Kubhoka 10
10
Libulo lya nane, Madidima
1Bhambo Chapanga ngannobholila Mucha, “Nnyende kabhele kwa Falao. Nenga nintei abhehe na mwojho unonoho, pamonga na akatumiche bhake, kupala ndende nginyililo henge panakate jhabhe, 2kupala mangota mwachimuli yana hino na ichokolo hino, chinatendi ubhiche Akamichile kwakuhenga nginyililo kwa ngaghandandela panakate jhabhe. Yene nabhamanya nenga ndi Bhambo Chapanga.”
3Peniya, Mucha na Alune ngabhanyendela Falao na kunnobholela, “Bhambo Chapanga, Chapanga jwa Akaebulaniya, ilonge naha, bho, nankana ade ligha kukitembekecha? Malekekeye bhando bhango bhajhende bhannyinamile. 4Anda nkanite kwalekekeya bhando bhango bhabhoke, bhahe, kilabho naneta madidima kwii mu kilambo chino. 5Kilambo choha chuku Michile nakibha na lubhendo, nhwalo gwa madidima. Nabhahachulana kila kilebhe chakihighilika na hula jha maghanga, helahela nabhahachulana mikongo yoha yaimelite mu mighonda jhino. 6Madidima gheniya naghatwelela mu nyumba jhino na mu nyumba ya akatumiche bhino na mu nyumba ya Akamichile, madidima naghabhaha hoko, akahoko bhino bhinaghabhona jhe kubhoke kubhelukwa kwabhe, ade deleno.” Peniya Mucha ngabhoka kwa Falao.
7Akatumiche bhakolo ngabhankonya Falao, “Bho, mundo jhonju natuntotoha ade ligha? Malekekeye bhando bhajhende bhakanyinamii Bhambo Chapanga gwabhe. Bho, mihola jhe kilambo chuku Michile kihangabhana?”
8Peniya Mucha na Alune ngabhakemitwa kwa Falao na kwalobhole, “Nnyendengane mukannyinamila Bhambo Chapanga gwino. Nambo nikonya, nannyenda achighane?”
9Mucha nganyangwila, “Natujhenda na ingombo hito na ighogholo hito na yana hito na achikabhale bhito. Natujhenda na mambelele na mbuhe na ng'ombi, nhwalo tupalwa tukanhenge Bhambo Chapanga unyagho.”
10Falao ngalongila, “Bhambo Chapanga abhaha pamonga na mangota, anda ninnekekekiye nnyende na akahana bhino na yana hino. Hotu namma na ilebhe yanganandela umalango ghino. 11Nai jhe! Akanalome tugha ndi nabhajhenda kunnyinamii Bhambo Chapanga, nhwalo lyene ndi lyamlipala.” Peniya Mucha na Alune ngabhabhengwa palonge jha Falao.
12Bhahe, Bhambo Chapanga ngannobholila Mucha, “Nnyinula mabhoko ghino mu kilambo chuku Michile, kupala madidima ghapitile na kulye ilebhe yoha yaimelite mumighonda na ilebhe yoha yaihighilika pipetita hula jha maghanga.” 13Peniya Mucha ngantondobhiya nkongocho gwake panane jha kilambo chuku Michile. Na Bhambo Chapanga ngaleta upepo kuhumii upande gwalipitii lyobha, ngaupoghita mu kilambo choha muhe jhoha na kilo nda, na pukuchila tugha upepo gwenio ngauletita madidima. 14Madidima ngaghapukila kila chehemo mu kilambo chenie ngaghatolita mu kilambo choha chuku Michile tyoo. Madidima gheniya ngaghajhingila twe hake, ghinapitii jhe ata naghapitii jhe ng'o. 15Ngayekelila kilambo choha chuku Michile, na kilambo ngakibhonekana lubhendo. Ngabhalila kila kilebhe na uhoe kikahighilika pipetita hula jha maghanga na kila kilebhe chikimelete mumighonda. Likahighilike jhe lihamba lyolyoha munkongo amu mimeya mu kilambo chuku Michile.
16Peniya Falao ngankema kajhombe Mucha na Alune na kwalobholela, “Ne nindendi uhakaho Bhambo Chapanga, Chapanga gwino helahela kwino. 17Chonde ninyopa unekekeye uhakaho gwango kwa mala jhenge, na mukanyopele kwa Bhambo Chapanga gwino ammohe lilagho lende.” 18Peniya, Mucha ngabhoka kwa Falao ngajhenda kunnyopa Bhambo Chapanga. 19Bhambo Chapanga ngauletita upepo ngaupoghita kulitipiki lyobha, ghubhii na makakala, ngaubhoha madidima na kughapeleka ku mbwane jha Chamu. Akahighilike jhe lididima hilu jhumo mu kilambo choha chuku Michile. 20Nambo Bhambo Chapanga ngautenda mwojho gwa Falao ngaujhendelila kubhehe na lighoho, hilu akalekeki jhe Akaichilahele bhabhoke.
Libulo lya ticha, Lubhendo
21Peniya Bhambo Chapanga ngannobholila Mucha, “Jhinula lubhoko lwino kunane, kupala lubhendo tyoo lujhenele mu kilambo choha chuku Michile, bhando nabhatyanga kwa kupapakila.” 22Bhahe, Mucha ngajhinula lubhoko lwake kunane, ngalupitila lubhendo tyoo mu kilambo chuku Michile kwa machiko matato. 23Akibha jhe mundo kukilambo chuku Michile jwahotwila kummona mundo jhonge hilu bhakahotwi jhe kuheghele kwa machiko matato. Nambo kwabhatamita Akaichilahele kukibha na lumule ndaa.
24Peniya, Falao ngankema Mucha na kunnobholela, “Nyendengane makannyinami Bhambo Chapanga. Yana hino na akahana bhino mihoto kulongohana nabho, nambo malongo gha mambelele na mbuhe na ng'ombi hino muileke.”
25Nambo Mucha ngalongila yene jhe, “Yene jhe, tupalwa tujhende na mipugho jhito kupala tukampikii Bhambo Chapanga gwito litambiko lya kukomelekelwa.” 26Twenga natubhoka na inyama hito, kibhii jhe kipagha chikipa kuhighilika. Nhwalo tupalwa kubhohe pakate jha inyama, kupala kunnyinamii Bhambo Chapanga gwito. Tumanya jhe kinyama ghane chakumpikii Bhambo Chapanga litambiko ade pitupa kuhika kwenio.
27Nambo Bhambo Chapanga ngajhendelila kuutenda mwojho gwa Falao kubhe unonoho, ngakana kwalekekeya Akaichilahele bhajhende. 28Falao ngannobholila Mucha, “Bokela oko! Mukilolekeye, chakaka naummone ng'o kabhele! Lichiko lyampa kukubhona kumiho kwango nahwa!”
29Mucha ngannyangwila, “Tela! Ibha ngita channongile, nanikubhone ng'o kumiho kwino kabhele.”
ទើបបានជ្រើសរើសហើយ៖
Kubhoka 10: NdeBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in the Ndendeule Language @The Word for the World International and Ndendeule Language Translation. All rights reserved