Utumbuli 43
43
Akaabeli baka Josepu ajenda ku Misili
1Ndipala ling`ai inzala jabiya jitenda kujonzukeka ku nndema uku Kanani. 2Ebajomula posu jela jebabiya ahemi kuhuma ku Misili, Yakobu jaapwagila bana baki, “Nnzendaninya kabee ku Misili mwakalomba posu nzokope.”
3Lakini Yuda jaapwagila atati baki, “Mundu jola jutulakali ngamaa, kupwaaga, ‘Ngananzopi ana ngamwiiki nu nndongu wii nsoku.’ 4Ana gujetaki nndongu witu Benjamini jujenda pamu na twepani, ndienu, ngiti tujenda kulomba posu. 5Lakini ana ngagujetake jujenda na twepani, ndi twepani ngatujende konioko, ndaba mundu jola jutupwagila, ‘Ngananzope ana ngamwiiki nu nndongu winu nsoku.’”
6Israeli japwaaga, “Boo, ndaba jaki kumbeleka mu mang`aliku kupwaaga mmbii nu nndongu wi jonge?”
7Bunzibua, “Mundu we jola jwatenda kutulaluki sukuhingamki ngani kupete majambu gitu na alongu bitu kupwaaga, ‘Boo atati bii bakona bome? Boo, mmbii nu nndongu wi jonge?’ Henu tunnzibua kulengana na maswali gaki. Tukawesa boo kumanya ana ngiti jutupwagila, ‘Munndeta nndongu wii.’ ”
8Yuda ampwagila Izilaeli atati baki, “Nyetakaliya nepani nyenda naku ili tuboka naku sajenu ili tubia twabomi na twiikuwa ni inzala twepani na wehapa pamu na bana bitu. 9Nepani nakabiya nunzemale. Wehapa wiinaja nepani. Ana ngasenunkelabwii ili gummbona kwa mihu gaku wamweti, lawama joti jibiya jangu nepani yaka petapeta. 10Ana ngasetwakakabaki twakabiya tupiti nu kukelabuka mala pabeli.”
11Hapa Izilaeli atati baki bapwaaga, “Hena kwa ndaba kupalika kuba hela ndienu, nhenga helahela, nnzukua mu mipuku jinu indu ya sapi yu punndema witu, mukumpekiya nhupi nkolongu mundu we hoju. Munntotuliya ubani, mitela juntomoni jebijikema zeli na manemane na mahuta masokopi gu nkwaju, busi nsokopi na posu jejilengana na malabi gu munkongu na lozi. 12Nntotula lupija mala pabeli ju lupija lolupalika kwa ndaba mpalika kunkelabu lupija lola lomuluketaninya mu mipuku pengi babei kwa makosa pena. 13Munzukua kabee nu nndongu winu nsoku nnzendaninya kabee kwaka mundu we hoju. 14Sapanga Jwana Makili jumpekiya ikia palongi jaka mundu we hoju, jukunndekakiya nndongu wii jola pamu na Benjamini akakelubuka pamu na mwanganya. Ku upandi wangu ana kupalika kuwelee na bana bangu mmanyibasi kubiya aelaela.”
15Hapa batola nhupi yela nu lupija mala ibeli na yu utumbuli, bajenda ku Misili pamu nu nndongu wabu Benjamini. Pabahika bajenda kujema palongi jaka Josepu. 16Josepu eammbona Benjamini pamu nabombi, jaapwagila jojujemale nyumba jaki, “Waapelika bandu haba kunyumba, wakasinza kinyama simu nukulenganake sapi, ndaba bandu be haba posu ja lyobamutu ngiti akula na nepani.” 17Jojujemale jola jahenga ngati ebunndagalakiya. Jaapelika bandu bala kunyumba jaka Josepu.
18Pababona apelekwa kunyumba jaka Josepu lwakamula lujogopu bapwaganinya beni na beni, “Butuletiki kongo kwa ndaba ju lupija lobutukelubukiya lola mu mipuku jitu, patwahikiki lisoba la mwandi ili apata kikopakale sukutuhenga liyaa nukutujopa maponda gitu nukutuhenga twaatumwa baki.” 19Henu bunzendila jojujemale nyumba jaka Josepu nukulongee naku koni abiii pu nndyangu, 20bumpwagila, “Gupepa koku bambu, twepani twahiki pani pamwandi kulomba posu. 21Etwahika pandu pukugone mwiindela, twahogula mipuku jitu, twasangia kulukole lupija kila jumu witu mu ndomu umpuku waki ngati eyabii. Henu tukelabwii lupija lola. 22Tuletiki nu lupija longi lukulombe posu. Ngasetumanyiki nya jojutubekila lupija lwe holu mu mipuku jito.”
23Jojujemale jola jajibua, “Mwiikuba ni kiholu, wala mwiijogopa. Pangi Sapanga winu, Sapanga wa atati binu, ndi jojunkelubukiya lupija mu mipuku jinu. Nepani najopa lupija lwinu.” Ndipala jaaletila Simoni nndongu wabu.
24Jojujemale jola pajaajopa pa nyumba jaka Josepu, jaapekiya masi nukusamba magolu gabu nakwagalea maponda gabu. 25Nabombi baandia nhupi yabu yukumpeke Josepu pajihika lyobamutu, kwa ndaba bajoa ngiti akula pamu najombi. 26Josepu pajakelubuka ku nyumba, bunndetila nnyumba nhupi yebabii atotwi bunzinamiya kwi isima. 27Josepu jaalalukiya majambu gabu ndi nakwapwaagi, “Mwanzimuliya majambu gaka atati bii baasejiki bala, boo, ajumwike? Bakona bome?”
28Bunzibua, “Ntumisi waku atati bitu ajumwiki na bakona bome.” Ndipala bajinama kwi isima.
29Josepu ejalinga nu kummbona Benjamini, nndongu waki mwana wa anyongo baki japwaaga, “Jonzo ndi nndongu wii nsoku jomwapwaga majambu gake?” Ndienu Josepu jaapwaaga, “Sapanga jugupengala mwanangu!” 30Apalapa, Josepu jaboka pandu je pala, ndaba maholi gabiya gapala kupita kwa hamu ngolongu juku nndongu waki, jajingala kusumba jaki kulela kwa sauti. 31Ejajomula kulela jasamba masi pamihu jaki, japita koni jilikasa, jalagalakiya posu jiihika. 32Josepu bunhandaliya posu jaki kajika jaki, na alongu baki baandaliya pakajika ahelahe kabee bandu buku Misili babakula pamu naku, baandaliya pakajika jabu, ndaba ngasekupalika Amisili kula posu pamu na Aebulania ndaba wabiya nhilu. 33Alongu baka Josepu batami pamu kulengana na umuli wabu, kutumbuli ju utumbuli mbaka jwamwisu, babiya alingalani sukusangaa. 34Posu jabiya jijukulika pamesa jaka Josepu nukupelekwa kwabu, lakini Benjamini bumpekia mala nhwanu ja posu jebapekiya alongu baki bangi. Ndienu bakula na kunywa nukutogule pamu.
ទើបបានជ្រើសរើសហើយ៖
Utumbuli 43: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.