Markos 8
8
Ya pagpakan ni Jisus sa upatemmalalan (4,000) ya manga utaw
1Dun ni manga allaw yan, migkatipun da uman ya madég to-o na manga utaw adti kan Jisus. Pagkabus da na makan nilan, pigtawag ni Jisus ya kanan manga umagakan, aw piglongan nan silan, 2“Nyallat aku sa manga utaw ini, kay seled na tulungallaw gayed silan asini sayid tadun, aw walaꞌ da ya un nilan makan. 3Kun pa-uli-en ku silan na walaꞌ ya pigkan, pagaw to-o silan magkalumay dun ni dalan. Kay awun eped kanilan na mawat pa ya un nilan uli-an.” 4Aw tyumubag ya kanan manga umagakan, “Ayin kitadun kamang sa makan asini kaligbinan ini na maka-umbaꞌ sa kadég na manga utaw yeiy?” 5Aw nyusip si Jisus kanilan, “Pilallapid ya pan mayu awun?” Aw tyumubag silan, “Pitullapid da.” 6Aw piglongan ni Jisus ya manga utaw na mingkud silan dun ni sakati. Aw pigkamang nan ya pitullapid ya pan, aw pigpasalamatan nan adti Tyumanem. Aw pagkatigkas yan, pigtenga-tengaꞌ nan adti kanan manga umagakan na un nilan uman atped-atped adti manga utaw. 7Aw pagkatigkas yan, kyumamang uman si Jisus sa mangkayantek na isdaꞌ na awun ni kanilan, aw pigpasalamatan nan ya Tyumanem. Aw piglongan nan ya manga umagakan nan na pan-atped-atpeden uman ya manga utaw na isdaꞌ. 8Kyuman ya kadég nilan aw alag silan nyangkabiyag. Aw pigpan-imun na manga umagakan nan ya nyasamaꞌ aw pitungka be-en na mabaklaꞌ ya dayaw nyangkatmuꞌ. 9Na, ya kadég na utaw na kyuman dun, manga upatemmalalan (4,000). Aw pagkatigkas nilan kuman, pigpapanaw silan ni Jisus. 10Aw maksay si Jisus aw manga umagakan nan syumakay sa balangay nilan pasinan adti banwa na Dalmanuta.
Ya pagsekat na manga Parisiyo sa pangilala
11Na, dyumulud ya manga Parisiyo kan Jisus aw gayed migpa-ayil kanan, kay yan ya tud nilan ya pagtandaꞌ kun si Jisus ya pigpadala na Tyumanem. Yanagaw migsekat silan kanan sa pangilala. 12Manang gyuminawa si Jisus na malalem aw nyusip kanilan, “Anangaꞌ ya manga utaw adun na manga allaw yeiy gayed migsekat sa pangilala? Matinaw ya un ku kamayu paglongun: Diliꞌ kamu saba atagan na pangilala!” 13Aw pig-indegan nan ya manga Parisiyo, aw syumakay si Jisus aw manga eped nan sa balangay, aw migpasinan adti dipag na danaw.
Ya pundinganan ni Jisus sa baluk na palna-u na manga Parisiyo
14Na, kyalingawan na manga umagakan ni Jisus ya dyumala sa pan, aw dakman sallapid ya pan na awun ni balangay. 15Aw miglong si Jisus kanilan, “Magpakatadeng kamu sa manga Parisiyo aw kan Hérodés, pagaw katapunan kamu na kanilan bet na kasiling na patulinay sa pan.”
16Aw migpanbalawbalaw silan, law nilan, “Yan gya ya du-an na piglong nan kay walaꞌ kitadun pakadala sa pan.” 17Manang kya-ede-an ni Jisus ya pigbalawbalawan nilan, yanagaw nyusip sakanan kanilan, “Anangaꞌ mayu balawbalawan ya walaꞌ ya pan? Unu, walaꞌ pa kaꞌ mayu kalabeti? Kenneꞌ kaꞌ na kategelan na anenganeng mayu? 18Awun saba mata mayu, anangaꞌ walaꞌ mayu kita-a? Awun saba talinga mayu, anangaꞌ walaꞌ mayu dengega? Unu, kyalingawlingawan da mayu ya kyinitaꞌ mayu 19sa pagtengaꞌ ku sa limallapid ya pan aw sa pagpakan ku sa limammalalan (5,000)? Na, pila ya be-en na nyatmuꞌ sa nyasamaꞌ na pigpan-imun mayu?” Tyumubag silan, “Sampuluꞌ tag duwa (12).” 20Nyusip pa si Jisus kanilan, “Sa pagtengaꞌ ku sa pitullapid ya pan aw sa pagpakan ku sa upatemmalalan (4,000) ya utaw, na, pila ya be-en na mabaklaꞌ na nyatmuꞌ sa nyasamaꞌ na pigpan-imun mayu?” Aw tyumubag silan, “Pitungka be-en na mabaklaꞌ.” 21Aw nyusip si Jisus kanilan, “Unu, walaꞌ pa mayu kalabeti na bekeꞌ na tengteng pan ya pyalabet ku?”
Ya pagpaguliꞌ ni Jisus sa eseg na buta
22Pagdateng ni Jisus aw manga umagakan nan adti Bétsayda, awun manga utaw na mig-agak sa eseg na buta pasinan adti kan Jisus, aw nyanginayuꞌ silan kanan na awidan nan ya eseg yan. 23Pig-agak ni Jisus ya eseg na buta aw pigpa-agad nan adti luwaꞌ na baranggay. Aw tigkas yan, pigdamus ni Jisus ya kanan laway adti mata na utaw yan aw betangi nan na kanan manga palad, aw nyusip si Jisus kanan, “Unu, awun da kyinitaꞌ mu?” 24Pagtandaw na eseg yan, miglong sakanan, “E-e, kyinitaꞌ da ku ya manga utaw manang kasiling silan na manga kawuy na migpanawpanaw.” 25Aw pigbetang pa uman ni Jisus ya manga palad nan adti manga mata na eseg. Aw sa pagtandaw nan salut, dayaw da kyumitaꞌ aw mabangal da ya pag-inunu nan. 26Aw pagkatigkas yan, pigpa-uliꞌ sakanan ni Jisus aw piglongan nan, “Sa pag-uliꞌ mu, diliꞌ kaw mag-agi adti baranggay.”
Ya tubag ni Pédro kun singalan si Jisus
27Pagkatigkas yan, nyindeg si Jisus aw manga umagakan nan aw nyanaw silan adti manga baranggay sakup na lunsud na Césariya Pilipos. Aw sa talana nilan nyanaw, pig-usip nan silan, “Dun ni pagbalawbalaw na manga utaw, singalan kunu aku?” 28Aw tyumubag silan, “Ya eped miglong na ikaw kunu si Juan na Magba͡utismuway, aw awun eped miglong na ikaw kunu si Éliyas, aw awun pa eped miglong na ikaw ya sambuk na propita.” 29Aw nyusip pa si Jisus kanilan, “Manang adti kamayu, singalan aku?” Aw tyumubag si Pédro, “Ikaw saba ya Misiyas.” 30Aw piglongan silan ni Jisus na diliꞌ nilan pagpa-edeꞌ adti eped na utaw kun singalan sakanan.
Ya tagnaꞌ na pagpa-edeꞌ ni Jisus sa pagkamatay aw pagkataw nan
31Aw pigpalekat ni Jisus ya miglong adti kanan manga umagakan, “Aku na Iseꞌ na Utaw ka-ilangan magti-is aw kele͡an na manga magdadumala͡ay sa manga Judiyu aw manga mangkatas na magdadugsu-ay aw manga magpalna-uway sa Uldin. Aw un aku nilan papatay, manang pagkatlu na allaw mataw aku.” 32To-o ni Jisus pigbangal kanilan ya un ma-imoꞌ kanan. Aw pigpa-agad sakanan ni Pédro adti diliꞌ to-o mawat sa manga eped nilan, aw pigpalekat ni Pédro ya pagsagda kanan. 33Manang nyatubang si Jisus adti manga umagakan nan, aw pigsagda nan si Pédro, law nan, “Pagpakawat kaw kanak! Ya piglong mu lekat saba adti kan Satanas. Walaꞌ mu betangan adti kanmu anenganeng ya kana Tyumanem pagkaliman. Yan oloꞌ ya pig-anenganeng mu ya kana utaw.”
34Pagkatigkas yan, pigtawag ni Jisus ya madég na manga utaw aw ya kanan manga umagakan, aw piglongan nan silan, “Pangkay singalan ya malim ma-imoꞌ kanak umagakan, ka-ilangan nan ayawan ya kanan pagkaliman aw pisanen nan ya kanan krus aw dumalug kanak. 35Kay pangkay singalan ya gyuminawa sa pag-eyaꞌ nan asini tas na lupaꞌ, kalagakan baling sa ginawa na walaꞌ ya katigkasan. Manang kun singalan ya magtibulluk dumalug kanak pangkay pa adti pagkamatay pada magpa-edeꞌ sa Madyaw na Ubat-ubat, yan ya un makatagtun sa ginawa na walaꞌ ya katigkasan. 36Unu kaꞌ ya un ma-untung na utaw kun matagtun nan ya kadakulaꞌ na banwa manang kalagakan baling sa ginawa na walaꞌ ya katigkasan? 37Aw unu uman ya nyatagtun na utaw na umbaꞌ nan pagliwan sa ginawa na walaꞌ ya katigkasan? 38“Ya manga utaw asini tas na lupaꞌ adun na manga allaw yeiy, gayed silan migpakasalaꞌ, aw kasiling silan na ka͡ubayan na miglakadenen. Aw kun singalan ya mamulamula asuntu kanak na Iseꞌ na Utaw aw mamulamula asuntu sa palna-u ku, kamulamula ku uman ya utaw yan dun ni allaw na paglikuꞌ ku asini tas na lupaꞌ. Aw dun ni kanak paglikuꞌ kita-en ya dakulaꞌ na kalalamdag na pagka Tyumanem na kanak Ama, aw eped ku ya manga anghil lekat adti tas na langit.”
ទើបបានជ្រើសរើសហើយ៖
Markos 8: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
Markos 8
8
Ya pagpakan ni Jisus sa upatemmalalan (4,000) ya manga utaw
1Dun ni manga allaw yan, migkatipun da uman ya madég to-o na manga utaw adti kan Jisus. Pagkabus da na makan nilan, pigtawag ni Jisus ya kanan manga umagakan, aw piglongan nan silan, 2“Nyallat aku sa manga utaw ini, kay seled na tulungallaw gayed silan asini sayid tadun, aw walaꞌ da ya un nilan makan. 3Kun pa-uli-en ku silan na walaꞌ ya pigkan, pagaw to-o silan magkalumay dun ni dalan. Kay awun eped kanilan na mawat pa ya un nilan uli-an.” 4Aw tyumubag ya kanan manga umagakan, “Ayin kitadun kamang sa makan asini kaligbinan ini na maka-umbaꞌ sa kadég na manga utaw yeiy?” 5Aw nyusip si Jisus kanilan, “Pilallapid ya pan mayu awun?” Aw tyumubag silan, “Pitullapid da.” 6Aw piglongan ni Jisus ya manga utaw na mingkud silan dun ni sakati. Aw pigkamang nan ya pitullapid ya pan, aw pigpasalamatan nan adti Tyumanem. Aw pagkatigkas yan, pigtenga-tengaꞌ nan adti kanan manga umagakan na un nilan uman atped-atped adti manga utaw. 7Aw pagkatigkas yan, kyumamang uman si Jisus sa mangkayantek na isdaꞌ na awun ni kanilan, aw pigpasalamatan nan ya Tyumanem. Aw piglongan nan ya manga umagakan nan na pan-atped-atpeden uman ya manga utaw na isdaꞌ. 8Kyuman ya kadég nilan aw alag silan nyangkabiyag. Aw pigpan-imun na manga umagakan nan ya nyasamaꞌ aw pitungka be-en na mabaklaꞌ ya dayaw nyangkatmuꞌ. 9Na, ya kadég na utaw na kyuman dun, manga upatemmalalan (4,000). Aw pagkatigkas nilan kuman, pigpapanaw silan ni Jisus. 10Aw maksay si Jisus aw manga umagakan nan syumakay sa balangay nilan pasinan adti banwa na Dalmanuta.
Ya pagsekat na manga Parisiyo sa pangilala
11Na, dyumulud ya manga Parisiyo kan Jisus aw gayed migpa-ayil kanan, kay yan ya tud nilan ya pagtandaꞌ kun si Jisus ya pigpadala na Tyumanem. Yanagaw migsekat silan kanan sa pangilala. 12Manang gyuminawa si Jisus na malalem aw nyusip kanilan, “Anangaꞌ ya manga utaw adun na manga allaw yeiy gayed migsekat sa pangilala? Matinaw ya un ku kamayu paglongun: Diliꞌ kamu saba atagan na pangilala!” 13Aw pig-indegan nan ya manga Parisiyo, aw syumakay si Jisus aw manga eped nan sa balangay, aw migpasinan adti dipag na danaw.
Ya pundinganan ni Jisus sa baluk na palna-u na manga Parisiyo
14Na, kyalingawan na manga umagakan ni Jisus ya dyumala sa pan, aw dakman sallapid ya pan na awun ni balangay. 15Aw miglong si Jisus kanilan, “Magpakatadeng kamu sa manga Parisiyo aw kan Hérodés, pagaw katapunan kamu na kanilan bet na kasiling na patulinay sa pan.”
16Aw migpanbalawbalaw silan, law nilan, “Yan gya ya du-an na piglong nan kay walaꞌ kitadun pakadala sa pan.” 17Manang kya-ede-an ni Jisus ya pigbalawbalawan nilan, yanagaw nyusip sakanan kanilan, “Anangaꞌ mayu balawbalawan ya walaꞌ ya pan? Unu, walaꞌ pa kaꞌ mayu kalabeti? Kenneꞌ kaꞌ na kategelan na anenganeng mayu? 18Awun saba mata mayu, anangaꞌ walaꞌ mayu kita-a? Awun saba talinga mayu, anangaꞌ walaꞌ mayu dengega? Unu, kyalingawlingawan da mayu ya kyinitaꞌ mayu 19sa pagtengaꞌ ku sa limallapid ya pan aw sa pagpakan ku sa limammalalan (5,000)? Na, pila ya be-en na nyatmuꞌ sa nyasamaꞌ na pigpan-imun mayu?” Tyumubag silan, “Sampuluꞌ tag duwa (12).” 20Nyusip pa si Jisus kanilan, “Sa pagtengaꞌ ku sa pitullapid ya pan aw sa pagpakan ku sa upatemmalalan (4,000) ya utaw, na, pila ya be-en na mabaklaꞌ na nyatmuꞌ sa nyasamaꞌ na pigpan-imun mayu?” Aw tyumubag silan, “Pitungka be-en na mabaklaꞌ.” 21Aw nyusip si Jisus kanilan, “Unu, walaꞌ pa mayu kalabeti na bekeꞌ na tengteng pan ya pyalabet ku?”
Ya pagpaguliꞌ ni Jisus sa eseg na buta
22Pagdateng ni Jisus aw manga umagakan nan adti Bétsayda, awun manga utaw na mig-agak sa eseg na buta pasinan adti kan Jisus, aw nyanginayuꞌ silan kanan na awidan nan ya eseg yan. 23Pig-agak ni Jisus ya eseg na buta aw pigpa-agad nan adti luwaꞌ na baranggay. Aw tigkas yan, pigdamus ni Jisus ya kanan laway adti mata na utaw yan aw betangi nan na kanan manga palad, aw nyusip si Jisus kanan, “Unu, awun da kyinitaꞌ mu?” 24Pagtandaw na eseg yan, miglong sakanan, “E-e, kyinitaꞌ da ku ya manga utaw manang kasiling silan na manga kawuy na migpanawpanaw.” 25Aw pigbetang pa uman ni Jisus ya manga palad nan adti manga mata na eseg. Aw sa pagtandaw nan salut, dayaw da kyumitaꞌ aw mabangal da ya pag-inunu nan. 26Aw pagkatigkas yan, pigpa-uliꞌ sakanan ni Jisus aw piglongan nan, “Sa pag-uliꞌ mu, diliꞌ kaw mag-agi adti baranggay.”
Ya tubag ni Pédro kun singalan si Jisus
27Pagkatigkas yan, nyindeg si Jisus aw manga umagakan nan aw nyanaw silan adti manga baranggay sakup na lunsud na Césariya Pilipos. Aw sa talana nilan nyanaw, pig-usip nan silan, “Dun ni pagbalawbalaw na manga utaw, singalan kunu aku?” 28Aw tyumubag silan, “Ya eped miglong na ikaw kunu si Juan na Magba͡utismuway, aw awun eped miglong na ikaw kunu si Éliyas, aw awun pa eped miglong na ikaw ya sambuk na propita.” 29Aw nyusip pa si Jisus kanilan, “Manang adti kamayu, singalan aku?” Aw tyumubag si Pédro, “Ikaw saba ya Misiyas.” 30Aw piglongan silan ni Jisus na diliꞌ nilan pagpa-edeꞌ adti eped na utaw kun singalan sakanan.
Ya tagnaꞌ na pagpa-edeꞌ ni Jisus sa pagkamatay aw pagkataw nan
31Aw pigpalekat ni Jisus ya miglong adti kanan manga umagakan, “Aku na Iseꞌ na Utaw ka-ilangan magti-is aw kele͡an na manga magdadumala͡ay sa manga Judiyu aw manga mangkatas na magdadugsu-ay aw manga magpalna-uway sa Uldin. Aw un aku nilan papatay, manang pagkatlu na allaw mataw aku.” 32To-o ni Jisus pigbangal kanilan ya un ma-imoꞌ kanan. Aw pigpa-agad sakanan ni Pédro adti diliꞌ to-o mawat sa manga eped nilan, aw pigpalekat ni Pédro ya pagsagda kanan. 33Manang nyatubang si Jisus adti manga umagakan nan, aw pigsagda nan si Pédro, law nan, “Pagpakawat kaw kanak! Ya piglong mu lekat saba adti kan Satanas. Walaꞌ mu betangan adti kanmu anenganeng ya kana Tyumanem pagkaliman. Yan oloꞌ ya pig-anenganeng mu ya kana utaw.”
34Pagkatigkas yan, pigtawag ni Jisus ya madég na manga utaw aw ya kanan manga umagakan, aw piglongan nan silan, “Pangkay singalan ya malim ma-imoꞌ kanak umagakan, ka-ilangan nan ayawan ya kanan pagkaliman aw pisanen nan ya kanan krus aw dumalug kanak. 35Kay pangkay singalan ya gyuminawa sa pag-eyaꞌ nan asini tas na lupaꞌ, kalagakan baling sa ginawa na walaꞌ ya katigkasan. Manang kun singalan ya magtibulluk dumalug kanak pangkay pa adti pagkamatay pada magpa-edeꞌ sa Madyaw na Ubat-ubat, yan ya un makatagtun sa ginawa na walaꞌ ya katigkasan. 36Unu kaꞌ ya un ma-untung na utaw kun matagtun nan ya kadakulaꞌ na banwa manang kalagakan baling sa ginawa na walaꞌ ya katigkasan? 37Aw unu uman ya nyatagtun na utaw na umbaꞌ nan pagliwan sa ginawa na walaꞌ ya katigkasan? 38“Ya manga utaw asini tas na lupaꞌ adun na manga allaw yeiy, gayed silan migpakasalaꞌ, aw kasiling silan na ka͡ubayan na miglakadenen. Aw kun singalan ya mamulamula asuntu kanak na Iseꞌ na Utaw aw mamulamula asuntu sa palna-u ku, kamulamula ku uman ya utaw yan dun ni allaw na paglikuꞌ ku asini tas na lupaꞌ. Aw dun ni kanak paglikuꞌ kita-en ya dakulaꞌ na kalalamdag na pagka Tyumanem na kanak Ama, aw eped ku ya manga anghil lekat adti tas na langit.”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.