Markos 13
13
Ya pagpa-edeꞌ ni Jisus na un kalaten ya Témplo
1Na, pagluwaꞌ da ni Jisus adti Témplo, miglong kanan ya sambuk na umagakan nan, “Kay Magpalna-uway, tandawi ya manga mangkabaklaꞌ na batu na pig-imoꞌ Témplo! To-o madyaw ya pagka-imoꞌ na kadég!” 2Aw miglong si Jisus, “Ya Témplo na pigkitaꞌ mayu adun aw eped pa iyan ni pamanag, dumateng ya allaw na mabus silan magkalat. Ya manga mangkabaklaꞌ na batu na pig-ilantulantu iyan, ya kadég yeiy alag saba mangkagettan.”
Ya manga pagti-is aw kalugan na un dumateng
3Pagkatigkas yan, tyumukud si Jisus adti Buntud na Manga Olibo dun ni dipag na Témplo aw nyingkud dun. Aw dyumulud kanan si Pédro, si Santiago, si Juan aw si Andrés, aw nyusip silan kan Jisus, 4“Ubati kami kun kinunu katuman ya kadég na piglong mu kakayna. Aw unu ya pangilala na agpet da ya allaw yan?”
5Aw tyumubag si Jisus, “Magpakatadeng kamu pagaw awun magpasuway kamayu. 6Kay awun madég na utaw na un dumateng na dumala sa kanak ngalan aw maglong silan, ‘Aku saba ya Misiyas’ aw madég ya gawayan nilan. 7Aw makadengeg kamu sa manga dakulaꞌ na tanam na malapit adti kamayu aw manga ubat-ubat uman sa tanam adti eped na manga banwa, manang diliꞌ kamu magkallek. Ka-ilangan una ma-imoꞌ ya kadég yeiy manang bekeꞌ pa nan ya katigkasan. 8Kay ya sambuk na nasud manubbuk sa eped na nasud, aw ya sambuk na kasakupan tumanam sa eped na kasakupan. Awun manga linug adti madég na banwa aw dumateng ya dakulaꞌ na getem. Aw oloꞌ pa yan pagpalekat sa pagti-is na un dumateng, kasiling na ka͡ubayan na bagu pyetesan.
9“Magpakatanaw kamu! Kay awun manga utaw na malim maglimanda aw magdala kamayu adti usayanan. Aw badasan kamu nilan na lalabet dun ni seled na sinagoga nilan. Asuntu sa pagpangintu-u mayu kanak, un kamu nilan pa-indegen adti asdangan na manga gubirnador aw manga hariꞌ, aw dun da kamu pakaselat pagpa-edeꞌ kanilan sa Madyaw na Ubat-ubat kanak. 10Aw sa diliꞌ pa dumateng ya katigkasan, ka-ilangan una pa-edeꞌ adti kadég na manga banwa ya Madyaw na Ubat-ubat. 11Yanagaw kun pandakepen kamu aw pan-usipen na mag-usayay, diliꞌ magkakamang ya ginawa mayu sa un mayu tubag. Kay dun ni udas yan, ya Ispiritu Santo yan ya maggagad sa kamayu anenganeng sa un mayu tubag kanilan.
12“Dun ni manga allaw yan, awun manga mangkaylug na magtumbay sa inulug nan adti manga po-on pada patayen. Aw maynan uman awun manga ama na magtumbay sa kanilan iseꞌ na patayen. Aw awun manga iseꞌ na matu sa mangkatikadeng nilan aw magtumbay kanilan adti manga po-on pada patayen. 13Aw dumutan kamu na madég na manga utaw asuntu sa pagdalug mayu kanak. Manang pangkay singalan ya magpadeleg dun ni pagpangintu-u nan kanak taman adti katigkasan, yan saba ya utaw na paluwa-en na Tyumanem.
Ya to-o kallekanan na un dumateng
14“Na, dun ni manga allaw yan, awun kita-en mayu na to-o malatay aw kallekanan adti seled na Témplo na Tyumanem na diliꞌ galu umbaꞌ kita-en dun. Aw kamu na magbasa, kalabetan galu mayu ya kakawasan.#13:14 Mabasa adti Danyél 11:31 aw 12:11. Kun kita-en da mayu ya maynan adti Témplo, kamu na awun ni Judiya, maksay kamu palaguy adti manga buntud. 15Kun awun utaw adti luwaꞌ na balay, diliꞌ da sakanan maglikuꞌ adti seled na un kumamang sa pangkay unu. 16Aw kun awun utaw na magtalabahu adti pawaꞌ nan, diliꞌ da sakanan mag-uliꞌ na un mangay sa kadégkadég nan. 17Makalalat ya manga ka͡ubayan na mabdes aw ya manga kalmukan dun ni manga allaw yan. 18Panawagtawag kamu adti Tyumanem na diliꞌ yeiy galu ma-imoꞌ dun ni bulan na to-o manikiꞌ. 19Kay dun ni manga allaw yan, ya un kagamakan na manga utaw to-o pa yeiy mabegat kun pa-unawa sa manga kyagamakan na manga utaw asini tas na lupaꞌ lekat pa na pag-imoꞌ na Tyumanem sa kadakulaꞌ na banwa aw pangkay sa manga dumadateng pa. 20Kun walaꞌ pa na Tyumanem uwa-i ya manga allaw yan na to-o malug, walaꞌ ya utaw na masamaꞌ asini tas na lupaꞌ. Manang asuntu sa kallat nan sa manga utaw na pigpamalliꞌ nan, walaꞌ nan pakadugaya ya manga allaw yan.
21“Aw dun ni manga allaw yan, kun awun utaw na maglong kamayu, ‘Tanawa! Ini la ya Misiyas!’ aw maglong ya sambuk, ‘Awun da kunu sakanan!’ Manang diliꞌ mayu silan pagpangintu-uwan. 22Kay awun dumateng na sallong kunu Misiyas. Aw awun uman dumateng na sallong kunu manga propita na Tyumanem. Magpakitaꞌ silan sa manga pangilala aw milagru pada pasuwayen ya manga pigpamalliꞌ da na Tyumanem kun mabatug. 23Yanagaw magpakatanaw kamu! Pig-ubatan ta kamu dadan sa kadég yeiy pada ka-ede-an da mayu.
24“Na, pagkatigkas da na dakulaꞌ na manga kalugan yan dun ni manga allaw yan, ya sega aw bulan diliꞌ da matag sa kalalamdag. 25Aw mangkolug ya madég na manga bitun. Mangkatangkeg ya kadég na awun ni dalem na langit magi sa katulus na Tyumanem.#13:24b-25 Mabasa adti Isayas 13:10 aw 34:4. 26Aw pagkatigkas yan, aku na Iseꞌ na Utaw lumikuꞌ na kita-en dun ni labun na ka-agadan na dakulaꞌ na kalalamdag aw katulus na pagka Tyumanem ku.#13:26 Mabasa adti Danyél 7:13. 27Aw sugu-un ku ya manga anghil aw madtu silan ni silatan aw adti sallepan aw adti balabagan na kadakulaꞌ na banwa, aw un nilan angayen aw pantipunun ya manga utaw na pigpamalliꞌ da ku.
28“Na, anenganenga mayu ya pundinganan sa kawuy na igira: Kun ya sanga manalingsing aw dumawun da, ka-ede-an mayu na agpet da ya manga bulan na to-o mapasuꞌ. 29Aw maynan uman, kun kita-en mayu ya kadég na piglong ku kamayu, dun da mayu ka-ede-i na malapit da ya paglikuꞌ ku. 30Matinaw ya un ku paglongun kamayu: Ya manga utaw asini tas na lupaꞌ adun na allaw yeiy, diliꞌ pa silan mabus mangkamatay mendaꞌ na matuman da ya kadég na piglong ku. 31Pangkay kun ma-uman ya langit aw ya kadakulaꞌ na banwa manang ya manga tingeg na piglong ku diliꞌ saba ma-uman.
32“Na, ya allaw aw udas na paglikuꞌ ku, walaꞌ ya utaw na nyaka-edeꞌ. Yan oloꞌ ya nyaka-edeꞌ ya Ama ku na awun ni tas na langit. Pangkay ya manga anghil, aw pangkay aku uman na Iseꞌ nan walaꞌ paka-edeꞌ. 33Yanagaw magpakatanaw kamu! Aw gayed kamu pagtagilan! Kay walaꞌ mayu ka-ede-i kun kinunu ya paglikuꞌ ku. 34Kasiling na eseg na un manaw adti mawat na banwa, pigtaligu nan ya kanan balay adti manga sugu-anen nan. Piglongan nan ya tagsambuksambuk kanilan sa un nilan imo-un. Aw pigsuguꞌ nan ya magtatunggu-ay sa tatakep na gayed sakanan magpakatanaw. 35Maynan uman kamu, gayed kamu magpakatanaw kay walaꞌ mayu ka-ede-i kun kinunu ya pag-uliꞌ na tagtun sa balay, pangkay ambung, aw tenga-tengaꞌ na gabi, aw pagtaga-uk da na manuk aw kun paka͡allawunun. 36Pagaw maksay dumateng ya tagtun aw kasaban kamu nan na nyampakatulug. 37Yanagaw yeiy ya piglong ku kamayu aw paglongun ku adti kadég na utaw: ‘Gayed kamu magpakatanaw.’ ”
ទើបបានជ្រើសរើសហើយ៖
Markos 13: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.