Matiyo 19
19
Ya palna-u ni Jisus sa mangugnanay na mag-ayaw
1Pagkatigkas ni Jisus palna-uwan ya manga utaw dun, pig-indegan nan ya Galiliya aw tyumalipag sakanan sa tubig na Jordan aw migpasinan adti probinsiya na Judiya. 2Aw dyumalug kan Jisus ya to-o madég na manga utaw. Aw pigpangguliꞌ nan ya manga kyedelan dun.
3Awun manga Parisiyo na dyumulud kan Jisus na un magtandaꞌ kanan magi sa usip, law nilan, “Unu, pigtumbay sa eseg ya pag-ayaw sa ka͡ubayan nan pangkay unu ya du-an?” 4Tyumubag si Jisus kanilan, “Walaꞌ kaꞌ mayu kabasa dun ni Uldin ya pigpasulat na Tyumanem? Asini muna sa pag-imoꞌ nan sa manga utaw, duwa ya punganan nilan: Awun eseg aw awun bubay.#19:4 Mabasa adti Génésis 1:27. 5Aw pigpasulat nan uman, ‘Yeiy ya du-an na indegan na eseg ya ama nan aw ina nan, aw pa-egketen silan ya ka͡ubayan nan, aw ya duwa silan ma-imoꞌ da sambuk.’ #19:5 Mabasa adti Génésis 2:24. 6Yanagaw bekeꞌ da silan na duwa manang ma-imoꞌ da sambuk. Aw ya pig-isambuk da na Tyumanem, diliꞌ galu silan pagsuwayen na utaw!” 7Aw nyusip pa silan kan Jisus, “Kun maynan, anangaꞌ maglong si Moysis na mabatug na eseg ayawan ya ka͡ubayan nan magi sa pag-atag sa sulat na magmatinaw na mag-ayaw da silan, aw tigkas yan papanawun nan?”#19:7 Mabasa adti Déutéronomiyo 24:1-4. 8Aw tyumubag si Jisus kanilan, “Yan saba ya du-an na piglong ni Moysis na mabatug ya pag-ayaw, asuntu sa kategelan mayu. Manang bekeꞌ na maynan ya palpa na Tyumanem lekat pa asini muna. 9Ini ya kanak paglongun kamayu: Kun awun eseg na ayawan nan ya kanan ka͡ubayan na walaꞌ pagkasala-enen adti sambuk na eseg, aw mangugnan sakanan sa eped na ka͡ubayan, piglakadan nan ya muna ka͡ubayan nan.”
10Pagkatigkas yan, miglong ya manga umagakan ni Jisus kanan, “Kun maynan ya ma-imoꞌ sa mangugnanay, madyaw pa baling kun diliꞌ da mangugnan ya utaw.” 11Manang miglong si Jisus kanilan, “Ya piglong mayu yeiy diliꞌ mabatug na eped na utaw, manang ya makadawat seiy yan oloꞌ ya manga utaw na pigtabangan na Tyumanem. 12Kay awun du-an na ya manga eped na eseg diliꞌ magpangugnan. Ya eped walaꞌ ya kabatug nilan mag-imoꞌ sa iseꞌ kay awun se-ey na kanilan lawas. Awun uman eped na pigkapun da. Aw awun uman manga eped na walaꞌ da pangugnan kay nyatibulluk silan adti imo-unun sa Kasakupan na Pighari-an na Tyumanem. Yanagaw, ya eseg na makadawat seiy, madyaw pa kanan ya diliꞌ da mangugnan.”
Si Jisus aw ya manga mangayseꞌ
13Pagkatigkas yan, awun mangkayantek na mangayseꞌ na pigpandala adti kan Jisus na un nan silan pan-awidan aw panawagtawagan pada atagan silan na kadyawan. Manang pigsagda baling na kanan manga umagakan ya manga utaw na nyandala sa mangayseꞌ nilan. 14Yanagaw miglong si Jisus, “Pakadiya kanak ya manga mangayseꞌ aw ya-i mayu silan pagtageni! Kay ya manga utaw na dyumawat kanak kasiling na manga mangayseꞌ ini, silan saba ya maka-akup adti Kasakupan na Pighari-an na Tyumanem.” 15Aw pig-awidan nan ya manga mangayseꞌ aw pig-atagan nan silan na kadyawan magi sa panawagtawag nan. Aw tigkas yan, nyanaw da uman si Jisus.
Ya utaw na mayaman
16Na, awun sambuk na eseg na dyumulud kan Jisus kay kaliman nan musip, aw miglong sakanan, “Kay Magpalna-uway, unu ya madyaw na ka-ilangan ku imo-un pada matagtun ku ya ginawa na walaꞌ ya katigkasan?” 17Aw tyumubag si Jisus kanan, “Anangaꞌ kaw musip kanak kun unu ya madyaw? Sambuk da oloꞌ ya tengteng madyaw, yan ya Tyumanem. Kun kaliman mu matagtun ya ginawa na walaꞌ ya katigkasan, daluga ya kanan manga suguꞌ.” 18Aw nyusip pa uman sakanan, “Unu ya manga suguꞌ yan?” Aw tyumubag si Jisus kanan, “Diliꞌ kaw magpatay sa utaw, aw diliꞌ kaw maglakadenen, aw diliꞌ kaw magpanakaw, aw diliꞌ mu pagmatinawun ya galuꞌ adti asdangan na mag-usayay, 19aw basayi ya kanmu ama aw ina, aw ginawayi ya eped mu kasiling na pagginawa mu sa kanmu pagka-utawun.”#19:18-19 Mabasa adti Éxudo 20:12-16, aw Libitiko 19:18, aw Déutéronomiyo 5:16-20. 20Miglong uman kanan ya eseg yan, “Pigdalug da ku alag ya kadég yeiy. Unu pa ya walaꞌ ku ka-imoꞌ?” 21Aw tyumubag si Jisus kanan, “Kun kaliman mu malingeb ya kadakulaꞌ, uliꞌ kaw aw galina ya manga nyatagtun mu. Tigkas yan, atagan ya kuwalta yan adti manga utaw na walaꞌ ya pagkamangan. Kun imo-un mu yeiy, dun da kaw pagluduk sa ka-unan adti tas na langit. Aw pagkatigkas yan, likuꞌ kaw adi aw dalug kaw kanak.” 22Manang pagdengeg na eseg yan sa tubag ni Jisus, nyanaw sakanan aw to-o migkalat ya ginawa nan kay to-o madég ya ka-unan nan.
23Pagkatigkas yan, miglong si Jisus sa manga umagakan nan, “Matinaw ya un ku paglongun kamayu: Malug sa utaw na mayaman ya pagpaka-akup adti Kasakupan na Pighari-an na Tyumanem. 24Aw paglongun ta kamu na molas pa ya pag-agi na ayep na kamilyo adti gawang na dagem kay sa pagpaka-akup na utaw na mayaman dun ni Kasakupan na Pighari-an na Tyumanem.” 25Pagdengeg na manga umagakan nan seiy, to-o silan nyabelengbeleng aw nyusip silan, “Na, kun maynan, singalan kaꞌ ya paluwa-en na Tyumanem?” 26Pig-inunu silan ni Jisus aw piglongan nan silan, “Diliꞌ na utaw mabatug yeiy, manang adti Tyumanem mabatug saba ya kadég.”
27Tigkas yan, miglong si Pédro kanan, “Inunuwa ya kanami ini! Nyabus da nami pig-ayawan ya kadég na nyatagtun nami pada magad kanmu. Unu ya imanen nami?” 28Aw tyumubag si Jisus kanilan, “Matinaw saba ya un ku paglongun kamayu: Dun ni allaw na baguwun da na Tyumanem ya kadakulaꞌ na banwa, aku na Iseꞌ na Utaw mingkud adti kanaken trunu na un maghariꞌ sa kanak Kasakupan. Aw kamu uman na gayed nyagad kanak, mingkud kamu uman adti sampuluꞌ tag duwa (12) ya trunu. Aw magdumala kamu sa kadég na manga buwadbuwad ni Isra-él na lyumekat alag adti sampuluꞌ tag duwa (12) ya iseꞌ nan na eseg. 29Aw pangkay singalan ya mag-ayaw sa kadég asuntu kanak, pangkay ya kanan balay, aw manga kaylug nan aw kanan mangkatikadeng aw manga mangayseꞌ, aw ya lupaꞌ nan asuntu kanak, un likuꞌ kanan ya sanggatus (100) ka piluꞌ na pig-ayawan nan aw matagtun nan uman ya ginawa na walaꞌ ya katigkasan. 30Manang awun madég na utaw na nyaka-una adun aw makamoli silan kagaya. Aw madég uman ya utaw na nyakamoli adun manang maka-una kagaya.”
ទើបបានជ្រើសរើសហើយ៖
Matiyo 19: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
