Lukas 16
16
Ya pundinganan sa pagsaligan na diliꞌ kasaligan
1Aw mig-ubat pa uman si Jisus sa pundinganan adti manga umagakan nan, law nan, “Awun sambuk na utaw na mayaman, aw pigtaligu nan adti kanan pagsaligan ya kanan manga ka-unan aw kuwalta. Manang awun manga utaw na migpa-edeꞌ adti mayaman na pigdagwas kunu na pagsaligan ya kuwalta nan. 2Yanagaw pigpatawag nan ya kanan pagsaligan, aw piglongan nan, ‘Unu ya dyengeg ku yeiy na diklamu kanmu? Atagan da kanak adun ya listahan sa kadég na pig-imoꞌ mu sa kuwalta ku, kay lekat adun diliꞌ da kaw magpadeleg sa talabahu mu.’ 3Aw miglong ya pagsaligan adti anenganeng nan, ‘Unu la ya un ku imo-un na bekeꞌ da ku ya pagsaligan na amu ku? Diliꞌ ku mabatug ya mabegat na talabahu kasiling na pagkutkut sa lupaꞌ, aw to-o aku magkamulamula magsekatenen adti manga eped.’ 4Aw tigkas yan miglong uman, ‘Ah…yeiy baling ya madyaw ku imo-un pada madég ya ubaybay ku na dumawat kanak adti balay nilan dun ni allaw na walaꞌ da ya talabahu ku.’ 5Yanagaw pigpatawag na pagsaligan ya tagsambuksambuk na nyakabeles sa amu nan. Pig-usip nan ya sambuk, ‘Pila ya beles mu adti amu ku?’ 6Aw tyumubag ya utaw yan, ‘Sanggatus (100) ka sibulan ya mantikaꞌ na olibo.’#16:6 Ya sanggatus (100) ka sibulan ya mantikaꞌ na olibo, yan ya tulummalalan aw tulunggatus aw sampuluꞌ ka litro na pigkamang adti sanggatus aw kalima͡an (150) ya kawuy na olibo. Kun baligyaꞌ, to-o dakulaꞌ ya alagaꞌ. Aw miglong kanan ya pagsaligan, ‘Ini la ya listahan sa beles mu. Ingkud kaw aw sulata na kalima͡an (50) da oloꞌ ya kyabelesan mu.’ 7Aw tigkas yan, miglong da uman adti kadwa na nyakabeles, ‘Pila uman ya kanmu beles adti amu ku?’ Aw tyumubag ya utaw yan, ‘Sanggatus (100) ka anes ya trigu.’#16:7 Ya anes yan ya to-o dakulaꞌ na be-en na diliꞌ mabatug dala͡en kun awun seled. Kun tanemen ya sanggatus (100) ka anes ya trigu, yan ya maka-umbaꞌ sa kapatan (40) aw tengaꞌ ya éktariya. Aw miglong ya pagsaligan, ‘Ini la ya listahan sa beles mu. Na, sulata na oloꞌ da kawaluwan (80) ka anes.’ 8Aw pigsayaꞌ baling na amu nan ya kanan pagsaligan asuntu sa katadeng nan, pangkay diliꞌ sakanan kasaligan. Kay ya manga utaw asini tas na lupaꞌ to-o pa madég ya kapandayan nilan sa paggamit sa kanilan kuwalta kay sa manga utaw na syumalig sa Tyumanem. 9Aw paglongun ta kamu: Gamita ya kuwalta mayu pada ka-untungan uman ya eped na manga utaw kay dumateng ya allaw na walaꞌ da ya ma-untung sa kuwalta. Aw ya manga utaw na pigtabangan mayu na nyakaseled adti Kasakupan na Pighari-an na Tyumanem, to-o silan magleya sa pagkitaꞌ nilan kamayu kagaya adti tas na langit.
Ya umbaꞌ imo-un sa kuwalta
10“Ya utaw na kasaligan sa tagbiꞌ, kasaligan uman sa dakulaꞌ. Aw ya utaw na diliꞌ kasaligan sa tagbiꞌ, diliꞌ uman kasaligan sa dakulaꞌ. 11Yanagaw kun diliꞌ kamu kasaligan sa kuwalta aw ka-unan asini tas na lupaꞌ, singalan kaꞌ ya un magtaligu kamayu sa tengteng ka-unan adti tas na langit? 12Aw kun diliꞌ kamu kasaligan sa pigtaligu kamayu na eped na utaw, na, singalan pa kaꞌ ya un matag kamayu sa ka-unan na pigtagilan da kamayu?
13“Walaꞌ ya allang na makadalug sa duwa ya tagtun, kay pakalaten nan ya sambuk aw ginawa͡an nan ya sambuk. Dalugun nan ya sambuk aw palipaslipasan nan baling ya sambuk. Diliꞌ saba mabatug na utaw pagdenganen ya pagginawa sa kuwalta aw ya pagdalug sa Tyumanem.”
Ya eped pa na palna-u ni Jisus
14Sa pagdengeg na manga Parisiyo sa palna-u ni Jisus, pig-odoy-odoy nilan sakanan kay to-o nilan pigginawa͡an ya kuwalta. 15Manang miglong si Jisus adti kanilan, “Migpakita-kitaꞌ kamu adti asdangan na manga utaw na sallong kunu na walaꞌ ya salaꞌ mayu, manang nya-edeꞌ saba ya Tyumanem sa anenganeng mayu. Kun unu ya adti anenaneng na utaw na dakulaꞌ ya ma-untung, adti Tyumanem walaꞌ ya ma-untung.
16“Ya Uldin na pig-atag na Tyumanem kan Moysis aw ya manga pigsulat na manga propita, pigpa-edeꞌ da mendaꞌ sa manga allaw ni Juan na Magba͡utismuway. Lekat dun ni allaw na pagdateng ni Juan, pigpa-edeꞌ da adti manga utaw ya Madyaw na Ubat-ubat sa Kasakupan na Pighari-an na Tyumanem. Aw madég ya migtibagseg na maka-akup dun. 17Manang kenneꞌ pa na awun ma-untung sa Uldin na pig-atag na Tyumanem. Molas pa malanas ya langit aw lupaꞌ kay sa ma-uman ya pangkay tagbiꞌ na pigpasulat dun ni Uldin.
18“Kasiling uman na pigsuguꞌ sa kapangugnanay, ‘Kun awun eseg na ayawan nan ya kanan ka͡ubayan, aw kun mangugnan sa eped na ka͡ubayan, piglakadan da nan ya muna ka͡ubayan nan. Aw ya eseg na mangugnan sa ka͡ubayan na pig-ayawan da na eseg nan, miglakadenen uman sakanan.’ ”
Ya pundinganan sa utaw na mayaman aw si Lazaro
19Aw miglong pa uman si Jisus sa sambuk na pundinganan, law nan, “Awun utaw na mayaman na migkadégkadég sa téla na linum aw téla na tapel ya batek na alag dakulaꞌ ya alagaꞌ.#16:19 Asini muna, ya kadégkadég na pagsutun na manga hariꞌ aw manga mangkalangkaw, tapel ya batek. Aw migpa-eyang sakanan kyuman sa mangkadyaw na kakan kada allaw. 20Aw dun ni luwaꞌ na suwangan na pamanag na balay nan pigpakulang dun ya sambuk na utaw na makalalat na pigngalanan na si Lazaro. Ya lawas nan nyatmuꞌ na pegsa 21aw kaliman nan galu kuman sa mumuꞌ na nyangkataktak lekat adti lamisa na mayaman. Aw gayed dyumulud adti kanan ya manga iduꞌ aw pyan-ilasan nilan ya manga pegsa nan. 22Na, sambuk na allaw nyatay si Lazaro, aw pya-agad sakanan na manga anghil adti tampid ni Abraham. Ya utaw na mayaman nyatay uman aw piglebeng. 23Aw dun ni banwa na Kaludukan to-o sakanan migti-is, aw sa paglangad nan kyinitaꞌ nan ya kanan tyugbulan na si Abraham adti mawat aw dun ni tampid nan si Lazaro. 24Yanagaw migtatawag ya mayaman, ‘We…kay Maꞌ Abraham! Mallat kaw kanak. Sugu-a beg si Lazaro na tullak nan ya kanan tulluꞌ adti tubig pada patagdu-an nan ya dilaꞌ ku. Kay to-o aku migti-is idi asuntu sa kapasuꞌ na atulun!’ 25Manang tyumubag si Abraham kanan, ‘Kay Toꞌ, anenganenga pagaw, sa adtu pa kaw ni tas na lupaꞌ, madyaw ya kanmu pagpakabetang, aw si Lazaro, malatay ya kanan pagpakabetang. Manang adun, migleya sakanan idi, aw migti-is kaw sa kanmu. 26Aw diliꞌ mabatug ya pigsekat mu, kay awun iyan ni tengaꞌ tadun na nyaka-elet na to-o malalem. Aw pangkay singalan ya malim na madtu na lekat adi kanami, diliꞌ nan mabatug ya pagkadtu, aw walaꞌ uman ya lekat dun ni kamayu na makakadi.’ 27Aw miglong pa uman ya mayaman, ‘Nyanginayuꞌ aku kanmu, kay Maꞌ Abraham. Pakadtuwa si Lazaro adti balay na ama ku, 28kay awun pa lima ya inulug ku aw pa-ede-en nan silan pada diliꞌ silan makadalug kanak adi banwa idi na alag pagti-is.’ 29Manang tyumubag si Abraham, ‘Adtu la ni kanilan ya pigpansulat ni Moysis aw manga propita na Tyumanem. Ka-ilangan pakanyegan nilan aw dalugun nilan.’ 30Aw miglong pa ya mayaman, ‘Kay Maꞌ Abraham, diliꞌ silan mangintu-u. Manang kun awun madtu kanilan na lekat adti nyangkamatay, magselsel silan.’ 31Manang miglong si Abraham kanan, ‘Kun diliꞌ silan mangintu-u sa pigpalna-u ni Moysis aw manga propita na Tyumanem, diliꞌ silan uman mangintu-u pangkay kun awun pa sambuk na mataw lekat adti nyangkamatay na magpalna-u kanilan.’ ”
ទើបបានជ្រើសរើសហើយ៖
Lukas 16: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
