Matiyo 26
26
Ya palpa sa pagpatay kan Jisus
1Na, pagkatigkas ni Jisus magpalna-u sa kadég yeiy adti manga umagakan nan, piglongan nan silan, 2“Kya-ede-an mayu na dakman duwangallaw dumateng da ya Pista na Paglabay na Anghil na Tyumanem,#26:2 Mabasa adti Éxudo 12:21-30. aw aku na Iseꞌ na Utaw un tumbay adti kanak manga po-on pada kalabuwan adti krus.”
3Dengan na manga allaw yan, migkatipun uman ya manga mangkatas na magdadugsu-ay aw ya manga magdadumala͡ay sa manga Judiyu adti seled na palasyo ni Kaypas. Na, si Kaypas ya pangulu na manga magdadugsu-ay dun ni umay yan. 4Aw pigbalawbalawan nilan kun unun nilan ya pagdakep kan Jisus na tagu-taguꞌ aw pagpapatay kanan. 5Manang miglong silan, “Diliꞌ tadun yeiy imo-un sa allaw na Pista pagaw magubut baling ya manga utaw.”
Ya pag-asag na ka͡ubayan sa manimboꞌ adti ulu ni Jisus
6Na, talana ni Jisus adti baranggay na Bétaniya, syumeled sakanan dun ni balay ni Simon na awun ibung idtu muna. 7Aw sa kyuman pa silan dun ni lamisa, awun sambuk na ka͡ubayan na dyumulud kan Jisus aw awun pigdala nan na sabuy na pig-imoꞌ lekat adti batu na alabastro. Aw ya sabuy pigseledan na manimboꞌ na dakulaꞌ to-o ya alagaꞌ. Aw pig-asag nan ya manimboꞌ adti ulu ni Jisus. 8Manang sa pagkitaꞌ na manga umagakan nan seiy, nyadaman silan aw law nilan, “Syapadan ya manimboꞌ iyan! 9Madyaw pa baling kun piggalin nan aw ya kuwalta atag adti manga utaw na walaꞌ ya pagkamangan!” 10Manang kya-ede-an ni Jisus ya piglong nilan, yanagaw piglongan nan silan, “Anangaꞌ mayu sala-en ya ka͡ubayan yeiy? Madyaw saba ya pig-imoꞌ nan kanak. 11Ya manga utaw na walaꞌ ya pagkamangan gayed mayu pig-iyeped. Manang aku, diliꞌ da aku madugay asini sayid mayu. 12Aw dun ni pag-asag nan sa manimboꞌ asini lawas ku, kasiling na pigtagilan da nan dadan ya kanak lawas na un lebeng. 13Matinaw saba ya un ku paglongun kamayu: Pangkay ayin pa-ede-an ya Madyaw na Ubat-ubat adti kadakulaꞌ na banwa, gayed uman ubat-ubat ya pig-imoꞌ nan kanaken pada diliꞌ sakanan kalingawan.”
Ya palpa ni Judas na lubidan si Jisus
14Na, dun ni sampuluꞌ tag duwa (12) ya umagakan ni Jisus, ya sambuk kanilan si Judas Iskariyoti. Aw nyadtu sakanan adti manga mangkatas na magdadugsu-ay, 15aw piglongan nan silan, “Unu ya atag mayu kanak kun tumbay ku si Jisus adti kamayu?” Yanagaw pig-atagan nilan sakanan na katluwan (30) ya kuwalta. 16Aw lekat dun ni allaw yan, tyumagad si Judas sa selat na un nan lubidan si Jisus adti kanilan.
Ya pagtagilan sa pangiyambungay na Pista
17Na, dyumateng da ya Pista na Pan na Walaꞌ Patulina. Yanagaw dyumulud adti kan Jisus ya manga umagakan nan, aw law nilan, “Ayin ya kaliman mu pakadtuwan kanami pada tagilanen kanmu ya pangiyambungay sa Pista na Paglabay na Anghil na Tyumanem?”#26:17 Migdengan migpalekat ya duwa ya pista. Sangka simana ya Pista na Pan na Walaꞌ Patulina, aw dun ni tagnaꞌ na allaw na pista yan, nya-imoꞌ uman Ya Pista na Paglabay na Anghil na Tyumanem. 18Aw tyumubag si Jisus kanilan, “Kadtu kamu ni Jérusalim, aw kita-en mayu dun ya sambuk na utaw. Paglonga mayu sakanan, ‘Nyameneꞌ ya Magpalna-uway na malapit da ya allaw na pigpamalliꞌ na Tyumanem, aw kaliman nan kuman adti balay mu sa pangiyambungay sa Pista eped na kanan manga umagakan.’ ” 19Yanagaw pigtuman na manga umagakan nan ya piglong ni Jisus, aw pigtagilan nilan ya pangiyambungay sa Pista na Paglabay na Anghil na Tyumanem.
Ya pagkan ni Jisus aw manga umagakan nan sa pangiyambungay sa pista
20Na, sa pagkamagsiklep da, migkatipun adti lamisa si Jisus aw ya sampuluꞌ tag duwa (12) ya umagakan nan. 21Sa talana nilan kyuman, miglong si Jisus kanilan, “Matinaw ya un ku paglongun kamayu: Awun sambuk kamayu na un maglubid kanak.” 22Pagdengeg na manga umagakan nan, migkalat to-o ya ginawa nilan, aw nyusip ya tagsambuksambuk kanilan, “Kay Magpalna-uway, bekeꞌ ku ya pyalabet mu?” 23Aw tyumubag si Jisus kanilan, “Awun sambuk kamayu na tyumugmuk sa pan eped ku asini lipung ini na yan ya un maglubid kanak. 24Aku na Iseꞌ na Utaw un saba patayen kasiling na dadan da pigpasulat asini muna. Manang malatay ya un datengan na utaw na maglubid kanak. Madyaw pa baling kanan ya walaꞌ ka͡utaw asini tas na lupaꞌ.” 25Pagkatigkas yan, miglong si Judas na maglubiday kan Jisus, “Kay Magpalna-uway, endaꞌ aku ya pyalabet mu?” Aw tyumubag si Jisus kanan, “Piglong da mu.”
Ya pagpa-edeꞌ ni Jisus sa bagu na pakang na dayaw mig-iganget
26Na, talana nilan kyuman, migkamang si Jisus sa pan aw pigpasalamatan nan adti Tyumanem. Tigkas yan, pigtenga-tengaꞌ nan aw pigpan-atag nan adti kanan manga umagakan, aw miglong sakanan, “Dawata aw kana mayu, kay yeiy ya kanak lawas.” 27Pagkatigkas yan, pigkamang nan uman ya tabuꞌ na pigseledan sa bino aw pigpasalamatan adti Tyumanem. Aw pigdimil nan kanilan ya tabuꞌ, aw piglongan nan silan, “Ya tagsambuksambuk kamayu minem asini tabuꞌ ini, 28kay yeiy ya kanak duguꞌ na un pa-iligen pada lanasen ya salaꞌ na manga utaw. Magi sa duguꞌ ku, yan ya magpa-iganget sa bagu na pakang na Tyumanem. 29Paglongun ta kamu na diliꞌ da ku salutun ya minem sa bino na paras mendaꞌ sa allaw na adtu la aku inem eped mayu dun ni pighari-an na kanak Ama.” 30Pagkatigkas ni Jisus maglong, migdalangan silan sa pagdeyen adti Tyumanem. Aw nyanaw da silan aw tyumukud adti Buntud na Manga Olibo.
Ya pagpa-edeꞌ ni Jisus na balyaw sakanan ni Pédro
31Aw sa dun pa silan ni dalan, miglong si Jisus kanilan, “Adun na gabi, un kamu magsipalaguy aw maksay aku mayu ayawan. Kasiling na pigpasulat dadan na Tyumanem: ‘Patayen ku ya magdadiyaga͡ay aw magpanbeklag ya manga karniro nan.’#26:31 Mabasa adti Zakariyas 13:7. 32Manang pagkatigkas na pagkataw ku lekat adti pagkamatay, muna aku kamayu adti Galiliya.” 33Aw miglong si Pédro kanan, “Pangkay kun ayawan kaw na kadég nilan, manang aku, diliꞌ ta kaw ayawan!” 34Manang miglong si Jisus kanan, “Matinaw saba ya un ku paglongun kanmu: Kagaya na gabi, sa diliꞌ pa tumaga-uk ya manuk, balyaw aku mu na makatlu.” 35Miglong uman si Pédro kanan, “Pangkay patayen pa aku nilan eped mu, manang ya magbalyaw kanmu, diliꞌ ku yan ma-imoꞌ!” Aw maynan uman ya piglong na kadég na manga eped nan.
Ya pagpanawagtawag ni Jisus dun ni Gétsémani
36Na, dyumateng si Jisus aw ya manga umagakan nan adti banwa na pigngalanan na Gétsémani. Aw miglong si Jisus kanilan, “Ingkud da kamu asini talana ku adtu manawagtawag.” 37Aw pigpa-agad nan si Pédro, aw ya duwa ya iseꞌ ni Zibidiyo na eseg.#26:37 Ya duwa ya iseꞌ ni Zibidiyo asini, yan si Santiago aw si Juan. Aw walaꞌ katingen ya anenganeng ni Jisus, aw to-o migkalat ya ginawa nan. 38Aw piglongan nan silan, “Kasiling na un da aku matay sangadi sa kakalatan na ginawa ku. Pagtagad pa kamu asini aw pagpulaw kamu eped ku.” 39Aw migpa-awat pa si Jisus kanilan tagbiꞌ aw lyumebleb adti lupaꞌ aw nyanawagtawag, “Kay Ama, kun mabatug, kamanga beg kanak ya pagti-is na un ku ka-agiyan. Manang bekeꞌ na kanak pagkaliman ya matuman. Yan baling ya matuman ya kanmu pagkaliman.”
40Pagkatigkas yan, lyumikuꞌ si Jisus adti tulu ya umagakan nan aw kyinitaꞌ nan na nyampakatulug silan. Aw piglongan nan si Pédro, “Anangaꞌ kamu makatulug? Unu, diliꞌ mayu mabatug ya magpulaw eped ku pangkay sangka-udas oloꞌ? 41Pagpulaw kamu aw panawagtawag pada diliꞌ kamu degen na pagtandaꞌ. Kaliman galu na utaw na manawagtawag, manang pigdeg baling na kalumay na kanan lawas.”
42Aw migpa-awat da uman si Jisus kanilan aw nyanawagtawag, “Kay Ama, kun diliꞌ mu beg tumbay na makamang adi kanak ya pagti-is, na, matuman da ya kanmu pagkaliman.”
43Aw lyumikuꞌ pa salut si Jisus adti manga umagakan nan, aw kyinitaꞌ nan na nyampakatulug da uman silan, kay to-o silan pigtudtud. 44Yanagaw pig-indegan da nan uman silan aw nyadtu sakanan ni mawatawat aw katlu la nan nyanawagtawag adti kanan Ama. Aw ya pagpanawagtawag nan kasiling na piglong nan idtu na tagnaꞌ aw kadwa na pagpanawagtawag nan. 45Pagkatigkas yan, lyumikuꞌ da uman si Jisus adti manga umagakan nan aw piglongan nan silan, “Unu, kenneꞌ pa mayu kyumulang aw nyakatulug? Tanawa! Dyumateng da ya udas na aku na Iseꞌ na Utaw un lubidan aw tumbay adti manga makasasalaꞌ. 46Pagbangun kamu! Kitadun da! Iyan da ya utaw na un maglubid kanak.”
Ya pagdakep kan Jisus
47Sa talana pa ni Jisus miglong, dyumateng si Judas Iskariyoti. Sambuk sakanan dun ni sampuluꞌ tag duwa (12) ya umagakan ni Jisus. Eped nan ya madég na utaw na nyandala sa kampilan aw babunal. Pigsuguꞌ silan na manga mangkatas na magdadugsu-ay aw magdadumala͡ay sa manga Judiyu. 48Na, dadan da silan ni Judas pigpa-edeꞌ sa pangilala, law nan, “Ya utaw na alekan ku, yan ya dakepen mayu.” 49Aw dyumulud si Judas adti kan Jisus aw miglong sakanan, “Kay Magpalna-uway, madyaw na gabi kanmu!” Aw pig-alekan nan si Jisus. 50Tyumubag si Jisus kanan, “Kay Lew, imo-a la ya kaliman mu imo-un.” Aw pigdulus na manga eped ni Judas si Jisus aw pigdakep nilan sakanan. 51Ya sambuk na umagakan ni Jisus, pigtagnus nan ya kanan kampilan, aw pigtibas nan ya sugu-anen na pangulu na manga magdadugsu-ay, aw dayaw nya-ilap ya talinga nan. 52Aw miglong si Jisus kanan, “Uli-an adti lumaꞌ ya kampilan mu! Kay ya kadég na magpatay sa eped nan magi sa kampilan, patayen uman silan magi sa kampilan. 53Unu, walaꞌ mu ka-ede-i na mabatug ku ya magsekat sa tabang adti kanak Ama, aw maksay saba aku padala͡an na pangkay pilammalalan ya anghil?#26:53 Ya kadég na manga anghil asini, sobla kapituwan tag duwa kamalalan (72,000) na yan ya sampuluꞌ tag duwa (12) ka légion. Dun ni manga allaw ni Jisus, ya sangka légion, enememmalalan (6,000) ya kadég na sundalu. 54Manang kun imo-un ku ya maynan, unun pa ya pagkatuman sa pigpasulat na Tyumanem asini muna na ka-ilangan ma-imoꞌ?”
55Aw miglong si Jisus adti manga utaw dun, “Anangaꞌ kamu dumala sa manga kampilan aw babunal? Kasiling kamu na migdakep sa ribildi! Kada allaw migpalna-u aku dun ni Témplo, aw walaꞌ aku mayu dakepa. 56Manang ya kadég yeiy ka-ilangan ma-imoꞌ, pada matuman ya pigpasulat na Tyumanem magi sa manga propita nan asini muna.” Aw tigkas yan, migsipalaguy ya manga umagakan ni Jisus aw pig-ayawan nilan sakanan.
Ya pagpa-agad kan Jisus adti asdangan na manga mag-usayay
57Ya manga utaw na migdakep kan Jisus, pigpa-agad nilan sakanan adti asdangan ni Kaypas na yan ya pangulu na manga magdadugsu-ay. Aw migpangkatipun dun ni balay nan ya manga magpalna-uway sa Uldin aw ya manga magdadumala͡ay sa manga Judiyu. 58Aw dyumalug si Pédro kanilan manang migpa-awatawat kan Jisus aw taman da oloꞌ sakanan dun ni pamanag na balay na pag-usayan. Aw pagseled nan adti pamanag, nyingkud sakanan dun ni sayid na manga magtatunggu-ay kay kaliman nan ka-ede-an kun unu ya un ma-imoꞌ kan Jisus.
59Na, adti seled, dun ya manga mangkatas na magdadugsu-ay aw ya kadég na matas na mag-usayay. Aw gayed silan nyaninaw sa utaw na magmatinaw sa galuꞌ adti kan Jisus pada awun puliba na patayen sakanan. 60Pangkay awun madég na utaw na migmatinaw sa galuꞌ adti kanan, manang walaꞌ ya kyinitaꞌ nilan na indeganan na papatay nilan sakanan. Tigkas yan, nyindeg ya duwa adti asdangan nilan 61aw miglong silan, “Miglong ya utaw ini, ‘Mabatug ku kalaten ya Témplo na Tyumanem aw seled na tulungallaw mabatug ku uman imo-un.’ ”
62Aw nyindeg ya pangulu na manga magdadugsu-ay aw nyusip kan Jisus, “Unu ya tubag mu sa diklamu nilan kanmu?” 63Manang walaꞌ si Jisus tubag. Yanagaw, pig-usip da nan uman: “Dun ni ngalan na Tyumanem na Gayed Awun, ubati kami sa tengteng matinaw. Unu, ikaw kaꞌ ya Misiyas, ya Iseꞌ na Tyumanem?” 64Aw tyumubag si Jisus kanan, “Piglong da mu. Manang paglongun ta kamu adun: Kagaya na moli na allaw, kita-en mayu aku na Iseꞌ na Utaw na mingkud apit adti kalintu na Tyumanem na To-o Matulus. Aw kita-en aku mayu uman na lumikuꞌ na ka-agadan na manga labun.”
65Pagdengeg na pangulu na manga magdadugsu-ay sa tubag ni Jisus, pigkéséꞌ nan ya kanan sa-ul asuntu sa kadaman nan aw miglong, “Ya utaw yeiy miglong sa malatay adti Tyumanem! Anangaꞌ pa kitadun maninaw sa eped na un magmatinaw? Dyengeg da mayu saba ya piglong nan. Migpa-unawa sakanan sa Tyumanem! 66Na, unu ya kamayu pagbayaꞌ?” Aw tyumubag silan, “Umbaꞌ sakanan patayen!”
67Aw tigkas yan, pig-eleb-eleban nilan ya gya ni Jisus, aw byadasan nilan sakanan pyanumbag, aw gayed nilan pigpanampal, 68aw pig-odoy-odoy nilan sakanan na miglong, “Na, kun ikaw ya Misiyas, ubatan kanami kun singalan ya migsumbag kanmu!”
Ya pagbalyaw ni Pédro kan Jisus
69Na, sa talana pa ni Pédro nyingkud adti luwaꞌ dun ni pamanag, awun sambuk na sugu-anen adti balay na dyumulud kanan aw miglong, “Endaꞌ, ikaw uman ya eped ni Jisus na taga Galiliya!” 70Manang pigbalyaw ni Pédro si Jisus adti asdangan na kadég na manga utaw dun ni pamanag, law nan, “Walaꞌ ku ka-ede-i ya piglong mu!” 71Pagkatigkas yan, mig-alin si Pédro adti suwangan na pamanag. Aw kyinitaꞌ uman sakanan na sugu-anen na bubay aw miglong sa manga utaw dun, “Ya eseg yeiy, eped saba ni Jisus na taga Nazarit!” 72Aw uman da ni Pédro pigbalyaw aw migsapaꞌ, law nan, “Matay pa aku, walaꞌ ku kilala͡a ya utaw yan!” 73Na, awun manga utaw na mig-indeg-indeg dun. Aw walaꞌ kadugay, dyumulud silan kan Pédro aw miglong silan, “Matinaw saba na ikaw ya sambuk kanilan. Pangkay ya linitukan mu taga Galiliya.” 74Aw migsapaꞌ salut si Pédro, law nan, “Matay pa aku, walaꞌ ku saba kilala͡a ya utaw yan na piglong mu!” Aw tigkan tyumaga-uk ya manuk. 75Aw dun da ni Pédro ka-anenganengi ya piglong kanan ni Jisus, “Sa diliꞌ pa tumaga-uk ya manuk, balyaw aku mu na makatlu.” Aw migkalat ya ginawa ni Pédro, yanagaw lyumuwaꞌ sakanan aw to-o migsugaw.
ទើបបានជ្រើសរើសហើយ៖
Matiyo 26: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
