Lukas 2
2
Ya pagka͡utaw ni Jisus
1Na, idtu na manga allaw yan, si César Agusto ya impirador#2:1 Ya impirador, to-o matas ya katundanan nan kay yan ya magpamalliꞌ sa manga hariꞌ aw manga gubirnador na un magdumala sa manga banwa dun ni kasakupan nan. na migdumala sa kadakulaꞌ na kasakupan na Roma. Mig-imoꞌ sakanan sa bala-ud na ka-ilangan magpalista ya kadég na utaw magi sa sinsus. Ya suguꞌ yeiy pigbekkal adti kadakulaꞌ na kasakupan nan. 2Yeiy ya tagnaꞌ na pagpasinsus. Aw nya-imoꞌ yeiy dengan na si Kuréniyo ya migdumala sa banwa na Sirya. 3Yanagaw ya kadég na manga utaw migpansi-uliꞌ silan adti kanilan manga lunsud pada magpalista sa ngalan nilan.
4Aw si José nyindeg uman lekat dun ni lunsud na Nazarit na sakup na Galiliya aw nyadtu ni Bétléhém na sakup na Judiya. Na, ya lunsud na Bétléhém, yan ya pigka͡utawan ni Dabid na hariꞌ asini muna. Yanagaw nyadtu si José kay buwadbuwad sakanan ni Dabid, 5eped nan si Maria na kanan tawas na ka͡utawanan da, pada magpalista uman silan. 6Sa talana nilan adti Bétléhém, dyumateng ya udas na pyetesan da si Maria. 7Aw kya͡utawan sa iseꞌ nan na eseg na kamagulangan, aw pigputus nan na téla ya iseꞌ nan. Aw pigpakulang nan dun ni kakananan na ayep kay walaꞌ da ya tambiꞌ na un nilan kabantukan.
Ya pagpakitaꞌ na anghil adti manga magdadiyaga͡ay sa manga karniro
8Na, yan na gabi, awun manga magdadiyaga͡ay na migtungguꞌ sa manga karniro nilan dun ni panabtabanan na diliꞌ to-o mawat adti Bétléhém. 9Aw tigkan migpakitaꞌ kanilan ya sambuk na anghil na Tyumanem, aw kya-ilawan silan na dakulaꞌ na kalalamdag na Tyumanem. Aw to-o silan nyallek. 10Manang miglong ya anghil kanilan, “Diliꞌ kamu magkallek! Pakanyegi mayu ya un ku paglongun: Awun ubat-ubat ku kamayu na to-o madyaw na makapaleya sa kadég na manga utaw. 11Kay adun na gabi yeiy, adti lunsud ni Dabid, nya͡utaw da ya Magpaluwa-ay kamayu na yan ya Kristu na Matas na Pangulu. 12Aw yeiy ya pangilala na matinaw ya pig-ubat-ubat ku kamayu: Kita-en mayu ya tagbiꞌ na iseꞌ na pigputus na téla aw pigpakulang dun ni kakananan na manga ayep.”
13Pagkatigkas na anghil maglong, biglaꞌ uman dyumateng ya madég na manga anghil na lekat adti tas na langit. Aw ya kadég nilan migdeyen sa Tyumanem, law nilan,
14“Deyen ya Tyumanem na awun ni tas na langit!
Aw awun da kalinaw na manga utaw asini tas na lupaꞌ na nyakatutuk sa Tyumanem.”
15Sa paglikuꞌ da na manga anghil adti tas na langit, migbalawbalaw ya manga magdadiyaga͡ay sa karniro, law nilan, “Na! Kitadun da madtu ni Bétléhém aw naten tanawun ya nya-imoꞌ adtu na pigpa-edeꞌ kanaten na Tyumanem.”
16Yanagaw nyaksay silan nyadtu aw kyinitaꞌ nilan si Maria aw si José, aw pigkitaꞌ nilan uman ya iseꞌ na pigpakulang adti kakananan na ayep. 17Aw pagkatigkas nilan tanawun ya iseꞌ, pig-ubat-ubat nilan adti manga utaw ya piglong kanilan na anghil sa iseꞌ yan. 18Aw nyabelengbeleng ya kadég na nyakadengeg sa pig-ubat-ubat na manga magdadiyaga͡ay sa karniro. 19Manang si Maria, pigtaguꞌ nan adti kanan ginawa ya kadég na nyangka-imoꞌ aw gayed nan pig-anenganeng kun unu ya kakawasan. 20Aw lyumikuꞌ ya manga magdadiyaga͡ay na migdeyen silan sa Tyumanem asuntu sa kadég na pigdengeg aw pigkitaꞌ nilan, kay alag saba matinaw ya kadég na piglong na anghil kanilan.
Ya pagngalan sa iseꞌ
21Na, sa walungallaw da na iseꞌ, pigpatuliꞌ nilan sakanan. Aw Jisus ya pigngalan nilan kanan, kay yan ya ngalan na piglong na anghil kanilan idtu muna sa walaꞌ pa kabdes ya ina nan.
Ya pagdala kan Jisus adti Témplo
22Na, dyumateng da ya allaw na un madtu si José aw si Maria adti Témplo dun ni Jérusalim pada tumanen ya suguꞌ dun ni Uldin na pig-atag kan Moysis sa paglinis sa ka͡ubayan na bagu kya͡utawan. Aw pigdala nilan uman ya iseꞌ pada taniyen adti Tyumanem, 23kay nyakasulat adti Uldin: “Ya kadég na iseꞌ na eseg na kamagulangan, pagtaniyen adti Tyumanem.”#2:23 Mabasa adti Éxudo 13:2,12. 24Na, pada kalinisan si Maria, pigdalug nilan uman ya nyakasulat dun ni Uldin: “Dugsuꞌ ya duwa ya tukmu, aw kun walaꞌ yan, duwa baling ya impis na kalupati.”#2:24 Mabasa adti Libitiko 12:2-8.
Ya pagpa-edeꞌ ni Simyon sa datengan na Iseꞌ
25Na, awun sambuk na utaw dun ni Jérusalim na pigngalanan na Simyon. Matulid ya kanan anenganeng aw nyatibulluk ya ginawa nan adti Tyumanem. Madugay da sakanan migtagad na paluwa-en na Tyumanem ya manga buwadbuwad ni Isra-él. Aw ya Ispiritu Santo awun ni kanan. 26Aw pigpa-edeꞌ da kanan na Ispiritu Santo na diliꞌ pa sakanan matay mendaꞌ na kita-en nan ya Misiyas na pigpakang na Tyumanem asini muna. 27Aw dun ni allaw yan, piggagad na Ispiritu Santo si Simyon na madtu ni Témplo. Aw dun da nan kita-a ya iseꞌ na si Jisus na pigdala na mangkatikadeng nan adti Témplo na un tumanen ya suguꞌ dun ni Uldin. 28Sa pagkitaꞌ ni Simyon sa iseꞌ, pigsipit nan aw pigdeyen nan ya Tyumanem, law nan,
29“We… Tyumanem, tumbayan da na kamangen aku mu na kanmu sugu-anen, kay nyatingen da ya anenganeng ku,
asuntu na nyatuman da ya pigpakang mu kanak.
30Kay pigkitaꞌ da na kanak mata ya pigtagilan mu dadan
31na yan ya Magpaluwa-ay sa kadég na manga utaw.
32Sakanan ya kalalamdag na mag-ilaw sa un agiyan na manga utaw na Héntil pada mangintu-u silan kanmu.#2:32 Mabasa adti Isayas 42:6b aw 49:6b.
Aw magi kanan ka-atagan na dengeg ya manga utaw na Isra-él na yan ya kanmu manga utaw.”
33Pagdengeg na ama aw ina na iseꞌ sa piglong ni Simyon, nya-enneng-enneng silan sa pigpa-edeꞌ nan sa un datengan na iseꞌ. 34Pagkatigkas yan, migsekat si Simyon adti Tyumanem na pakadyawun nan silan, aw piglongan pa nan si Maria, “Ya iseꞌ ini un ma-imoꞌ pangilala adti manga utaw na Isra-él pada ka-ede-an nilan ya agiyanan pasinan adti Tyumanem. Madég kanilan ya un kumele kanan, yanagaw ukuman nan silan. Manang madég uman kanilan ya dumawat kanan, aw paluwa-en nan silan. 35Aw magi kanan, kabukasan ya pigtaguꞌ na manga utaw dun ni kanilan anenganeng. Manang ikaw kay Déꞌ, kun kita-en da mu ya un imo-un na manga utaw sa iseꞌ mu, apeten mu ya kakalatan na ginawa kasiling na pigdugsang na lipang ya kanmu pusuꞌ.”
Ya pagleya ni Ana
36Na, awun sambuk na ka͡ubayan na propita sakanan na Tyumanem. Aw ya ngalan nan si Ana na iseꞌ ni Panu-él na buwadbuwad ni Asir. To-o la sakanan buyag, aw oloꞌ da pitungka͡umay ya pagsambuk nilan ya eseg nan. 37Nyabalu la sakanan, aw adun kawaluwan tag upat (84) ya umay nan. Allaw aw gabi awun sakanan ni Témplo na gayed migsimba sa Tyumanem magi sa pagpuwasa aw pagpanawagtawag. 38Aw sa talana pa ni José aw ni Maria adti Témplo, dyumulud si Ana kanilan aw to-o nan pigpasalamatan ya Tyumanem. Aw gayed nan pigkasampetan ya iseꞌ adti kadég na manga utaw na migtagad sa paglekat na Tyumanem sa manga taga Isra-él.
Ya pag-uliꞌ adti Nazarit
39Sa abus da ni José aw si Maria katuman ya kadég na pigsuguꞌ na umbaꞌ nilan imo-un na awun ni Uldin na Tyumanem, nyuliꞌ silan adti Nazarit sakup na Galiliya. 40Aw ya iseꞌ tyumulin aw to-o migkabagseg, aw gayed sakanan nyatmuꞌ na katadeng aw grasya na alag lekat adti Tyumanem.
Ya pagpatagak ni Jisus adti Jérusalim
41Na, kada umay magkadtu ya mangkatikadeng ni Jisus adti Jérusalim pada tumambung sa Pista na Paglabay na Anghil na Tyumanem. 42Aw sa pagdateng da ni Jisus adti sampuluꞌ tag duwa (12) ya umay, nyadtu uman silan ni Pista kasiling na katanem nilan aw pigpa-agad nilan si Jisus. 43Pagkatigkas na manga allaw na Pista, nyan-uliꞌ da silan. Manang migpatagak baling si Jisus adti Jérusalim. Aw walaꞌ yeiy ka-ede-i na mangkatikadeng nan. 44Iman nilan aw nyaka-agad si Jisus sa kanilan ka-epedanan. Pagkatigkas na sangallaw na pagpanaw nilan, pigpaninaw nilan si Jisus dun ni kanilan kadégan aw manga ubaybay 45manang walaꞌ nilan kita-a. Yanagaw lyumikuꞌ silan adti Jérusalim pada paninawun sakanan. 46Sa pagkatlu la na allaw, pigkitaꞌ nilan si Jisus adti Témplo na nyingkud dun ni tengaꞌ na manga magpalna-uway sa Uldin. Migpakanyeg si Jisus aw nyusip kanilan. 47Aw ya kadég na dyumengeg kanan, nya-enneng-enneng silan asuntu sa kadakulaꞌ na kya-ede-an nan dun ni pagtubag nan sa kanilan manga usip. 48Aw sa pagkitaꞌ na mangkatikadeng nan kanan, to-o silan nyabelengbeleng, aw miglong ya ina nan, “Kay Toꞌ, anangaꞌ mu imo-un kanami yeiy? Tanawa! To-o kami nyaypeng kanmu! Gayed kaw nami ya ama mu pigpaninaw.” 49Tyumubag si Jisus kanilan, “Anangaꞌ kamu maninaw kanaken? Unu, walaꞌ kaꞌ mayu ka-ede-i na ka-ilangan na asini aku pag-eyaꞌ ni balay na Ama ku?” 50Manang walaꞌ nilan kalabeti kun unu ya kakawasan na piglong nan.
51Aw nyagad si Jisus kanilan nyuliꞌ adti Nazarit. Aw kya͡agadan nan ya kanan mangkatikadeng. Aw ya kadég na nya-imoꞌ, alag pigtaguꞌ na ina nan adti kanan ginawa. 52Aw tyumulin si Jisus aw kyadugangan pa to-o ya katadeng nan. Aw ya Tyumanem aw manga utaw alag kyatutukan kanan.
ទើបបានជ្រើសរើសហើយ៖
Lukas 2: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
