Utumbuli 14
14
Abulamu anhoko Lutu
1Kipindi sehesi, bambu nkolongu Ampupeli juku Shinali na bambu nkolongu Alioku juku Elasali na bambu nkolongu Kedolameli wa Elamu na bambu nkolongu Tidali wa Goimu, 2bajenda kukomana ngondu na bambu nkolongu Bela juku Sodoma na bambu nkolongu Bilisha juku Gomola na bambu nkolongu Shinabu juku Adima, bambu nkolongu Shemebeli juku Seboimu na bambu nkolongu Bela jobunkemika kabe Soali. 3Boti babalogwi pamwisu ajonganisi alonda babu pamu kuhuma mu ligomba luku Sidimu yani Nhanga ja mwinyu. 4Kukipindi sa yaka komi ni mibeli babiya atenda kuntumaki bambu nkolongu Kedolaomeli, lakini saka sa komi na tatu, bakana kuntumaki. 5Ekwahika saka sa komi nu nnsesi, bambu nkolongu Kedolaomeli na akabambu akolongu ajaki bala bahika na kaawesa bandu buku Lepaimu ku Ashitaloti Kalinaimu na Aazuzi buku Amu na Aemi ku Shawi Kiliataimu, 6na Aoli ku kitombi sabu suku Seili, baabenga mbaka ku Elupalani pambipi nu lukoba. 7Ndienu bakelubuka munyuma mbaka ku Enimishipati yani Kadeshi, baatukaliya Aamaleki na Aamoli boti na kwaalapu bandu babii atama ku Asasoni Tamali.
8Ndienu bambu nkolongu juku Sodoma na bambu nkolongu juku Gomola na bambu nkolongu juku Adima na bambu nkolongu juku Seboimu na bambu nkolongu Bela bapelika alonda babu ku ligomba luku Sidima, 9kukomana na Kedolaomeli bambu nkolongu juku Elamu na Tidali bambu nkolongu juku Goimu na Amulaeli bambu nkolongu juku Shinali na Alioko bambu nkolongu juku Elasali yani akolongu nsesi kwa akolongu nhwanu. 10Ligomba luku Sidimu labiya litweli mabomba ga lami, henu bambu nkolongu juku Sodoma nuku Gomola pababiya atila ngondu bahabukiya momuje, lakini bangi batilila kwi itombi. 11Ndienu akabambu akolongu nsesi bala bababiya awesiki, bajukua mali goti guku Sodoma na Gomola ni ilebi yabu ndi batenda kujendane. 12Anzukua hata Lutu mwana juku nndongu mundu Abulamu jojabii jutama ku Sodoma pamu na mali gaki na batenda kubokane.
13Mundu jumu jabiya jukwelapwiki jajenda kumpwagi Abulamu Nhebulania. Kipindi sehesi Abulamu jabiya jutama pambipi ni mikongu ji mialoni jaka Mwaamoli Mamule. Mamule jabii nndongu waka Eshikoli na Aneli. Boti haba babiya ajongini na Abulamu. 14Abulamu pajajoa mwana waka nnuna waki atei kunkamu, jaboka na bandu baki mia tatu na komi na nani buku nyumba jaki babaaboliki kukomana ngondu, na baapwataliya mbaka musi uku Dani. 15Ikilu jaabaga bandu baki ili jwaalapulaa bandu babunkamwi Lutu behaba baalapula na kwaabenga mbaka musi uku Hoba gogubii upandi uku kasikazini gwa musi uku Damasiko. 16Ndienu, Abulamu jagakombula mali goti gababia ajukwi abaja bala, nu kunhokola Lutu nnuna waki na mali gaki pamu na akambomba na bandu bangi.
Melikisedeki ampenge Abulamu
17Abulamu pajakelubuka ejabiya anhwesiki bambu nkolongu Kedolomeli na ajaki, bambu nkolongu juku Sodoma jajenda kuketangana na Abulamu mu ligomba luku Shawi yani ligomba lu ubambu ukolongu. 18Najombi Melikisedeki bambu nkolongu jwa musi uku Salemu jojuwe jojabii nngolu jwaka Sapanga Nkolongu jojubi kunani namangani jaleta mabumunda na divai, 19Ampengila, “Abulamu su kumpwagi, Abulamu Sapanga jojubii kunani ngani jugupengi! 20Julumbaliwa Sapanga Nkolongu jojubii kunani ngamaa, jojuguwesisi kwawesa abaja baku!” Ndienu Abulamu ampekiya Melikizedeki pandu pa komi pa indu yaki yoti yejakamula ku ngondu.
21Nkolongu juku Sodoma ampwagila Abulamu, “Ngelubukiya bandu bangu ila mali goa gujukua wehapa.”
22Lakini Abulamu ampwagila nkolongu juku Sodoma, “Napa mbamba kwaka Bambu Sapanga Nkolongu, jojabombiki nndema nu kunani kwaka Sapanga, 23nganijukui lugoji au nyusi ikilatu, wala sokapi sekibii saku, wakipuna nu kupwaga gunyangatii mia na mali gingi. 24Ndienu, nganijukuu sokapi ila pe indu yela ya akakombu bangu yebakuliki na pandu pa bandu babapiti nanepani, Aneli Eshikoli na Mamule haba apata lipungu labu.”
ទើបបានជ្រើសរើសហើយ៖
Utumbuli 14: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.