Matiyo 20
20
Ya pundinganan sa manga magtalabahuway adti parasan
1“Ya Kasakupan na Pighari-an na Tyumanem kasiling na maynini: Awun utaw na dakulaꞌ ya parasan nan. Pagkamaselem da, nyanaw sakanan na un maninaw sa manga utaw na magtalabahu adti kanan parasan. 2Pagkitaꞌ da nan sa manga utaw na malim magtalabahu, pigpakangan nan silan sa umbaꞌ na pagtandan sa sangallaw na pagtalabahu na yan ya tag sangka dinariyo. Aw pigpakadtu nan silan adti parasan nan. 3Pagdateng da na alas nibi na maselem, nyadtu sakanan adti palingki aw awun pigkitaꞌ nan na manga utaw na gayed mig-indeg-indeg dun kay walaꞌ ya talabahu nilan. 4Yanagaw miglong kanilan ya tagtun, ‘Awun talabahuwunun adti kanak parasan. Kun malim kamu magtalabahu, tandanan ta kamu sa umbaꞌ na tandan kamayu.’ 5Aw yanagaw nyadtu silan adti parasan nan. Pagka-alas dosi la, lyumikuꞌ da uman ya tagtun adti palingki aw awun pa uman kyinitaꞌ nan na manga utaw dun aw pigpatalabahu la nan uman adti kanan parasan. Aw maynan uman ya pig-imoꞌ nan dun ni alas trés. 6Pagka-alas singku la na ambung, lyumikuꞌ da uman salut ya tagtun adti palingki, aw awun pa kyinitaꞌ nan dun na manga utaw na mig-indeg-indeg kay walaꞌ ya talabahu nilan. Aw pig-usip nan silan, ‘Anangaꞌ gayed kamu asini mag-indeg-indeg? Syapadan ya allaw adun na walaꞌ ya talabahu mayu.’ 7Aw tyumubag silan kanan, ‘Walaꞌ du-an ya migpatalabahu kanami.’ Yanagaw miglong kanilan ya tagtun sa parasan, ‘Kadtu kamu baling ni parasan ku aw pagtalabahu kamu dun.’
8“Aw sa pagkamagsiklep da, miglong ya tagtun adti maggagaday sa manga magtalabahuway, ‘Tawaga ya kadég nilan aw atagan ya tandan adti tagsambuksambuk kanilan, manang una͡en mu atagan na tandan ya manga nyakamoli tyumangkaꞌ, aw pamoliya ya nyaka-una.’ 9Aw ya manga magtalabahuway na tyumangkaꞌ na alas singku na ambung, dyumulud silan aw pigtandanan ya tagsambuksambuk kanilan na tag sangka dinariyo. 10Aw sa pagdulud da uman na manga nyaka-una tyumangkaꞌ, pig-iman nilan na dakulaꞌ pa ya tandan kanilan. Manang ya tagsambuksambuk kanilan pig-atagan na tag sangka dinariyo kasiling na nyadawat na manga nyakamoli tyumangkaꞌ. 11Pagpakadawat da nilan sa kanilan tandan, migdiklamu silan adti tagtun sa parasan, 12law nilan, ‘Oloꞌ da sangka-udas ya pagtalabahu na manga utaw yeiy! Anangaꞌ pigpa-unawa mu baling ya tandan sa kadég nami? Sangallaw nami migtalabahu aw nyabelad pa kami na sega, manang silan walaꞌ da dateng na sangallaw!’ 13Manang miglong ya tagtun adti sambuk kanilan, ‘Kay Lew, walaꞌ ta kamu limbungi. Dadan da saba kitadun migpakang sa tandan na tag sangka dinariyo ya allaw. 14Na, dawata la ya kanmu tandan aw uliꞌ da kaw. Kanak yeiy pagbayaꞌ na pa-unawa͡en ya tandan adti kadég mayu pangkay nyaka-una kamu aw pangkay nyakamoli silan. 15Yeiy ya kanak pagbayaꞌ kay aku ya tagtun. Unu, nyingaꞌ kaw asuntu sa kanimbet ku kanilan?’ ”
16Aw miglong si Jisus, “Maynan uman ya adti kanak Kasakupan. Awun madég na manga utaw na nyakamoli adun manang maka-una silan kagaya. Aw awun uman madég na manga utaw na nyaka-una adun manang makamoli silan kagaya.”
Ya katlu na pagpa-edeꞌ ni Jisus sa pagkamatay aw pagkataw nan
17Na, sa pagpasinan da ni Jisus aw ya madég na manga utaw adti Jérusalim, pigtani ni Jisus ya sampuluꞌ tag duwa (12) ya kanan umagakan kay awun paglongun nan kanilan, law nan, 18“Pada ka-ede-an mayu, migpasinan da kitadun adti Jérusalim, aw aku na Iseꞌ na Utaw un da tumbay adti manga mangkatas na magdadugsu-ay aw manga magpalna-uway sa Uldin, aw ukuman aku nilan na patayen. 19Pagkatigkas yan, tumbay aku uman nilan adti manga utaw na Héntil, aw odoy-odoyun aku nilan aw badasan uman na lalabet, aw pakalabu nilan adti krus. Manang pagdateng na katlu na allaw, matawun aku lekat adti pagkamatay.”
Ya pagsekat na ina ni Santiago aw ni Juan
20Pagkatigkas yan, dyumulud kan Jisus ya ka͡ubayan ni Zibidiyo aw ya manga iseꞌ nilan na si Santiago aw si Juan. Aw lyumuhud sakanan adti asdangan ni Jisus kay awun sekaten nan. 21Aw nyusip si Jisus kanan, “Unu ya kaliman mu na imo-un ku kanmu?” Aw tyumubag sakanan, “Pakangan beg kanak na dun ni kanmu Kasakupan na un mu hari-an kagaya, tumbay mu ya duwa ya iseꞌ ku yeiy na mingkud adti sayid mu dun ni ingkudanan na to-o pagbasa͡an, ya sambuk apit adti kalintu aw ya sambuk apit adti kawala.” 22Manang piglongan silan ni Jisus, “Walaꞌ mayu ka-ede-i kun unu ya pigsekat mayu. Unu, mabatug mayu ti-isen ya pagti-is na un ku ka-agiyan?” Aw miglong ya duwa yeiy, “E-e, mabatug nami.” 23Aw miglong si Jisus kanilan, “Un mayu saba ka-agiyan ya kadég yeiy. Manang ya pag-ingkud apit adti kalintu aw kawala ku, bekeꞌ ku ya mamalliꞌ. Ama ku saba ya magbayaꞌ kun singalan ya mingkud dun.”
24Sa pagdengeg na sampuluꞌ ya umagakan nan sa pigsekat na duwa ya maylug aw ina nilan, nyadaman silan. 25Yanagaw pigpatawag ni Jisus ya kadég nilan aw piglongan nan silan, “Kya-ede-an da mayu ya bet na manga pangulu na manga utaw na walaꞌ ya pagpangintu-u sa Tyumanem. Silan ya gayed magbayaꞌ sa manga sakup nilan. Aw maynan uman ya pig-imoꞌ na mangkalangkaw nilan. Gayed silan magpanuguꞌ sa kanilan manga utaw asuntu na dakulaꞌ ya katundanan nilan. 26Manang diliꞌ mayu silan pagsilingan. Kun awun sambuk kamayu na kaliman nan ma-imoꞌ dakulaꞌ na utaw, ka-ilangan una sakanan ma-imoꞌ sugu-anen dun ni kamayu. 27Aw kun awun sambuk kamayu na malim na yan ya gayed pag-una͡en, ka-ilangan silingan nan ya bet na sugu-anen na gayed magpadanaꞌ. 28Kasiling ku saba na Iseꞌ na Utaw, walaꞌ aku kadi asini tas na lupaꞌ pada sanggila-en, manang yan baling ya pigkadi ku ya ma-imoꞌ sugu-anen adti madég na utaw, aw ma-imoꞌ kalyu kanilan adti pagkamatay pada maglekat kanilan adti manga salaꞌ nilan.”
Ya pagpaguliꞌ ni Jisus sa duwa ya eseg na buta
29Na, sa pag-indeg ni Jisus aw manga umagakan nan lekat adti syudad na Jériko, dyumalug kanan uman ya to-o madég na utaw. 30Aw awun uman duwa ya eseg na buta na nyingkud dun ni kilid na dalan. Aw sa pagdengeg nilan na un da lumabay si Jisus, migtatawag silan kanan, “We… Buwadbuwad ni Dabid, kallati beg kami!” 31Madég ya utaw na migsagda kanilan na maglong, “Katinep kamu!” Manang to-o pa baling nilan pigpakadakulaꞌ ya kanilan tingeg, law nilan, “We… Matas na Pangulu na buwadbuwad ni Dabid, kallati beg kami!” 32Yanagaw tyumeneng si Jisus aw pigtawag nan silan aw nyusip kanilan, “Unu ya kaliman mayu na imo-un ku kamayu?” 33Aw tyumubag silan kanan, “Kay Sir, kaliman beg nami kumitaꞌ!” 34Aw nyallat si Jisus kanilan, aw pig-awidan nan ya mata na tagsambuksambuk kanilan, aw dayaw silan kyumitaꞌ. Aw dyumalug da silan kanan.
ទើបបានជ្រើសរើសហើយ៖
Matiyo 20: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
