Matiyo 22
22
Ya pundinganan sa manga pyamilit adti pista na kasal
1Pagkatigkas yan, pig-ubatan pa silan ni Jisus sa manga pundinganan, law nan, 2“Ya Kasakupan na Pighari-an na Tyumanem, kasiling na maynini: Awun hariꞌ na migpatagilan sa pista na kasal sa iseꞌ nan na eseg. 3Pigsuguꞌ na hariꞌ ya kanan manga sugu-anen na tawagen da ya manga utaw na dadan da pigpamilit na madtu ni pista na kasal. Manang ya manga pigpamilit walaꞌ baling silan kalim kadtu. 4Yanagaw migsuguꞌ pa ya hariꞌ sa manga eped na sugu-anen nan, aw miglong sakanan, ‘Na, paglonga la mayu ya manga pigpamilit na nyatagilan da ku ya pista na kasal. Pigpatumba la ku ya kanak manga mangkatabaꞌ na baka aw nyalutuꞌ da ya kadakulaꞌ. Yanagaw paglonga mayu na maksay da silan madi.’ 5Manang pigpalipaslipasan na manga pigpamilit ya piglong na manga sugu-anen nan. Ya eped kanilan nyadtu baling ni pawaꞌ, aw ya eped nyadtu ni tindahan nan. 6Aw ya manga eped uman na pigpamilit, pigdulus nilan ya manga sugu-anen na hariꞌ aw pigpamulayaman nilan, aw pigpamatay. 7Na, sa pagdengeg na hariꞌ sa kyagamakan na manga sugu-anen nan, to-o sakanan nyadaman. Yanagaw migsuguꞌ sakanan sa manga sundalu pada patayen nilan ya manga migpatay sa manga sugu-anen nan aw pansangaben ya syudad nilan. 8Pagkatigkas yan, miglong ya hariꞌ adti manga sugu-anen nan, ‘Nyatagilan da ya pista na kasal, manang ya manga utaw na tagnaꞌ ku pigpamilit, diliꞌ silan umbaꞌ pakadiyen. 9Yanagaw kadtu kamu ni manga suwayan na manga dalan na syudad, aw pakadiya mayu asini pista ya kadég na manga utaw na kita-en mayu.’ 10Aw pigtuman na manga sugu-anen ya pigsuguꞌ na hariꞌ. Nyadtu silan adti manga dalan, aw pigpa-agad nilan ya kadég na utaw na pigkitaꞌ nilan pangkay madyaw aw malatay na utaw. Aw dayaw nyatmuꞌ ya katipunanan.
11“Na, walaꞌ kadugay, syumeled ya hariꞌ adti katipunanan na kasal na un magtanaw sa manga pigpamilit, aw kyinitaꞌ nan ya sambuk na eseg dun na walaꞌ sut sa kadégkadég na umbaꞌ pagsutun adti kasal. 12Aw nyusip ya hariꞌ kanan, ‘Kay Lew, anangaꞌ kaw makaseled adi na walaꞌ kaw sut sa kadégkadég na pangkasal?’ Manang walaꞌ pakapaglong ya utaw yan. 13Pagkatigkas yan, miglong ya hariꞌ sa manga sugu-anen nan, ‘Banggeti ya taklayan aw siki na utaw yeiy, aw agbelan mayu sakanan adti banwa na kangitngitan na adti luwaꞌ. Dun ni banwa yan, to-o magpansugaw ya manga utaw aw magpansipanguliteb ya manga untu nilan.’ ” 14Aw miglong pa si Jisus, “Madég to-o ya pigpamilit manang tabay oloꞌ ya pigpamalliꞌ aw yan ya maka-akup adti Kasakupan na Pighari-an na Tyumanem.”
Ya usip sa pagbayad sa buwis
15Pagkatigkas yan, pig-indegan na manga Parisiyo si Jisus, aw migkatipun silan na un mag-imoꞌ sa palpa pada kalitagan nilan si Jisus dun ni piglong nan. 16Yanagaw awun manga utaw na pigsuguꞌ nilan adti kan Jisus, na lekat adti kanilan manga umagakan aw lekat adti partido ni Hérodés, aw miglong silan kan Jisus, “Kay Magpalna-uway, kya-ede-an nami na ya kadég na piglong mu alag saba matinaw, aw gayed mu pigpalna-u ya tengteng pagkaliman na Tyumanem. Aw kya-ede-an uman nami na walaꞌ ya pigkibang mu sa manga utaw pangkay singalan pa silan. 17Yanagaw, awun usip nami kanmu: Adti kanmu anenganeng, unu, umbaꞌ kanaten na manga Judiyu ya pagbayad sa buwis adti kan César aw diliꞌ?” 18Manang kya-ede-an ni Jisus ya kapandayan nilan. Yanagaw piglongan nan silan, “Alag kamu saba migtallalingu! Anangaꞌ aku mayu tanda-en? 19Pakita͡an kanak ya kuwalta na un mayu pagbayad sa buwis.” Aw pigdimilan nilan sakanan na kuwalta, 20aw nyusip si Jisus kanilan, “Kan yeiy gya ya ini? Aw kan yeiy uman ngalan ya nyakasulat asini?” 21Aw tyumubag silan, “Kan César.” Aw miglong si Jisus kanilan, “Na, atagan mayu adti kan César ya umbaꞌ kan César aw atagan adti Tyumanem ya umbaꞌ sa Tyumanem.” 22Sa pagdengeg nilan sa tubag nan, to-o silan nya-enneng-enneng asuntu sa tubag nan. Yanagaw pig-indegan nilan si Jisus.
Ya usip na manga Sadusiyo sa pagkataw na utaw
23Dun ni allaw yan, awun dyumulud kan Jisus na manga Sadusiyo. Na, ya manga utaw yeiy, walaꞌ silan pangintu-u na awun pagkataw na manga utaw lekat adti pagkamatay. Yanagaw nyusip silan kanan, 24“Kay Magpalna-uway, piglong kanaten ni Moysis ya suguꞌ yeiy adti Uldin tadun: ‘Kun awun eseg na nyatay, aw kun walaꞌ silan ya ka͡ubayan nan paka-iseꞌ, ka-ilangan pangugnanen na inulug na eseg ya nyabalu pada ya mangayseꞌ nilan ma-imoꞌ da buwadbuwad na inulug nan na nyatay da.’ 25Na, idtu muna adti kanami, awun pitu ya mangkaylug na eseg. Ya magulang na kadég nilan, nyangugnan sa ka͡ubayan. Manang walaꞌ silan paka-iseꞌ. Aw nyatay ya eseg yan, aw ya nyabalu pigpangugnan na mangud na eseg nan. 26Aw maynan uman ya nya-imoꞌ adti mangud nan aw adti katlu mendaꞌ sa kapitu. 27Pagkatigkas yan, nyatay uman ya ka͡ubayan. 28Na, ini ya usip nami kanmu: Pagdateng da na allaw na pagmataw sa manga utaw lekat adti nyangkamatay, singalan ya tengteng eseg na ka͡ubayan yan? Kay awun pitu ya eseg na nyangugnan kanan.”
29Aw tyumubag si Jisus kanilan, “Yan saba ya du-an na nyangkasayep kamu, kay walaꞌ mayu kalabeti ya pigpasulat na Tyumanem asini muna aw walaꞌ mayu uman ka-ede-i ya katulus nan. 30Kay dun ni pagmataw sa manga utaw lekat adti pagkamatay, diliꞌ da silan mangugnan, kasiling saba na anghil na awun ni tas na langit. 31Aw ya pagmataw sa manga utaw lekat adti nyangkamatay, unu, walaꞌ kaꞌ mayu kabasa ya pigpasulat na Tyumanem asini na muna? Kay miglong sakanan: 32‘Aku ya Tyumanem ni Abraham, aw ya Tyumanem ni Isa-ak, aw ya Tyumanem ni Jakub.’ #22:32 Mabasa adti Éxudo 3:6. Yan ya kakawasan nan, pangkay nyatay da silan manang adti asdangan na Tyumanem kenneꞌ na utaw pa silan aw gayed nilan pigsimba ya Tyumanem.” 33Pagdengeg na manga utaw sa piglong ni Jisus, to-o silan nya-enneng-enneng sa palna-u nan.
Ya suguꞌ na to-o matas
34Na, pagdengeg na manga Parisiyo na pigdeg ni Jisus ya kapandayan na manga Sadusiyo, migkatipun silan aw dyumulud adti kanan. 35Aw nyusip ya sambuk kanilan na magpalna-uway sa Uldin, pada tanda-en nan si Jisus, law nan, 36“Kay Magpalna-uway, unu ya to-o matas na suguꞌ na Tyumanem dun ni Uldin na pig-atag nan kan Moysis?” 37Aw tyumubag si Jisus kanan, “Ginawa͡an mu ya kanmu Tyumanem sa kadakulaꞌ na pagka-utawun mu, aw sa kadakulaꞌ na ginawa mu, aw sa kadakulaꞌ na anenganeng mu.#22:37 Mabasa adti Déutéronomiyo 6:5. 38Sa kadég na manga suguꞌ, yeiy ya to-o matas. 39Aw ya kadwa na suguꞌ na to-o matas: Ginawayi ya eped mu na utaw kasiling na pagginawa mu sa kanmu pagka-utawun.#22:39 Mabasa adti Libitiko 19:18. 40Kun dalugun mu ya duwa yeiy, dun da mu uman kadalug ya kadég na manga suguꞌ na awun ni Uldin aw ya pigsulat na manga propita.”
Ya usip kun singalan ya Misiyas
41Na, sa talana pa na manga Parisiyo migkatipun dun ni pamanag na Témplo, nyusip si Jisus kanilan, 42“Unu ya anenganeng mayu sa Misiyas? Kan yan buwadbuwad sakanan?” Aw tyumubag silan, “Buwadbuwad sakanan ni Dabid.” 43Aw miglong si Jisus kanilan, “Na, kun maynan, anangaꞌ miglong si Dabid magi sa Ispiritu Santo na ya Misiyas yan ya kanan Matas na Pangulu? Miglong saba si Dabid,
44 ‘Piglongan na Tyumanem ya kanaken Matas na Pangulu:
“Ingkud kaw apit adi kalintu ku
mendaꞌ na mabus ku degen ya manga po-on mu aw alag ku silan betang adti salad na manga siki mu.” ’#22:44 Mabasa adti Salmo 110:1.
45Yanagaw kun pigtawag ni Dabid ya Misiyas na ‘Matas na Pangulu,’ pig-unu na Misiyas ya pagka-imoꞌ buwadbuwad ni Dabid?” 46Aw walaꞌ kanilan ya nyakatubag sa usip ni Jisus. Aw lekat dun ni allaw yan, walaꞌ da ya nyaka-eles nyangusip kanan.
ទើបបានជ្រើសរើសហើយ៖
Matiyo 22: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
