Matiyo 4
4
Ya pagtandaꞌ ni Satanas kan Jisus
1Pagkatigkas yan, pigpa-agad na Ispiritu Santo si Jisus adti kaligbinan na laganasen pada tanda-en ni Satanas. 2Aw migpuwasa si Jisus seled na kapatan (40) ya allaw aw kapatan (40) ya gabi, aw pagkatigkas yan, to-o sakanan nyagetem. 3Yanagaw, dyumulud kanan si Satanas aw piglongan nan, “Kun Iseꞌ kaw na Tyumanem, na, paglonga ya manga batu ini na ma-imoꞌ pan.”
4Manang tyumubag si Jisus kanan, “Ini ya pigpasulat na Tyumanem: ‘Bekeꞌ oloꞌ na kakan ya makamataw sa utaw. Manang ya tengteng makamataw sa utaw, yan ya kadég na manga tingeg na piglong na Tyumanem.’ ”#4:4 Mabasa adti Déutéronomiyo 8:3.
5Pagkatigkas yan, pigpa-agad ni Satanas si Jisus adti Jérusalim na yan ya pigtani la dadan na Tyumanem na kanan syudad. Aw pigpa-indeg nan adti katasan na Témplo. 6Aw piglongan nan si Jisus, “Kun Iseꞌ kaw na Tyumanem, kawas kaw adti dalem, kay yeiy ya pigpasulat asini muna: ‘Sugu-un nan ya kanan manga anghil adti kanmu na salu-un kaw nilan pada diliꞌ kapali-an ya manga siki mu na batu.’ ”#4:6 Mabasa adti Salmo 91:11-12.
7Aw tyumubag si Jisus, “Pigpasulat uman na Tyumanem: ‘Diliꞌ mu pagtanda-en ya Tyumanem na yan ya kanmu Matas na Pangulu.’ ”#4:7 Mabasa adti Déutéronomiyo 6:16.
8Pigpa-agad da uman ni Satanas si Jisus adti to-o matas na buntud aw pigpatandaw kanan ya kadég na kasakupan asini tas na lupaꞌ dala ya kanenggeya nilan. 9Aw piglongan nan, “Kun lumuhud kaw aw magsimba kanak, atag ku kanmu ya katundanan sa pagdumala sa kadég yeiy.”
10Manang tyumubag si Jisus, “Kay Satanas, pagpakawat kaw kanak! Pigpasulat da saba: ‘Yan ya kanmu simba͡en ya Tyumanem na kanmu Matas na Pangulu. Aw yan oloꞌ ya ka͡agadan mu.’ ”#4:10 Mabasa adti Déutéronomiyo 6:13.
11Yanagaw pig-indegan ni Satanas si Jisus. Aw dyumateng adti kan Jisus ya manga anghil, aw pigsanggilaꞌ nilan sakanan.
Ya pagpalekat ni Jisus sa manga imo-unun nan dun ni Galiliya
12Na, sa pagdengeg ni Jisus na pigdakep aw nyakalabusu si Juan,#4:12 Ya du-an na pigkalabusu ni Hérodés Antipas si Juan kay pigsagda sakanan ni Juan sa pig-imoꞌ nan na malatay. Mabasa adti Matiyo 14:3-4. pig-indegan nan ya banwa na Judiya aw nyuliꞌ sakanan adti Galiliya. 13Tigkas yan, pig-indegan nan uman ya lunsud na Nazarit aw adtu la sakanan pag-eyaꞌ ni lunsud na Kapirna-um. Na, ya Kapirna-um malapit adti dulug na dakulaꞌ na Danaw na Galiliya, dun ni banwa na pig-eya-an asini muna na manga buwadbuwad ni Zébulun aw ni Naptali. 14Aw dun da katuman ya pigpasulat na Tyumanem asini muna magi sa propita nan na si Isayas:
15 “Ya manga nyeyaꞌ adti manga banwa na Zébulun aw Naptali,
dala ya adti kilid na ‘Dalan na Pasinan adti Dagat,’
aw adti dipag na tubig na Jordan apit adti silatan,
aw pangkay ya pig-eya-an na manga Héntil#4:15 Ya manga Héntil, silan ya manga utaw na bekeꞌ na Judiyu. dun ni banwa na Galiliya,
16 kasiling na nyeyaꞌ silan dun ni kangitngitan, kay walaꞌ ya Tyumanem adti kanilan.
Idtu na muna, walaꞌ da ya pag-iman nilan. Yan da oloꞌ ya pigtagadan nilan ya kamatayen.
Manang adun, syumilat da adti kanilan ya bagu na kalalamdag.”#4:15-16 Mabasa adti Isayas 9:1-2.
17Na, dun ni manga allaw yan, migpalekat si Jisus mig-ubat-ubat na maglong: “Pagselsel kamu! Kay ya Paghariꞌ na Tyumanem sa Kasakupan nan malapit da.”
Ya pagtawag ni Jisus sa upat ya mangingisda-ay
18Na, sambuk na allaw, nyanaw si Jisus adti baklayan na Danaw na Galiliya, aw kyinitaꞌ nan si Simon na pigngalanan uman na Pédro aw ya inulug nan na si Andrés. Nyamiyala silan adti danaw, kay mangisda-ay saba silan. 19Aw miglong si Jisus adti kanilan, “Agad kamu kanak kay imo-un ta kamu mangisda-ay sa manga utaw.” 20Aw maksay nilan pig-ayawan ya kanilan manga biyala, aw nyagad silan kanan.
21Aw migpadeleg si Jisus nyanaw adti baklayan na danaw, aw kyinitaꞌ pa nan uman si Santiago aw ya inulug nan na si Juan. Pig-uman nilan ya kanilan manga biyala dun ni seled na balangay, eped nilan ya kanilan ama na si Zibidiyo. Aw piglongan ni Jisus ya duwa ya maylug, “Agad kamu kanak!” 22Aw maksay nilan pig-ayawan ya kanilan talabahu dun ni balangay aw ya ama nilan, aw nyagad silan kan Jisus.
Ya pagpangguliꞌ ni Jisus sa manga utaw
23Na, piglegeb ni Jisus ya kadakulaꞌ na Galiliya, aw migpalna-u sakanan dun ni manga sinagoga. Aw pigpa-edeꞌ nan adti manga utaw ya Madyaw na Ubat-ubat sa Kasakupan na Pighari-an na Tyumanem. Aw pigpangguliꞌ nan uman ya kadég na manga magkedel na manga utaw.
24Yanagaw nyabekkal ya dengeg nan pangkay adti banwa na Sirya, aw pigpandala adti kanan ya madég na utaw na pyangkedelan aw ya manga to-o pyangkatigda-an, aw manga utaw na syeledan na busaw, aw ya manga gayed pigtakigan, aw manga pulid aw manga kapig. Aw pigguliꞌ ni Jisus ya kadég nilan. 25Aw to-o madég ya manga utaw na dyumalug kanan na lekat adti Galiliya, aw ya eped lekat adti Dékapolis,#4:25 Ya kakawasan na Dékapolis adti tingeg na Grigo: banwa na sampuluꞌ ya lunsud. aw adti Jérusalim, aw adti Judiya, aw manga banwa adti dipag na tubig na Jordan.
ទើបបានជ្រើសរើសហើយ៖
Matiyo 4: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
