1 Bakorindo 3
3
Ebaanda ba Ongo
1Kubinali banyaketu, nabáa ndénjire náhambala nenyu nga bandu ba bákoresibwa ne'Muchima wa Ongo. Si nabáa nénjire náhambala nenyu nga bandu ba bákoresibwa ne'myasi ye'butala, kanji nga bandu ba bachíri bana batoto mwa myasi ya Kirisito*. 2Kubonza ku nabáa nénjire nábonza, si ndàbêresaa biryo bya bìkoochire, bushi mwábaa mùtangafura kuala kutafuna. Anabe na lwarero, mùtanganafura kuala kutafuna, 3bushi muchiri mwákoresibwa ne'myasi ye'butala. Bushi mango emufula ne'mbangano bichíri mwa kachi-kachi kenyu, ebyera binálosise kwa muchiri mwákoresibwa ne'myasi ye'butala, ne'myanya yenyu ináli nge'myanya ye'bandu be'butala! 4Mango muuma mu mwabo áteta mbu: «Nyono nyìri mundu wa Paulo.» Ne'unji mbu: «Nyiri wa Apolo.» Mwákuira bacha, mùtasene kwa mwénjire mwáchitola nga bandu bo'mwa butala?
5Rero, Apolo àli nde? Na Paulo àli nde? Si tunáli baanda ba Ongo, ba bàbakangirisaa enjira ye'kwêmerera Kirisito*. Chira muuma mu tubano, énjire ákola kukulikana ne'lwêmbo lwa Enawetu ámweresise. 6Nyono nàingaa embuto, na Apolo era kunde áihuira-huira kwe'meshi, si Ongo iwamésaa'i. 7Rero ola wáinga embuto, no'la wáihuira-huira kwe'meshi, boshi batéte mufa. Si Ongo iwète mufa, bushi iwénde wámesa embuto. 8Ola wáinga embuto, no'la wáihuira-huira kwe'meshi, boshi kuuma kubanali. Na chira muuma, Ongo akámwemba kukulikana ne'mulimo wai. 9Tubano tunáli baanda ba bénjire bákola na Ongo. Nenyu mu mùli ehwa lyai, kanji mwánaba nyumba yai. 10Rero, kukulikana ne'ngahanyi sa Ongo anyêresise nga murenga ola wìshi kuimba, nemánzise emusingi. Na kwo'yu musingi, unji mundu nai ánaimbira'ko. Si chiro bacha, chira mundu ěmire kunde ámenyerera kubuya kute énjire áimbira'ko. 11Emusingi êmanzibwe mira. No'yu musingi àli Yesu Kirisito. Rero kutáli unji mundu ola ùngachîmanza unji musingi. 12Kwo'yu musingi, emundu àngaimba'ko ne'horo, ne'buteya, ne'makoi me'chichiro chinene, ne'michi, ne'bukere, nesi ne'máúngu. 13Si chiro bacha, emulimo wa chira mundu akánalorekana'ko changanama kwa lusuku lwe'buchinjibusi. Bushi kwo'lu lusuku, emulimo wa chira mundu, akárenzibwa mwa muliro. No'yu muliro i'ùkáereka ne'kulosa emufa we'mulimo wa chira mundu. 14Akaba enyumba era mundu áimbaa kwo'yu musingi ìtasirere, oyola i'ùkábona elwêmbo. 15Si ola enyumba yai ikásirera, yeke atákabone lwêmbo. Si chiro bacha, yeine akánunulibwa, si akába ngo'la wafúfumukire mwa muliro!
16Mùteshi kwa mwabo mùli nyumba ya Ongo, ne'Muchima wai atúla mwa ndanda senyu? 17Akaba mundu àngahandula enyumba ya Ongo, nai Ongo akámuhandula! Bushi ei nyumba ya Ongo, itúla ibuya-buya. Na mwabo mu mùli ei nyumba.
18Emundu aténdaa áchengeera yeine! Akaba mundu murebe mwa kachi-kachi kenyu angénde áanyisa mbu àli mwenge mwa myasi ye'butala, ěmire kunde áchitola nga mbuta, chasiya ábe mundu wa bwenge kanangana. 19Bushi ebwenge bwo'muno butala, bùli buuta era muhondo sa Ongo. Bushi bitúla byǎnjikirwe mwa Maanjiko Mabuya-buya mbu: «Ongo énde ásimbira ebandu be'bwenge, kwa bukalange bwabo beine!»#3:19 Somaa Yobu 5:13. 20Kanji bitúla byǎnjikirwe mbu: «Enawetu atúla èshi emianyisa ye'bandu be'bwenge. Anêshi kwa inátula ya buha.»#3:20 Somaa Saburi 94:11.
21Bushi no'ku, kùtabaa ola úndaa wáchitongera ebandu. Bushi byoshi bináli byenyu: 22ábe Paulo, nesi Apolo, nesi Petero, nesi ebutala, nesi ekalamo, nesi elufu, nesi emyasi ye'sine suku, nesi emyasi era ikáika. Ebi byoshi, bináli byenyu. 23Si mwabo, mùli bandu ba Kirisito*, na Kirisito* àli wa Ongo.
ទើបបានជ្រើសរើសហើយ៖
1 Bakorindo 3: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.