2 Bakorindo 1
1
Paulo álamusa ebemeresi
1Nyono Paulo, nyìri ndumwa* ya Yesu Kirisito kwa kuhonda kwa Ongo. Nyono na munyaketu Timoteo, nyínabaanjikira mu bemeresi bo'mwa musi we'Korindo, ne'bandu ba Ongo boshi ba bàli mwa chio choshi che'Akaya. 2Ongo Tata, na Enawetu Yesu Kirisito béndaa bábaahanyira na kuberesa ebôlo.
Paulo átonga Ongo
3Ongo, Eshe wa Enawetu Yesu Kirisito, éndaa átongibwa. i'Tata ola wénde wátufira bonjo, na kutusesa emichima mwa myasi yoshi. 4iwénde wátusesa emichima mwa malibuko metu moshi, chasiya netu kurengera oku kusesibwa emichima na Ongo, túnde twáala kusesa emichima ye'banji bandu ba bárenga mu chira malibuko. 5Bushi ngo'kwa twárenga mu malibuko manene kurengera ebuuma bwetu na Kirisito*, kuno'ku ku twénde twánasesibwa emichima busese kurengera Kirisito*. 6Twálibuka bacha chasiya musésibwe emichima, kanji munúnulibwe. Twénjire twásesibwa emichima, chasiya nenyu musésibwe'i, mubóne ne'misi era ingátuma mwásimika mwa'mu malibuko muna'mo ma twárenga'mo. 7Kubinali, emunyiro ola twéte bushi nenyu àli munene. Bushi twìshi kwa nenyu mwálibuka ala'uma netu, kanji mwénjire mwásesibwa emichima ala'uma netu.
Emalibuko mwa mulimo wa Enawetu
8Banyaketu, twáhonda muményerere emalibuko ma twárengaa'mo mwa chio che'Asiya. Amu malibuko, matúkooteraa busese, kuikira echihangi twáesa emunyiiro we'kubao. 9Twábaa twénjire twáanyisa mbu twàchinjibusibwe ekufa. Byabáa bacha, chasiya tuténdaa twálangalira emisi yetu tubeine, si túndaa twálangalira Ongo iwénde wômola ebafu. 10Ongo yeine iwátununulaa mwa'ko kasibu ke'lufu, achíri angánatununula. Kanji tulángalire kwa achíri akánatununula. 11Nenyu mwénjire mwátuasa mwa kutwěmera. Mwa bacha, angénde áakula ememo ma máirwaa na bandu banene bushi netu, na kutuirira mabuya. Aola, bandu banene bangátonga Ongo bushi netu.
Paulo ábindula emianyisa ye'lubalamo lwai
12Tubano emyasi twénjire twáchitongera, ne'michima yetu yálosa kwa ináli ya kanangana iyêne: Twabáa twénjire twáchitola mwa bandu, tanga mwa kachi-kachi kenyu na muchima wa burembu, kanji kwa kutungenene kwa kutengire era mwa Ongo. Ebyera byabáa bìtatenganyire na bwenge bwa mundu, si byabáa bìtenganyire ne'bonjo bwa Ongo.
13Mwa maruba metu, twénjire twábaanjikira emyasi era mwásoma na kûmva oshâo. Nyéte munyiiro kwa mungánômva ene myasi kubuya-buya, 14bushi mwomvíre'i bimbi-imbi. Ne'i myasi iyêne: Elusuku lwa Enawetu akáfuluka, mukáchitonga bushi netu, netu twánachitonga bushi nenyu. 15Nabáa nyìshi ei myasi kubuya-buya. Bushi no'ku, nabáa náhonda nyiíke tanga ei mwenyu, chasiya muáhanyirwe ebwakabiri. 16No'mwa kutenga eyi mwenyu, nyìngaire eMaketoniya. Chasinda, mwa kutenga eMaketoniya, nyìngahubire kuika eyi mwenyu chasiya munyiase kwa bya nyìlaire'ko mwa lubalamo lwe'kuya eYuteya. 17Rero mango nàtolaa ei mianyisa, nabáa ndàserire mui? Nesi, mango nátola lwango lurebe, nénde nába nákoresa bwenge bwa bandu, kuikira nêmerera nesi nánana emyasi ku chihangi chiuma? 18Na Ongo anêshi kanangana kwa emyasi era twàbaburaa ìtabaa ya kwêmerera nesi kunana ku chihangi chiuma. 19Bushi Yesu Kirisito, eMwana wa Ongo ola nyono, na Sirifano, na Timoteo twabáhubanganyisaa atáikaa kwa kunde êmerera na kunana ku chihangi chiuma. Si anátula wa kwêmerera. 20Bushi kurengera Yesu, ku Ongo énde áira byoshi bya átulaanyaa. Rero, kurengera Yesu Kirisito, ku twénde twáteta mbu «Bibe bacha», kwa kwêresa Ongo etunda. 21Tubano ala'uma nenyu, Ongo yeine iwénde wátweresa emisi ye'kusímika mwa buuma bwetu na Kirisito*. Kanji Ongo iwátulondolaa, 22na kutubika kwe'kalorero ka kálosa kwa tùli bandu bai. Ábikire ne'Muchima Mubuya-buya mwa ndanda setu, ábe chikinja che'bindu byoshi bya atúla àtubikirire.
23Nyono naláisise era muhondo sa Ongo, akaba náfula bisha ànyîtaa. Nalólaa kwa kukomire ndàchihubaa eyi Korindo, bushi ne'kubafira ebonjo. 24Tutáhonda kubachichika emyasi era mwěmire kwêmerera, bushi musímikire mwa bwemeresi. Si twáhonda kukola ala'uma nenyu, chasiya múnde mwámowa.
ទើបបានជ្រើសរើសហើយ៖
2 Bakorindo 1: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.