Matiyo 7
7
Ya palna-u ni Jisus na diliꞌ mag-ukum sa eped
1“Diliꞌ kamu mag-ukum sa eped na utaw, pada diliꞌ kamu uman ukuman. 2Kay kun unu ya sukud mayu sa kamayu manga eped, maynan uman ya sukud kamayu. 3Anangaꞌ kaw magtulliꞌ sa puling na awun ni mata na kanmu eped manang pyabaya-an mu baling ya dakulaꞌ na batang na nyakabalabag dun ni kanmu mata? 4Anangaꞌ kaw maglong sa eped mu, ‘Nateꞌ kamangen ya kanmu puling.’ Manang diliꞌ mu mabatug kamangen asuntu sa dakulaꞌ na batang na nyakabalabag awun ni kanmu mata! 5Migtallalingu kaw! Una͡a saba kamanga ya batang na awun ni kanmu mata pada mabangal ya kanmu pag-inunu aw mabatug da mu ya pagkamang sa puling na eped mu.”
6Pagkatigkas yan, miglong pa uman si Jisus, “Diliꞌ madyaw na agbel adti iduꞌ ya manga pametang na pigtani la kay walaꞌ ya untung adti kanilan aw pagaw banga-en kamu baling nilan. Aw diliꞌ uman madyaw na agbel ya kamagi adti manga takuꞌ pagaw taguna-an nilan. Yanagaw diliꞌ kamu magpalna-u sa manga utaw na gayed kyumele sa tingeg na Tyumanem aw diliꞌ malim magpakanyeg kamayu.
Ya palna-u ni Jisus sa pagsekat adti Tyumanem
7“Pagsekat kamu adti Tyumanem, aw atagan kamu nan. Tibagsegi mayu ya pagpaninaw, aw pakitaꞌ nan kamayu. Pagtatawag kamu adti kanan, aw uwangan kamu nan. 8Kay ya kadég na magsekat adti Tyumanem, un saba silan atagan. Aw ya kadég uman na maninaw, awun saba kita-en nilan. Aw ya kadég na magtatawag adti kanan, un saba silan uwangan. 9Alimbawaꞌ, kamu na manga ama, kun magsekat ya iseꞌ mu sa kakan, unu, atagan mu baling na batu? 10Aw kun magsekat uman sa isdaꞌ, unu, atagan mu na ulud? Diliꞌ saba! 11Yanagaw, pangkay makasasalaꞌ kamu, manang kya-ede-an mayu kun unu ya madyaw na atag adti kamayu mangayseꞌ. Na, to-o pa dun ya kamayu Ama na awun ni tas na langit, kay atag nan saba ya to-o madyaw adti utaw na magsekat kanan!
Ya palna-u ni Jisus sa pagpakadyaw sa eped na utaw
12“Kun kaliman mayu pakadyawun na manga eped na utaw, na, una͡a mayu silan pakadyawa. Yan ya tengteng na kakawasan na Uldin na Tyumanem aw ya pigpalna-u na manga propita.
Ya pundinganan ni Jisus sa duwa ya suwangan
13“Kun kaliman mayu makaseled adti Kasakupan na Tyumanem, agi kamu adti suwangan na mapeyet. Kay ya suwangan na malakbang, pangkay maluwag ya dalan aw molas agiyan, aw madég ya manga utaw na nyagi dun, manang ya dalan yeiy pasinan adti atulun na diliꞌ pagkapatayan. 14Manang ya suwangan na mapeyet, malug agiyan aw tabay oloꞌ ya kyumitaꞌ sa dalan yeiy, manang yeiy ya dalan pasinan adti tengteng ginawa na walaꞌ ya katigkasan.
Ya palna-u ni Jisus na magpakatanaw sa manga sallong kunu propita
15“Magpakatanaw kamu sa manga utaw na sallong kunu manga propita. Ya pigpakitaꞌ nilan kasiling na bet na karniro, manang ya tengteng na bet nilan kasiling na iduꞌ na to-o mangkabulut. 16Ka-ede-an mayu silan magi sa bunga na manga imo-unun nilan. Diliꞌ kaw maka-ipuꞌ sa bunga na igira adti suksukun na kawuy aw diliꞌ mu uman kita-en ya bunga na paras adti sampinit. 17Ya kawuy na madyaw, madyaw uman ya bunga nan. Manang kun diliꞌ madyaw ya kawuy, diliꞌ uman madyaw ya bunga nan. 18Ya madyaw na kawuy diliꞌ mamunga sa malat, aw ya malat na kawuy diliꞌ uman mamunga sa madyaw. 19Ya kadég na kawuy na diliꞌ mamunga sa madyaw, pamila͡en silan baling aw agbel adti atulun. 20Yanagaw ka-ede-an mayu ya manga sallong kunu propita magi sa manga imo-unun nilan.
Ya pagkasampet ni Jisus sa datengan na manga sallong kunu nyangintu-u kanan
21“Aw awun madég na utaw na pagtawagen aku nilan na ‘Matas na Pangulu.’ Manang ya manga eped kanilan diliꞌ maka-akup adti Kasakupan na Pighari-an na Tyumanem. Yan oloꞌ ya maka-akup dun, ya utaw na mig-imoꞌ sa pagkaliman na kanak Ama na awun ni tas na langit. 22Aw dun ni allaw na pag-ukum, awun madég na utaw na maglong kanak, ‘Kay Matas na Pangulu, paseleda beg kami! Madég ya pigpan-imoꞌ nami magi dun ni kanmu ngalan. Pig-ubat-ubat nami ya pigpa-edeꞌ mu, aw pig-alilinan nami ya manga busaw na syumeled adti manga utaw, aw mig-imoꞌ kami sa madég na milagru!’ 23Manang paglongun ku baling silan, ‘Walaꞌ ta kamu kilala͡a. Pagpakawat kamu kanak, kadég mayu na mag-imo-ay sa malatay!’
Ya pundinganan ni Jisus sa duwa ya utaw na migtulluk sa balay
24“Ya utaw na migpakanyeg sa palna-u ku aw pigdalug nan, kasiling sakanan na utaw na to-o matadeng na migtulluk sa balay nan adti tas na batu na sumalem. 25Dyumateng ya dakulaꞌ na ulan aw nyuntul ya baꞌ, aw to-o mabandes ya samet na kyumeleg adti balay, manang walaꞌ kalukad ya balay kay to-o saba masalig ya kyatullukan nan.
26“Manang pangkay singalan ya dyumengeg sa manga palna-u ku aw walaꞌ nan daluga, kasiling sakanan na utaw na walaꞌ ya katadeng na migtulluk sa balay nan adti tas na pantad. 27Dyumateng ya dakulaꞌ na ulan aw nyuntul ya baꞌ, aw to-o mabandes ya samet na kyumeleg adti balay. Aw dayaw nyalukad ya balay aw migkalat!”
28Pagkatigkas ni Jisus magpalna-u sa to-o madég na manga utaw dun ni buntud, to-o silan nya-enneng-enneng 29kay awun katulus na kanan pagpalna-u na diliꞌ kasiling na pagpalna-u na manga magpalna-uway sa Uldin na manga Judiyu.
ទើបបានជ្រើសរើសហើយ៖
Matiyo 7: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
