa babere-bere kwâna, kanji mu mwàtangirisaa oyu mulimo kutengera mwa mwaka ola wàrengaa. 11Rero, oyu mulimo, muísaa'o kwa businda. Kwa mwabáa munéte emuchima we'kukola'o, ku munáisaa'o kwa businda bacha, kukulikana ne'buashi bwa mwěte. 12Bushi, akaba emundu éte emuchima we'kwâna, Ongo énde êmerera echindu cha àanyire kukulikana na cha oyu mundu éte, si atá kukulikana na cha atéte.

13Emianyisa yanyi, itá ya kuhonda kubalibusa kwa kuasa ebanji bandu, si náhonda ebandu boshi bénde bátolibwa kuuma. 14Mwe'sine suku, mwéte buare bunene. Rero obu buare bwenyu, búndaa bwáasa ebanji ba bàli mwa malae. Mwa bacha, nabo mango bangába bàbonyire bindu binene busese, bangénde bábaasa mango mukába mwa bulae. Mwe'i njira ebandu boshi bangénde bátolibwa kuuma, 15kukulikana no'kwa Maanjiko Mabuya-buya matúla màtechire mbu:

«Ola wátola-tolaa binene, atábonaa binene kurenza.

No'la wátola-tolaa bieke, atábonaa bieke busese.»#8:15 Somaa Kutenga 16:18.

Tito na balikabo báya eKorindo

16Akoko era mwa Ongo, iwerésaa Tito bushiru bunene kwa kubaasa ngo'kwa nanyi nyinéte'bo! 17Tito emérere kuya eyi mwenyu kukulikana no'kwa twàmwěmaa. Kanji kwa bushiru bwai bunene, àchikunganyise mira kwa kuya eyi mwenyu kukulikana ne'kuhonda kwai yeine. 18Twamútumire na unji munyaketu muuma. Oyu munyaketu, atúsa ngulu ibuya mwa bemeresi boshi, bushi ne'mulimo wai we'kunde áhubanganyisa ebandu eMwasi Mubuya-buya. 19Kanji oyu munyaketu, álondolibwe ne'bemeresi kwa kunde átwerekesa mwa nyibalamo se'kuaba emiholore era yàanyibwaa na muchima mubuya. Twénjire twákola oyu mulimo kwe'tunda lya Enawetu, na kulosa emuchima wetu mubuya we'kuasa ebanji bandu.

20Kanji tutáhonda mbu ebandu béndaa bátwamaana bulio, kukulikana no'kwa twénjire twáaba bine bikulo bingana bicha, 21bushi twáhonda kuira emabuya, atá era muhondo sa Enawetu yeine oshâo, si ne'ra muhondo se'bandu.

22Twàtumire na unji munyaketu mwemeresi muuma ala'uma nabo. Oyu munyaketu, mu njira sinene, twénde twálola kwa atúsa bushiru bunene. Rero obu bushiru bwai bwérire bwánarengeresa bushi àbalángalire busese. 23Rero kwa bya byèrekere Tito, àli mundu ola wénde wányekeresa mwa mulimo. Ende ákola mwa kachi-kachi kenyu mwe'twe lyanyi. Na'bu banji banyaketu ba bàmwěrekesise, bàtumirwe ne'bikembe bye'bemeresi. Bénde bákola kwe'tunda lya Kirisito*. 24Bushi no'ku, mulósaa era muhondo se'bikembe bye'bemeresi kwa mubasimire kanangana, na kulosa'bo kwa twabáa tùsinganyire ekunde twáchitonga bushi nenyu.

ទើបបានជ្រើសរើសហើយ៖

2 Bakorindo 8: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya