1 Bakorindo 15

eMwasi Mubuya-buya wa Kirisito

1Banyaketu, náhonda nyìbakengese era luulu se'Mwasi Mubuya-buya ola nàbakangirisaa. Mwera kwêmerera'o, kanji munásimikire muo. 2Kurengera oyu Mwasi ku mwénjire mwánunulibwa emango mwákulikira'o ngo'kwa nanábakangirisaa. Si akaba bitáli bacha, eri ebwemeresi bwenyu bunáli bwa buha.

3Era muhondo sa byoshi, nàbakangirisaa emyasi era nanyi nákangirisibwaa: Kirisito* àfaa bushi ne'bibi byetu, kukulikana no'kwa Maanjiko Mabuya-buya mábaa mátechire mira. 4Era kutabwa na kwômoka kwa lusuku lwa kahatu era nyuma se'kufa kwai, kukulikana no'kwa Maanjiko Mabuya-buya mábaa màtechire mira. 5Era kupamukira ku Petero, chasinda era kupamukira kwa ndumwa* ekumi ne'biri. 6Era nyuma se'bi, era kupamukira ku bemeresi banene ku maana matano ku chihangi chiuma. Na banene mubo banáchiri'o, si ebanji báfire mira. 7Era nyuma se'bi, era kupamukira ku Yakobo, chasinda kwa ndumwa* soshi.

8Chasinjire, era nyuma sa'bu boshi, era kunyipamukira'ko nanyi, nyi nyìri nga mwana ola wàbuchirwe àtasa kulumisa ne'myesi. 9Bushi nyono nyi mueke mwa ndumwa*. Chiro ndanémire kwérikibwa mbu ndumwa*, bushi nyínabaa nénjire nálibusa eluhu lwa Ongo. 10Si kwa bonjo bwa Ongo, ku kutumire nába ngo'kwa nyìri. Obu bonjo bùtabaa bwa buha, bushi nàkolaa busese kurenza esinji ndumwa* soshi. Kanangana atá nyínakolaa, si ebonjo bwa Ongo bu bwénjire bwákola mwa ndanda sanyi. 11Rero, ábe nyono, ábe abu banji, oyu Mwasi Mubuya-buya muuma, itwénjire twánahubanganyisa ebandu, na i'mwánêmerere.

Ekwômoka kwe'bafu

12Twénjire twákangirisa ebandu mbu Kirisito* omwókaa mwa bafu. Rero, kute bauma mu mwabo bénjire báteta mbu ebafu batákômwoke? 13Akaba kanangana ebafu batákômwoke, kukuteta mbu Kirisito* nai àtômwokaa. 14Na akaba Kirisito* àtômwokaa, kukuteta mbu ne'myasi era twénjire twáhubanganyisa ebandu ìri ya buha, ne'bwemeresi bwenyu nabo, bunáli bwa buha! 15Kanji akaba kanangana ebafu batákômwoke, kukuteta mbu Ongo àtômolaa Kirisito*. Aola, tuséneke'ko nga babei ba bêkera Ongo bisha, bushi twénjire twáteta mbu ômwolaa Kirisito*. 16Bushi akaba ebafu bàtomoka, kukuteta mbu Kirisito* nai átomwôkaa. 17Kanji akaba Kirisito* átomwôkaa, kukuteta mbu ebwemeresi bwenyu bùli bwa buha, munáchiri no'mwa bibi byenyu. 18Kanji kukuteta mbu ebandu ba báfire bemérere Kirisito*, kuera ku báerire. 19Akaba tùchinyiirire Kirisito* bushi na kano kalamo ka twéte lwarero oshâo, eri tùli bânya kurenza ebandu boshi.

20Si kanangana Kirisito* omwókaa mwa bafu, echera chi chálosa kanangana kwe'banji bafu nabo bakánômoka. 21Bushi ngo'kwa walufu árechibwaa na mundu muuma, kuno'ku ku ekômwoka kwe'bafu nako, kwarechibwaa na mundu muuma. 22Rero, ngo'kwa ebandu boshi bénde báfa bushi ne'buuma bwabo na Atamu, kuno'ku ku ebandu boshi bakánahuba kuba bauma-uma bushi ne'buuma bwabo na Kirisito*. 23Si chira mundu éte echai chihangi che'kômwoka, na Kirisito* imubere. Chasinda ebandu bai nabo bakômwoka mango akábaha. 24Ne'ra nyuma se'bi, enzinjiro ikáika. Mwa'mu mango mu Kirisito* akáhandula byoshi bya bìmire, na byoshi bya byète ebuashi, na byoshi bya byète emisi. Chasinda, akáalulira Ongo Tata ebwami. 25Bushi byěmire Kirisito* aéndekere kwîma kuikira mango Ongo akába àbikire ebarenda bai boshi kuba chisimachiro chai.#15:25 Somaa Matayo 22:44. 26Ne'murenda musinda ola ukáhandulibwa, àli walufu. 27Bushi bitúla byǎnjikirwe mwa Maanjiko Mabuya-buya mbu: «Ongo áirire byoshi kuba chisimachiro chai.»#15:27 Somaa Saburi 8:6. Si byoshi byáiribwe kuba chisimachiro chai kureka Ongo yeine oshâo, bushi iwábikire byoshi era chibanda se'buashi bwa Kirisito*. 28Na mango akába àbikire byoshi era chibanda se'buashi bwe'Mwana wai, mu mango oyu Mwana nai akére áchibika era chibanda se'buashi bwa Ongo, iwábikaa byoshi era chibanda se'buashi bwai. Mwa bacha, Ongo ánere êma loshi era luulu sa byoshi.

29Rero akaba ebafu batákômwoke, kute bikába kwa'bu bénjire bábatisibwa bushi nabo? Kanji akaba kanangana ebafu batákômwoke, chi chìngatuma ebandu bénjire bábatisibwa bushi nabo? 30Anabe netu tubeine, chi chìngatuma chira chihangi twáendekera kubika ekalamo ketu mwa kasibu? 31Banyaketu, chira lusuku nénjire nábura náfa. Nábabura bacha bushi nénjire náchitongera mwabo mwa buuma bwetu na Enawetu Yesu Kirisito. 32Anabe no'mwa musi we'Efeso, nalwáa ne'nyama ngali. Rero akaba nyìngalwire nasi bushi ne'kuhonda ebindu byo'muno butala oshâo, mutoloke muchiye nyìngabonyire? Akaba ebafu batákômwoke, rero:

«Tùlyaa, tunámwe,

bushi mishangya tungáfa.»#15:32 Somaa Isaya 22:13.

33Muténdaa mwêngeerwa! «Ebera babi bénde bátuma ebandu babuya báira emabi.» 34Muchíhubaa'ko ngo'kwa binêmire, murékaa kunde mwáira emabi, bushi bauma mu mwabo bàteshi Ongo. Ekubabura bacha, siri honyi senyu.

Kwa bafu bàkômwoka

35Si kuli mango mundu àngabusa mbu: «Kute ebafu bakômwoka? Na mubiri muchiye ibàkômwokana?» 36E u'mbuta! Mango wénde wáinga embuto, ei mbuto ìtangamera itasa kufa tanga. 37Kanji cha wénde wáinga, àtatula emwaka ola ungámera, si wénde wáinga enjimi. Ei njimi ìngaba ya bulo, nesi njimi ya inji mbuto. 38Chasinda, Ongo énde êresa'i ehuhi ngo'kwa yeine asímire. Ende êresa chira njimi elyai huhi.

39Emibiri ya byoshi bya byábumbwaa itúla irenzenye. Ebandu batúsa wabo mubiri, ne'nyama sánaata wabo, ne'milonge yánaata wabo, ne'fi sánaata wabo.

40Kutúla mibiri yo'kwa nguba kwánaba ne'mibiri yo'muno butala. Emibiri yo'kwa nguba itúsa bwabo bulangare, ne'mibiri yo'muno butala, nai yánaata bwabo bulangare. 41Esuba litúsa bwai bulangare, ne'mwesi ánata bwai, ne'ngununu nasi sánaata bwabo. Na chira ngununu inátusa ebwai bulangare.

42Rero, ekômwoka ku kukanaba bacha. Mango emubiri énde átabwa, énde ába àli wakúbola, si mango énde ômwolibwa, énde ába àtachiri wakúbola. 43Ende átabwa mwa kukenyibwa, si énde ômwoka mwe'tunda. Kanji énde átabwa atéte misi, si énde ômwôlibwa éte misi. 44Ende átabwa àli mubiri wa mundu, si énde ômwôlibwa, era mubiri ola wêresibwe ekalamo kurengera eMuchima Mubuya-buya.

Kuli emubiri we'mundu, kwánaba ne'mubiri ola wêresibwe ekalamo kurengera eMuchima Mubuya-buya. 45Bushi bitúla byǎnjikirwe mwa Maanjiko Mabuya-buya mbu: «Emundu mubere-bere, Atamu ábaa mundu ola wète kalamo.»#15:45 Somaa Ndangiriso 2:7. Si «Atamu musinda-sinda»#15:45 Atamu musinda-sinda: i'Yesu Kirisito. Somaa 15:21. , i'Muchima, ola wénde wêresa ebandu ekalamo. 46Emubiri ola wêresibwe ekalamo kurengera eMuchima Mubuya-buya, atá íwatangiraa kuba'o, si emubiri we'mundu íwatangiraa. Chasinda, emubiri ola wêresibwe ekalamo kurengera eMuchima Mubuya-buya, nao era kwire ába'o. 47Emundu mubere-bere ábumbwaa mwa butaka, kanji análi we'butala. Si emundu wa kabiri, yeke átengaa kwa nguba. 48Ebandu be'butala, batúla bahúhire ola wábumbwaa mwa butaka, ne'bandu bo'kwa nguba, batúla bahúhire ola wátengaa kwa nguba. 49Rero ngo'kwa tutúla tuhúhire oyu mundu wábumbwaa mwa butaka, kuno'ku ku tukánahuha ola wátengaa kwa nguba.

50Banyaketu, bacha ku nàtechire: choshi cha chábumbwaa kwa mubiri ne'mikira, chìtangengirira mwa bwami bwa Ongo. Na choshi cha chìri che'kubola chìtangaata ekalamo ke'suku ne'mango.

51Rero, nera nábabihulira ono mwasi wábaa ùbishibwe: tuboshi tutákafe, si tuboshi tukábindulibwa. 52Ebyera bikába mu bihangi bieke, ngo'kwa mundu énde ásiba ne'kusibula eliho mango ekaperere kasinda-sinda kakábanjibwa'mo. Bushi mango kakábanjibwa'mo, ebafu bakômwoka, kanji batákachibe ba kubola, netu tukábindulibwa. 53Bushi byěmire ono mubiri we'kubola àbindulibwe kuba mubiri ola utá wékubola. Ne'mubiri we'kufa, byěmire àbindulibwe kuba mubiri ola utá wékufa. 54Na mango ono mubiri we'kubola akábindulibwa kuba ola utá wékubola, ne'mubiri we'kufa mango akábindulibwa kuba ola utá wékufa, mu mango echinwa chikáberera cha chitúla chiánjikirwe mwa Maanjiko Mabuya-buya mbu:

«Walufu asíkire, aímirwe loshi!»#15:54 Somaa Isaya 25:8.

55«Era walufu, ekuimana kwao, ngai yi'kuli?

Era walufu, ebuashi bwao bwe'kwîta ngai yi'bùli?»#15:55 Somaa Oseya 13:14.

56Walufu énde ábona ebuashi bwe'kwîta kurengera ebibi. Ne'bibi byénde byábona ebuashi kurengera eMwaso*. 57Si Ongo atóngwe, bushi iwénde wátuma twáimana kurengera Enawetu Yesu Kirisito!

58Bushi no'ku banyaketu basiirwa, musímikaa busese busira kuliya-liya. Muéndekeraa era muhondo mwa kukorera Enawetu esuku soshi, bushi mwìshi kwe'malibuko ma mwálola'ko bushi nai, matákafe buha.

ទើបបានជ្រើសរើសហើយ៖

1 Bakorindo 15: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya