Markos 14
14
Ya palpa sa pagpatay kan Jisus
1Na, dakman duwangallaw magpalekat da ya Pista na Paglabay na Anghil na Tyumanem aw ya Pista na Pan na Walaꞌ Patulina.#14:1 Mabasa adti Éxudo 12 ya pagpa-edeꞌ sa duwa ya pista ini. Dun ni allaw ni Jisus, migdengan migpalekat ya duwa ya pista. Sanggabi oloꞌ ya Pista na Paglabay na Anghil na Tyumanem, aw sangka simana ya Pista na Pan na Walaꞌ Patulina. Ya manga mangkatas na magdadugsu-ay aw manga magpalna-uway sa Uldin na manga Judiyu, gayed silan mig-anenganeng kun unun nilan ya pagdakep kan Jisus na tagu-taguꞌ, kay kaliman nilan patayen sakanan. 2Manang miglong silan, “Diliꞌ tadun yeiy imo-un sa allaw na Pista pagaw magubut baling ya manga utaw.”
Ya pag-asag na ka͡ubayan sa manimboꞌ adti ulu ni Jisus
3Na, si Jisus aw ya manga umagakan nan nyadtu silan ni baranggay na Bétaniya. Aw kyuman silan adti balay ni Simon na awun ibung idtu muna. Talana ni Jisus kyuman, dyumulud kanan ya sambuk na ka͡ubayan na dyumala sa sabuy na pig-imoꞌ lekat adti batu na alabastro, aw adti seled awun to-o manimboꞌ na pigngalanan na nardo. Aw dakulaꞌ to-o ya alagaꞌ kay walaꞌ ya nyakadaliꞌ. Pigbukasan nan ya sabuy aw pig-asag nan adti ulu ni Jisus. 4Manang ya manga utaw dun, sa pagkitaꞌ nilan sa pig-imoꞌ na ka͡ubayan yan, ya eped kanilan to-o nyadaman aw miggumudgumud, law nilan, “Syapadan ya manimboꞌ iyan! 5Kay ya alagaꞌ nan sangka͡umay na utaw talabahuwan, aw kun piggalin pa yeiy, ya kuwalta atag galu adti manga utaw na walaꞌ ya pagkamangan.” Aw to-o nilan pigsalaꞌ ya ka͡ubayan yan. 6Manang miglong si Jisus kanilan, “Pabaya-i mayu sakanan. Anangaꞌ mayu sala-en? Madyaw saba ya pig-imoꞌ nan kanak. 7Ya manga utaw na walaꞌ ya pagkamangan gayed mayu pig-iyeped, aw pangkay kinunu mayu silan tabangan mabatug mayu saba. Manang aku, diliꞌ da aku madugay asini sayid mayu. 8Ya ka͡ubayan ini, pig-imoꞌ nan ya kanan mabatug pada mamasa kanak. Aw dun ni pag-asag nan sa manimboꞌ asini lawas ku, yan ya palangad pagtagilan nan dadan sa kanak lebeng. 9Matinaw saba ya un ku paglongun kamayu: Pangkay ayin pa-ede-an ya Madyaw na Ubat-ubat adti kadakulaꞌ na banwa, gayed uman ubat-ubat ya pig-imoꞌ nan kanaken pada diliꞌ sakanan kalingawan.”
Ya paglubid ni Judas kan Jisus
10Na, dun ni sampuluꞌ tag duwa (12) ya umagakan ni Jisus, ya sambuk kanilan si Judas Iskariyoti. Aw nyadtu sakanan adti manga mangkatas na magdadugsu-ay pada lubidan si Jisus. 11Pagdengeg nilan sa tud nan, migleya to-o silan, aw pigpakangan nilan si Judas na atagan nilan sakanan na kuwalta. Yanagaw tyumagad si Judas sa selat pada lubidan nan si Jisus adti kanilan.
Ya pagpangiyambung ni Jisus eped ya kanan manga umagakan
12Na, dyumateng da ya tagnaꞌ na allaw na Pista na Pan na Walaꞌ Patulina. Yeiy ya allaw na magsi-iyaw ya manga Judiyu sa nati na karniro na un nilan kanen dun ni pangiyambungay sa Pista na Paglabay na Anghil na Tyumanem. Nyusip kan Jisus ya manga umagakan nan, law nilan, “Ayin ya kaliman mu pakadtuwan kanami pada tagilanen kanmu ya pangiyambungay sa Pista?” 13Yanagaw pigsuguꞌ ni Jisus ya duwa ya umagakan nan, law nan, “Kadtu kamu ni Jérusalim. Pagdateng mayu dun, awun sumungun kamayu na sambuk na eseg na dumala sa sibulan na syeledan na tubig. Agad kamu kanan. 14Aw sa pagseled nan adti balay, paglonga mayu ya tagtun sa balay yan, ‘Nyameneꞌ ya Magpalna-uway: Ayin kunu ya tambiꞌ na un nan pagkanan sa pangiyambungay sa Pista eped nan ya kanan manga umagakan?’ 15Aw pakitaꞌ nan kamayu ya dakulaꞌ na gibalayan adti kadwa na kansad na balay na dadan da nilan pigtagilan. Aw dun da mayu tagilana ya pangiyambungay tadun.” 16Yanagaw nyanaw ya duwa ya umagakan ni Jisus adti syudad. Aw pagdateng nilan dun, kyinitaꞌ nilan ya kadég na piglong ni Jisus kanilan. Aw pigtagilan nilan ya pangiyambungay sa Pista na Paglabay na Anghil na Tyumanem.
17Aw sa pagkamagsiklep da, dyumateng si Jisus aw ya sampuluꞌ tag duwa (12) ya umagakan nan. 18Aw sa talana nilan kyuman, miglong si Jisus kanilan, “Matinaw saba ya un ku kamayu paglongun: Awun sambuk kamayu asini eped ku kyuman na un maglubid kanak.” 19Pagdengeg na manga umagakan nan, migkalat to-o ya ginawa nilan. Aw nyusip ya tagsambuksambuk kanilan, “Unu, bekeꞌ ku ya pyalabet mu?” 20Aw tyumubag si Jisus kanilan, “Dun ni kamayu na sampuluꞌ tag duwa (12), awun sambuk na tyumugmuk sa pan eped ku asini lipung ini na yan ya un maglubid kanak. 21Aku na Iseꞌ na Utaw un saba patayen kasiling na dadan da pigpasulat asini muna. Manang malatay ya un datengan na utaw na maglubid kanak. Madyaw pa baling kanan ya walaꞌ ka͡utaw asini tas na lupaꞌ.”
22Talana nilan kyuman, migkamang si Jisus sa pan aw pigpasalamatan nan ya Tyumanem. Tigkas yan, pigtenga-tengaꞌ nan ya pan aw pigpan-atag nan adti manga umagakan nan aw law nan, “Dawata mayu aw kana. Yeiy ya kanak lawas.” 23Pagkatigkas yan, pigkamang nan uman ya tabuꞌ na pigseledan sa bino aw pigpasalamatan nan ya Tyumanem. Aw pigdimil nan kanilan ya tabuꞌ, aw nyinem ya tagsambuksambuk kanilan. 24Aw piglongan nan silan, “Yeiy ya kanak duguꞌ na un pa-iligen pada sa kadég na manga utaw. Magi sa duguꞌ ku, yan ya magpa-iganget sa bagu na pakang na Tyumanem. 25Matinaw saba ya un ku paglongun kamayu: Diliꞌ da ku salutun ya minem sa bino na paras mendaꞌ sa allaw na adtu la aku inem sa bagu na bino adti Kasakupan na Pighari-an na Tyumanem.” 26Pagkatigkas ni Jisus maglong, migdalangan silan sa pagdeyen adti Tyumanem. Aw pig-indegan nilan ya Jérusalim aw tyumukud silan adti Buntud na Manga Olibo.
Ya pagpa-edeꞌ ni Jisus na balyaw sakanan ni Pédro
27Aw sa dun pa silan ni dalan, miglong si Jisus kanilan, “Ayawan aku na kadég mayu. Kasiling na pigpasulat dadan na Tyumanem: ‘Patayen ku ya magdadiyaga͡ay aw magpanbeklag ya manga karniro nan.’ #14:27 Mabasa adti Zakariyas 13:7. 28Manang mataw aku lekat adti pagkamatay. Aw muna aku kamayu adti Galiliya.” 29Aw miglong si Pédro kanan, “Pangkay ayawan kaw na kadég nilan, manang aku, diliꞌ ta kaw ayawan!” 30Aw miglong si Jisus kanan, “Matinaw saba ya un ku paglongun kanmu: Kagaya na gabi, sa diliꞌ pa tumaga-uk ya manuk na makadwa, balyaw aku mu na makatlu.” 31Manang gayed uman miglong si Pédro, “Bekeꞌ yan! Pangkay patayen pa aku nilan eped mu, manang ya magbalyaw kanmu, diliꞌ ku yan ma-imoꞌ!” Aw maynan uman ya piglong na kadég na manga eped nan.
Ya pagpanawagtawag ni Jisus dun ni Gétsémani
32Na, dyumateng si Jisus aw ya manga umagakan nan adti banwa na pigngalanan na Gétsémani. Aw miglong si Jisus kanilan, “Ingkud da kamu asini talana ku adtu manawagtawag.” 33Manang pigpa-agad nan si Pédro, aw si Santiago, aw si Juan. Aw walaꞌ katingen ya anenganeng ni Jisus, aw to-o migkalat ya ginawa nan. 34Aw piglongan nan silan, “Liwan na un da aku matay sangadi sa kakalatan na ginawa ku. Pagtagad pa kamu asini aw pagpulaw kamu.”
35Aw migpa-awat si Jisus kanilan tagbiꞌ. Aw lyumuhud sakanan adti lupaꞌ aw nyanawagtawag adti Tyumanem na kun mabatug, diliꞌ galu dumateng adti kanan ya pagti-is, 36law ni Jisus, “Kay Maꞌ, mabatug mu saba ya pangkay unu. Kun kaliman mu, kamanga beg kanak ya pagti-is na un ku ka-agiyan. Manang bekeꞌ na kanak pagkaliman ya matuman. Yan baling ya matuman ya kanmu pagkaliman.”
37Paglikuꞌ ni Jisus adti tulu ya umagakan nan, kyinitaꞌ nan na nyampakatulug da silan. Yanagaw piglongan nan si Pédro, “Kay Simon, anangaꞌ kaw makatulug? Unu, diliꞌ mu mabatug ya pagpulaw pangkay da oloꞌ sangka-udas? 38Pagpulaw kamu aw panawagtawag kamu pada diliꞌ kamu degen na pagtandaꞌ. Kaliman galu na utaw ya manawagtawag, manang pigdeg baling na kalumay na kanan lawas.” 39Aw migpa-awat da uman si Jisus kanilan aw nyanawagtawag adti Ama nan, aw pigsalut nan ya tagnaꞌ na panawagtawag nan.
40Aw lyumikuꞌ pa salut si Jisus adti kanilan, aw kyinitaꞌ nan na uman da silan nyampakatulug, kay to-o silan pigtudtud. Aw walaꞌ nilan ka-ede-i kun unu ya un nilan tubag kanan. 41Aw katlu ni Jisus lyumikuꞌ adti kanilan, piglongan nan silan, “Unu, kenneꞌ pa mayu kyumulang aw nyakatulug? Umbaꞌ da yan! Dyumateng da ya udas na aku na Iseꞌ na Utaw un lubidan aw tumbay adti manga makasasalaꞌ. 42Pagbangun kamu! Kitadun da! Iyan da ya utaw na un maglubid kanak.”
Ya pagdakep kan Jisus
43Sa talana pa ni Jisus miglong, dyumateng si Judas Iskariyoti. Sambuk sakanan dun ni sampuluꞌ tag duwa (12) ya umagakan ni Jisus. Eped nan ya madég na utaw na nyandala sa kampilan aw babunal. Pigsuguꞌ silan na manga mangkatas na magdadugsu-ay, aw manga magpalna-uway sa Uldin, aw manga magdadumala͡ay sa manga Judiyu. 44Na, dadan da silan ni Judas pigpa-edeꞌ sa pangilala, law nan, “Ya utaw na alekan ku, yan ya dakepen mayu. Pa-agadan mayu aw dayaw mayu tunggu-i.” 45Yanagaw pagdateng nilan dun, dyumulud si Judas adti kan Jisus aw miglong, “Kay Magpalna-uway!” Aw pig-alekan nan si Jisus. 46Aw tigkan nilan pigdulus si Jisus aw pigdakep nilan.
47Aw ya sambuk na utaw na malapit dun, pigtagnus nan ya kanan kampilan, aw pigtibas nan ya sugu-anen na pangulu na manga magdadugsu-ay, aw nya-ilap ya talinga nan. 48Aw tigkas yan, miglong si Jisus adti manga utaw na migdakep kanan, “Anangaꞌ kamu dumala sa manga kampilan aw babunal? Kasiling kamu na migdakep sa ribildi! 49Kada allaw awun aku ni Témplo migpalna-u, aw walaꞌ aku mayu dakepa. Manang ka-ilangan na ma-imoꞌ yeiy pada matuman ya pigpasulat dadan na Tyumanem.” 50Aw ya manga umagakan ni Jisus, nyabus silan nyampamalaguy aw pig-ayawan nilan si Jisus.
51Awun sambuk na bataꞌ na dyumalug adti moli ni Jisus, aw oloꞌ migkulimot sa kayab. Pigdakep galu uman nilan, 52manang kya-ayawan ya kayab nan aw nyakapalaguy sakanan na walaꞌ ya kadégkadég.
Ya pagpa-agad kan Jisus adti asdangan na manga mag-usayay
53Pagkatigkas yan, pigpa-agad nilan si Jisus adti balay na pangulu na manga magdadugsu-ay. Aw migpangkatipun dun ya kadég na mangkatas na magdadugsu-ay, aw manga magdadumala͡ay sa manga Judiyu, aw manga magpalna-uway sa Uldin. 54Aw dyumalug si Pédro kanilan manang migpa-awatawat kan Jisus aw taman da oloꞌ sakanan dun ni pamanag na balay na pag-usayan. Aw talana nilan adti seled, nyingkud si Pédro dun ni sayid na manga magtatunggu-ay malapit dun ni atulun kay nyanalang sakanan. 55Na, adti seled, dun ya manga mangkatas na magdadugsu-ay aw ya kadég na matas na mag-usayay. Aw gayed silan nyaninaw sa utaw na magtanemtanem sa mabegat na salaꞌ adti kan Jisus, manang walaꞌ ya kyinitaꞌ nilan na puliba na umbaꞌ sakanan patayen.#14:55 Yan ya du-an na nyaninaw ya mag-usayay na manga Judiyu sa utaw na magtanemtanem kan Jisus, pada awun puliba nilan na umbaꞌ sakanan patayen, kay walaꞌ ya katundanan nilan mag-ukum sa utaw na patayen. Oloꞌ saba gubirnador na taga Roma ya awun katundanan. 56Pangkay awun madég na utaw na migmatinaw sa galuꞌ adti kanan, manang walaꞌ pag-unawa ya ubat-ubat nilan.
57Aw awun uman manga eped na utaw na nyindeg adti asdangan na kadég nilan aw migmatinaw silan sa galuꞌ adti kan Jisus, law nilan, 58“Dyengeg nami ya utaw yeiy na miglong, ‘Kalaten ku ya Témplo ini na pig-imoꞌ na utaw, aw seled na tulungallaw, pa-indegen ku ya bagu na walaꞌ imo-a na utaw.’ ” 59Pangkay maynan ya pig-ubat nilan, manang kenneꞌ na walaꞌ pag-unawa ya piglong nilan.
60Pagkatigkas yan, nyindeg ya pangulu na manga magdadugsu-ay adti asdangan na kadég, aw nyusip kan Jisus, “Unu, walaꞌ ya tubag mu sa diklamu nilan kanmu?” 61Manang walaꞌ si Jisus tubag kanan. Aw pig-usip da nan uman, “Unu, ikaw kaꞌ ya Misiyas, ya Iseꞌ na Tyumanem na To-o Pagdeyen?” 62Aw tyumubag si Jisus, “E-e, aku saba. Aw kita-en mayu aku na Iseꞌ na Utaw na mingkud apit adti kalintu na Tyumanem na To-o Matulus. Aw kita-en aku mayu uman na lumikuꞌ na ka-agadan na manga labun.” 63Pagdengeg na pangulu na manga magdadugsu-ay sa tubag ni Jisus, pigkéséꞌ nan ya kanan sa-ul kay to-o sakanan nyadaman, aw miglong, “Anangaꞌ pa kitadun maninaw sa eped na un magmatinaw? 64Dyengeg da mayu saba ya piglong nan na malatay adti Tyumanem. Migpa-unawa sakanan sa Tyumanem! Na, unu ya kamayu pagbayaꞌ?” Yanagaw, pig-ukuman nilan si Jisus na umbaꞌ sakanan patayen.#14:64 Dun ni Uldin na manga Judiyu, pangkay singalan ya maglong sa malatay adti Tyumanem, patayen saba ya utaw yan. Mabasa adti Libitiko 24:16.
65Aw ya eped kanilan migpalekat mig-eleb-eleb kan Jisus. Aw pigtampeng nilan ya mata nan aw pigbadasan nilan na sumbag, aw law nilan, “Na, ubatan kanami kun singalan ya migsumbag kanmu!” Tigkas yan, pigkamang na manga magtatunggu-ay si Jisus aw gayed nilan pigpanampal.
Ya pagbalyaw ni Pédro kan Jisus
66Na, talana ni Pédro adti pamanag na balay, awun sambuk na ka͡ubayan na dyumateng na yeiy ya sugu-anen na pangulu na manga magdadugsu-ay. 67Aw sa pagkitaꞌ nan kan Pédro na nyanalang, pigtengtengan nan aw miglong, “Ikaw uman ya eped ni Jisus na taga Nazarit!” 68Manang migbalyaw si Pédro, law nan, “Walaꞌ ku ka-ede-i ya piglong mu!” Aw mig-alin si Pédro adti suwangan na pamanag. Aw tigkas yan tyumaga-uk ya manuk. 69Walaꞌ kadugay, kyinitaꞌ da uman na sugu-anen si Pédro, aw miglong adti manga utaw dun, “Ya eseg iyan, eped nilan saba!” 70Manang uman da ni Pédro pigbalyaw. Aw walaꞌ kadugay, miglong kan Pédro ya manga utaw dun na mig-indeg-indeg, “Matinaw saba na ikaw ya sambuk kanilan, kay ya linitukan mu kasiling na taga Galiliya.” 71Aw pigpalekat ni Pédro ya migsapaꞌ, law nan, “Matay pa aku, walaꞌ ku saba kilala͡a ya utaw yan na piglong mayu!” 72Aw dyengeg nan ya kadwa na pagtaga-uk na manuk, aw dun da ni Pédro ka-anenganengi ya piglong ni Jisus kanan, “Sa diliꞌ pa tumaga-uk ya manuk na makadwa, balyaw aku mu na makatlu.” Aw migkalat ya ginawa ni Pédro aw to-o sakanan migsugaw.
ទើបបានជ្រើសរើសហើយ៖
Markos 14: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.