Akalabhe 2
2
Matambiko gha uhembe
1“Mundo jhojhoha anda aletite litambiko lya uhembe kwa Bhambo Chapanga, litambiko lyene libha lya uhembe ghutemite. Nahangalana na mahuta na ubane. 2Peniya, nabhaletela akampiya matambiko bheniya yana ya Alune. Mpiya litambiko jhumo pakate jhabhe natola lukohe lumo jha uhembe gwenio ghunakutema ghubhii na mahuta na ubane nukukomelekeya kwa mwotu chehemo jha kupiikiya litambiko, libhaha litambiko lya ukombokelo gwa Bhambo Chapanga. Lende ndi litambiko lya kukomelekelwa. Litambiko lya lilibhii na luhumba lwambone lwa kunhalalicha Bhambo Chapanga. 3Chehemo uhembe ghuighilike gwa litambiko lyenio ndi jha akapiya matambiko. Jhenie ndi chehemo jha nyahinyahi hake jha litambiko jhipiitwe kwa Bhambo Chapanga.
4“Anda mundo impikii litambiko lya mabumunda ghu kujhocha, ibhaha jhangalekelwa ngedule jhihangalinwe na mahuta gha micheitune amu mabumunda makombaho ghangabhehe na ngedule na kupakaya mahuta.
5“Anda litambiko lyampihite ndi lya mabumunda ghighajhochitwe pa kikalango, lyenie libhaa lya uhembe ghukutema ghuhangalinwe na mahuta gha micheitune nambo changa ngedule. 6Mabumunda gheniya ngaghaghabhanichwa ipande ipande nu kujhitii mahuta, lyene ndi litambiko lya uhembe.
7“Anda litambiko lyamupiya ndi lya mabumunda ghighatelikwe mu chupuliya, lyenie nalibha lya uhembe ghunakutema na kujhitii mahuta. 8Nanneta litambiko lyenio lya uhembe ghutenganichwe kwa ilebhe yene palonge jha Bhambo Chapanga, na mpiya matambiko naipelika chehemo jha kupiikiya litambiko. 9Mpiya litambiko natola chehemo jha kipandi cha litambiko, jhibhii ndi litambiko lya ukombokelo na kukomelekeya chehemo jha kukomelekeya. Lende ndi litambiko lya kukomelekelwa. Litambiko lya kukomelekelwa, lilibhi na luhumba lwa mbone lwa kunhalalicha Bhambo Chapanga. 10Chehemo jhihighilike jha litambiko lya uhembe, ndi lya akapiya matambiko. Jhenie ndi jhihighilike jha nyahinyahi hake jha litambiko jhipiitwe kwa Bhambo Chapanga.
11“Litambiko lyolyoha lya uhembe lya mumpiikiya Bhambo Chapanga ipalwa lyangahangalanwa jhe na ngedule, ipalwa ng'o kuhangalana ngedule amu bhuche mu litambiko lyapiikilwa Bhambo Chapanga kwa mwotu. 12Mihoto kunnete Bhambo Chapanga malobhoko ghino ngita litambiko. Nambo ghena naghapiwa jhe mu chehemo jha kupiikiya litambiko ngita hela ibhii nu luhumba lukunhalalicha Bhambo Chapanga. 13Nnekela mwinyo mu matambiko ghino gha uhembe, nhwalo mwinyo ndi ulangii nginyililo jha Lilaghano pakate jhino na Bhambo Chapanga. 14Anda mipala kumpiikiya Bhambo Chapanga litambiko lya malobhoko ghake, nampiya mbonje ijhochitwe mu manjwanjwane ghake, amu nampiya mu mabumunda ghighabanikwe ghighatengenichwe kwa ngano jhitemite. 15Namiijhitila mahuta nu kuhangalana na ubane, na lyene nalibhaha ndi litambiko lya mbonje. 16Mpiya litambiko najhocha chehemo jha litambiko lya mbonje iponditwe na kuhangalana mahuta pamonga na ubane gwake gwoha, ibha litambiko lya ukombokelo, lyenie ndi litambiko lyapiikilwa Bhambo Chapanga kwa mwotu.”
ទើបបានជ្រើសរើសហើយ៖
Akalabhe 2: NdeBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in the Ndendeule Language @The Word for the World International and Ndendeule Language Translation. All rights reserved